Oʻzbekiston Respublikasi Davlat gerbining rangli va oq-qora tasviri tasdiqlansin (ilova qilinadi).

Oʻzbekiston Respublikasi Davlat gerbi respublika davlat mustaqilligining ramzidir.

Oʻzbekiston Respublikasi Davlat gerbi quyidagi koʻrinishga ega: togʻlar, daryolar va soʻl tomoni bugʻdoy boshoqlaridan, oʻng tomoni esa chanoqlari ochilgan gʻoʻza shoxlaridan iborat chambarga oʻralgan gullagan vodiy uzra quyosh zarrin nurlarini sochib turadi. Gerbning yuqori qismida Respublika hurligining ramzi sifatida sakkizburchak tasvirlangan boʻlib, uning ichki qismida yarim oy va yulduz tasvirlangan. Gerbning markazida baxt va erksevarlik ramzi — qanotlarini yozgan Humo qushi tasvirlangan. Gerbning pastki qismida respublika Davlat bayrogʻini ifoda etuvchi chambar lentasining bantida “Oʻzbekiston” deb yozib qoʻyilgan.

Oʻzbekiston Respublikasi Davlat gerbining rangli koʻrinishida: Humo qushi va daryolar — kumush rangida; quyosh, boshoqlar, paxta chanoqlari va “Oʻzbekiston” yozuvi — oltin rangida; gʻoʻza shoxlari va barglari, togʻlar va vodiy — yashil rangda; chanoqlardagi paxta — oq rangda; lenta — Oʻzbekiston Respublikasi Davlat bayrogʻining ranglarini aks ettiruvchi uch xil rangda; sakkizburchak — oltin zarhal bilan hoshiyalangan holda havo rangda; yarim oy va yulduzlar — oltin rangida tasvirlangan.

Oʻzbekiston Respublikasi Davlat gerbining tasviri:

1) quyidagi binolarda:

a) Oʻzbekiston Respublikasi Prezidenti devonining binosida;

b) Oʻzbekiston Respublikasi Oliy Kengashi binosida;

v) Oʻzbekiston Respublikasi Hukumati binosida;

g) Oʻzbekiston Respublikasi davlat hokimiyati va boshqaruvi mahalliy idoralarining binolarida;

d) Oʻzbekiston Respublikasi vazirliklari, davlat qoʻmitalari, respublika Prezidenti huzuridagi Vazirlar Mahkamasiga qarashli boshqa organlarning binolarida;

e) Oʻzbekiston Respublikasi sudlari va hakamlik sudlari binolarida;

j) Oʻzbekiston Respublikasi Prokuratura idoralarining binolarida;

z) Oʻzbekiston Respublikasi diplomatiya vakolatxonalari va konsullik muassasalarining binolarida;

2) Oʻzbekiston Respublikasi Oliy Kengashining sessiyalari, Oʻzbekiston Respublikasi Oliy Kengashi Rayosati, Oʻzbekiston Respublikasi Prezidenti huzuridagi Vazirlar Mahkamasining majlislari, xalq deputatlari mahalliy Kengashlarining sessiyalari oʻtkazilayotgan binolarda, sudlar va hakamlik sudlari sud majlislari oʻtkazayotgan xonalarda, shuningdek tugʻilish va nikoh tantanali suratda roʻyxatga olinadigan xonalarda;

3) Oʻzbekiston Respublikasi Prezidenti va uning devoni, Oʻzbekiston Respublikasi Oliy Kengashi, uning Rayosati qoʻmitalari, komissiyalari va Oʻzbekiston Respublikasi Oliy Kengashining Kotibiyati, Oʻzbekiston Respublikasi Prezidenti huzuridagi Vazirlar Mahkamasi, Oʻzbekiston Respublikasi diplomatiya vakolatxonalari va konsullik muassasalari, Oʻzbekiston Respublikasi vazirliklari va davlat qoʻmitalarining, Oʻzbekiston Respublikasi Prezidenti huzuridagi Vazirlar Mahkamasiga qarashli boshqa idoralarning, Oʻzbekiston Respublikasi sudlari va hakamlik sudlarining, Oʻzbekiston Respublikasi Konstitutsiyaviy nazorat qoʻmitasi, Oʻzbekiston Respublikasi xalq deputatlari saylovini oʻtkazuvchi Markaziy saylov komissiyasi, Oʻzbekiston Respublikasi prokuratura idoralari, davlat hokimiyati va boshqaruvi mahalliy idoralarining, davlat notarial kontoralarining, Oʻzbekiston Respublikasi bank muassasalari va tashkilotlarining, shuningdek Oʻzbekiston Respublikasi qonunlari bilan muhrlar va blankalarda gerbning tasvirini tushirish huquqi berilgan respublika va mahalliy boʻysunuvdagi korxonalar, muassasalar va tashkilotlarning muhrlari va hujjat blankalarida;

4) Oʻzbekiston Respublikasi Prezidentining, Oʻzbekiston Respublikasi Oliy Kengashining, Oʻzbekiston Respublikasi Prezidenti huzuridagi Vazirlar Mahkamasining rasmiy nashrlarida;

5) Oʻzbekiston Respublikasining pul birliklarida, qimmatli qogʻozlarida, obligatsiyalarida, pochta markalarida, pul-buyum lotereyasi biletlarida;

6) Oʻzbekiston Respublikasi fuqarosining pasportida, shuningdek Oʻzbekiston Respublikasi fuqarolariga beriladigan diplomatiya va oʻzga chet el pasportlarida;

7) Oʻzbekiston Respublikasining davlat chegaralarida oʻrnatiladigan sarhad stolbalarida oʻrnatib qoʻyiladi.

Oʻzbekiston Respublikasi Davlat gerbining boʻrtma tasviridan Oʻzbekiston Respublikasi davlat hokimiyati va boshqaruvi idoralari majlis zallarida, sudlar va hakamlik sudlari — sud oʻtkaziladigan majlis zallarida, fuqarolik holatini qayd etish idoralari — tugʻilish va nikoh tantanali suratda roʻyxatga olinadigan xonalarda foydalanishlari mumkin.

Oʻzbekiston Respublikasining qonunlarida Oʻzbekiston Respublikasi Davlat gerbining tasvirini aks ettirish majburiy boʻlgan boshqa hollar ham nazarda tutilishi mumkin.

Oʻzbekiston Respublikasi Davlat gerbining takrorlanayotgan tasviri, uning katta-kichikligidan qatʼi nazar, ushbu Qonunga ilova qilinayotgan rangli va oq-qora tasviriga aniq mos boʻlishi kerak.

Oʻzbekiston Respublikasining Davlat gerbi toʻgʻrisidagi ushbu Qonunda bayon etilgan talablarga rioya qilinishi uchun masʼuliyat Oʻzbekiston Respublikasining Davlat gerbi tasviridan foydalanish huquqi berilgan davlat hokimiyati va boshqaruv idoralarining rahbarlari zimmasiga yuklatiladi.

Ushbu Qonunning aniq bajarilishini kuzatish mahalliy davlat idoralari zimmasiga yuklatiladi.

Oʻzbekiston Respublikasining fuqarolari, shuningdek respublikada turgan oʻzga shaxslar Oʻzbekiston Respublikasining Davlat gerbini hurmat qilishlari shart.

Oʻzbekiston Respublikasining Davlat gerbini behurmat qilganlik Oʻzbekiston Respublikasi qonunlarida belgilangan tartibda jazolanadi.