Yuqori qoʻshilgan qiymatga ega boʻlgan raqobatbardosh mahsulot ishlab chiqarishni taʼminlaydigan zamonaviy, yuksak texnologiyali ishlab chiqarishlarni tashkil etish uchun xorijiy va mahalliy investitsiyalarni jalb etish boʻyicha qulay shart-sharoitlarni shakllantirish, shuningdek Toshkent viloyatining ishlab chiqarish va resurs salohiyatidan kompleks hamda samarali foydalanish, shu asosda yangi ish joylarini yaratish va aholi daromadlarini oshirish maqsadida:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligi, Toshkent viloyati hokimligining Toshkent viloyatida “Angren” maxsus industrial zonasini (keyingi oʻrinlarda — “Angren” MIZ deb yuritiladi) 1-ilovaga muvofiq hududlar chegaralari doirasida barpo etish toʻgʻrisidagi taklifi qabul qilinsin.

Oʻzbekiston Respublikasi “Yergeodezkadastr” davlat qoʻmitasi Toshkent viloyati hokimligi bilan birgalikda bir oy muddatda “Angren” maxsus industrial zonasi tarkibiga kiritiladigan yer maydonlarining chegaralarini aniq belgilasin va yerlarning tegishli ravishda ajratilishini taʼminlasin.

Belgilab qoʻyilsinki, “Angren” maxsus industrial zonasi tarkibiga kiritilgan yer maydonlari Toshkent viloyati hokimligining bevosita tasarrufida boʻladi.

2. Quyidagilar “Angren” maxsus industrial zonasi faoliyatining asosiy vazifalari va yoʻnalishlari etib belgilansin:

ichki va jahon bozorlarida raqobatbardosh boʻlgan yuqori qoʻshilgan qiymatga ega mahsulot ishlab chiqarish boʻyicha zamonaviy, yuksak texnologiyali ishlab chiqarishlarni barpo etish va ularning samarali faoliyat yuritishi uchun investitsiyalar, eng avvalo toʻgʻridan-toʻgʻri investitsiyalarni jalb etish borasida qulay shart-sharoitlarni shakllantirish;

maxsus industrial zonaga kiruvchi mintaqaning ishlab chiqarish va resurs salohiyatidan kompleks va samarali foydalanishni taʼminlash, mineral-xomashyo resurslarini yanada chuqurroq qayta ishlash boʻyicha yangi ishlab chiqarishlarni barpo etish;

maxsus industrial zona va umuman respublika korxonalari oʻrtasida mustahkam kooperatsion aloqalar oʻrnatish hamda sanoat kooperatsiyasini rivojlantirish asosida mahalliy xomashyo va materiallar negizida yuksak texnologiyali mahsulot ishlab chiqarishni mahalliylashtirish jarayonlarini chuqurlashtirish;

transport, muhandislik-kommunikatsiya va ijtimoiy infratuzilmani jadal rivojlantirish hamda samarali foydalanish, “Angren” logistika markazi salohiyatini, yuklarni avtomobil va konteynerlarda tashish borasida yaratilgan tizimni yanada rivojlantirish hamda ulardan keng koʻlamda foydalanishni taʼminlash.

3. Belgilab qoʻyilsinki:

“Angren” maxsus industrial zonasining faoliyat yuritish muddati 30 yilni tashkil etadi va bu muddat keyinchalik uzaytirilishi mumkin;

“Angren” MIZ faoliyat yuritadigan muddat mobaynida uning hududida maxsus soliq tartibi va bojxona imtiyozlari amal qiladi;

“Angren” MIZ qatnashchisi maqomi “Angren” maxsus industrial zonasi Maʼmuriy kengashining qarori bilan beriladi.

4. “Angren” maxsus industrial zonasining Maʼmuriy kengashi 2-ilovaga* muvofiq tarkibda tashkil qilinsin.

“Angren” maxsus industrial zonasi Maʼmuriy kengashining asosiy vazifalari va funksiyalari quyidagilardan iborat deb hisoblansin:

korxonalarga “Angren” MIZ qatnashchisi maqomini berish toʻgʻrisida qarorlar qabul qilish;

“Angren” MIZda loyihalarni amalga oshirish uchun masʼul boʻlgan vazirliklar va idoralarning, xoʻjalik birlashmalarining loyiha, tender va kontrakt hujjatlarini oʻz vaqtida tayyorlash hamda ularning ekspertizasini oʻtkazish borasidagi ishlarini, shuningdek mahalliy davlat hokimiyati organlarining “Angren” MIZ faoliyati bilan bogʻliq masalalardagi ishlarini muvofiqlashtirish;

ishlamayotgan korxonalarni va davlat egaligidagi mol-mulkni “Angren” MIZ qatnashchilariga nolga teng xarid qiymati boʻyicha sotish toʻgʻrisida qarorlar qabul qilish;

“Angren” MIZning samarali faoliyat yuritishini tashkil qilish, “Angren” MIZ Direksiyasini shakllantirish va uning faoliyati ustidan nazorat olib borish boʻyicha kompleks chora-tadbirlarni amalga oshirish.

5. “Angren” maxsus industrial zonasi qatnashchilari:

yuridik shaxslardan olinadigan foyda soligʻi, ularning mol-mulkiga solinadigan soliqni, obodonlashtirish va ijtimoiy infratuzilmani rivojlantirish soligʻini toʻlashdan, kichik korxonalar uchun yagona soliq toʻlovi, shuningdek Respublika yoʻl jamgʻarmasiga majburiy ajratmalar toʻlashdan;

respublikada ishlab chiqarilmaydigan, loyihalarni amalga oshirish doirasida “Angren” MIZ hududiga Vazirlar Mahkamasi tomonidan tasdiqlanadigan roʻyxatlar boʻyicha olib kiriladigan uskunalar, butlovchi buyumlar va materiallar boj toʻlovlari (bojxona yigʻimlaridan tashqari) toʻlashdan ozod qilinsin.

Belgilab qoʻyilsinki, yuqorida koʻrsatib oʻtilgan imtiyozlar kiritilgan investitsiyalarning hajmiga qarab 3 yildan 7 yilgacha muddatga beriladi, shu jumladan ekvivalenti:

300 ming AQSh dollaridan 3 million AQSh dollarigacha boʻlganda — 3 yil muddatga;

3 million AQSh dollaridan ortib 10 million AQSh dollarigacha boʻlganda — 5 yil muddatga;

10 million AQSh dollaridan ortiq boʻlganda — 7 yil muddatga beriladi.

6. Toshkent viloyati hokimligi “Angren” maxsus industrial zonaning Maʼmuriy kengashi qarorlari boʻyicha belgilangan tartibda “Angren” MIZda loyihalarni amalga oshiruvchi investorlar uchun quyidagilarni taʼminlasin:

birinchi navbatda sobiq sanoat zonalarining foydalanilmayotgan hududlarida korxonalar qurish uchun yer maydonlarini oʻz vaqtida ajratish;

muhandislik-kommunikatsiya infratuzilmasi tarmoqlariga ulanish uchun barcha zarur ruxsatnomalarni “bir darcha” tamoyili asosida berish.

7. Shunday tartib oʻrnatilsinki, unga muvofiq “Angren” MIZda qatnashuvchi xoʻjalik yurituvchi subyektlar uchun “Oʻzbekenergo” DAK, “Oʻztransgaz” AK, Toshkent viloyati hokimligi boʻlinmalari va boshqa muhandislik-kommunikatsiya xizmatlarini yetkazib beruvchilar kommunikatsiyalarni ishlab chiqarish maydonchalariga tutashtirgan holda kafolatli ulanishini taʼminlaydilar.

8. Oʻzbekiston Respublikasi Iqtisodiyot vazirligi, Moliya vazirligi hamda Davlat arxitektura va qurilish qoʻmitasi “Oʻzbekenergo” DAK, “Oʻztransgaz” AK, “Oʻzavtoyoʻl” AK, “Oʻzbekiston temir yoʻllari” DAK, “Oʻzkommunxizmat” agentligi, Toshkent viloyati hokimligi bilan birgalikda uch oy muddatda “Angren” maxsus industrial zonasi hududida transport, ishlab chiqarish va muhandislik-kommunikatsiya infratuzilmasini jadal rivojlantirish dasturini ishlab chiqsin va Oʻzbekiston Respublikasi Vazirlar Mahkamasiga kiritsin.

9. Oʻzbekiston Respublikasi Vazirlar Mahkamasi bir oy muddatda “Angren” MIZ Direksiyasini tashkil etsin va “Angren” maxsus industrial zonasi faoliyatini tashkil etish boʻyicha qaror qabul qilsin, unda “Angren” maxsus industrial zonasi toʻgʻrisidagi Nizom hamda “Angren” maxsus industrial zonasi Maʼmuriy kengashi haqidagi Nizomni tasdiqlash nazarda tutilsin.

10. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi Moliya vazirligi, Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

11. Mazkur Farmonning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

janub tomondan — A-373 avtomobil yoʻli (78 — 101 km qismi) bilan;

sharq tomondan — Qorabov daryosi qayirining oʻng tomoni bilan;

shimol tomondan — Oqchasoy jilgʻasi qayirining soʻl tomonidan Angren sanoat magistral kanali (ASMK) boʻylab 3 km, soʻngra shimol tomonga 500 kV EUL “Yangi Angren IES-PS Oʻzbekiston” (500 kV EUL) gacha, keyin 500 kvV EUL boʻylab Alisher aholi punkti orqali 4-sugʻorish quvuri (SQ)gacha va soʻngra suv quvuri boʻylab 500 kV EUL bilan kesishgungacha, keyin sharqqa qarab 500 kV EUL boʻylab Achchiqsoy jilgʻasigacha, keyin shimolga qarab Achchiqsoy jilgʻasi 2-SQ bilan kesishgungacha, soʻngra 2-SQ boʻylab Uvoq aholi punkti orqali sharqqa tomon u Qurtoshsoy jilgʻasi bilan kesishgungacha, soʻngra Qurtoshsoy jilgʻasi boʻylab shimolga qarab u Olmaliq KMKning Angren ruda boshqarmasi gidroqatlamiga olib boradigan avtomobil yoʻli bilan kesishgungacha, keyin ushbu avtomobil yoʻli boʻylab sharqqa tomon Chirishsoy jilgʻasigacha, keyin u 500 kV EUL bilan kesishgunigacha janubga tomon, soʻngra 500 kV EUL boʻylab u “Qizil Olma” koniga olib boruvchi avtomobil yoʻli bilan kesishgunigacha shimoli-sharqqa tomon, keyin koʻrsatib oʻtilgan avtomobil yoʻli boʻylab janubi-sharqqa tomon Sogʻlom aholi punkti chegarasigacha, keyin sharqqa tomon Qorabov daryosigacha chegaralangan hudud.