1-modda. Oʻzbekiston Respublikasining 1993-yil 3-sentabrda qabul qilingan “Fuqarolarning davlat pensiya taʼminoti toʻgʻrisida”gi 938-XII-sonli Qonuniga (Oʻzbekiston Respublikasi Oliy Kengashining Axborotnomasi, 1993-yil, № 9, 338-modda; Oʻzbekiston Respublikasi Oliy Majlisining Axborotnomasi, 1995-yil, № 12, 269-modda; 1997-yil, № 4-5, 126-modda; 1998-yil, № 9, 181-modda; 1999-yil, № 5, 112-modda; 2001-yil, № 5, 89-modda; 2002-yil, № 4-5, 74-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 5, 152-modda; 2007-yil, № 12, 590, 608-moddalar; 2008-yil, № 12, 640-modda; 2010-yil, № 5, 178-modda, № 9, 334-modda) quyidagi oʻzgartishlar kiritilsin:

1) 8-moddaning matni quyidagi tahrirda bayon etilsin:

“Pensiya tayinlash uchun (7-modda) yetarlicha ish stajiga ega boʻlmagan shaxslarga yoshga doir pensiyalar ushbu Qonun 37-moddasi birinchi qismining “a”, “b”, “v” va “g” bandlarida nazarda tutilgan kamida 5 yil ish staji mavjud boʻlgan taqdirda, bor stajga mutanosib miqdorda (29-modda) tayinlanadi”;

2) 9-moddaning ikkinchi qismi quyidagi tahrirda bayon etilsin:

“Imtiyozli shartlarda pensiya olish huquqiga urush nogironlari, bolalikdan nogiron farzandlarning onalari, liliputlar va pakanalar ham ega”;

3) 12-moddaning:

“v”, “g”, “d”, “e” va “j” bandlari chiqarib tashlansin;

“z” bandi quyidagi tahrirda bayon etilsin:

“z) bolalikdan nogiron farzandlarning onalari ularni sakkiz yoshgacha tarbiyalagan boʻlsa — ish staji kamida 20 yil boʻlgan taqdirda. Basharti, ayol oʻgay oʻgʻil va oʻgay qizni ular 8 yoshga toʻlguniga qadar kamida 5 yil tarbiyalagan boʻlsa, pensiya tayinlashda ular haqiqiy farzandlar bilan teng ravishda hisobga olinadi”;

“i” bandi chiqarib tashlansin;

“k” va “l” bandlari quyidagi tahrirda bayon etilsin:

“k) nogiron bolalar uchun ixtisoslashgan taʼlim muassasalari, “Mehribonlik” uylari, harbiy akademik litseylar, tarbiya koloniyalari oʻqituvchilari — maxsus ish staji kamida 25 yil boʻlgan taqdirda (3-sonli roʻyxat, VII qism);

l) ixtisoslashgan tibbiy muassasalarning shifokorlari va oʻrta tibbiy xodimlari — maxsus ish staji qishloq joyda kamida 25 yil va shaharlarda kamida 30 yil boʻlgan taqdirda (3-sonli roʻyxat, VIII qism)”;

4) 15-moddaning matni quyidagi tahrirda bayon etilsin:

“Nogironlik pensiyalari qonun hujjatlarida belgilangan tartibda I va II guruh nogironlari deb topilgan shaxslarga tayinlanadi”;

5) 18-modda quyidagi tahrirda bayon etilsin:

Pensiya tayinlash uchun yetarlicha ish stajiga ega boʻlmagan (17-modda) umumiy kasallik oqibatidagi I va II guruh nogironlariga nogironlik pensiyasi bor stajga mutanosib miqdorda (29-modda) tayinlanadi”;

6) 22-moddaning matnidagi “toʻliq” degan soʻz chiqarib tashlansin;

7) 26-moddaning:

“a” bandidagi “toʻliq” degan soʻz chiqarib tashlansin;

“v” bandi chiqarib tashlansin;

8) 27-modda birinchi qismining:

birinchi xatboshisidagi “Toʻliq pensiya” degan soʻzlar “Pensiya” degan soʻz bilan almashtirilsin;

“v” bandi chiqarib tashlansin;

9) 28-moddaning “v” bandi chiqarib tashlansin;

10) 29-modda ikkinchi qismining:

beshinchi xatboshisi chiqarib tashlansin;

oltinchi va yettinchi xatboshilari tegishincha beshinchi va oltinchi xatboshilar deb hisoblansin;

11) 30-moddaning ikkinchi qismidagi “a”, “b” yoki “v” bandlarida” degan soʻzlar “a” yoki “b” bandlarida” degan soʻzlar bilan almashtirilsin;

12) 37-modda:

birinchi qismining:

“e” va “j” bandlari quyidagi tahrirda bayon etilsin:

“e) oliy taʼlim muassasalarida, aspiranturada, doktoranturada va klinik ordinaturada kunduzgi oʻqish, shu jumladan chet elda oʻqish;

j) bola 3 yoshga toʻlguncha bolani parvarishlash taʼtillarida boʻlish vaqti, lekin hammasini jamlaganda koʻpi bilan 3 yil”;

“i” va “k” bandlari chiqarib tashlansin;

ikkinchi va uchinchi qismlaridagi “e” — “k” bandlarda” degan soʻzlar “e” — “z” bandlarda” degan soʻzlar bilan almashtirilsin;

13) 49-modda birinchi qismining:

oltinchi xatboshisi chiqarib tashlansin;

yettinchi xatboshisi oltinchi xatboshi deb hisoblansin;

14) 50-modda chiqarib tashlansin;

15) 66-moddaning ikkinchi qismi quyidagi tahrirda bayon etilsin:

“Mulkchilik shaklidan qatʼi nazar, korxonalar va tashkilotlar:

boquvchisini yoʻqotganlik uchun, shuningdek xodimning mehnat vazifalarini bajarishi bilan bogʻliq holda mehnatda mayiblanganligi yoki kasb kasalligiga uchraganligi oqibatidagi nogironlik uchun;

xodim ushbu Qonunning 7-moddasida nazarda tutilgan pensiya yoshiga toʻlguniga qadar mazkur Qonun 12-moddasining “b” bandiga muvofiq tayinlangan pensiyalarni toʻlash xarajatlarining oʻrnini qoplovchi pulni ish haqi toʻlashga moʻljallangan mablagʻlar hisobidan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga oʻtkazadi”.

2-modda. Oʻzbekiston Respublikasining 1995-yil 21-dekabrda qabul qilingan 161-I-sonli Qonuni bilan tasdiqlangan Oʻzbekiston Respublikasining Mehnat kodeksiga (Oʻzbekiston Respublikasi Oliy Majlisining Axborotnomasi, 1996-yil, 1-songa ilova; 1997-yil, № 2, 65-modda; 1998-yil, № 5-6, 102-modda, № 9, 181-modda; 1999-yil, № 1, 20-modda, № 5, 112, 124-moddalar, № 9, 229-modda; 2001-yil, № 5, 89-modda, № 9-10, 182-modda; 2002-yil, № 1, 20-modda, № 9, 165-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 9, 312-modda; 2009-yil, № 12, 470, 471-moddalar) quyidagi oʻzgartish va qoʻshimchalar kiritilsin:

1) 100-moddaning ikkinchi qismi quyidagi mazmundagi 7-band bilan toʻldirilsin:

“7) xodimning pensiya yoshiga toʻlganligi, qonun hujjatlariga muvofiq yoshga doir davlat pensiyasini olish huquqi mavjud boʻlganda”;

2) 102-modda birinchi qismining 1-bandi quyidagi tahrirda bayon etilsin:

“1) mehnat shartnomasi texnologiyadagi, ishlab chiqarish va mehnatni tashkil etishdagi oʻzgarishlar, xodimlar soni (shtati) yoki ish xususiyatining oʻzgarishiga olib kelgan ishlar hajmining qisqarganligi yoxud korxonaning tugatilganligi munosabati bilan (100-modda ikkinchi qismining 1-bandi), shuningdek xodimning pensiya yoshiga toʻlganligi munosabati bilan, qonun hujjatlariga muvofiq yoshga doir davlat pensiyasini olish huquqi mavjud boʻlgan taqdirda (100-modda ikkinchi qismining 7-bandi) bekor qilinganda kamida ikki oy oldin”;

3) 104-moddaning birinchi qismidagi “(100-modda ikkinchi qismining 1, 2, 5 va 6-bandlari)” degan soʻzlar “(100-modda ikkinchi qismining 1, 2, 5, 6 va 7-bandlari)” degan soʻzlar bilan almashtirilsin;

4) 234-moddaning beshinchi qismi “mehnat stajiga” degan soʻzlardan keyin “lekin hammasini jamlaganda koʻpi bilan uch yil” degan soʻzlar bilan toʻldirilsin;

5) 290-moddaning matni quyidagi tahrirda bayon etilsin:

“Nogironlik pensiyasi qonun hujjatlarida belgilangan tartibda I va II guruh nogironlari deb topilgan, sugʻurta qilingan xodimlarga:

mehnatda mayib boʻlganligi yoki kasb kasalligiga chalinganligi tufayli — mehnat faoliyatining muddatidan qatʼi nazar;

boshqa sabablar tufayli — muddati sugʻurta qilingan xodimning nogironlik roʻy bergan vaqtdagi yoshiga bogʻliq tegishli umumiy mehnat stajiga ega boʻlgan taqdirda tayinlanadi”.

3-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

4-modda. Ushbu Qonun 2011-yilning 1-yanvaridan eʼtiboran kuchga kiradi.

Ushbu Qonun 1-moddasi 15-bandining qoidalari 2016-yil 1-yanvardan eʼtiboran amalga kiritiladi.