Oʻzbekiston Respublikasi Davlat statistika qoʻmitasi va Koreya Respublikasi “Koreya Statistiks” (bundan keyin “Tomonlar” deb ataluvchilar),

kelajakda Tomonlar oʻrtasida statistika sohasidagi hamkorlikni chuqurlashtirish va rivojlantirish hamda statistikani yuksaltirish imkoniyatlari haqida kelishib olish maqsadida,

statistika sohasiga oid oʻzaro hamkorlikdagi dasturlar va loyihalarni birgalikda ishlab chiqish va amalga oshirishning shart-sharoitlarini shakllantirishning muhimligini hisobga olib,

Tomonlar, oʻzaro yordam va oʻzaro manfaatdorlikka asoslangan statistika sohasidagi hamkorlikni kengaytirish va rivojlantirishda barcha zarur boʻlgan chora-tadbirlardan amalda foydalanadilar.

Tomonlar, moliyaviy va inson resurslari yetarli boʻlgan sharoitlarda va Tomonlar davlatlarining milliy qonunchiligiga mos ravishda statistika sohasidagi quyidagi yoʻnalishlarda ikki tomonlama hamkorlikni mustahkamlashga asos yaratadilar va qoʻllab-quvvatlaydilar:

1) Tomonlar davlatlari hududlaridagi ijtimoiy-iqtisodiy oʻzgarishlar bilan bogʻliq, davriy va boshqa nashrlar (yillik nashrlar, toʻplamlar, byulletenlar, yangiliklar va sharhlar kabilar)ni qoʻshgan holda, ochiq statistik maʼlumotlar, statistik kuzatuvlar, roʻyxatga olish va kuzatuvlarga oid uslubiy qoʻllanmalar va axborotlar almashish;

2) statistikaga oid Tomonlar davlatlarining milliy qonunlarini takomillashtirish va Tomonlarning rivojlanishiga bogʻliq yangi yoʻnalishlarga oid axborotlar bilan almashish;

3) axborot texnologiyalarini statistika amaliyotiga joriy etish bilan bogʻliq tajriba almashish;

4) shartnoma asosida, foydali loyihalar boʻyicha oʻzaro hamkorlikdagi tadqiqotlarni amalga oshirishni muhokama qilish;

5) statistika masalalariga oid oʻzaro hamkorlikdagi texnik loyihalarni tayyorlash;

6) statistika sohasidagi soʻnggi oʻzgarishlar bilan tanishish va tajriba almashish maqsadida, oʻzaro hamkorlikdagi sessiyalar, seminarlar va konferensiyalar tashkil etish.

1. Tomonlar, aniq tadbirlar va ularni amalga oshirish muddatlarini, oʻzlarining tegishli vakolatlari va imkoniyatlarini inobatga olgan holda qoʻshimcha tarzda aniqlaydilar.

2. Ushbu anglashuv Memorandumi va Tomonlarning oʻzaro hamkorligi doirasida oʻtkaziladigan tadbirlar jarayonida, Tomonlar davlatlarining rasmiy (davlat) tilidan foydalaniladi. Loyihalarga oid barcha rasmiy hujjatlar, shu jumladan, barcha maʼlumotlar Tomonlarning oʻzaro kelishuvi asosida belgilangan tilda chop etiladi.

3. Ushbu anglashuv Memorandumini amalga oshirish jarayonida yuzaga kelgan sarf va xarajatlar, oʻzaro hamkorlikdagi har bir tadbir boshlanishidan oldin Tomonlarning oʻzaro kelishuvi asosida qoplanadi.

Ushbu anglashuv Memorandumi Tomonlar imzolagan sanadan kuchga kiradi va 5 yil davomida amal qiladi. Agar Tomonlardan biri boshqa Tomonga uning amal qilish muddatini tugatish kamida 6 oy oldin yozma ravishda xabar bermasa, anglashuv Memorandumi keyingi 5 yillik muddatlarga uzaytirib boriladi.

Ushbu anglashuv Memorandumini talqin etishda vujudga kelishi mumkin boʻlgan barcha munozarali masalalar, Tomonlarning maslahatlashuvi va muzokaralari vositasida hal etiladi.

Ushbu anglashuv Memorandumiga oʻzgartirish va qoʻshimchalar kiritish, Tomonlarning oʻzaro kelishuviga asosan, ushbu anglashuv Memorandumining ajralmas qismi hisoblangan va ushbu anglashuv Memorandumida qayd etilgan tartibda kuchga kiradigan alohida rasmiylashtirilgan bayonnomalar vositasida amalga oshirilishi mumkin.

Tomonlarning biri anglashuv Memorandumini tugatish maqsadida ekanini yozma ravishda ikkinchi tomonni kamida 6 oy oldin xabardor qilgan holda, ushbu anglashuv Memorandumini tugatishi mumkin.

Toshkent shahrida, 2011-yil 24-avgustda ikki asl nusxada oʻzbek, koreys va ingliz tillarida imzolandi, bunda barcha matnlar teng kuchga ega.

Talqin etishda yuzaga keladigan har qanday tushunmovchilik holatida ingliz tilidagi matn ustuvor hisoblanadi.