Oʻzbekiston Respublikasi Prezidentining “Byurokratik toʻsiqlarni bartaraf etish va tadbirkorlik faoliyati erkinligini yanada oshirish chora-tadbirlari toʻgʻrisida” 2011-yil 25-avgustdagi PQ-1604-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Prezidentining “Byurokratik toʻsiqlarni bartaraf etish va tadbirkorlik faoliyati erkinligini yanada oshirish chora-tadbirlari toʻgʻrisida” 2011-yil 25-avgustdagi PQ-1604-son qaroriga muvofiq 2011-yil 1-sentabrdan boshlab tashqi iqtisodiy faoliyat sohasida tegishli ruxsat beruvchi tartibotlar bekor qilinganligi maʼlumot uchun qabul qilinsin.

2. Oʻzbekiston Respublikasi Davlat bojxona qoʻmitasi manfaatdor vazirliklar va idoralar bilan birgalikda:

2011-yil 1-noyabrgacha birja va yarmarka savdolarida tuzilgan eksport va import kontraktlarini kiritish va ularni Tashqi savdo operatsiyalarining yagona elektron axborot tizimida roʻyxatdan oʻtkazish uchun modul ishlab chiqsin;

2011-yil 1-noyabrdan boshlab “Oʻzbekiston respublika tovar-xomashyo birjasi” ochiq aksiyadorlik jamiyatiga, Respublika universal agrosanoat birjasi” masʼuliyati cheklangan jamiyatga, “Xalq isteʼmol tovarlarining koʻrgazma-yarmarka savdosi markazi” yopiq aksiyadorlik jamiyatiga va “Oʼzbekiston yarmarkasi” ochiq aksiyadorlik jamiyatiga, keyinchalik respublikada yangidan tashkil etilayotgan barcha birjalarga va yarmarka tashkilotlariga birja va yarmarka savdolarida tuzilgan eksport va import kontraktlari boʻyicha Tashqi savdo operatsiyalarining yagona elektron axborot tizimiga kirish imkonini bersin.

3. “Oʻzbekiston respublika tovar-xomashyo birjasi” ochiq aksiyadorlik jamiyati, Respublika universal agrosanoat birjasi” masʼuliyati cheklangan jamiyat, “Xalq isteʼmol tovarlarining koʻrgazma-yarmarka savdosi markazi” yopiq aksiyadorlik jamiyati va “Oʼzbekiston yarmarkasi” ochiq aksiyadorlik jamiyati, manfaatdor vazirliklar va idoralar bilan birgalikda, 2011-yil 1-noyabrdan boshlab Tashqi savdo operatsiyalarining yagona elektron axborot tizimiga ulanishni taʼminlasinlar.

4. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar va qoʻshimcha kiritilsin.

5. Vazirliklar va idoralar Oʻzbekiston Respublikasi Adliya vazirligi bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 1996-yil 13-martdagi 95-son qarori bilan tasdiqlangan Import operatsiyalar boʻyicha kontraktlarni hisobga olish va ularning bajarilishini nazorat qilish tartibi toʻgʻrisidagi nizomda:

a) 2-band quyidagi tahrirda bayon qilinsin:

“2. Valyuta mablagʻlaridan foydalanishi ustidan nazorat Tashqi savdo operatsiyalarining yagona elektron axborot tizimi maʼlumotlari asosida amalga oshiriladi”;

b) 4-band, “Import bitishuvlar pasportini rasmiylashtirish” boʻlimi va 6—16, 22, 24-bandlar, 1 va 2-ilovalar, Nizomga 3-ilovaning 1-bandi oʻz kuchini yoʻqotgan deb hisoblansin;

v) 17-band quyidagi tahrirda bayon qilinsin:

“17. Oʻzbekiston Respublikasi hududiga keltirilayotgan tovarlarni bojxonada rasmiylashtirish tugallangandan keyin bojxona xizmati tomonidan tasdiqlangan Tovarlar keltirish kartochkasi (3-ilova) import qiluvchi korxonaga beriladi”;

g) 18-banddagi “Pasportni va” soʻzlari chiqarib tashlansin;

d) 20-bandning ikkinchi xatboshi chiqarib tashlansin;

e) 21-banddagi “Pasportlar va” soʻzlari chiqarib tashlansin;

j) 23-bandga quyidagi mazmundagi xatboshi qoʻshilsin:

“yoki import qiluvchi korxona tugatilganda”;

z) Import kontraktini hisobga olish va uning harakatini nazorat qilish Sxemasida (Import operatsiyalar boʻyicha kontraktlarni hisobga olish va ularning bajarilishini nazorat qilish tartibi toʻgʻrisidagi nizomga ilova):

2-banddagi “Bitishuv pasportini rasmiylashtirish” soʻzlari chiqarib tashlansin;

3-banddagi “Bitishuv pasportini tasdiqlash” soʻzlari chiqarib tashlansin;

6-band quyidagi tahrirda bayon qilinsin:

“6. Tovar kelib tushganda bojxona xizmati (bojxona posti) Tovarlar keltirish kartochkasiga tovar keltirilganligi toʻgʻrisida belgi qoʻyadi”;

7-banddagi “Bitishuv pasportini hisobdan chiqarish” soʻzlari chiqarib tashlansin.

2. Vazirlar Mahkamasining 1999-yil 6-maydagi 223-son qarori (Oʻzbekiston Respublikasi QT, 1999-y., 5-son, 25-modda) bilan tasdiqlangan Oʻzbekiston Respublikasi Tovar-xomashyo birjalari savdolarida import kontraktlari tuzish tartibida, 2011-yil 1-noyabrdan boshlab:

a) 8-banddagi “va import bitishuvi pasporti” soʻzlari chiqarib tashlansin;

b) 9-band chiqarib tashlansin.

3. Vazirlar Mahkamasining 2003-yil 30-sentabrdagi 416-son qarori (Oʻzbekiston Respublikasi QT, 2003-y., 9-son, 92-modda) bilan tasdiqlangan Import kontraktlarini hisobga qoʻyish va tashqi savdo operatsiyalarining bojxona monitoringini amalga oshirish tartibi toʻgʻrisidagi nizomda:

a) 3-bandning oltinchi xatboshi chiqarib tashlansin;

yettinchi—toʻqqizinchi xatboshilar tegishli ravishda oltinchi — sakkizinchi xatboshilar deb hisoblansin;

b) 4-band quyidagi tahrirda bayon qilinsin:

“4. Valyuta nazorati boʻlimi taqdim etilgan hujjatlarni koʻrib chiqadi va rad etish uchun asos mavjud boʻlmagan taqdirda kontraktga import kontraktlarini roʻyxatga olish jurnali boʻyicha tartib raqami beradi hamda bojxona xizmatining vakolatli mansabdor shaxsi tomonidan imzolangan va muhr bilan tasdiqlangan kontraktni qaytaradi”;

v) 6-bandning ikkinchi va uchinchi xatboshi chiqarib tashlansin;

toʻrtinchi va beshinchi xatboshilar tegishli ravishda ikkinchi va uchinchi xatboshilar deb hisoblansin;

g) ilovadagi “Import bitishuv pasportini rasmiylashtirish hamda” soʻzlari chiqarib tashlansin.