Mamlakatda olimpiya harakatini yanada rivojlantirish va O‘zbekiston sportchilarining Sidney shahri (Avstraliya)dagi XXVII Olimpiya o‘yinlarida muvaffaqiyatli ishtirok etishlarini rag‘batlantirish maqsadida, shuningdek O‘zbekistonning xalqaro obro‘sini mustahkamlashda, yosh avlodni milliy g‘urur va Vatanga sadoqat ruhida tarbiyalashda o‘zbek sportchilari erishgan yutuqlarning g‘oyat katta ahamiyatini e’tiborga olib:

1. O‘zbekiston Milliy Olimpiya qo‘mitasi Xalqaro Olimpiya qo‘mitasi tomonidan o‘tkaziladigan barcha tadbirlarda O‘zbekiston Respublikasining rasmiy vakili deb hisoblansin.

2. XXVII Olimpiya o‘yinlarida sovrindor bo‘lgan O‘zbekiston sportchilarini rag‘batlantirish, Vatanimizning sportdagi shon-shuhratini ko‘paytirishga ular qo‘shgan munosib hissani e’tirof etish maqsadida quyidagi miqdorlarda bir yo‘la beriladigan mukofotlar belgilansin:

oltin medal uchun — 100 000 AQSh dollari,

kumush medal uchun — 50 000 AQSh dollari,

bronza medali uchun — 25 000 AQSh dollari.

O‘zbekiston Respublikasi Moliya vazirligi bir hafta muddatda Tashqi iqtisodiy faoliyat milliy banki bilan birga yuqorida ko‘rsatilgan pul mukofotlarini to‘lash tartibi to‘g‘risida Vazirlar Mahkamasiga takliflar kiritsin.

3. O‘zbekiston Respublikasi Davlat sport qo‘mitasi va O‘zbekiston Milliy Olimpiya qo‘mitasi XXVII Olimpiya o‘yinlariga bag‘ishlangan lotereyani o‘tkazishdan olingan daromad (foyda) solig‘ini to‘lashdan ozod qilinsin, bunda tushgan mablag‘lar XXVII Olimpiya o‘yinlariga O‘zbekistonning sport delegatsiyasini tayyorlash hamda ishtirok etishiga maqsadli yo‘naltirilishi shart;

yuridik va jismoniy shaxslar tomonidan O‘zbekiston sportchilarini XXVII Olimpiya o‘yinlarida qatnashishga tayyorlash hamda ishtirok etishlariga yo‘naltirilgan homiylik mablag‘lari tegishli ravishda daromad (foyda) solig‘i yoki jismoniy shaxslarning daromad solig‘ini to‘lashdan ozod qilinsin;

O‘zbekiston sport delegatsiyasini XXVII Olimpiya o‘yinlariga tayyorlash hamda ishtirok etishini ta’minlash uchun aniq maqsadni ko‘zlab respublikaga olib kelinayotgan maxsus sport uskunalari va anjomlari, sport liboslari bojxona to‘lovlarini to‘lashdan ozod qilinsin (bojxona hujjatlarini rasmiylashtirish uchun yig‘imlar bundan mustasno).

4. Vazirlar Mahkamasining iste’mol mollari ishlab chiqarish va savdo kompleksi O‘zbekiston Respublikasi Davlat sport qo‘mitasi hamda O‘zbekiston Milliy Olimpiya qo‘mitasining buyurtmasi bo‘yicha Olimpiya o‘yinlarida o‘zbek sportining munosib namoyandalari bo‘lmish O‘zbekiston sport delegatsiyasining a’zolari uchun maxsus sport kiyimi tayyorlab berilishini ta’minlasin.

5. O‘zbekiston Respublikasi Davlat sport qo‘mitasi va O‘zbekiston Milliy Olimpiya qo‘mitasi XXVII Olimpiya o‘yinlariga tayyorgarlik davrida olimpiya terma jamoalariga respublikaning barcha sport bazalarida, ular qaysi idoraga qarashli bo‘lishidan qat’i nazar, ijara haqi to‘lamasdan o‘quv-mashq mashg‘ulotlarini o‘tkazish huquqi berilsin.

6. O‘zbekiston Respublikasi Davlat matbuot qo‘mitasi, “O‘zbekkino” davlat-aksionerlik kompaniyasi, “O‘zteleradio” kompaniyasi, O‘zbekiston Milliy axborot agentligi XXVII Olimpiya o‘yinlarida respublikaning madaniyat va sport sohasidagi yutuqlarini targ‘ib qilish uchun matbaa va kino-video mahsulotlari tayyorlashni, shuningdek O‘zbekiston terma jamoalarining Olimpiya o‘yinlariga tayyorgarligi hamda ishtirokini ommaviy axborot vositalarida keng yoritishni ta’minlasinlar.

7. O‘zbekiston Respublikasi Vazirlar Mahkamasi o‘n kun muddatda ushbu Farmonni bajarish yuzasidan qaror qabul qilsin.