Yoʻl qurilishini boshqarish tizimini takomillashtirish, umumiy foydalaniladigan zamonaviy avtomobil yoʻllari tarmogʻini yanada rivojlantirish, ortiqcha boshqaruv tuzilmalarini qisqartirish, umumiy foydalaniladigan avtomobil yoʻllarini saqlash, taʼmirlash, rekonstruksiya qilish va qurish uchun yoʻnaltiriladigan mablagʻlardan foydalanish samaradorligini oshirish maqsadida:

1. Oʻzbekiston Respublikasi Vazirlar Mahkamasi Qurilish va yoʻl-transporti kommunikatsiyalari kompleksi, “Oʻzavtoyoʻl” konserni, yoʻl xoʻjaligi tizimi birlashmalari, korxonalari va tashkilotlarining quyidagi takliflari qabul qilinsin:

Oʻzbekiston avtomobil yoʻllari qurish va foydalanish davlat aksiyadorlik konsernini Avtomobil yoʻllari qurish va foydalanish Davlat-aksiyadorlik kompaniyasi (“Oʻzavtoyoʻl” DAK) etib qayta tashkil qilish;

Qoraqalpogʻiston Respublikasi va viloyatlarda “Oʻzavtoyoʻl” kompaniyasining “Oʻzavtoyoʻl” hududiy davlat-aksiyadorlik birlashmalari negizida yuridik shaxs huquqiga ega boʻlgan hududiy shoʼba yoʻl-qurilish tashkilotlari (Qoraqalpoqavtoyoʻl, Andijonavtoyoʻl, Buxoroavtoyoʻl, Jizzaxavtoyoʻl, Qashqadaryoavtoyoʻl, Navoiyavtoyoʻl, Namanganavtoyoʻl, Samarqandavtoyoʻl, Surxondaryoavtoyoʻl, Sirdaryoavtoyoʻl, Toshkentavtoyoʻl, Fargʻonaavtoyoʻl, Xorazmavtoyoʻl) tashkil etish;

“Oʻzavtoyoʻl” kompaniyasi tarkibida tuman avtomobil yoʻllari boshqarmalari, ekspluatatsiya-liniya, yoʻllardan foydalanish, yoʻl-koʻpriklardan foydalanish boshqarmalari negizida tuman yoʻl xoʻjaligi pudrat taʼmirlash-ekspluatatsiya korxonalari tuzish.

2. Quyidagilar “Oʻzavtoyoʻl” davlat aksiyadorlik kompaniyasi faoliyatining asosiy vazifalari va yoʻnalishlari etib belgilansin:

respublikada avtomobil yoʻllari tarmogʻini rivojlantirish hamda takomillashtirishda yagona texnikaviy, investitsiya va tashqi iqtisodiy siyosatni oʻtkazish;

umumiy foydalaniladigan avtomobil yoʻllari, koʻpriklar, tonnellar, eng avvalo xalqaro va davlat ahamiyatiga ega boʻlgan koʻpriklar hamda tonnellarga kompleks xizmat koʻrsatish va ularni tegishli texnik holatda saqlash hamda oʻtkazish qobiliyatini, shuningdek kompaniya tarkibiga kiruvchi pudrat tashkilotlari faoliyatini taʼminlash borasidagi ishlarni muvofiqlashtirish;

avtomobil yoʻllari tarmogʻini rivojlantirish hamda takomillashtirish istiqbollarini belgilash;

umumiy foydalaniladigan avtomobil yoʻllarini loyihalash, qurish, rekonstruksiya qilish, taʼmirlash, saqlash va ulardan foydalanish masalalarining kompleks hal etilishini taʼminlash;

umumiy foydalaniladigan avtomobil yoʻllarida qurilish, taʼmirlash va qayta tiklash ishlarini amalga oshirish chogʻida belgilangan qoida va sifat standartlariga rioya etilishini nazorat qilish.

3. Belgilansinki, umumiy foydalaniladigan avtomobil yoʻllarini qurish va rekonstruksiya qilish ishlarini amalga oshirish hududiy shoʼba yoʻl-qurilish tashkilotlari zimmasiga, avtomobil yoʻllari va yoʻl infratuzilmasiga kompleks xizmat koʻrsatish hamda ularning texnik holati ustidan doimiy nazoratni amalga oshirish esa — tuman yoʻl xoʻjaligi pudrat taʼmirlash-ekspluatatsiya korxonalari zimmasiga yuklanadi.

4. Oʻzbekiston Respublikasi Moliya vazirligi, Davlat soliq qoʻmitasi va “Oʻzavtoyoʻl” davlat-aksiyadorlik kompaniyasining:

2003-yilning 1-oktabridan boshlab yoʻl xoʻjaligini boshqarish tuzilmasidagi Respublika, viloyat va mahalliy yoʻl jamgʻarmalarini tugatish hamda Oʻzbekiston Respublikasi Moliya vazirligi huzurida Respublika yoʻl jamgʻarmasini tuzish toʻgʻrisidagi;

Oʻzbekiston Respublikasi Moliya vazirligi huzuridagi Respublika yoʻl jamgʻarmasiga mablagʻlarni yigʻish va tushumlarning toʻliqligini nazorat qilish vazifalarini Oʻzbekiston Respublikasi Davlat soliq va Davlat bojxona qoʻmitalari zimmasiga yuklash toʻgʻrisidagi taklifiga rozilik berilsin.

5. Quyidagilar Moliya vazirligi huzuridagi Respublika yoʻl jamgʻarmasining asosiy vazifalari etib belgilansin:

Respublika pul jamgʻarmasi mablagʻ tushumlari hamda sarf-xarajatlarining yillik va kvartal balanslarini shakllantirish;

umumiy foydalaniladigan avtomobil yoʻllarini qurish, rekonstruksiya qilish, taʼmirlash hamda jihozlashning investitsiya loyihalari va tender hujjatlarining texnikaviy-iqtisodiy asoslanishini ekspertizadan oʻtkazish;

yoʻl xoʻjaligi obyektlarini qurish, rekonstruksiya qilish, taʼmirlash va jihozlashning nomma-nom roʻyxatlarini belgilangan tartibda kelishib olish;

umumiy foydalaniladigan avtomobil yoʻllaridan foydalanish va ularni saqlash smeta xarajatlarini roʻyxatdan oʻtkazish;

umumiy foydalaniladigan avtomobil yoʻllari qurish, rekonstruksiya qilish, taʼmirlash, jihozlash hamda ulardan foydalanish borasidagi tadbirlarni tasdiqlangan xarajatlarga muvofiq moliyalash, jamgʻarma mablagʻlaridan foydalanishning qonuniyligi va maqsadga muvofiqligi ustidan nazoratni amalga oshirish.

6. Belgilansinki, Respublika yoʻl jamgʻarmasiga majburiy ajratmalar va yigʻimlar davlat soliqlari va yigʻimlariga tenglashtiriladi, ularning miqdori har yili Davlat budjeti tasdiqlanishi bilan bir vaqtda belgilanadi.

7. “Oʻzbekiston Avtomobil yoʻllari qurish va foydalanish davlat-aksionerlik konserni (“Oʻzavtoyoʻl”)ni tashkil etish toʻgʻrisida” Oʻzbekiston Respublikasi Prezidentining 1993-yil 26-yanvardagi PF–546-son Farmoni oʻz kuchini yoʻqotgan deb hisoblansin.

8. Vazirlar Mahkamasi bir hafta muddatda ushbu Farmonni ijro etish boʻyicha qaror qabul qilsin.