Oʻzbekiston Respublikasi Prezidentining “2011-yil uchun asosiy makroiqtisodiy koʻrsatkichlar va Oʻzbekiston Respublikasi Davlat budjeti parametrlari toʻgʻrisida” 2010-yil 24-dekabrdagi PQ-1449-son qaroriga muvofiq hamda umumtaʼlim muassasalari faoliyatini metodik va tashkiliy jihatdan taʼminlashni yanada takomillashtirish maqsadida Vazirlar Mahkamasi qaror qiladi:

1. Xalq taʼlimi tumanlar (shaharlar) boʻlimlari hamda ular huzurida faoliyat koʻrsatuvchi metodik kabinetlar, taʼlim standartlari monitoringi boʻlimlari (shoʻbalari), oʻquvchilarni kasbga yoʻnaltirish va psixologik-pedagogik diagnostika markazlari negizida, ulardagi mavjud xodimlar sonini oʻrtacha 5 foizga qisqartirgan holda xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tashkil etilsin.

2. Xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining namunaviy tuzilmasi va xodimlarining lavozim maoshlari miqdorlari 1 va 2-ilovalarga muvofiq tasdiqlansin.

Oʻzbekiston Respublikasi Xalq taʼlimi vazirligiga, zarurat boʻlganda, xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tuzilmasiga xodimlarning belgilangan cheklangan umumiy soni va mehnatga haq toʻlash fondi doirasida oʻzgartirishlar kiritish huquqi berilsin.

3. Quyidagilar xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining asosiy vazifalari etib belgilansin:

idoraviy mansubligidan va mulkchilik shakllaridan qatʼi nazar, maktabgacha, umumiy oʻrta va maktabdan tashqari taʼlim muassasalari faoliyatini muvofiqlashtirish va ular tomonidan davlat taʼlim standartlariga rioya etilishi yuzasidan monitoringni amalga oshirish;

maktabgacha, umumiy oʻrta va maktabdan tashqari taʼlim, taʼlim muassasalarida oʻquv-tarbiya ishlarini metodik taʼminlashni tashkil etish, oʻquv-tarbiya jarayoniga oʻqitishning zamonaviy va ilgʻor shakllarini, eng yangi pedagogik va axborot texnologiyalarini, maʼnaviy-axloqiy tarbiyalashning samarali shakl va metodlarini joriy etish;

taʼlim muassasalari tomonidan ular huzurida tashkil etilgan zamonaviy moddiy-texnika bazasidan, shu jumladan oʻquv-laboratoriya asbob-uskunalari, kompyuter texnikasi, mebellar va jihozlardan samarali foydalanilishini taʼminlash;

oʻquvchilarning kasbga yoʻnaltirilishini va psixologik-pedagogik diagnostikasini, vasiylikni, bolalar va oʻsmirlarning huquq va manfaatlarini himoya qilishni, ular bilan, shu jumladan ijtimoiy nochor bolalar bilan doimiy ish olib borishni tashkil etish.

4. Oʻzbekiston Respublikasi Xalq taʼlimi vazirligi ikki oy muddatda:

xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tuzilmasini ushbu qarorga muvofiqlashtirsin;

xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari toʻgʻrisidagi namunaviy nizomni ishlab chiqsin va belgilangan tartibda tasdiqlasin;

xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining yuqori malakali mutaxassislar va rahbar xodimlar bilan toʻldirilishini taʼminlasin.

5. Oʻzbekiston Respublikasi Moliya vazirligi:

2011-yil uchun Davlat budjeti parametrlariga tegishli oʻzgartirishlar kiritsin, bunda xalq taʼlimi hududiy organlarining hamda xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining joriy taʼminoti moliyalashtirilishi Davlat budjetining “Taʼlim” moddasi boʻyicha nazarda tutiladigan mablagʻlar hisobiga amalga oshirilishini hisobga olsin;

metodistlar sonining maqbullashtirilishi munosabati bilan boʻshaydigan mablagʻlarni tashkil etilayotgan xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining moddiy-texnika bazasini mustahkamlashga belgilangan tartibda yoʻnaltirsin, bunda ularning zarur mebellar va kompyuter texnikasi bilan bosqichma-bosqich toʻliq jihozlashni, shuningdek axborot nashrlari va adabiyotlarga, shu jumladan ularning elektron shakliga obuna boʻlishni, “Ziyo Net” tarmogʻidan foydalanishni nazarda tutsin.

6. Oʻzbekiston Respublikasi Xalq taʼlimi vazirligi Adliya vazirligi bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.