Shaxsning barkamol kamol topishiga, oʻsib kelayotgan avlodning ijodiy qobiliyatlarini aniqlash va rivojlantirishga, oʻquvchilarga mehnatsevarlikni singdirishga, shuningdek ularning boʻsh vaqtdan oqilona foydalanishiga yoʻnaltirilgan maktabdan tashqari ishlar tizimini tubdan takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Xalq taʼlimi vazirligi, Iqtisodiyot vazirligi va Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining faoliyat koʻrsatayotgan maktabdan tashqari taʼlim muassasalarining sonini va tuzilmasini takomillashtirish hamda uning asosida har bir tuman va shaharda bittadan “Barkamol avlod” bolalar markazini, shuningdek bittadan viloyat bolalar markazini, Qoraqalpogʻiston Respublikasida esa respublika bolalar markazini va Toshkent shahrida — texnik, badiiy ijodiyot, oʻlkashunoslik va ekologiya boʻyicha uchta respublika bolalar markazlarini — ular tegishli ravishda tumanlar, shaharlar va viloyatlar hokimliklariga boʻysundirilgan holda — hammasi boʻlib 215 ta bolalar markazini shakllantirish toʻgʻrisidagi taklifi qabul qilinsin.

2. “Barkamol avlod” tuman (shahar) bolalar markazlari, viloyat (Qoraqalpogʻiston Respublikasida respublika markazi) va Toshkent shahar bolalar markazlarining, shuningdek uchta “Barkamol avlod” respublika bolalar markazlarining namunaviy tuzilmalari 1, 2 va 3-ilovalarga muvofiq maʼqullansin.

3. Quyidagilar “Barkamol avlod” bolalar markazlarining asosiy vazifalari etib belgilansin:

bolalarning ehtiyojlari va qiziqishlariga muvofiq ularning ijodiy va badiiy qobiliyatlarini rivojlantirish, ularning foydali dam olishini tashkil etish;

mehnatsevarlikni, kasb tayyorgarligining dastlabki uquv va koʻnikmalarini singdirish, fan va texnikani rivojlantirishning istiqbolli yoʻnalishlariga muvofiq texnik vositalar va kompyuter texnologiyalari ishini oʻrganishni tashkil etgan holda bolalar texnik ijodkorligini rivojlantirish;

bolalar tomonidan jonajon oʻlka tarixi, arxeologik va madaniy meros chuqur oʻrganilishi, mamlakatimizning tabiiy boyliklari bilan tanishtirish hamda ekologiya va atrof muhit muhofazasi sohasidagi asosiy bilimlarni egallab olish;

maktabdan tashqari taʼlim tizimiga ilgʻor pedagogik usullar va metodlardan, zamonaviy axborot-kommunikatsiya texnologiyalaridan foydalangan holda oʻqitishning yangi shakllarini keng joriy etish.

Oʻzbekiston Respublikasi Vazirlar Mahkamasi bir oy muddatda “Barkamol avlod” markazlari toʻgʻrisidagi nizomni tasdiqlasin.

4. Oʻzbekiston Respublikasi Prezidentining 2010-yil 13-oktabrdagi F-3509-son farmoyishi bilan tashkil etilgan ishchi guruh tomonidan ishlab chiqilgan, quyidagilarni oʻz ichiga oladigan 2011 — 2014-yillarda “Barkamol avlod” bolalar markazlarini shakllantirish dasturi tasdiqlansin:

2011 — 2014-yillarda “Barkamol avlod” bolalar markazlarini shakllantirish va ularning moddiy-texnika bazasini rivojlantirish boʻyicha kompleks tadbirlar 4-ilovaga muvofiq;

2011 — 2014-yillarda “Barkamol avlod” bolalar markazlarini mukammal taʼmirlash va jihozlashning asosiy parametrlari 5-ilovaga muvofiq.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

belgilangan jadvalga muvofiq muddatlarda umumtaʼlim maktablari binolarining alohida oʻquv bloklarida 78 ta “Barkamol avlod” bolalar markazi ochilishini taʼminlasinlar, alohida kirish joyi mavjud boʻlishini hamda toʻrttadan oltitagacha toʻgarak xonalarini oʻquv jarayoniga zarar yetkazmasdan zarur asbob-uskunalar va inventar bilan toʻliq jihozlashni nazarda tutsinlar;

toʻgarak mashgʻulotlarini oʻtkazishga asosan umumtaʼlim maktablari, akademik litseylar va kasb-hunar kollejlari oʻqituvchilari oʻtilgan mashgʻulotlar hajmiga proporsional ravishda soatbay haq toʻlagan holda shartnoma asosida jalb etilishini tashkil etsinlar;

Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda maktabdan tashqari taʼlim muassasalarining boʻshab qoladigan xodimlarini ishga joylashtirish chora-tadbirlarini koʻrsinlar.

Belgilansinki, umumtaʼlim maktablari binolarining alohida oʻquv bloklarida tashkil etiladigan “Barkamol avlod” bolalar markazlarida elektr energiyasini hisobga olishning alohida priborlari oʻrnatiladi, qolgan kommunal xarajatlar esa ular tomonidan umumtaʼlim maktablariga moliya organlari bilan kelishuv boʻyicha qoplanadi.

6. Belgilab qoʻyilsinki:

“Barkamol avlod” bolalar markazlarini mukammal taʼmirlash, shuningdek ularni jihozlash boʻyicha buyurtmachi funksiyasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatiga yuklanadi;

Dasturni amalga oshirish doirasida “Barkamol avlod” bolalar markazlarini mukammal taʼmirlash va jihozlash boʻyicha ishlarni moliyalashtirish mahalliy budjetlar parametrlarida kam samarali maktabdan tashqari taʼlim muassasalarini tugatish hisobiga boʻshab qoladigan maktabdan tashqari taʼlim muassasalarini moliyalashtirishga nazarda tutilgan mablagʻlar va xodimlar sonini maqbullashtirish hisobiga amalga oshiriladi.

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Davlat arxitektura va qurilish qoʻmitasi bilan birgalikda:

“Barkamol avlod” bolalar markazlari tashkil etiladigan binolar va inshootlarni mukammal taʼmirlash uchun loyiha-smeta hujjatlari oʻz vaqtida ishlab chiqilishini, taʼmirlash ishlarini toʻliq tugallash va obyektlarni belgilangan muddatlarda topshirish shartlari bilan tanlov (tender) savdolari oʻtkazilishini taʼminlasinlar;

buyurtmachi bilan pudratchilar oʻrtasidagi shartnoma majburiyatlari bajarilishi hamda qurilish normalari va qoidalariga muvofiq taʼmirlash ishlari amalga oshirilishi ustidan doimiy nazorat oʻrnatsinlar.

8. “Barkamol avlod” bolalar markazlarida oʻqiganlik uchun ota-onalardan olinadigan toʻlovlar oyiga bazaviy hisoblash miqdoriga nisbatan quyidagi miqdorlarda belgilanadi:

Qoraqalpogʻiston Respublikasining Nukus va Xorazm viloyatining Urganch shaharlarida — 5 foiz, Qoraqalpogʻiston Respublikasi va Xorazm viloyatining qolgan tuman (shahar)larida — 2,5 foiz;

viloyatlar markazlari va Toshkent shahrida — 10 foiz;

respublikaning qolgan tuman (shahar)larida — 5 foiz;

Imkoniyati cheklangan bolalar uchun ixtisoslashtirilgan taʼlim muassasalari oʻquvchilari va ichki ishlar organlarining profilaktik hisobiga olingan oʻquvchilar “Barkamol avlod” bolalar markazlarida oʻqiganlik uchun ota-onalar toʻlovidan ozod qilinadi.

Ota-onalar toʻlovidan tushgan mablagʻlar:

toʻgarak faoliyati uchun zarur boʻlgan xomashyo va materiallar, moddiy boyliklar (mebel, asbob-uskuna va jihozlar, kompyuter texnikasi va boshqalar) xarid qilishga;

madaniy-ommaviy tadbirlarni oʻtkazish va ularda qatnashish bilan bogʻliq xarajatlarga;

oʻquvchilari respublika miqyosida oʻtkaziladigan koʻrik-tanlovlar va festivallarda 1, 2, 3-oʻrinlarni egallagan toʻgarak rahbarlarini tegishincha bazaviy hisoblash miqdorining besh, toʻrt, uch barobari miqdorida moddiy ragʻbatlantirishga yoʻnaltiriladi.

Oʻzbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda “Barkamol avlod” bolalar markazlarida bolalar oʻqiganligi uchun ota-ona toʻlovini undirish va undan foydalanish tartibini ishlab chiqsin va tasdiqlasin.

9. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida taklif kiritsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.