Oʻzbekiston Respublikasining qonunchiligini tashqi iqtisodiy faoliyat va ichki valyuta bozorini erkinlashtirish yuzasidan qabul qilingan qarorlarga muvofiqlashtirish, shuningdek milliy valyutaning joriy xalqaro operatsiyalar boʻyicha erkin almashtirilishini taʼminlash maqsadida Oʻzbekiston Respublikasi Prezidentining baʼzi farmonlariga ilovaga muvofiq oʻzgartirishlar kiritilsin.

1. “Eksport-import operatsiyalari boʻyicha valyuta nazoratini taʼminlash chora-tadbirlari toʻgʻrisida” Oʻzbekiston Respublikasi Prezidentining 1994-yil 20-apreldagi PF-837-son Farmoni ilovasidagi 13-bandning ikkinchi xatboshi chiqarib tashlansin.

2. “Oʻzbekiston Respublikasi milliy valyutasining ichki erkin almashtirilishini yanada kengaytirish chora-tadbirlari toʻgʻrisida” Oʻzbekiston Respublikasi Prezidentining 1995-yil 27-iyundagi PF-1193-son Farmonining 2-bandi, 3-bandining toʻrtinchi va beshinchi xatboshilari, 5-bandi, 8-bandining uchinchi xatboshi oʻz kuchini yoʻqotgan deb hisoblansin.

3. “Oʻzbekiston Respublikasida tashqi iqtisodiy faoliyatni yanada erkinlashtirish toʻgʻrisida” Oʻzbekiston Respublikasi Prezidentining 1995-yil 19-iyuldagi PF-1205-son Farmoni 4-bandining uchinchi xatboshi chiqarib tashlansin.

4. “Xorijiy investitsiyalar ishtirokidagi korxonalarni tashkil etishni va ularning faoliyatini ragʻbatlantirishga oid qoʻshimcha chora-tadbirlar toʻgʻrisida” Oʻzbekiston Respublikasi Prezidentining 1996-yil 31-maydagi PF-1467-son Farmonining 5-bandi chiqarib tashlansin.

5. “Oʻzbekiston Respublikasi Prezidenti farmonlariga oʻzgartish va qoʻshimchalar kiritish toʻgʻrisida” Oʻzbekiston Respublikasi Prezidentining 2000-yil 5-dekabrdagi PF-2772-son Farmoni ilovasida:

2-bandning v) kichik bandi chiqarib tashlansin;

2-bandning g) kichik bandidagi “import kontraktlari boʻyicha avans toʻlovlari kontraktda nazarda tutilgan qiymatning 15 foizidan oshmaydigan, ammo 100 000 AQSH dollaridan koʻp boʻlmagan summa doirasida, faqat import qiluvchi korxonaga xizmat koʻrsatadigan Oʻzbekiston Respublikasi vakolatli bankining aloqador bankning muqobil bank kafolati mavjud boʻlgan taqdirdagina yoʻl qoʻyiladi. Mazkur summadan oshadigan avans toʻlovlarini oʻtkazish faqat Oʻzbekiston Respublikasi Tashqi iqtisodiy aloqalar vazirligining xulosasi boʻyicha Oʻzbekiston Respublikasi Vazirlar Mahkamasining ruxsati bilan amalga oshiriladi” jumlalari chiqarib tashlansin.