Oʻzbekiston Respublikasi Soliq kodeksi (Oʻzbekiston Respublikasi qonun hujjatlari toʻplami, 2007-y., 52 (I)-son), Oʻzbekiston Respublikasi Prezidentining 2010-yil 24-dekabrdagi PQ-1449-son “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 52-son, 513-modda) muvofiq, Oʻzbekiston Respublikasi Moliya vazirligi va Davlat soliq qoʻmitasi qaror qiladilar:

1. Ishlab chiqariladigan tabiiy gazga aksiz soligʻini toʻlash tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi Soliq kodeksi (Oʻzbekiston Respublikasi qonun hujjatlari toʻplami, 2007-y., 52 (I)-son) va Oʻzbekiston Respublikasi Prezidentining 2010-yil 24-dekabrdagi PQ-1449-son “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 52-son, 513-modda) muvofiq, Oʻzbekiston Respublikasida ishlab chiqariladigan tabiiy gazga aksiz soligʻini hisoblab chiqarish va toʻlash tartibini belgilaydi.

1. Ushbu Nizomda quyidagi asosiy tushunchalar qoʻllaniladi:

tabiiy gaz — konlardan qazib olinadigan, gaz va neft qazib oluvchi, gazni qayta ishlovchi va utilizatsiya qiluvchi tashkilotlar tomonidan qayta ishlanadigan va utilizatsiya qilinadigan tabiiy gaz;

pirovard isteʼmolchilar — tabiiy gazdan ishlab chiqarish va/yoki maishiy maqsadlarda foydalanadigan tashkilotlar, avtomobillarni gaz bilan toʻldirish kompressor stansiyalari;

gaz bilan taʼminlovchi tashkilot — gazning pirovard isteʼmolchilarga yetkazib berilishi, uzatilishi va taqsimlanishini taʼminlovchi “Oʻztransgaz” aksiyadorlik kompaniyasi.

2. Oʻzbekiston Respublikasi Prezidentining 2010-yil 24-dekabrdagi PQ-1449-son “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qarorining 12-1-son ilovasiga muvofiq respublikada ishlab chiqariladigan gaz realizatsiyasiga (aholiga realizatsiya qilinadigan hajm bundan mustasno) aksiz soligʻi solinadi. Ushbu talab eksportga realizatsiya qilinadigan tabiiy gazga ham tatbiq etiladi.

3. Tuzilgan Mahsulot taqsimotiga oid bitimda aksiz soligʻi toʻlanishi boʻyicha ushbu Nizomda nazarda tutilgan tartibdan boshqacha tartib belgilangan boʻlsa, unda Mahsulot taqsimotiga oid bitimda nazarda tutilgan tartib qoʻllaniladi.

4. Quyidagi tabiiy gazga aksiz soligʻi solinadi:

ichki bozorda pirovard isteʼmolchiga realizatsiya qilinadigan;

eksportga yetkazib beriladigan;

gaz va neft qazib oluvchi, gazni qayta ishlovchi va utilizatsiya qiluvchi tashkilotlar, shuningdek gaz bilan taʼminlovchi tashkilot tomonidan oʻz ehtiyoji uchun foydalaniladigan;

gaz bilan taʼminlovchi tashkilotga gaz va neft qazib oluvchi, gazni qayta ishlovchi va utilizatsiya qiluvchi tashkilotlar uchun Oʻzbekiston Respublikasi Moliya vazirligi tomonidan tasdiqlanadigan eng yuqori deklaratsiya qilinadigan narxdan oshadigan narx boʻyicha realizatsiya qilinadigan.

5. Tabiiy gazga aksiz soligʻi toʻlovchilari quyidagilardir:

a) gaz bilan taʼminlovchi tashkilot – oʻzi sotib olgan va ichki bozorda pirovard isteʼmolchilarga hamda eksportga, avtomobillarni gaz bilan toʻldirish kompressor stansiyalariga realizatsiya qiladigan hajmlar boʻyicha, shuningdek oʻz ehtiyojlari uchun foydalanadigan hajmlari boʻyicha;

b) tabiiy gazni qazib olishni, qayta ishlashni va utilizatsiya qilishni amalga oshiruvchi tashkilotlar tomonidan quyidagi hajmlar boʻyicha:

gaz bilan taʼminlovchi tashkilotga gaz va neft qazib oluvchi, gazni qayta ishlovchi va utilizatsiya qiluvchi tashkilotlar uchun Oʻzbekiston Respublikasi Moliya vazirligi tomonidan tasdiqlanadigan eng yuqori deklaratsiya qilinadigan narxdan oshadigan narx boʻyicha realizatsiya qilinadigan hajmlar boʻyicha;

tabiiy gaz hajmini gaz bilan taʼminlovchi tashkilotga realizatsiya qilmagan holda ichki bozorda pirovard isteʼmolchilarga va eksportga realizatsiya qilish hajmlari boʻyicha;

oʻz ehtiyojlari uchun foydalanadigan hajmlari boʻyicha.

6. Realizatsiya qilinadigan tabiiy gazga aksiz soligʻini hisoblab chiqarish uchun soliq solinadigan baza boʻlib realizatsiya qilingan tabiiy gazning aksiz soligʻi va qoʻshilgan qiymat soligʻini oʻz ichiga olmagan holdagi qiymati hisoblanadi.

7. Oʻz ehtiyojlari uchun foydalaniladigan tabiiy gaz boʻyicha soliq solinadigan baza uning tannarxidan kelib chiqib aniqlanadi.

8. Gaz bilan taʼminlovchi tashkilot realizatsiya qilinadigan tabiiy gazga aksiz soligʻini hisoblab chiqarishda gaz va neft qazib oluvchi, gazni qayta ishlovchi va utilizatsiya qiluvchi tashkilotlar uchun Oʻzbekiston Respublikasi Moliya vazirligi tomonidan tasdiqlanadigan eng yuqori deklaratsiya qilinadigan narxdan oshadigan narx boʻyicha tabiiy gazni qazib chiqarishni, qayta ishlashni va utilizatsiya qilishni amalga oshiruvchi tashkilotlardan sotib olingan tabiiy gazga toʻlangan aksiz soligʻi summasini chegirish huquqiga ega.

9. Chegirma gaz va neft qazib oluvchi, gazni qayta ishlovchi va utilizatsiya qiluvchi tashkilotlar tomonidan soliq davrida realizatsiya qilingan tabiiy gaz hajmiga toʻgʻri keluvchi sotib olingan tabiiy gaz hajmidan kelib chiqib aniqlanadigan hisobvaraq-fakturalarda ajratib koʻrsatilgan aksiz soligʻi summasiga amalga oshiriladi.

10. Aksiz soligʻi boʻyicha hisob-kitob soliq boʻyicha hisobga olish joyidagi davlat soliq xizmati organiga quyidagi muddatlarda taqdim etiladi:

aksiz soligʻi toʻlovchisi boʻlgan mikrofirma va kichik tashkilotlar tomonidan — har chorakda hisobot choragidan keyingi oyning 25-kunidan kechiktirmay;

mikrofirma va kichik tashkilotlar jumlasiga kirmaydigan soliq toʻlovchilar tomonidan — har oyda hisobot oyidan keyingi oyning 25-kunidan kechiktirmay.

11. Aksiz soligʻi budjetga quyidagi muddatlarda toʻlanadi:

joriy oyning 13-kunidan kechiktirmay — joriy oyning birinchi oʻn kunligi uchun;

joriy oyning 23-kunidan kechiktirmay — joriy oyning ikkinchi oʻn kunligi uchun;

kelgusi oyning 3-kunidan kechiktirmay — hisobot oyining qolgan kunlari uchun.

12. Tabiiy gaz uchun aksiz soligʻining toʻgʻri hisoblab chiqarilishi va toʻlanishi ustidan nazorat davlat soliq xizmati organlari tomonidan qonun hujjatlariga muvofiq amalga oshiriladi.

13. Ushbu Nizom “Oʻzbekneftegaz” MXK bilan kelishilgan.