Qayd etilsinki, respublikada oila institutini rivojlantirishga, shu jumladan yosh oilalarni qonunchilik, iqtisodiy va ijtimoiy choralar bilan qoʻllab-quvvatlashga katta eʼtibor berilmoqda.

Ijtimoiy-iqtisodiy muammolarni hal etishda, birinchi navbatda yosh oilalarning oʻz turar joyiga ega boʻlishida amaliy yordam koʻrsatish uchun ularga imtiyozli ipoteka kreditlari berish tizimi joriy etildi, shuningdek yakka tartibda uy-joy qurish, rekonstruksiya qilish va uy-joy yoki koʻp kvartirali uydan kvartira sotib olish uchun ipoteka krediti oluvchi yosh oilalar aʼzolarining daromadlariga soliq imtiyozlari berildi. Keyingi uch yilda ipoteka kreditlari berish hisobiga yosh oilalar uchun umumiy summasi 355,4 mlrd soʻmlik 9 360 ta kvartira qurildi.

Qishloq joylarda Davlat budjeti va Osiyo taraqqiyot bankining mablagʻlari hisobiga moliyalashtiriladigan namunaviy loyihalar boʻyicha qishloqda uy-joy ipoteka qurilishi dasturlari doirasida aholining, birinchi navbatda yosh oilalarning uy-joy sharoitlari yaxshilanmoqda.

Shu bilan birgalikda shaharlar, tumanlar va shahar posyolkalarida yashovchi yosh oilalar uchun uy-joy qurilishi dasturini kengaytirish, uy-joy qurish va maishiy turmushni tashkil etishda yosh oilalar uchun shart-sharoitlar yaratish talab etiladi.

Yosh oilalar hayotining qulay maishiy sharoitlari yaratilishini davlat tomonidan qoʻllab-quvvatlashni yanada kuchaytirish, qimmat boʻlmagan uy-joyga ega boʻlishni yanada kengaytirish, shuningdek “Mustahkam oila yili” Davlat dasturini bajarish yuzasidan Vazirlar Mahkamasi qaror qiladi:

1.Oʻzbekiston Respublikasi Iqtisodiyot vazirligi, Moliya vazirligi, “Davarxitektqurilish” qoʻmitasi tomonidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ishlab chiqilgan 2012-2013-yillarda shaharlar, tuman markazlari va shahar posyolkalarida koʻp kvartirali uylarni qurish va rekonstruksiya qilish dasturi (keyingi oʻrinlarda Dastur deb ataladi) 1-ilovaga* muvofiq maʼqullansin.

2. Belgilansinki:

yangi koʻp kvartirali uylar qurish Oʻzbekiston Respublikasi Davlat arxitektura va qurilish qoʻmitasi tomonidan ishlab chiqilgan namunaviy loyihalar boʻyicha, foydalanilmayotgan va qurilishi tugallanmagan koʻp kvartirali uylarni rekonstruksiya qilish esa — aniq obyektlarga biriktirilgan va “Davarxitektqurilish” qoʻmitasi tomonidan tasdiqlangan yakka tartibdagi loyihalar boʻyicha amalga oshiriladi;

yangi qurilishni moliyalashtirish, mavjud foydalanilmayotgan va qurilishi tugallanmagan koʻp kvartirali uylarni rekonstruksiya qilish, keyinchalik koʻrsatib oʻtilgan uylardagi kvartiralarni ehtiyojmand yosh oilalarga ipoteka krediti berish shartlarida sotgan holda, tijorat banklarining oʻz mablagʻlari hisobiga amalga oshiriladi;

Dasturga muvofiq ipoteka krediti berish shartlarida uy-joy olishga ehtiyojmand yosh oilalarni tanlash Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tashkil etiladigan 2-ilovaga* muvofiq namunaviy tarkibdagi ipoteka krediti berish shartlarida uy-joy sotib olishga ehtiyojmand yosh oilalarni tanlash boʻyicha komissiya (keyingi oʻrinlarda hududiy komissiya deb ataladi) tomonidan amalga oshiriladi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda:

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi hamda Davlat arxitektura va qurilish qoʻmitasi bilan kelishgan holda muhandislik infratuzilmasi, shu jumladan gaz taʼminoti, elektr taʼminoti, suv taʼminoti va kanalizatsiya, ichki kirish yoʻllari mavjudligini hisobga olgan holda yangi koʻp kvartirali uy-joylar qurish uchun yer uchastkalari ajratilishini;

Oʻzbekiston Respublikasi Davlat mulki qoʻmitasi bilan kelishgan holda qurilishi tugallanmagan obyektlarning, shuningdek mahalliy davlat hokimiyati organlariga tegishli boʻlgan foydalanilmayotgan koʻp kvartirali uy-joylarning koʻp kvartirali uylar etib rekonstruksiya qilinishi uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatiga pul qiymati bilan berilishini taʼminlasinlar;

Respublika “Mahalla” jamgʻarmasi bilan kelishgan holda “Mehribonlik” uylarining 30 yoshdan oshmagan, birinchi marta nikohga kirayotgan barcha bitiruvchilariga yosh oila tashkil etilishi munosabati bilan toʻy sovgʻasini — mahalliy budjetlar va xayr-ehson qiluvchilarning mablagʻlari hisobiga sotib olinadigan, mamlakatimizning oʻzida ishlab chiqarilgan yotoqxona mebeli toʻplamini doimiy asosda bersinlar.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlari shaharlar, tuman markazlari va shahar posyolkalarida koʻp kvartirali uy-joylarni qurish va rekonstruksiya qilish boʻyicha buyurtmachilar etib belgilansin.

5. Belgilab qoʻyilsinki:

kvartiralar umumiy qiymatining 75 foizidan ortiq boʻlmagan miqdordagi ipoteka kreditlari ehtiyojmand yosh oilalarga hududiy komissiyalarning tavsiyalari asosida uy-joy qiymatining kamida 25 foizi miqdoridagi dastlabki badal ariza beruvchilar tomonidan maxsus hisob raqamiga oʻtkazilgandan keyin 15 yil muddatga, Oʻzbekiston Respublikasi Markaziy bankining qayta moliyalashtirish stavkasidan koʻp boʻlmagan foiz stavkasi boʻyicha uch yillik imtiyozli davr bilan beriladi;

imtiyozli davr mobaynida boshlangʻich badalning 25 foizini, ajratilgan ipoteka krediti boʻyicha hisoblab yozilgan foizlarni toʻlash, shuningdek oila aʼzolaridan biri “Mehribonlik” uylarida tarbiyalanib chiqqan va birkitilgan turar joyga ega boʻlmagan yosh oilalar uchun mamlakatimizda ishlab chiqarilgan yotoqxona mebeli toʻplamini sotib olish, belgilangan tartibda, maqsadli transfertlar ajratish yoʻli bilan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan amalga oshiriladi;

yosh oilalarga mamlakatimizda ishlab chiqarilgan, uzoq muddat foydalaniladigan tovarlarni, shu jumladan mebellar, maishiy texnika va uzoq muddat foydalaniladigan boshqa hayotiy muhim tovarlarni sotib olish uchun kreditlar berish Oʻzbekiston Respublikasi Markaziy bankining qayta moliyalashtirish stavkasidan koʻp boʻlmagan foiz stavkasi boʻyicha, 3 yilgacha boʻlgan muddatga eng kam oylik ish haqining 200 baravarigacha miqdorda amalga oshiriladi.

6. Oʻzbekiston Respublikasi “Davarxitektqurilish” qoʻmitasi:

bir oy muddatda — uy-joylar qurish sohasida loyihalashtirish tajribasiga ega boʻlgan, tanlab olingan loyihalash institutlari bilan birgalikda 2 va 3 xonali kvartiralardan iborat boʻladigan koʻp kvartirali ekonom-klass uy-joylarning namunaviy loyihalari, shuningdek qurilishi tugallanmagan va foydalanilmayotgan uy-joy obyektlarini rekonstruksiya qilish boʻyicha kam chiqimli loyihalar ishlab chiqilishini;

loyihalar taqdim etilgandan keyin bir hafta muddatda — ushbu qarorda nazarda tutilgan qurilayotgan va rekonstruksiya qilinayotgan koʻp kvartirali uy-joylarning loyiha-smeta hujjatlari ekspertizadan oʻtkazilishini;

keyinchalik qurilish-montaj ishlarining sifati, shaharsozlik hamda sanitariya norma va qoidalariga, tasdiqlangan bosh rejalarga va hududlarning arxitektura-rejalashtirilishini tashkil etish loyihalariga qatʼiy rioya etilishi yuzasidan davlat nazorati amalga oshirilishini taʼminlasin.

7. Shaharlar, tuman markazlari va shahar posyolkalarida koʻp kvartirali uy-joylarni qurish va rekonstruksiya qilish boʻyicha buyurtmachilar:

ikki oy muddatda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi “Davarxitektqurilish” qoʻmitasi bilan birgalikda tanlov savdolari oʻtkazilishini hamda qurilishi yangidan boshlanayotgan uy-joylar va qurilishi tugallanmagan obyektlarni 2012-2013-yillarda rekonstruksiya qilish boʻyicha pudratchilar aniqlanishini qurilishlarning titul roʻyxatlarini belgilangan tartibda tasdiqlagan holda taʼminlasinlar;

tanlov savdolari oʻtkazilgandan keyin oʻn kun muddatda qurilishlarning manzilli uzil-kesil roʻyxatlarini kelishish uchun Oʻzbekiston Respublikasi Iqtisodiyot vazirligiga va Moliya vazirligiga taqdim etsinlar.

8. Oʻzbekiston Respublikasi Iqtisodiyot vazirligi, “Oʻzmetkombinat” ochiq aksiyadorlik jamiyati, “Oʻzqurilishmateriallari” aksiyadorlik kompaniyasi, “Kvars” ochiq aksiyadorlik jamiyati ishlab chiqilgan loyiha-smeta hujjatlariga muvofiq yosh oilalarga koʻp kvartirali uy-joylarni qurish va rekonstruksiya qilish uchun pudrat tashkilotlariga birja kotirovkalarining oʻrtacha hisoblangan narxlari boʻyicha, toʻgʻridan toʻgʻri shartnomalarga binoan zarur miqdorda metall prokati, sement va qurilish oynasi ajratsinlar.

9. Oʻzbekiston Respublikasi Prezidentining “Ijtimoiy va fuqaro obyektlarini loyihalash va qurishda tegishli tartib oʻrnatish chora-tadbirlari toʻgʻrisida” 2011-yil 27-dekabrdagi PQ-1666-son qaroriga muvofiq tuzilgan Qurilishi va rekonstruksiya qilinishi Oʻzbekiston Respublikasi Hukumati darajasida tasdiqlanishi lozim boʻlgan obyektlarning manzilli roʻyxatlarini tasdiqlash boʻyicha Hukumat komissiyasiga uy-joy qurilishi obyektlarining oʻz vaqtida topshirilishini hamda kelgusida ularning ipoteka krediti berish shartlarida yosh oilalarga taqdim etilishini taʼminlash ishlarini muvofiqlashtirish vazifasi yuklansin, shuningdek Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari takliflariga koʻra Dasturga tuzatishlar kiritish huquqi berilsin.

10. Oʻzbekiston Respublikasi Milliy axborot agentligi, Oʻzbekiston milliy teleradiokompaniyasi, Oʻzbekiston matbuot va axborot agentligi, ommaviy axborot vositalari aholi, ayniqsa yosh oilalar oʻrtasida ushbu qarorning maqsadi va vazifalari muntazam ravishda va keng tushuntirilishini taʼminlasinlar.

11. Oʻzbekiston Respublikasi Moliya vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I.Zakirov zimmasiga yuklansin.