Oʻzbekiston Respublikasining “Adliya organlari va muassasalari faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2010-yil 14-sentabrdagi OʻRQ-255-sonli Qonunini amalga oshirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar va qoʻshimcha kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi adliya vaziri R.A. Muhitdinov zimmasiga yuklansin.

1. Vazirlar Mahkamasining 2002-yil 28-iyundagi 236-son qarori (Oʻzbekiston Respublikasi QT, 2002-y., 6-son, 36-modda) bilan tasdiqlangan Faoliyatning ayrim turlarini litsenziyalovchi organlar roʻyxati “Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari” boʻlimining ikkinchi xatboshi chiqarib tashlansin.

2. Vazirlar Mahkamasining 2003-yil 27-avgustdagi 370-son qarori (Oʻzbekiston Respublikasi QT, 2003-y., 8-son, 79-modda) bilan tasdiqlangan Oʻzbekiston Respublikasi Adliya vazirligi toʻgʻrisidagi nizomda:

a) 7-bandning 5-kichik bandida:

uchinchi xatboshidagi “ochadi” soʻzi “tashkil etadi” soʻzlari bilan almashtirilsin;

toʻrtinchi xatboshi oʻz kuchini yoʻqotgan deb hisoblansin;

oltinchi xatboshi quyidagi tahrirda bayon qilinsin:

“stajor notarius faoliyatini tashkil etish tartibini belgilaydi, Oliy malaka komissiyasi va malaka komissiyalari toʻgʻrisidagi nizomlarni tasdiqlaydi”;

oʻn beshinchi xatboshi quyidagi tahrirda bayon qilinsin:

“notariat va FHDY organlari faoliyatini tartibga soluvchi normativ-huquqiy hujjatlarni ishlab chiqadi va tasdiqlaydi, ushbu organlar uchun koʻrsatmalar va uslubiy tushuntirishlar beradi, shuningdek Oʻzbekiston Respublikasi Moliya vazirligi bilan kelishgan holda davlat notarial idoralarining notariuslari tomonidan amalga oshiriladigan huquqiy va texnik tusdagi qoʻshimcha harakatlar, FHDY organlari tomonidan jismoniy shaxslarga koʻrsatiladigan pulli xizmatlar roʻyxatlarini, ushbu harakatlar amalga oshirilganligi va xizmatlar koʻrsatilganligi uchun, shuningdek notarial arxivlar tomonidan yuridik va jismoniy shaxslarga notarial tasdiqlangan hujjatlar dublikatlari, roʻyxatlardan koʻchirmalar, maʼlumotnomalar va arxiv hujjatlarining nusxalari berilganligi uchun toʻlovlar miqdorlarini tasdiqlaydi”;

b) 9-bandning 15-kichik bandi quyidagi tahrirda bayon qilinsin:

“15) advokatlarga berilgan litsenziyalarning amal qilishini belgilangan tartibda toʻxtatib turish va toʻxtatish”.

3. Vazirlar Mahkamasining “Avtomototransport vositalarini sotib olish, ulardan foydalanish va ularni boshqa shaxsga berishni tartibga solishga doir qoʻshimcha chora-tadbirlar toʻgʻrisida” 2006-yil 7-martdagi 38-son qarori (Oʻzbekiston Respublikasi QT, 2006-y., 3-son, 17-modda) 1-bandining ikkinchi xatboshidagi “notariuslar esa litsenziyadan ham mahrum qilinsin” soʻzlari chiqarib tashlansin.

4. Vazirlar Mahkamasining “Oʻzbekiston Respublikasi Prezidentining “Oʻzbekiston Respublikasida notariat institutini yanada takomillashtirish choralari toʻgʻrisida” 2010-yil 5-maydagi PF-4216-son Farmonini amalga oshirish chora-tadbirlari toʻgʻrisida” 2010-yil 2-iyundagi 104-son qarorida (Oʻzbekiston Respublikasi QT, 2010-y., 6-son, 25-modda):

a) 6-bandda:

uchinchi xatboshi quyidagi tahrirda bayon qilinsin:

“davlat notarial idoralari notariuslari tomonidan amalga oshiriladigan huquqiy va texnik tusdagi qoʻshimcha harakatlar uchun tushumlar”;

quyidagi mazmundagi toʻrtinchi xatboshi qoʻshilsin:

“notarial arxivlar tomonidan yuridik va jismoniy shaxslarga notarial tasdiqlangan hujjatlar dublikatlarini, roʻyxatlardan koʻchirmalarni, shuningdek maʼlumotnomalarni va arxiv hujjatlarining nusxalarini berganlik uchun toʻlovlar summasi”;

toʻrtinchi—oltinchi xatboshi beshinchi — yettinchi xatboshi deb hisoblansin;

b) 7-bandning ikkinchi xatboshi quyidagi tahrirda bayon qilinsin:

“davlat notarial idoralari notariuslari tomonidan amalga oshiriladigan huquqiy va texnik tusdagi qoʻshimcha harakatlar uchun bundan buyon Oʻzbekiston Respublikasi Moliya vazirligi bilan kelishiladigan haq miqdorlarini tasdiqlash”;

v) 8-bandning uchinchi xatboshidagi “unda davlat notarial idoralari xodimlarini mutaxassislar malakasiga, ularning oʻz vazifalarini sifatli bajarishiga, amalga oshirilayotgan notarial harakatlar, koʻrsatilayotgan qoʻshimcha xizmatlar hajmiga va undiriladigan davlat bojlari summasiga” soʻzlari “unda davlat notarial idoralari va notarial arxivlar xodimlarini mutaxassislar malakasiga, ularning oʻz vazifalarini sifatli bajarishiga, amalga oshirilayotgan notarial harakatlar, huquqiy va texnik tusdagi qoʻshimcha harakatlar hajmiga va undiriladigan davlat bojlari summasiga” soʻzlari bilan almashtirilsin.