LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Bolali oilalarga nafaqalarni va aholiga to‘lanadigan eng oz ish haqi miqdoriga nisbatan belgilangan boshqa to‘lovlarni oshirish maqsadida:
1. 1996-yil 1-dekabrdan boshlab O‘zbekiston Respublikasining hududida ish haqining eng oz miqdori oyiga 600 so‘m etib belgilansin.
2. Belgilab qo‘yilsinki, ish haqiga, pensiyalarga ustama va qo‘shimcha haqlarning barcha turlari, shuningdek bolali oilalarga nafaqalar hamda eng oz ish haqi miqdoriga nisbatan belgilangan boshqa to‘lovlar ushbu Farmonda belgilangan eng oz ish haqi miqdoriga asosan 1996-yilning 1-dekabridan boshlab amalga oshiriladi.
3. O‘zbekiston Respublikasi Ijtimoiy ta’minot vazirligi, Mehnat vazirligi, vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, tashkilotlar va muassasalar 1996-yil 1-dekabrdan joriy etiladigan ish haqining eng oz miqdoridan kelib chiqqan holda ish haqi va pensiyalarga ustama va qo‘shimcha haqlarning barcha turlari, shuningdek bolali oilalarga nafaqalar hamda boshqa to‘lovlar o‘z vaqtida qayta hisoblab chiqilishini ta’minlasinlar.
4. Ish haqiga, pensiyalarga qo‘shimcha va ustama haqlarni oshirish, shuningdek nafaqalar va boshqa to‘lovlarni ko‘paytirish bilan bog‘liq xarajatlar tegishli ravishda respublika davlat budjeti, Ijtimoiy sug‘urta fondi mablag‘lari hamda korxonalar va tashkilotlarning o‘z mablag‘lari hisobidan qoplansin.
5. O‘zbekiston Respublikasi Vazirlar Mahkamasi ushbu Farmonning bajarilishini nazorat qilishni ta’minlasin.