Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish chora-tadbirlari toʻgʻrisida” 2011-yil 28-noyabrdagi PQ-1652-son qarorini bajarish yuzasidan, shuningdek tibbiy faoliyatni, ayniqsa xususiy tibbiyot muassasalari tomonidan amalga oshirilayotgan tibbiy faoliyatni litsenziyalashni tartibga solish maqsadida Vazirlar Mahkamasi qaror qiladi:

1. Quyidagi yangilangan:

Tibbiy faoliyatni litsenziyalash toʻgʻrisidagi Nizom 1-ilovaga muvofiq;

Xususiy tibbiyot muassasalariga litsenziya beriladigan tibbiy faoliyat ixtisosliklari turlarining roʻyxati 2-ilovaga muvofiq tasdiqlansin.

2. Oʻzbekiston Respublikasi Sogʻliqni saqlash vazirligi:

tibbiyot muassasalari bilan ushbu qaror qoidalarini bajarish yuzasidan tegishli tushuntirish ishlarini olib borsin;

ishlab turgan xususiy tibbiyot muassasalariga ilgari berilgan litsenziyalarni mazkur qaror bilan tasdiqlangan Xususiy tibbiyot muassasalariga litsenziya beriladigan tibbiy faoliyat ixtisosliklari turlarining roʻyxatiga muvofiqligi yuzasidan uch oy muddatda xatlovdan oʻtkazsin, litsenziyalovchi organ hisobidan qayta rasmiylashtirish yoki belgilangan talablarga javob bermaydigan ayrim litsenziatlarning faoliyatini toʻxtatish boʻyicha zarur chora-tadbirlarni koʻrsin.

3. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Aripov zimmasiga yuklansin.

1. Mazkur Nizom tibbiy faoliyatni litsenziyalash tartibini belgilaydi.

2. Tibbiy faoliyatni litsenziyalash Oʻzbekiston Respublikasi Sogʻliqni saqlash vazirligi (keyingi oʻrinlarda litsenziyalovchi organ deb ataladi) tomonidan amalga oshiriladi.

Litsenziyalar berish toʻgʻrisidagi hujjatlarni koʻrib chiqish, ular yuzasidan xulosalar tayyorlash Oʻzbekiston Respublikasi Sogʻliqni saqlash vazirligining Litsenziyalash va nodavlat tibbiyot muassasalari tomonidan koʻrsatilayotgan tibbiy xizmatlar sifatini nazorat qilish boshqarmasi (keyingi oʻrinlarda Litsenziyalash va nazorat qilish boshqarmasi deb ataladi) tomonidan amalga oshiriladi.

3. Kasalliklarni profilaktika, diagnostika qilish va davolashga, chalingan kasallik (kasalliklar)dan keyin reabilitatsiya qilishga yoʻnaltirilgan, maxsus tibbiy maʼlumotni va koʻnikmalarni talab qiluvchi tibbiy faoliyat litsenziyalanadigan tibbiy faoliyat hisoblanadi.

Tibbiy faoliyat tegishli tibbiyot muassasalarida ambulatoriya va statsionar tipda maslahat berish, diagnostika qilish va davolash boʻyicha xizmatlar hajmida tibbiy ixtisosliklar turlari boʻyicha amalga oshiriladi.

Tibbiy faoliyat ixtisoslashuv turlari roʻyxati Oʻzbekiston Respublikasi Vazirlar Mahkamasi tomonidan tasdiqlanadi.

Tibbiyot muassasalari turlari va ixtisoslik turlari boʻyicha tibbiy faoliyat hajmiga talablar Oʻzbekiston Respublikasi Sogʻliqni saqlash vazirligi tomonidan belgilanadi.

4. Ushbu Nizomda nazarda tutilgan talablar va shartlarga muvofiq boʻlgan yuridik shaxslar litsenziya talabgorlari boʻlishi mumkin.

5. Davlat tibbiyot muassasalari, shuningdek Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi qarorlariga muvofiq tashkil etilgan tibbiyot unitar korxonalari va muassasalari, Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi qarorlarida ular tomonidan tibbiy faoliyatni amalga oshirish nazarda tutilgan taqdirda, tibbiy faoliyatni litsenziya olmasdan amalga oshirishga haqlidir. Ushbu qoida koʻrsatib oʻtilgan muassasalarni mazkur Nizomda nazarda tutilgan litsenziya talablari va shartlarini (mutaxassislarning malaka toifalariga litsenziya talablaridan tashqari), shuningdek tibbiy faoliyatni amalga oshirish bilan bogʻliq qonun hujjatlariga muvofiq qoʻyiladigan boshqa talablarni bajarishdan ozod qilmaydi.

6. Tibbiy faoliyatni amalga oshirish uchun namunaviy (oddiy) litsenziyalar beriladi.

Tibbiy faoliyatni amalga oshirish huquqi uchun litsenziya olgan yuridik shaxslar litsenziya bitimida koʻrsatilgan xizmatlarni koʻrsatadilar. Litsenziya bitimida ixtisoslik turlari, tibbiy xizmatlar hajmi va tibbiyot muassasasining turi koʻrsatiladi.

7. Tibbiy faoliyatni amalga oshirish huquqi uchun litsenziyalar 5 yil muddatga beriladi. Litsenziya 5 yildan kam muddatga litsenziya talabgorining arizasiga koʻra berilishi mumkin.

8. Quyidagilar tibbiy faoliyatni amalga oshirishda litsenziya talablari va shartlari hisoblanadi:

faoliyatni qonun hujjatlariga qatʼiy muvofiq ravishda amalga oshirish;

bosh vrachning oliy tibbiy maʼlumotga va malaka toifasiga, shuningdek boshqa mutaxassis vrachlarning — oliy tibbiy maʼlumotga va tegishli mutaxassislik boʻyicha malaka toifasiga ega boʻlishi;

tibbiyot muassasasida ishlayotgan mutaxassis vrachlarning va oʻrta tibbiyot xodimlarining kamida 5 yilda bir marta malaka oshirishga oid talablarga rioya etgan holda zarur kasb darajasini taʼminlashi;

litsenziya talabgorida litsenziyalanayotgan faoliyat turini bajarish uchun moʻljallangan, unga mulk huquqi bilan yoki boshqa qonuniy asosda tegishli boʻlgan, sanitariya qoidalari va normalariga muvofiq binolarning mavjud boʻlishi;

tegishli ixtisoslik turi, muassasa turi va koʻrsatiladigan xizmatlar hajmiga muvofiq boʻlgan tashkiliy-texnik shart-sharoitlar va moddiy-texnika jihozlarining mavjud boʻlishi, shu jumladan:

a) litsenziya talabgoriga mulk huquqi bilan yoki boshqa qonuniy asosda tegishli boʻlgan, metrologiya normalariga va texnika xavfsizligi normalariga muvofiq boʻlgan zamonaviy diagnostika va davolash asbob-uskunalarining mavjud boʻlishi;

b) Oʻzbekiston Respublikasi Sogʻliqni saqlash vazirligi tomonidan qoʻllashga ruxsat berilgan tibbiy texnologiyalardan foydalanishni taʼminlaydigan asboblar, qattiq va yumshoq maxsus inventarlar, transport vositalari va hujjatlarning mavjud boʻlishi;

Oʻzbekiston Respublikasi Sogʻliqni saqlash vazirligi tomonidan tasdiqlangan namunalar va shakllar boʻyicha dastlabki tibbiy hujjatlarni yuritish, shuningdek davlat statistika organlariga statistika maʼlumotlarini qonun hujjatlarida belgilangan tartibda taqdim etish;

sanitariya-gigiyena normalari va qoidalariga rioya qilish;

Oʻzbekiston Respublikasi Sogʻliqni saqlash vazirligi tomonidan ruxsat etilgan profilaktika, diagnostika va davolash metodlarini, shuningdek dori-darmonlarni, dezinfeksiya va zararsizlantirish vositalarini qoʻllash;

tibbiy faoliyatni qatʼiy litsenziya bitimida koʻrsatilgan doirada amalga oshirish.

9. Tibbiy faoliyatning tegishli turi, hajmi va tipini amalga oshirish uchun zarur boʻlgan moddiy-texnik bazaga, asbob-uskunalarga va boshqa texnika vositalariga, shu jumladan tibbiyot anjomlariga, shuningdek zamonaviy va maʼnaviy eskirgan tibbiy asbob-uskunalarga minimal talablar belgilangan tartibda Oʻzbekiston Respublikasi Sogʻliqni saqlash vazirligi tomonidan belgilanadi.

10. Litsenziya talabgori litsenziya olish uchun litsenziyalovchi organga quyidagi hujjatlarni taqdim etadi:

a) litsenziya berish toʻgʻrisida ariza, unda quyidagilar koʻrsatiladi:

yuridik shaxsning nomi va tashkiliy-huquqiy shakli, uning joylashgan joyi (pochta manzili) va tibbiy faoliyatni amalga oshirish joyining manzili, bank rekvizitlari;

tibbiyot muassasasining turi, yuridik shaxs amalga oshirishni moʻljallayotgan ixtisoslik turi va koʻrsatiladigan tibbiy xizmatlar hajmi va faoliyatning koʻrsatilgan turi amalga oshiriladigan muddat;

b) yuridik shaxsning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) hududiy davlat sanitariya-epidemiologiya nazorati organining arizada koʻrsatilgan muassasaning turi, ixtisoslashuv turi va tibbiy xizmatlar hajmi boʻyicha tibbiy faoliyatni amalga oshirish uchun moʻljallangan binolarning sanitariya normalari va qoidalariga muvofiqligi toʻgʻrisidagi xulosasi;

g) litsenziya talabgorida tibbiy faoliyatni amalga oshirish uchun zarur boʻlgan mavjud tibbiyot asbob-uskunalari, inventarlari, apparatlari va anjomlari roʻyxati;

d) “Oʻzstandart” agentligi organlari yoki “Oʻzstandart” agentligida tegishli xulosalar berish huquqi uchun akkreditatsiya qilingan metrologiya xizmatlari tomonidan tibbiyot asbob-uskunalari va apparatlarining metrologiya normalari va standartlariga muvofiqligi toʻgʻrisida berilgan xulosa;

e) bosh vrach uchun — lavozimga tayinlanganlik toʻgʻrisidagi buyruqning nusxasi, oliy tibbiy maʼlumot toʻgʻrisidagi diplomning, malaka toifasi berilganligi toʻgʻrisidagi guvohnomaning, oxirgi 5 yilda malaka oshirganlik yoki ixtisoslashuvdan oʻtganlik toʻgʻrisidagi hujjatning notarial tasdiqlangan nusxalari, shuningdek mutaxassis vrachlar uchun — oliy tibbiy maʼlumot toʻgʻrisidagi diplomning, malaka toifasi berilganligi toʻgʻrisidagi guvohnomaning, oxirgi 5 yilda malaka oshirganlik yoki ixtisoslashuvdan oʻtganlik toʻgʻrisidagi hujjatning notarial tasdiqlangan nusxalari;

j) xodimlar uchun tibbiy maʼlumot toʻgʻrisidagi diplomning nusxasi va markazlashtirilgan sterilizatsiya boʻlimining (MSB) mavjud boʻlishini talab qiladigan ixtisosliklar boʻyicha tibbiy faoliyatni litsenziyalashda sterilizatsiya asbob-uskunalarida ishlashga ruxsat berish toʻgʻrisidagi guvohnomasining mavjudligi;

z) litsenziya talabgori tomonidan litsenziya talabgorining arizasi litsenziyalovchi organ tomonidan koʻrib chiqilganligi uchun yigʻim toʻlanganligini tasdiqlovchi hujjat;

i) litsenziya talabgorida unga mulk huquqi bilan yoki boshqa qonuniy asosda tegishli boʻlgan tibbiy faoliyatni amalga oshirish uchun binolarning mavjudligini tasdiqlaydigan hujjat.

11. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

12. Hujjatlar litsenziya talabgori tomonidan litsenziyalovchi organga chopar orqali yoxud olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

Hujjatlar Litsenziyalash va nazorat qilish boshqarmasining masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda ariza beruvchiga topshiriladi (yuboriladi).

13. Litsenziya talabgori notoʻgʻri yoki buzib koʻrsatilgan maʼlumotlar taqdim etilganligi uchun qonun hujjatlariga muvofiq javob beradi.

14. Ariza koʻrib chiqilganligi uchun litsenziya talabgoridan qonun hujjatlarida belgilangan eng kam oylik ish haqining ikki baravari miqdorida yigʻim undiriladi.

Ariza koʻrib chiqilganligi uchun yigʻim summasi litsenziyalovchi organning hisob raqamiga oʻtkaziladi. Litsenziya talabgori berilgan arizadan voz kechgan taqdirda toʻlangan yigʻim summasi qaytarilmaydi.

15. Tibbiy faoliyatni litsenziyalash ushbu Nizomga ilova qilinayotgan sxemaga muvofiq amalga oshiriladi.

Litsenziya berish yoki litsenziya berishni rad etish toʻgʻrisidagi qaror barcha zarur hujjatlar bilan birgalikda litsenziya talabgorining arizasi olingan kundan boshlab oʻttiz kundan ortiq boʻlmagan muddatda litsenziyalovchi organ tomonidan qabul qilinadi.

Litsenziya berish yoki litsenziya berishni rad etish toʻgʻrisida qaror qabul qilish uchun Litsenziyalash va nazorat qilish boshqarmasi xodimlari litsenziya talabgori tomonidan tibbiy faoliyatni amalga oshirish uchun yaratilgan shart-sharoitlarni ekspertizadan oʻtkazadilar.

Litsenziyalovchi organ, zarurat boʻlganda, ekspertizadan oʻtkazish uchun qoʻshimcha ravishda tegishli ixtisoslik boʻyicha yuqori malakali mutaxassislarni jalb qilishga haqlidir.

16. Litsenziya talabgori tomonidan tibbiy faoliyatni amalga oshirish uchun yaratilgan shart-sharoitlarni ekspertizadan oʻtkazish joyiga borgan holda litsenziyalovchi organning oʻz mablagʻlari hisobiga amalga oshiriladi.

17. Taqdim etilgan hujjatlar va ekspertiza yakunlari boʻyicha litsenziya talabgoriga litsenziya berish yoxud litsenziya berishni rad etish toʻgʻrisidagi taklif bilan xulosa tuziladi.

18. Litsenziyalovchi organ uch kun muddatda Litsenziyalash va nazorat qilish boshqarmasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi hamda qabul qilingan qaror toʻgʻrisida litsenziya talabgorini ikki kun muddatda xabardor qiladi.

19. Litsenziya berilganligi uchun eng kam oylik ish haqining oʻn baravari miqdorida davlat boji undiriladi. Davlat boji summasi respublika budjetiga oʻtkaziladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

20. Litsenziya litsenziya talabgori tomonidan davlat boji toʻlanganligini tasdiqlovchi hujjat taqdim etilgan va u litsenziya bitimini imzolagan kunda beriladi. Litsenziya bitimi tashkilot rahbari yoki bosh vrach tomonidan imzolanadi.

Litsenziya bitimida quyidagilar mavjud boʻladi:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

muassasa turining, ixtisoslik turining nomi va xizmatlar hajmi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

tibbiy faoliyat amalga oshiriladigan manzil (manzillar);

litsenziya bitimi talablari va shartlari buzilganligi uchun tomonlarning javobgarligi;

litsenziya bitimi talablari va shartlari bajarilishini litsenziyalovchi organ tomonidan nazorat qilish tartibi;

tibbiy faoliyatning muayyan turini amalga oshirish xususiyatlariga taalluqli boshqa shartlar.

Litsenziya bitimi ikki nusxada — litsenziat va litsenziyalovchi organ uchun bir nusxadan tuziladi.

21. Litsenziyalar maxsus blankalarda rasmiylashtiriladi. Litsenziya blankasi namunasi Oʻzbekiston Respublikasi Vazirlar Mahkamasining 2000-yil 20-dekabrdagi 488-son qaroriga muvofiq litsenziyalovchi organ tomonidan tasdiqlanadi.

Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari litsenziyalovchi organ buyurtmasiga koʻra “Davlat belgisi” davlat-ishlab chiqarish birlashmasi tomonidan bosmaxona usulida tayyorlanadi. Litsenziyalar blankalarining hisobga olinishi, saqlanishi va ulardan maqsadli foydalanilishi uchun Litsenziyalash va nazorat qilish boshqarmasi rahbari javob beradi.

22. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, litsenziyalovchi organ litsenziyani bekor qilish toʻgʻrisida qaror qabul qilishga haqlidir.

23. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida belgilangan asoslar boʻyicha rad etilishi mumkin.

Litsenziya talabgori litsenziyalovchi organning litsenziya berishni rad etish toʻgʻrisidagi qarori, shuningdek litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga ega.

24. Litsenziyalovchi organ tomonidan litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma ikki kun muddatda litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

Litsenziya berish rad etilishiga asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziyalovchi organ tomonidan litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Litsenziyalash va nazorat qilish boshqarmasi taqdim etilgan hujjatlarni olti kundan ortiq boʻlmagan muddatda takroran koʻrib chiqadi va ular boʻyicha litsenziya berish yoki litsenziya berishni rad etish toʻgʻrisida ekspert xulosasi tayyorlaydi.

Litsenziyalovchi organ uch kun muddatda Litsenziyalash va nazorat qilish boshqarmasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi va litsenziya talabgorini qabul qilingan qaror haqida ikki kun muddatda xabardor qiladi.

Litsenziya talabgorining arizasi qayta koʻrib chiqilganligi uchun yigʻim undirilmaydi.

Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi;

Litsenziya berishni rad etish toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

25. Litsenziat qayta tashkil etilganda, uning nomi yoki joylashgan joyi (pochta manzili) oʻzgarganda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlarni ilova qilgan holda litsenziyani qayta rasmiylashtirish toʻgʻrisida ariza berishi shart.

26. Litsenziat litsenziya qayta rasmiylashtirilgunga qadar unda koʻrsatilgan faoliyat turini ilgari berilgan litsenziya asosida amalga oshiradi.

27. Litsenziyani qayta rasmiylashtirishda litsenziyalovchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish litsenziyalovchi organ tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisida ariza olingan kundan boshlab oʻn kun mobaynida amalga oshiriladi.

Litsenziyani qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

28. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza litsenziyalovchi organga litsenziyaning amal qilish muddati oʻtgunga qadar ikki oydan kechikmay berilishi kerak.

Litsenziyaning amal qilish muddatini uzaytirish litsenziya berish uchun nazarda tutilgan tartibda amalga oshiriladi.

29. Amal qilish muddati oʻtmagan yoʻqolgan yoki yaroqsiz holga kelgan litsenziya yoki litsenziya bitimi oʻrniga litsenziatning arizasiga koʻra dublikat berilishi mumkin.

Litsenziyalar dublikatlarini berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

30. Litsenziya bitimini qayta rasmiylashtirish litsenziatning tegishli hujjatlarni ilova qilgan holda berilgan arizasi asosida litsenziyani qayta rasmiylashtirishda, shuningdek filial ochilgan (yopilgan), tibbiy faoliyatni amalga oshirish joyi, muassasa turi, ixtisoslashuv turlari va koʻrsatiladigan tibbiy xizmatlar hajmi oʻzgargan hollarda, ariza qabul qilingan sanadan boshlab 20 kun mobaynida amalga oshiriladi.

Litsenziya bitimi qayta rasmiylashtirilgunga qadar litsenziat ilgari berilgan litsenziya bitimi asosida oʻz faoliyatini amalga oshiradi.

31. Litsenziya bitimini qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi. Litsenziat tomonidan arizadan voz kechilganda toʻlangan summa qaytarilmaydi.

Litsenziya bitimini qayta rasmiylashtirishda davlat boji undirilmaydi.

32. Tibbiy faoliyatni amalga oshirish joyi, muassasa turi, ixtisoslashuv turlari va koʻrsatiladigan tibbiy xizmatlar hajmi oʻzgarishi munosabati bilan litsenziya bitimini qayta rasmiylashtirish uchun joyiga borgan holda ekspertiza oʻtkaziladi.

33. Litsenziyalovchi organ, zarurat boʻlganda, ekspertiza oʻtkazish uchun tegishli ixtisosga ega boʻlgan yuqori malakali mutaxassislarni jalb qilishga haqlidir.

34. Taqdim etilgan hujjatlar va joyiga borgan holda yaratilgan shart-sharoitlarni oʻrganish asosida litsenziya bitimini qayta rasmiylashtirish mumkinligi yoki qayta rasmiylashtirishni rad etish toʻgʻrisida ekspert xulosasi tuziladi.

35. Litsenziyalovchi organ Litsenziyalash va nazorat qilish boshqarmasining xulosasi asosida litsenziya bitimini qayta rasmiylashtirish yoki litsenziya bitimini qayta rasmiylashtirishni rad etish toʻgʻrisida qaror qabul qiladi va litsenziya talabgorini qabul qilingan qaror haqida xabardor qiladi.

Bunda litsenziya bitimini qayta rasmiylashtirish:

litsenziat tomonidan zarur darajada rasmiylashtirilmagan hujjatlar taqdim etilgan;

litsenziat tomonidan taqdim etilgan hujjatlarda ishonchsiz va buzib koʻrsatilgan maʼlumotlar mavjud boʻlgan;

litsenziat litsenziya talablari va shartlariga muvofiq boʻlmagan hollarda rad etilishi mumkin.

36. Litsenziya bitimini qayta rasmiylashtirishda litsenziyalovchi organ litsenziyalar reyestriga tegishli oʻzgartirishlar kiritadi.

37. Agar litsenziya bitimini qayta rasmiylashtirish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab 3 oy mobaynida litsenziya bitimi imzolanmasa, litsenziyalovchi organ qarorni bekor qilishga haqlidir.

38. Litsenziyalovchi organning litsenziya bitimini qayta rasmiylashtirishni rad etish toʻgʻrisidagi qarori, shuningdek litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilinishi mumkin.

39. Litsenziya bitimini qayta rasmiylashtirish rad etilishiga asos boʻlgan sabablar litsenziya talabgori tomonidan bartaraf etilgan taqdirda, litsenziyalovchi organ tegishli hujjatlarni ilova qilgan holda takroran berilgan arizani olingan kunidan boshlab oʻn besh kun muddatda koʻrib chiqadi.

40. Litsenziyalash va nazorat qilish boshqarmasi taqdim etilgan hujjatlarni oʻn kun muddatda takroran koʻrib chiqadi (zarur hollarda joyiga borgan holda) va litsenziya bitimini qayta rasmiylashtirish yoki qayta rasmiylashtirishni rad etish toʻgʻrisida ekspert xulosasi tayyorlaydi.

41. Litsenziyalovchi organ uch kun muddatda Litsenziyalash va nazorat qilish boshqarmasining xulosasi asosida litsenziya bitimini qayta rasmiylashtirish yoki qayta rasmiylashtirishni rad etish toʻgʻrisida qaror qabul qiladi va ariza beruvchini qabul qilingan qaror haqida ikki kun muddatda xabardor qiladi.

42. Arizaning takroran koʻrib chiqilishi uchun yigʻim undirilmaydi.

43. Filial ochilishini, tibbiy faoliyatni amalga oshirish joyi, muassasa turi, ixtisoslik turlari va koʻrsatiladigan xizmatlar hajmining oʻzgarishini ekspertizadan oʻtkazish jarayonida ayni bir vaqtda tibbiy xizmatlar koʻrsatishga ruxsat berilgan ixtisoslikning boshqa turlari boʻyicha monitoring oʻtkaziladi.

Ixtisoslikning mavjud turlari boʻyicha litsenziya talablari va shartlari buzilishi holatlari aniqlangan taqdirda qayta rasmiylashtirishni rad etish toʻgʻrisida qaror qabul qilinadi va aniq muddat koʻrsatilgan holda qoida buzilishlarini tezkorlik bilan bartaraf etish toʻgʻrisida koʻrsatma beriladi.

Agar litsenziat litsenziya bitimini qayta rasmiylashtirishni ikkinchi marta rad etgandan keyin qoidabuzarlikni bartaraf etmasa, u holda litsenziyalovchi organ litsenziatning faoliyatini 10 kunga toʻxtatib turishga, keyinchalik belgilangan tartibda sudga murojaat qilishga haqlidir.

44. Filial ochilishida, tibbiy faoliyatni amalga oshirish joyi, muassasa turi, ixtisoslik turlari va koʻrsatiladigan xizmatlar hajmi oʻzgarganda litsenziya bitimini qayta rasmiylashtirish uchun litsenziat litsenziyalovchi organga quyidagi hujjatlarni taqdim etishi zarur:

a) litsenziya bitimini qayta rasmiylashtirish toʻgʻrisida ariza, unda quyidagilar koʻrsatiladi:

yuridik shaxsning nomi va tashkiliy-huquqiy shakli, uning joylashgan joyi (pochta manzili) va tibbiy faoliyatni amalga oshirish joyining, filialning manzili, bank rekvizitlari;

qoʻshiladigan yoki oʻzgartiriladigan ixtisoslik turi, muassasa turi va koʻrsatiladigan tibbiy xizmatlar hajmi;

b) hududiy davlat sanitariya-epidemiologiya nazorati organining arizada koʻrsatilgan muassasa turi, ixtisoslik turi va tibbiy xizmatlar hajmi boʻyicha tibbiy faoliyatni amalga oshirish uchun moʻljallangan binolarning sanitariya normalari va qoidalariga muvofiqligi toʻgʻrisidagi xulosasi;

v) litsenziyatda muassasa turi, ixtisoslashuv turlari va koʻrsatiladigan xizmatlar hajmining oʻzgarishini hisobga olgan holda tibbiy faoliyatni amalga oshirish uchun zarur boʻlgan mavjud tibbiyot asbob-uskunalari, inventarlari, apparatlari va anjomlari roʻyxati;

g) “Oʻzstandart” agentligi organlari yoki “Oʻzstandart” agentligida tegishli xulosalar berish huquqi uchun akkreditatsiya qilingan metrologiya xizmatlari tomonidan tibbiyot asbob-uskunalari va apparatlarining metrologiya normalari va standartlariga muvofiqligi toʻgʻrisida berilgan xulosa;

d) ixtisoslashuv turlari oʻzgarganda mutaxassis uchun – oliy tibbiy maʼlumot toʻgʻrisidagi diplomning, malaka toifasi berilganligi toʻgʻrisidagi guvohnomaning, oxirgi 5 yilda malaka oshirganlik yoki ixtisoslashuvdan oʻtganlik toʻgʻrisidagi hujjatning notarial tasdiqlangan nusxasi;

e) litsenziat tomonidan litsenziya talabgorining arizasi litsenziyalovchi organ tomonidan koʻrib chiqilganligi uchun yigʻim toʻlanganligini tasdiqlovchi hujjat;

j) tibbiy faoliyatni amalga oshirish joyining manzili oʻzgarganda – binolar va inshootlarga mulk huquqini yoki boshqa qonuniy asosda egalik qilish huquqini tasdiqlaydigan hujjatlar nusxasi.

45. Hujjatlar litsenziat tomonidan litsenziyalovchi organga chopar yoxud pochta aloqa vositasi orqali ularni olganligi toʻgʻrisidagi bildirishnoma bilan yetkaziladi.

Hujjatlar Oʻzbekiston Respublikasi Sogʻliqni saqlash vazirligining Litsenziyalash va nazorat qilish boshqarmasining masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda arizachiga topshiriladi (yuboriladi).

46. Ishonchsiz yoki buzib koʻrsatilgan maʼlumotlar taqdim qilinganligi uchun litsenziat qonun hujjatlariga muvofiq javob beradi.

47. Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi qarorlari bilan tashkil etilgan davlat muassasalari, shuningdek davlat unitar korxonalari va muassasalari tomonidan amalga oshiriladigan tibbiy faoliyatni, shu jumladan litsenziya talablari va shartlariga rioya etilishini nazorat qilishni Oʻzbekiston Respublikasi Sogʻliqni saqlash vazirligining tegishli tarkibiy boʻlinmalari amalga oshiradi.

48. Litsenziat tomonidan litsenziya talablari va shartlariga rioya etilishi yuzasidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda, Nazorat qiluvchi organlar faoliyatini muvofiqlashtirish Respublika kengashi va uning hududiy komissiyalari bilan qoʻshimcha ravishda kelishmasdan rejali, rejadan tashqari tekshirishlarni amalga oshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish uchun yetarli boʻlgan muddatlarni belgilash;

litsenziyalarning amal qilishini toʻxtatib turish, toʻxtatish yoki ularni bekor qilish toʻgʻrisida qonun hujjatlarida belgilangan tartibda qarorlar chiqarish va taqdimnoma bilan sudga murojaat qilish;

xoʻjalik yurituvchi subyektlar tomonidan tibbiy faoliyatni litsenziya olmasdan amalga oshirish va/yoki litsenziya bitimida nazarda tutilmagan tibbiy xizmatlar koʻrsatishning aniqlangan holatlari toʻgʻrisidagi materiallarni qonun hujjatlarida nazarda tutilgan choralar koʻrish uchun belgilangan tartibda davlat soliq xizmati organlariga yuborish.

49. Litsenziya talablari va shartlariga rioya etilishini tekshirishda litsenziyalovchi organning tekshirayotgan xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi litsenziyalovchi organda qoladi.

50. Litsenziyalovchi organ shuningdek:

fuqarolarni belgilangan tartibda qabul qilish va ularning murojaatlarini oʻrganish;

Oʻzbekiston Respublikasi Sogʻliqni saqlash vazirligining markaziy apparatida va sogʻliqni saqlashni boshqarish hududiy organlarida oʻrnatilgan “ishonch telefoni” orqali axborot olish;

litsenziatlar faoliyatini boshqa nazorat qiluvchi organlar tomonidan oʻtkazilgan tekshirishlar yakunlari boʻyicha tushadigan axborotlarni toʻplash, umumlashtirish va tahlil qilish;

litsenziyalanadigan faoliyatni amalga oshirishning holati va shart-sharoitlari bilan, ularning moliyaviy-xoʻjalik faoliyatiga aralashmagan holda, joyida tanishish.

51. Litsenziyaning amal qilishini toʻxtatib turish va toʻxtatish, uni bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22 — 24-moddalarida nazarda tutilgan hollarda va tartibda amalga oshiriladi.

Litsenziyalovchi organning litsenziyaning amal qilishini toʻxtatib turish toʻgʻrisidagi qarori yuzasidan sudga shikoyat qilish mumkin. Litsenziyalovchi organ qarorining asossiz ekanligi sud tomonidan eʼtirof etilgan taqdirda litsenziyalovchi organ litsenziat oldida litsenziat koʻrgan zarar miqdorida javob beradi.

52. Litsenziyalovchi organ litsenziyalar reyestrini yuritadi.

Litsenziyalar reyestrida quyidagilar koʻrsatiladi:

a) yuridik shaxsning nomi va soliq toʻlovchining identifikatsiya raqami, mulkchilik shakli, filiallar toʻgʻrisidagi maʼlumotlar, yuridik shaxs rahbarining familiyasi, ismi, otasining ismi;

b) litsenziyaning berilgan sanasi va tartib raqami;

v) litsenziya blankasining seriyasi va tartib raqami;

g) litsenziyaning amal qilish muddati;

d) faoliyatning litsenziyalanadigan turi;

e) faoliyatning litsenziyalanadigan turi amalga oshiriladigan manzil, ish telefoni, faks;

j) litsenziya va litsenziya bitimini qayta rasmiylashtirish, uning amal qilishini toʻxtatib turish va tiklashning asoslari va sanasi;

z) litsenziyaning amal qilishini toʻxtatish yoki uni bekor qilishning asoslari va sanasi.

53. Litsenziyalar reyestridagi maʼlumotlar litsenziyalovchi organning veb-saytiga joylashtiriladi va tanishish uchun ochiq hisoblanadi.

54. Ushbu Nizomning buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Umumiy vrachlik amaliyoti.

2. Tez tibbiy yordam.

3. Ginekologiya (maslahat-diagnostika yordami, konservativ davolash).

4. Endokrinologiya (operatsiyasiz).

5. Ichki kasalliklar (terapiya).

6. Allergologiya va immunologiya.

7. Gastroenterologiya.

8. Diyetologiya.

9. Kurortologiya.

10. Fizioterapiya.

11. Davolash fizkulturasi va sport tibbiyoti.

12. Nefrologiya.

13. Pulmonologiya.

14. Revmatologiya.

15. Funksional diagnostika.

16. Otorinolaringologiya (LOR organlarning murakkab tugʻma nuqsonlarini bartaraf etishga oid operatsiyalardan tashqari).

17. Surdologiya-otorinolaringologiya.

18. Kardiologiya (intervension kardiologiyadan tashqari).

19. Oftalmologiya.

20. Bolalar oftalmologiyasi (operatsiyasiz).

21. Dermatovenerologiya (faqat dermatologiya boʻyicha xizmatlar).

22. Tibbiy kosmetologiya.

23. Nevrologiya.

24. Narkologiya.

25. Psixoterapiya.

26. Umumiy xirurgiya (kichik ambulatoriya xirurgiyasi).

27. Koloproktologiya (maslahat-diagnostika yordami, konservativ davolash, kichik operativ koloproktologiya).

28. Plastik xirurgiya.

29. Diagnostik va davolash-operatsiyali endoskopiya.

30. Gematologiya (maslahat-diagnostika yordami).

31. Urologiya (maslahat-diagnostika yordami, konservativ davolash, kichik operativ urologiya).

32. Seksopatologiya.

33. Tibbiy radiologiya.

34. Rentgenologiya.

35. Ultratovush diagnostikasi.

36. Reabilitologiya.

37. Ortopediya (operatsiyasiz).

38. Bolalar ortopediyasi (operatsiyasiz).

39. Oilaviy tibbiyot.

40. Tibbiy genetika.

41. Umumiy pediatriya.

42. Pediatriya.

43. Klinik diagnostik laboratoriya.

44. Umumiy stomatologiya.

45. Terapevtik stomatologiya.

46. Xirurgiya stomatologiya.

47. Ortopedik stomatologiya.

48. Bolalar stomatologiyasi.

49. Ortodontiya.

50. Dezinfektologiya.

1. Vazirlar Mahkamasining “Tibbiy faoliyatni litsenziyalash tartibini yanada takomillashtirish chora-tadbirlari toʻgʻrisida” 2008-yil 3-apreldagi 61-son qarori 1-bandining ikkinchi xatboshi va qarorga 1-ilova (Oʻzbekiston Respublikasi QT, 2008-y., 4-son, 13-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasining “Fuqarolarning sogʻligʻini saqlash toʻgʻrisida”gi Oʻzbekiston Respublikasi Qonunining 10 va 11-moddalariga oʻzgartishlar kiritish haqida” 2010-yil 19-maydagi OʻRQ-246-son Qonuni)” 2010-yil 26-noyabrdagi 270-son qarorining (Oʻzbekiston Respublikasi QT, 2010-y., 11-son, 64-modda) 2-bandi, shuningdek qarorga 1-ilova 2-bandining “a” va “b” kichik bandlari va 2-ilova.