Sugʻoriladigan yerlarda qishloq xoʻjaligini barqaror rivojlantirishni taʼminlash, Fargʻona va Zarafshon vodiylarida suv va yer resurslaridan foydalanish samaradorligini oshirish, shuningdek, Osiyo taraqqiyot banki bilan hamkorlikni kengaytirish maqsadida:

1. Maʼlumot uchun qabul qilinsinki:

2008-yil 17-dekabrda Osiyo taraqqiyot banki (OTB) Direktorlar kengashi Oʻzbekiston Respublikasiga “Fargʻona va Zarafshon vodiylarida suv resurslarini boshqarish” loyihasini amalga oshirish uchun Osiyo taraqqiyot jamgʻarmasining imtiyozli resurslaridan ekvivalenti 15,0 mln AQSh dollariga teng boʻlgan 10,04 MQOH (maxsus qarz olish huquqi)ni 8 yillik imtiyozli davrni hisobga olgan holda, 32 yillik uzish muddati bilan hamda OTBning oddiy resurslaridan 6 yillik imtiyozli davrni hisobga olgan holda, 26 yillik uzish muddati bilan 85,0 mln AQSh dollari miqdorida qarz berishni maʼqulladi;

loyihani amalga oshirish muddati olti yil etib belgilandi (2009 — 2014-yillar);

loyihani amalga oshirishda Oʻzbekiston Respublikasining ulushi ekvivalentda 44,05 mln AQSh dollarini, shu jumladan soliq va bojxona toʻlovlaridan ozod qilish shaklida — 8,41 mln AQSh dollari, loyihani amalga oshirish davrida Davlat budjeti mablagʻlari hisobidan foizlar va komissiyalarni toʻlash shaklida — 7,29 mln AQSh dollari, Davlat budjeti mablagʻlari hisobidan markazlashgan kapital qoʻyilmalar shaklida — 0,33 mln AQSh dollari, loyiha doirasida uni amalga oshirish davrida rekonstruksiya qilinayotgan davlat suv xoʻjaligi obyektlarini ekspluatatsiya qilish va ularga xizmat koʻrsatish uchun budjet ajratmalari shaklida — 28,02 mln AQSh dollarini tashkil etadi.

2. Belgilansinki:

Oʻzbekiston Respublikasiga qarzlar Oʻzbekiston Respublikasi va OTB oʻrtasidagi qarz bitimlariga asosan taqdim etiladi;

Oʻzbekiston Respublikasi Qishloq va suv xoʻjaligi vazirligi qarz mablagʻlaridan maqsadli va samarali foydalanish, shuningdek, mazkur loyihani amalga oshirish uchun masʼul organ hisoblanadi;

foizlar va komissiya toʻlovlarini toʻlash, shuningdek, qarzlarni qaytarish bilan bogʻliq boʻlgan xarajatlar Davlat budjeti mablagʻlari hisobidan amalga oshiriladi.

3. Oʻzbekiston Respublikasi Qishloq va suv xoʻjaligi vazirligi, Iqtisodiyot vazirligi va Moliya vazirligining quyidagi takliflariga rozilik berilsin:

Fargʻona va Zarafshon vodiylari irrigatsiya tizimlarining Sirdaryo-Soʻx, Norin-Sirdaryo, Norin-Qoradaryo va Zarafshon havza boshqarmalari zonasida alohida ustuvor loyihalarni tanlab olish, ekspertizadan oʻtkazish va tayyorlash yoʻli bilan loyihani bosqichma-bosqich amalga oshirish;

mazkur loyiha doirasida tayyorlangan Samarqand viloyatidagi “Narpay” va Fargʻona viloyatidagi “Beshariq” nasos stansiyalarini hamda “Narpay” va “Beshariq” mashina kanallari xoʻjaliklararo tizimini rekonstruksiya qilish loyihasini toʻrt yil mobaynida (2009 — 2012-yillar) amalga oshirish.

4. Quyidagilar:

“Fargʻona va Zarafshon vodiylarida suv resurslarini boshqarish” loyihasini komponentlar, manbalar va yillar boʻyicha moliyalashtirish dasturi 1-ilovaga muvofiq*;

“Fargʻona va Zarafshon vodiylarida suv resurslarini boshqarish” loyihasi boʻyicha OTB qarzini soʻndirish hamda foizlar va komissiya toʻlovlarini toʻlash jadvali 2 va 2a-ilovalarga muvofiq*;

“Samarqand viloyatidagi “Narpay” va Fargʻona viloyatidagi “Beshariq” nasos stansiyalarini hamda “Narpay” va “Beshariq” mashina kanallari xoʻjaliklararo tizimini rekonstruksiya qilish” loyihasining texnik-iqtisodiy asoslanishi asosiy texnik-iqtisodiy parametrlari bilan birga 3-ilovaga muvofiq* tasdiqlansin.

Oʻzbekiston Respublikasi qishloq va suv xoʻjaligi vaziri, Samarqand va Fargʻona viloyatlari hokimlariga loyiha tadbirlarini amalga oshirish uchun zarur shart-sharoitlarni yaratish, shuningdek, zarur hisobotlar va hujjatlarni OTB tartib-taomillari va Oʻzbekiston Respublikasi qonunchilik hujjatlariga muvofiq oʻz vaqtida tayyorlash hamda taqdim etish yuzasidan shaxsiy javobgarlik yuklansin.

5. Oʻzbekiston Respublikasi moliya vaziriga Oʻzbekiston Respublikasi nomidan OTB bilan qarz bitimini imzolash vakolati berilsin.

Oʻzbekiston Respublikasi Adliya vazirligi Oʻzbekiston Respublikasi va OTB oʻrtasidagi qarz shartnomalari yuzasidan belgilangan tartibda yuridik xulosalar bersin.

6. “Fargʻona va Zarafshon vodiylarida suv resurslarini boshqarish” loyihasini amalga oshirish boʻyicha muvofiqlashtiruvchi kengash 4-ilovaga* muvofiq tarkibda tashkil qilinsin va unga quyidagi vazifalar yuklansin:

loyiha doirasida alohida ustuvor loyihalarning sifatli tanlab olinishini, ekspertizadan oʻtkazilishini va oʻz vaqtida amalga oshirishga tayyorlanishini taʼminlash, ajratilayotgan mablagʻlardan samarali foydalanilishi ustidan nazorat olib borish;

loyihani amalga oshirish doirasida tovarlar, ishlar (xizmatlar)ni xarid qilish boʻyicha tender komissiyalar tarkiblarini tasdiqlash;

amalga oshirilayotgan har bir loyiha va butun umumiy loyiha bajarilishining borishini muntazam ravishda koʻrib chiqish, zarur hollarda, ularning samarali va oʻz vaqtida amalga oshirilishini taʼminlash yuzasidan Oʻzbekiston Respublikasi Vazirlar Mahkamasiga takliflar kiritish.

7. Oʻzbekiston Respublikasi Qishloq va suv xoʻjaligi vazirligi quyidagilarni taʼminlasin:

bir oy muddatda — Toshkent shahrida mazkur loyihani boshqarish boʻyicha guruh tuzib, uning zimmasiga loyihani amalga oshirish boʻyicha ishlarni muvofiqlashtirish va boshqarish funksiyalarini yuklash, shuningdek, OTB bilan tuzilgan qarz bitimi shartlariga muvofiq, shtat jadvali va ishchi guruhlari faoliyatini moliyalashtirishning yillik smetasini Oʻzbekiston Respublikasi Moliya vazirligi bilan majburiy tartibda kelishgan holda, Samarqand va Fargʻona shaharlarida loyihalarni amalga oshirish boʻyicha ikkita ishchi guruhini tuzish;

loyiha doirasida qoʻshimcha loyihalar tanlab olinishiga qarab, belgilangan tartibda ularning texnik-iqtisodiy asoslanishini ishlab chiqish va tasdiqlash.

8. Mazkur loyiha doirasida investitsiya davri mobaynida OTB qarz mablagʻlari hisobidan xarid qilinadigan tovarlar (ishlar, xizmatlar) va transport vositalari bojxona toʻlovlari (bojxona rasmiylashtiruvi uchun yigʻimlar bundan mustasno), qoʻshilgan qiymat soligʻi hamda davlat maqsadli jamgʻarmalariga majburiy ajratmalar va yigʻimlardan ozod qilinsin.