Oʻzbekiston Respublikasining “Adliya organlari va muassasalari faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2010-y., 37-son, 313-modda) va Oʻzbekiston Respublikasi Vazirlar Mahkamasining 2003-yil 27-avgustdagi 370-son “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2003-y., 15-16-son, 138-modda) muvofiq buyuraman:

1. Davlat notarial idoralarida notarial ish yuritish qoidalari ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.

3. Qonun hujjatlarini turkumlash va huquqiy axborot boshqarmasi (S. Nuriyev) va Notariat, FHDY va advokatura boshqarmasi (D. Yakubova) ushbu normativ-huquqiy hujjatni oʻn kun muddat ichida barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Mazkur buyruq 2011-yil 1-yanvardan boshlab kuchga kiradi.

5. Mazkur buyruq ijrosini nazorat qilish vazir oʻrinbosari E. Kanyazov zimmasiga yuklansin.

Mazkur Qoidalar Oʻzbekiston Respublikasining “Notariat toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 2-son, 42-modda), “Fuqarolarning murojaatlari toʻgʻrisida”gi (Oʻzbekiston Respublikasi Oliy Majlisining Axborotnomasi, 2003-y., 1-son, 7-modda) va “Arxiv ishi toʻgʻrisida”gi (Oʻzbekiston Respublikasi qonun hujjatlari toʻplami, 2010-y., 24-25-son, 192-modda) qonunlari, Oʻzbekiston Respublikasi Vazirlar Mahkamasining 1999-yil 29-martdagi 140-son “Oʻzbekiston Respublikasi davlat hokimiyati va boshqaruv organlarida ish yuritish va ijro nazoratini tashkil etish boʻyicha normativ hujjatlarni tasdiqlash haqida”gi qarori, Notariuslar tomonidan notarial harakatlarni amalga oshirish tartibi toʻgʻrisidagi yoʻriqnoma (roʻyxat raqami 2090, 2010-yil 30-mart) (Oʻzbekiston Respublikasi qonun hujjatlari toʻplami, 2010-y., 13-son, 99-modda) va boshqa normativ-huquqiy hujjatlarga muvofiq davlat notarial idoralarida notarial ish yuritish, notarial hujjatlarni saqlash muddatlari va tartibini belgilaydi.

1. Oʻzbekiston Respublikasi “Notariat toʻgʻrisida”gi Qonunining 1-moddasiga muvofiq Oʻzbekiston Respublikasida notariat qonunlarda nazarda tutilgan notarial harakatlarni hamda ular bilan bevosita bogʻliq huquqiy va texnik tusdagi harakatlarni notariuslar tomonidan amalga oshirish yoʻli bilan jismoniy va yuridik shaxslarning huquqlari hamda qonuniy manfaatlarini himoya qilishni taʼminlashga daʼvat etilgan huquqiy institutdir.

2. Davlat notarial idoralarida (bundan keyingi oʻrinlarda notarial idoralar deb yuritiladi) notarial ish yuritishni tashkil etish mazkur Qoidalarga muvofiq amalga oshiriladi.

3. Notarial ish yuritishni toʻgʻri tashkil qilish uchun notarial idorada rahbarlik qiluvchi notarius javobgardir.

Notarial ish yuritish va (yoki) arxiv ishlarini olib borish Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (bundan keyingi oʻrinlarda adliya boshqarmalari deb yuritiladi) rahbarining buyrugʻi bilan notarial idora xodimlaridan biriga yuklanadi.

Notarial ish yuritish va (yoki) arxiv ishlarini olib borish yuklatilgan shaxs (bundan keyingi oʻrinlarda masʼul shaxs deb yuritiladi) ishdan boʻshaganda yoki boshqa ishga oʻtkazilganda hujjatlar yangi tayinlangan xodimga dalolatnoma asosida topshiriladi.

4. Oʻzbekiston Respublikasi “Notariat toʻgʻrisida”gi Qonunining 6-moddasiga muvofiq notariusning, notarial harakatlarni amalga oshiruvchi boshqa mansabdor shaxslarning, shuningdek amalga oshirilayotgan notarial harakatlardan xizmat vazifasini bajarish munosabati bilan xabardor boʻlib qolgan shaxslarning oʻzlariga maʼlum boʻlgan axborotlarni oshkor qilishi, shu jumladan mehnat shartnomasi bekor qilinganidan keyin ham oshkor qilishi taqiqlanadi.

Fuqaro jismoniy nuqsoni, kasalligi tufayli yoki qandaydir boshqa sabablarga koʻra bitim, ariza yoki boshqa hujjatni oʻz qoʻli bilan imzolay olmaganida, bitim, ariza yoki boshqa hujjatni uning topshirigʻiga koʻra imzolagan fuqaro, hujjatni tarjima qilib bergan tarjimon (surdo tarjimon) va boshqalar ham oʻzlariga maʼlum boʻlgan axborotlarni oshkor qilishi taqiqlanadi.

5. Oʻzbekiston Respublikasining “Davlat tili haqida” (Oʻzbekiston Respublikasi Oliy Majlisining Axborotnomasi, 1995-y., 12-son, 257-modda) va “Notariat toʻgʻrisida”gi qonunlariga muvofiq notarial idoralarda notarial ish yuritish va notarial harakatlar davlat tilida amalga oshiriladi.

Notarial harakatlar boʻyicha rasmiylashtiriladigan hujjat matni yuridik va jismoniy shaxslarning talablariga binoan notarius tomonidan rus tilida yoki imkon boʻlsa, boshqa maqbul tilda yoziladi.

6. Notariuslar tomonidan amalga oshiriladigan notarial harakatlar Oʻzbekiston Respublikasining “Notariat toʻgʻrisida”gi Qonuni hamda Notariuslar tomonidan notarial harakatlarni amalga oshirish tartibi toʻgʻrisidagi yoʻriqnoma talablariga asosan rasmiylashtiriladi.

7. Hujjat turining nomi (maʼlumotnoma, hisobot va boshqa) har bir hujjatda (xatdan tashqari) koʻrsatiladi.

8. Hujjatlar matni A4 (210 x 297) va A5 (148 x 210) formatdagi varagʻining bir tomonida masshtab kichraytirilmagan holda yoziladi. Bunda quyidagilar inobatga olinishi lozim:

matn qora rangda, chapdan 3 sm, oʻngdan 1,5 sm, tepa va pastdan 2 sm sahn qoldirib yoziladi;

matn xatboshisi 6 harfdan iborat joy tashlab boshlanadi;

hujjatning birinchi betidan tashqari boshqa betlarining tepa qismi oʻrtasiga “2” raqamidan boshlab tartib raqami qoʻyiladi;

matn 1,2 qatorlararo oraliq (interval)da yoziladi.

9. Notarial idoraning ish yurituvi bilan bogʻliq boʻlgan barcha hujjatlar tegishliligiga qarab tashkilotlarga, mansabdor shaxslarga va fuqarolarga yuboriladi.

Hujjat yuborilayotganda tashkilotning nomi bosh kelishikda, mansabdor shaxsning lavozimi va familiyasi hamda fuqaroning familiyasi joʻnalish kelishigida yoziladi.

Hujjat yuborilayotgan tashkilotning manzili uning nomidan keyin yoziladi. Hujjat fuqaroga yuborilganda esa uning manzili, keyin uning ismi, otasining ismi bosh harflari va familiyasi yoziladi.

Javob xatlarida javobi joʻnatilayotgan hujjatning raqami va sanasi koʻrsatiladi.

10. Rasmiylashtirilgan hujjatlar matnida keltirilgan sanalar raqamlar bilan ifodalanadi. Sanalar arab raqamlari bilan bir satrda va quyidagi izchillikda yoziladi: yil, kun, oy (rus tilida tayyorlangan hujjatlarda kun, oy, yil koʻrinishida).

11. Hujjatlarda ilova mavjud boʻlganda ular quyidagicha rasmiylashtiriladi:

agar ilova hujjat matnida koʻrsatilgan boʻlsa, ilovadagi varaqlar soni koʻrsatiladi;

agar ilova hujjat matnida koʻrsatilmagan boʻlsa, ilovalar nomi sanab koʻrsatiladi;

agar yozishmalar bir nechta manzilga yuborilayotgan boʻlib, ulardan biriga ilova yuborilsa, bu holda ilovaning kimga tegishliligi koʻrsatiladi.

Agar ilovalar risolalangan boʻlsa, varaqlar soni koʻrsatilmaydi.

12. Bitta yoʻllanma xat bilan oʻzaro bogʻliq boʻlmagan hujjatlarni yuborish va kirim qilish taqiqlanadi.

13. Barcha joʻnatilayotgan hujjatlar notarius tomonidan imzolanadi. Agar bitta notarial idorada ikki va undan ortiq notarius ishlayotgan boʻlsa, notarial idora faoliyati bilan bogʻliq hujjatlar mazkur notarial idoraning katta notariusi tomonidan imzolanadi.

Hujjatni imzolashda notarial idora nomi, notariusning ismi va otasining ismi bosh harflari hamda familiyasi yoziladi.

Hujjatlarni “uning oʻrniga” degan soʻzlar, shuningdek lavozimning nomi oldiga qiya chiziq qoʻyib imzolashga yoʻl qoʻyilmaydi.

14. Notarial idorada ijro qilinishi lozim boʻlgan barcha hujjatlar, shu jumladan arizalar belgilangan tartibda roʻyxatdan oʻtkaziladi. Notarial idora faoliyatiga tegishli boʻlmagan xatlar, shaxsiy yozishmalar, tabriknomalar, taklifnomalar va shunga oʻxshash yozishmalar roʻyxatdan oʻtkazilmaydi.

Hujjatlar ijro etilganidan keyin mazkur Qoidalarning 1-ilovasiga muvofiq shakldagi notarial idora hujjatlar yigʻmajildlarining namunaviy nomenklaturasida koʻrsatilgan yigʻmajildga tikiladi.

15. Notarial idoralarda hujjatlarni roʻyxatga olish va ularning ijrosini nazorat qilish uchun mazkur Qoidalarning 2 va 3-ilovalariga muvofiq shakldagi tegishli daftarlar yuritiladi.

16. Roʻyxatga olingan hujjatlarning birinchi betida (chap tomon pastki qismida) notarial idoraning shtampi bosiladi hamda hujjatning kirim raqami va uning qabul qilingan sanasi yoziladi.

17. Hujjatlarning yetishmasligi yoki ularning yaroqsiz holatda ekanligi aniqlansa, masʼul shaxs tomonidan bu haqda ikki nusxada dalolatnoma tuziladi va notarius tomonidan imzolanadi. Dalolatnomaning bir nusxasi hujjatni joʻnatuvchiga hujjatlarni ilova qilgan holda yuboriladi.

18. Kelib tushgan hujjatlarning konverti uning joʻnatuvchisi manzilini hamda hujjatning joʻnatilgan va qabul qilib olingan vaqtini uning konverti boʻyicha aniqlash mumkin boʻlgan hollardagina saqlanadi va konvert hujjatlarga ilova qilinadi.

Fuqarolarning ariza, shikoyat va takliflari kelib tushgan konvertlar yoʻq qilinmaydi hamda ushbu hujjatlar bilan birgalikda saqlanadi.

19. Agar hujjatlar adashib joʻnatilgan boʻlsa, ular yangi konvertlarda avvalgi konvert ilova qilingan holda tegishli manzillarga yuboriladi yoki shaxsan hujjatning joʻnatuvchisiga qaytariladi.

20. Notarial idoraga kelib tushgan hujjatlar roʻyxatdan oʻtkazilganidan keyin notarius shu kunning oʻzida uni ijro etish va ijro muddati toʻgʻrisidagi masalani hal qiladi.

21. Hujjat unda koʻrsatilgan barcha masalalar hal qilinib, uning joʻnatuvchisiga javob berilganda ijro etilgan deb hisoblanadi. Ijro etilgan hujjatga ularning ijrosi va yigʻmajildga tikilishi haqida belgi qoʻyiladi.

Agar hujjatning ijro qilinganligini tasdiqlovchi hujjat boʻlmasa, hujjatning ijro qilinganligi haqidagi belgi uning birinchi varagʻining pastki qismiga yoki joy boʻlmaganda hujjatning birinchi varagʻi orqa tomoniga qoʻyiladi, shuningdek, “yigʻmajildga” degan soʻz va ijro etilgan hujjat tikilishi lozim boʻlgan yigʻmajildning raqami yozib qoʻyiladi.

22. Joʻnatilayotgan hujjat mazkur Qoidalarning 3-ilovasiga muvofiq shakldagi Hujjatlarning chiqish daftarida roʻyxatdan oʻtkaziladi va unga tegishli tartib raqami beriladi hamda ushbu daftarga joʻnatilayotgan hujjatning nusxasi saqlanadigan yigʻmajildning raqami yoziladi.

23. Notarial idoralarda hujjatlar pochta aloqasi, xat-hujjat tashuvchi xodim orqali joʻnatiladi yoki shaxsan uning joʻnatuvchisiga (uning vakiliga) topshiriladi.

24. Roʻyxatdan oʻtkazilgan barcha hujjatlarning ijro etilishi ahvolini nazorat qilish adliya boshqarmasi tomonidan amalga oshiriladi.

Zarur hollarda hujjatlarning ijrosi yuzasidan notarius adliya boshqarmasiga hisobot taqdim etadi.

25. Oʻzbekiston Respublikasi Adliya vazirligi, adliya boshqarmalari va boshqa yuqori turuvchi tashkilotlardan kelib tushgan topshiriqlar nazoratga olinadi.

Notarial idorada rahbarlik qiluvchi notarius tomonidan boshqa hujjatlarning ijrosi ham nazoratga olinishi mumkin.

26. Hujjatlarning ijrosi boʻyicha nazorat “nazorat kartochkalari” yoki tegishli nazorat ish jildlari yordamida olib boriladi.

27. Hujjatlar yigʻmajildlari nomenklaturasi amalga oshiriladigan barcha notarial harakatlar, shuningdek reyestrlar, kitoblarni inobatga olgan holda shakllantiriladi.

28. Hujjatlar yigʻmajildlari nomenklaturasi notarial idoraning nomi koʻrsatilgan holda adliya boshqarmalari huzuridagi notarial arxivlar bilan kelishiladi hamda adliya boshqarmalari rahbarlari tomonidan tasdiqlanadi.

Hujjatlar yigʻmajildlari nomenklaturasi bir kalendar yil davomida amalda boʻladi va har yili yangidan tasdiqlanadi. Hujjatlar yigʻmajildlari nomenklaturasi ikki nusxada tuziladi. Birinchi nusxa adliya boshqarmasida, ikkinchi nusxasi esa notarial idorada saqlanadi. Notarial idorada saqlanadigan hujjatlar yigʻmajildlari nomenklaturasidan ish nusxasi sifatida foydalaniladi.

29. Yigʻmajildlar quyidagicha shakllantirilishi va yuritilishi zarur:

yigʻmajildlarga faqat ijro etilgan va toʻgʻri rasmiylashtirilgan hujjatlarni joylashtirish;

bitta masalaning hal qilinishiga taalluqli barcha hujjatlarni ularning ilovalari bilan birgalikda joylashtirish;

yigʻmajildlarda bir kalendar yilga oid hujjatlarni guruhlash (yildan-yilga oʻtuvchi hujjatlar yigʻmajildlari bundan mustasno);

yigʻmajild varaqlarining jami 250 varaqdan oshmasligi, agar ortsa, mazkur yigʻmajildning navbatdagi jildini yuritish.

30. Notarial idoraning ish yurituvidagi barcha hujjatlar ijro etilganidan keyin tegishli yigʻmajildlarga turkumlashtiriladi.

31. Hujjatlar yigʻmajildlari nomenklaturasi asosida notarial idorada mazkur Qoidalarning 4 — 12-ilovalariga muvofiq shakllardagi kitoblar yuritiladi.

32. Merosni qabul qilish yoki undan voz kechish haqidagi arizalar, merosga boʻlgan huquq toʻgʻrisida guvohnoma berish, meros mol-mulk hisobidan xarajatlarni toʻlash, meros mol-mulkni qoʻriqlash choralarini koʻrish haqidagi arizalar, shuningdek, kreditorlarning talabnomalari alohida meros ishlari shakliga keltiriladi, ularning har biriga alohida indeks beriladi va tegishli hujjatlar yigʻmajildlariga tikiladi, shundan soʻng, mazkur Qoidalarning 13-ilovasiga muvofiq Meros ishlarini roʻyxatga olish kitobida qayd etiladi hamda unga shu kitobdagi tegishli tartib raqami beriladi.

Meros ishi yigʻmajildiga mazkur bandning birinchi xatboshisida koʻrsatilgan arizalar boʻyicha merosni rasmiylashtirish bilan bogʻliq boʻlgan barcha hujjatlar tikib qoʻyiladi.

Agar meros ishini rasmiylashtirish joriy yilda tugallanmasa, u keyingi yilga mazkur raqam bilan oʻtadi va u qayta roʻyxatga olinmaydi.

33. Yozishmalar kalendar yil davri boʻyicha guruhlanadi va xronologik tartibda ketma-ket turkumlanadi, javob hujjati soʻrov hujjatidan keyin joylashtiriladi.

Hisobot yili tugagach, yigʻmajildlar boʻshatiladi va ularning har biri alohida tikiladi. Bunda yigʻmajildlar muqovalanadi, ularning nomlari yoziladi, varaqlarga tartib raqamlari beriladi hamda hujjatlarning roʻyxati tuziladi.

34. Yillik rejalar va hisobotlar qachon tuzilganligidan qatʼi nazar, mazmunan qaysi yilga taalluqli boʻlsa, oʻsha yilning yigʻmajildiga qoʻyiladi.

35. Oʻzbekiston Respublikasi “Notariat toʻgʻrisida”gi Qonunning 10-moddasiga asosan, notarial idora notarial ish yuritish hujjatlari va materiallarining but saqlanishini taʼminlashi, oʻz notarial arxivini yuritishi shart.

Notarial ish yuritish hujjatlari va materiallari uch yil oʻtgach adliya boshqarmalari huzuridagi notarial arxivlarga (bundan keyingi oʻrinlarda notarial arxiv deb yuritiladi) topshirilishi kerak.

36. Joriy ish yuritish reyestrlari, meros ishlari yigʻmajildlari va tugallangan yigʻmajildlar notarial idora arxiviga topshirilishiga qadar changdan, quyosh nuri taʼsiridan himoyalaydigan va ularning yaxshi saqlanishini taʼminlaydigan shkaflarda turadi.

37. Yigʻmajildlardan biron-bir hujjat olish va berishga yoʻl qoʻyilmaydi.

Oʻzbekiston Respublikasi “Notariat toʻgʻrisida”gi Qonunining 6-moddasiga asosan, amalga oshirilgan notarial harakatlar toʻgʻrisidagi maʼlumotlar (hujjatlar) bu harakatlar kimning nomidan yoki kimning topshirigʻi bilan amalga oshirilgan boʻlsa, oʻsha shaxslarning oʻzigagina berilishi mumkin.

Amalga oshirilgan notarial harakatlar toʻgʻrisidagi maʼlumotnomalar (maʼlumotlar) sud, prokuratura, tergov organlarining talabiga binoan ular yuritayotgan ishlar munosabati bilan beriladi. Hujjatlarni berish toʻgʻrisidagi talablar qaror yoki ajrim shaklida yoxud protsessual qonunlarda belgilangan boshqa tartibda rasmiylashtirilgan boʻlishi shart.

Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bilan bogʻliq boʻlgan amalga oshirilgan notarial harakatlar toʻgʻrisidagi maʼlumotnomalar (maʼlumotlar) qonun hujjatlarida nazarda tutilgan hollarda va tartibda maxsus vakolatli davlat organiga taqdim etiladi.

Koʻchmas mulk ijarasi shartnomalarini tasdiqlash va ijara haqining miqdori toʻgʻrisidagi, meros yoki hadya tartibida fuqarolar mulkiga oʻtayotgan mol-mulkning qiymati haqidagi maʼlumotnomalar qonun hujjatlarida nazarda tutilgan hollarda davlat soliq xizmati organiga taqdim etiladi.

Vasiyatnoma toʻgʻrisidagi maʼlumotnomalar vasiyat qiluvchining vafotidan keyingina beriladi.

38. Kalendar yil tugashi bilan masʼul shaxs yigʻmajildlarni notarial idora arxivida saqlash uchun tayyorlaydi.

Yigʻmajilddagi hujjatlar turkumlashtiriladi, rasmiylashtiriladi, tartibga keltirilib, muqovalanadi va tikiladi.

Yigʻmajild oxirida alohida toza varaqqa tikilgan varaqlar soni yoziladi. Ushbu varaqqa masʼul shaxs va notariusning imzolari hamda notariusning muhri qoʻyiladi.

Yigʻmajild muqovasidagi sana hujjatlar yigʻmajildini yuritish boshlangan va tugallangan kun, oy va yilga muvofiq kelishi kerak.

Yigʻmajild muqovalari mazkur Qoidalarning 14-ilovasiga muvofiq rasmiylashtiriladi.

39. Notarial idora hujjatlar va materiallarni notarial arxivga topshirishidan oldin masʼul shaxs ularni tayyor holga keltiradi.

40. Notarial idora tomonidan hujjatlar va materiallar notarial arxivga topshirilayotganda, ularning butligini koʻrib chiqish adliya boshqarmasining doimiy faoliyat olib boruvchi ekspert komissiyasi tomonidan amalga oshiriladi.

41. Ekspert komissiyasi hujjatlar va materiallarni koʻrib chiqishda arxiv ishi toʻgʻrisidagi qonun hujjatlari talablariga rioya qiladi.

42. Ekspert komissiyasi tomonidan hujjatlar notarial arxivga topshirilishi lozim deb topilganda, ikki nusxada mazkur Qoidalarning 15-ilovasiga muvofiq topshirish-qabul qilish dalolatnomasi tuziladi.

Dalolatnomada topshirilayotgan hujjatlar roʻyxati toʻliq koʻrsatilishi shart. Dalolatnoma ekspert komissiyasi aʼzolari va notarial idorada rahbarlik qiluvchi notarius tomonidan imzolanadi hamda unga notariusning gerbli muhri qoʻyiladi.

43. Mazkur Qoidalar talablarining buzilishida aybdor shaxslar qonun hujjatlarida belgilangan tartibda javobgarlikka tortiladi.

1-1. Yuqori turuvchi tashkilotlarning buyruq va koʻrsatmalari.

1-2. Ish rejalari va ularning bajarilishi haqida maʼlumotlar.

1-3. Notarial amaliyotni umumlashtirish boʻyicha hujjatlar.

1-4. Statistik hisobot va notarial idoraning ishlari haqida tushuntirish xatlari.

1-5. Notarial idorani tekshirish natijalari haqida maʼlumotnoma va dalolatnomalar.

1-6. Shaxsiy tarkib boʻyicha buyruqlar, mehnat shartnomalari va boshqa hujjatlar.

1-7. Boshqa tashkilotlar bilan yozishmalar.

1-8. Banklar bilan solishtirma dalolatnomalar.

1-9. Tashkilotlar bilan huquqbuzarliklarni oldini olish masalalari boʻyicha yozishmalar. Notarial idora ishlarini tashkil etish boʻyicha arizalar, shikoyatlar va takliflar hamda ularga berilgan javoblar.

1-10. Notarial harakatlarni notarial idora binosidan tashqarida amalga oshirish boʻyicha daftar.

1-11. Notarial idora yigʻmajildlari nomenklaturasi.

1-12. Notarial arxivga topshirilgan hujjatlarning roʻyxati.

1-13. Notarial idora faoliyatiga oid hujjatlarni arxivga topshirish dalolatnomalari.

1-14. Xalqaro shartnomalar boʻyicha yozishmalar.

1-15. Shikoyatlar va takliflar daftari.

1-16. Hujjatlarning kirim daftari.

1-17. Hujjatlarning chiqish daftari.

1-18. Boshqa hujjatlar.

2-1. Uy, kvartira, uyning yoki kvartiraning bir qismini boshqa shaxsga oʻtkazish toʻgʻrisidagi shartnomalar va ularni tasdiqlash uchun asos boʻlgan hujjatlar.

2-2. Korxona va boshqa koʻchmas mulklarni boshqa shaxsga oʻtkazish toʻgʻrisidagi shartnomalar.

2-3. Garov (ipoteka) shartnomalari hamda ularni tasdiqlash uchun asos boʻlgan hujjatlar.

2-4. Avtomototransport vositalarini boshqa shaxsga oʻtkazish toʻgʻrisidagi shartnomalar va ularni tasdiqlash uchun asos boʻlgan hujjatlar.

2-5. Koʻchmas mulklarni boshqa shaxsga oʻtkazishni taqiqlab qoʻyish va bekor qilish, shuningdek koʻchmas mulklarni boshqa shaxsga oʻtkazish xatlanganligi va xatlovning olib tashlanganligi bilan bogʻliq hujjatlar.

2-6. Avtomototransport vositalarini boshqa shaxsga oʻtkazishni taqiqlab qoʻyish va bekor qilish, shuningdek avtomototransport vositalarini boshqa shaxsga oʻtkazish xatlanganligi va xatlovning olib tashlanganligi bilan bogʻliq hujjatlar.

2-7. Boshqa shartnomalar.

2-8. Ishonchnomalar.

2-9. Notarial tasdiqlangan vasiyatnomalar.

2-10. Koʻchmas mulk ochiq savdoda sotib olinganligi haqida guvohnoma berishga oid hujjatlar.

2-11. Meros ishlari.

2-12. Er-xotinning umumiy mol-mulkidagi ulushga boʻlgan egalik huquqi haqidagi guvohnomalar (ushbu guvohnoma agar notarial idorada meros ishi ochilishi bilan bogʻliq ravishda tirik qolgan er (xotin)ga berilgan boʻlsa, u meros ishiga tikiladi).

2-13. Fuqaroning tirikligi, muayyan joyda ekanligini, fuqaroning fotosuratda aks ettirilgan shaxs ekanligini tasdiqlash haqidagi hujjatlar.

2-14. Hujjatlar taqdim etilgan vaqtni tasdiqlash.

2-15. Jismoniy va yuridik shaxslarning arizalarini boshqa jismoniy va yuridik shaxslarga topshirish.

2-16. Pul summalari va qimmatli qogʻozlarni depozitga qabul qilish.

2-17. Hujjatlarni saqlash uchun qabul qilib olish boʻyicha hujjatlar.

2-18. Pul toʻlash uchun cheklarni toʻlovga taqdim etish va cheklar boʻyicha pul toʻlanmaganligini tasdiqlash toʻgʻrisidagi hujjatlar.

2-19. Ijro xatlarini yozish va unga tegishli boʻlgan hujjatlar.

2-20. Vekselni protest qilish va unga tegishli hujjatlar.

2-21. Dengiz protestlari haqidagi arizalar.

2-22. Notarial tasdiqlangan hujjatlarning dublikatlarini hamda reyestrlardan koʻchirmalar berishga oid hujjatlar.

2-23. Boshqa notarial harakatlar.

3-1. Tugallanmagan meros ishlari boʻyicha hujjatlar.

3-2. Meros mol-mulkini qoʻriqlash choralarini koʻrish boʻyicha arizalar.

3-3. Notarial harakatni amalga oshirishni kechiktirish yoki rad etish haqidagi qarorlar.

3-4. Hujjatlarni ekspertizaga joʻnatish haqidagi qarorlar.

3-5. Amalga oshirilgan notarial harakatlarni roʻyxatga olish reyestrlari.

3-6. Koʻchmas mulklarni boshqa shaxsga oʻtkazishni taqiqlab qoʻyish va bekor qilish, shuningdek koʻchmas mulklarni boshqa shaxsga oʻtkazish xatlanganligi va xatlovning olib tashlanganligini roʻyxatga olish kitobi.

3-7. Koʻchmas mulklarni boshqa shaxsga oʻtkazishni taqiqlab qoʻyish va bekor qilish, shuningdek koʻchmas mulklarni boshqa shaxsga oʻtkazish xatlanganligi va xatlovning olib tashlanganligini roʻyxatga olish alifbo kitobi.

3-8. Avtomototransport vositalarini boshqa shaxsga oʻtkazishni taqiqlab qoʻyish va bekor qilish, shuningdek avtomototransport vositalarini boshqa shaxsga oʻtkazish xatlanganligi va xatlovning olib tashlanganligini roʻyxatga olish kitobi.

3-9. Avtomototransport vositalarini boshqa shaxsga oʻtkazishni taqiqlab qoʻyish va bekor qilish, shuningdek avtomototransport vositalarini boshqa shaxsga oʻtkazish xatlanganligi va xatlovning olib tashlanganligini roʻyxatga olish alifbo kitobi.

3-10. Meros ishlarini roʻyxatga olish kitobi.

3-11. Meros ishlarini roʻyxatga olish alifbo kitobi.

3-12. Vasiyatnomalarni roʻyxatga olish alifbo kitobi.

3-13. Garov (ipoteka) shartnomalarini roʻyxatga olish reyestr kitobi.

3-14. Garov (ipoteka) shartnomalarini roʻyxatga olish alifbo kitobi.

3-15. Meros mol-mulkni qoʻriqlash boʻyicha arizalar va qimmatliklarni roʻyxatga olish kitobi.

3-16. Notarial tasdiqlangan hujjatlarga tenglashtiriladigan vasiyatnomalar.