“Faoliyatning ayrim turlarini litsenziyalash toʻgʻrisida”, “Pirotexnika buyumlari muomalasi tartibga solinishi munosabati bilan Oʻzbekiston Respublikasining ayrim qonun hujjatlariga qoʻshimchalar kiritish toʻgʻrisida”gi Oʻzbekiston Respublikasi qonunlariga muvofiq, shuningdek Oʻzbekiston Respublikasi hududida pirotexnika buyumlari muomalasi sohasida davlat boshqaruvi tizimini takomillashtirish va xavfsizligi taʼminlanishini nazorat qilish maqsadida Vazirlar Mahkamasi qaror qiladi:

1. Quyidagilar:

Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni litsenziyalash toʻgʻrisidagi nizom 1-ilovaga muvofiq;

Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish faoliyatini litsenziyalash boʻyicha Vazirlar Mahkamasi komissiyasi (keyingi oʻrinlarda Komissiya deb ataladi) tarkibi 2-ilovaga* muvofiq tasdiqlansin.

2. Quyidagilar Komissiyaning asosiy vazifalari etib belgilansin:

pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish va ularni utilizatsiya qilishda nazorat qilish, hisobga olish va xavfsizlikni taʼminlashning ishonchli, samarali tizimini yaratish;

pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni litsenziyalash hamda keyinchalik litsenziatlar tomonidan litsenziya talablariga rioya qilinishi yuzasidan monitoring olib borish ishlarini tashkil etish.

3. Komissiyaning ishchi organi funksiyasi Oʻzbekiston Respublikasi Ichki ishlar vazirligiga yuklansin.

Belgilab qoʻyilsinki, Oʻzbekiston Respublikasi Ichki ishlar vazirligi oʻz vakolatlari doirasida:

litsenziya berish toʻgʻrisidagi arizalarni tegishli hujjatlar bilan birga qabul qiladi, litsenziyalar berish yoki litsenziyalar berishni rad etish, litsenziyalarning amal qilishini toʻxtatish yoxud litsenziyalarni bekor qilish toʻgʻrisidagi takliflarni tayyorlaydi va koʻrib chiqish uchun Komissiyaga kiritadi, tegishli ekspert xulosalari tayyorlash uchun ekspertlarni jalb etadi;

litsenziyalarni rasmiylashtiradi, qayta rasmiylashtiradi va beradi, litsenziyalar reyestrini yuritadi, litsenziya bitimlari tuzadi;

litsenziatlar tomonidan litsenziya talablari va shartlariga rioya etilishini nazorat qiladi;

pirotexnika buyumlari muomalasi sohasidagi faoliyatni tartibga soladigan qonun hujjatlarini takomillashtirishga oid takliflar tayyorlaydi;

qonun hujjatlariga muvofiq boshqa funksiyalarni amalga oshiradi.

4. Komissiya ikki hafta muddatda Komissiya toʻgʻrisidagi nizomni ishlab chiqsin va tasdiqlasin.

5. Vazirlar Mahkamasining “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida” 2002-yil 28-iyundagi 236-son qaroriga (Oʻzbekiston Respublikasi QT, 2002-y., 6-son, 36-modda) 1-ilovaning “Oʻzbekiston Respublikasi Vazirlar Mahkamasi” boʻlimiga quyidagi mazmundagi xatboshi qoʻshilsin:

“Pirotexnika buyumlarini (harbiy maqsaddagi mahsulotlardan tashqari) yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish”.

6. Vazirliklar, davlat qoʻmitalari va idoralar:

ikki oy muddatda oʻz normativ-huquqiy hujjatlarini ushbu qarorga muvofiqlashtirsinlar;

idoraviy mansub tashkilotlar hamda boshqa yuridik va jismoniy shaxslar tomonidan ushbu qaror talablariga rioya etilishini nazorat qilish boʻyicha zarur chora-tadbirlar koʻrsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Ushbu Nizom pirotexnika buyumlarini (harbiy maqsaddagi mahsulotlardan tashqari) yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni litsenziyalash tartibini belgilaydi.

2. Quyidagilar boʻyicha faoliyat litsenziyalanadi:

pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish (xavflilikning I — V klasslari);

texnik va maxsus maqsaddagi pirotexnika buyumlaridan foydalanish (xavflilikning III — V klasslari).

3. Maishiy maqsaddagi pirotexnika buyumlari (xavflilikning I-II klasslari) tayyorlovchining yoʻriqnomasi talablariga rioya qilish sharti bilan yakka tartibda foydalanish maqsadida fuqarolar tomonidan erkin sotib olinishi, tashilishi, saqlanishi va foydalanilishi mumkin.

4. Litsenziyalar berish, shuningdek, qonun hujjatlarida belgilangan hollarda ularning amal qilishini toʻxtatish va bekor qilish toʻgʻrisidagi qarorlar Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish faoliyatini litsenziyalash boʻyicha Vazirlar Mahkamasi komissiyasi (keyingi oʻrinlarda Komissiya deb ataladi) tomonidan qabul qilinadi.

5. Oʻzbekiston Respublikasi Ichki ishlar vazirligi (keyingi oʻrinlarda Ishchi organ deb ataladi) Komissiyaning Ishchi organi funksiyasini bajaradi.

6. Ishchi organ litsenziyalar berish yoki litsenziyalarning amal qilish muddatini uzaytirish toʻgʻrisidagi arizalarni tegishli hujjatlar bilan birga qabul qiladi, ular boʻyicha ekspert xulosasi tuzadi, litsenziyalar berish yoki litsenziyalar berishni rad etish, litsenziyalarning amal qilishini toʻxtatish yoxud litsenziyalarni bekor qilish toʻgʻrisidagi takliflarni tayyorlaydi va koʻrib chiqish uchun Komissiyaga kiritadi.

Litsenziyalar berish yoki litsenziyalarning amal qilish muddatini uzaytirish toʻgʻrisidagi arizalarni koʻrib chiqishda Ishchi organ tegishli xulosalar tayyorlash uchun ekspertlarni jalb etish huquqiga ega.

7. Faqat yuridik shaxslar pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni amalga oshirish huquqini beruvchi litsenziyalarning talabgorlari boʻlishi mumkin.

Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni amalga oshirish huquqiga namunaviy (oddiy) litsenziyalar beriladi.

8. Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni amalga oshirish huquqiga litsenziya 5 yil muddatga beriladi. Litsenziya litsenziya talabgorining arizasiga koʻra 5 yildan kam muddatga berilishi mumkin. Litsenziyaning amal qilish muddati litsenziya berilgan kundan boshlab hisoblanadi.

9. Litsenziya talabgorining arizasiga binoan litsenziya umuman faoliyat turiga yoxud uning bir qismiga berilishi mumkin.

10. Quyidagilar pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni amalga oshirishdagi litsenziya talablari va shartlari hisoblanadi:

litsenziat tomonidan pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish sohasidagi qonun hujjatlariga, tegishli texnik reglamentlarga yoki standartlarga, texnika xavfsizligi va mehnatni muhofaza qilish qoidalariga majburiy rioya qilish, jamoat tartibi, yongʻinga qarshi, ekologiya va sanitariya-gigiyena norma va talablarini taʼminlash;

litsenziya talabgorlariga arizada koʻrsatilgan litsenziyalanadigan faoliyat turlarini toʻliq hajmda amalga oshirish, shu jumladan unga mulk huquqi bilan yoki boshqa qonuniy asosda tegishli boʻlgan pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish sohasida amal qiluvchi meʼyorlar, qoidalar va texnik reglamentlarga yoki standartlarga javob beradigan tegishli moddiy-texnik baza (maxsus jihozlangan binolar, inshootlar, joylar, hududlar, koʻtarish-transport asbob-uskunalari, muhandislik kommunikatsiyalari, apparatlar, texnologiyalar, texnologik asbob-uskunalar, elektr energiyasi va suv taʼminoti tarmoqlari, sinash, nazorat qilish, oʻlchash, yashindan himoya qilish, yoritish vositalari, inventar, ventilyatsiya, transport vositalari, hisoblash va tashkiliy texnika, yongʻinga qarshi avtomatika tizimlari, qoʻriqlash, yongʻin va qoʻriqlash-yongʻin signalizatsiyasi, boshqa texnik vositalar) uchun zarur shart-sharoitlar yaratish;

pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish obyektlari ishonchli qoʻriqlanishini, ularni fizik va texnik himoya qilish tadbirlari oʻtkazilishini, ularni transportda tashishda kuzatib borishni, pirotexnika buyumlaridan ruxsat berilmagan holda foydalanishga yoʻl qoʻymaslikka qaratilgan rejim choralari va boshqa choralar koʻrilishini taʼminlash;

faoliyatning litsenziyalanadigan turiga tegishli qism boʻyicha pirotexnika buyumlari va ularning komponentlari mavjudligi va sarfi (ishlab chiqarish, realizatsiya qilish, foydalanish, yoʻq qilish, utilizatsiya qilish) hisobini yuritish;

faoliyatning litsenziyalanadigan turi boʻyicha belgilangan tartibda tasdiqlangan nizomlar, yoʻriqnomalar, metodik hujjatlar va boshqa zarur normativ-texnik hujjatlar mavjudligi;

yongʻin va boshqa favqulodda vaziyatlar yuz bergan taqdirda xodimlarning xatti-harakati rejasini ishlab chiqish;

yongʻinni oʻchirish va boshqa favqulodda vaziyatlar, xavfli moddalar tarqalishi (oqib ketishi)ning oldini olish va lokalizatsiya qilish uchun zarur boʻlgan yakka tartibda va kollektiv himoyalanish vositalari, shuningdek maxsus vositalarning hisob-kitob zaxirasi va turlari mavjudligi hamda ish holatida boʻlishi;

litsenziya talabgorining shtatida tegishli malakali, meʼyorlar va qoidalar talablariga muvofiq sanoat maqsadidagi portlatish materiallari va pirotexnika buyumlari bilan ishlashga ruxsat berilgan texnik xodimlar, shu jumladan tegishli maʼlumotli, maxsus tayyorgarlik koʻrgan va faoliyatning litsenziyalanadigan turlari boʻyicha kamida bir yil ish stajiga ega boʻlgan rahbarlar va muhandis-texnik xodimlar mavjudligi;

faoliyatning litsenziyalanadigan turlari bilan bogʻliq ishlarni bevosita bajaradigan xodimlarni muntazam ravishda (har yili) tibbiy koʻrikdan oʻtkazish;

har yili Ishchi organga hisobot yilidan keyingi yilning 10-yanvaridan kechikmay mazkur Nizomda nazarda tutilgan maʼlumotlar koʻrsatilgan holda faoliyatning litsenziyalanadigan turlari bilan bogʻliq ishlarni bevosita bajaradigan xodimlar roʻyxatini taqdim etish;

qonun hujjatlariga muvofiq “Sanoatgeokontexnazorat” davlat inspeksiyasi tomonidan belgilangan tartibda va muddatlarda faoliyatning litsenziyalanadigan turlari bilan bogʻliq ishlarni bevosita bajaradigan ishlab chiqarish rahbarlari, xodimlar, ishlab chiqarish nazorati xizmatlari mutaxassislarini tayyorlash, qayta tayyorlash va attestatsiyadan oʻtkazish;

litsenziyada va litsenziya bitimida koʻrsatilgan, shuningdek litsenziya bitimida koʻrsatilgan obyektlar manzillari boʻyicha faoliyatni amalga oshirish (pirotexnika buyumlarini tashish va ulardan foydalanish boʻyicha faoliyat bundan mustasno);

“Oʻzstandart” agentligi tomonidan akkreditatsiya qilingan sertifikatlash organlari bergan muvofiqlik sertifikatlariga, shuningdek texnik reglamentlarga yoki standartlarga muvofiq ishlab chiqilgan texnik shartlar va qoʻllash boʻyicha yoʻriqnomalarga ega boʻlgan pirotexnika buyumlarini tashish, realizatsiya qilish va ulardan foydalanish (pirotexnika buyumlarini tashish, realizatsiya qilish va ulardan foydalanish boʻyicha faoliyatda).

11. Pirotexnika buyumlari muomalasi sohasida faoliyatning ayrim turlarini amalga oshirishda qoʻshimcha litsenziya talablari va shartlariga quyidagilar kiradi:

a) pirotexnika buyumlarini yaratish boʻyicha:

“Oʻzstandart” agentligi tomonidan akkreditatsiya qilingan asbob-uskunalar, priborlar, kimyoviy reaktivlar bilan jihozlangan hamda texnik reglamentlarda yoki standartlarda nazarda tutilgan koʻrsatkichlarning barcha zarur fizik-kimyoviy, portlash va yongʻin-texnik tekshirishlarini oʻtkazish uchun sinov usullariga oid normativ-texnik hujjatlarga ega boʻlgan ixtisoslashtirilgan laboratoriyalarning mavjudligi;

pirotexnika buyumlarining nazorat sinovlarini oʻtkazish uchun maxsus jihozlangan hudud (bino)ning mavjudligi;

normativ-texnik talablarga muvofiq boʻlgan va pirotexnika buyumlarini ishlab chiqarish, saqlash, tashish, realizatsiya qilish, ulardan foydalanish, ularni yoʻq qilish va utilizatsiya qilishda ularning xavfsizligi va isteʼmol xossalarini taʼminlash uchun axborotning toʻliq berilishini taʼminlaydigan konstruktorlik-texnologik va foydalanish hujjatlari jamlami (chizmalar, texnik shartlar, texnologik yoʻriqnomalar, qoʻllash boʻyicha yoʻriqnomalar)ni yuritish;

b) pirotexnika buyumlarini ishlab chiqarish boʻyicha:

litsenziya talabgori tomonidan xavfli ishlab chiqarish obyektlarining sanoat xavfsizligi toʻgʻrisidagi qonun hujjatlarida belgilangan hollarda va tartibda qoʻllaniladigan texnik qurilmalarni hisobga olish, identifikatsiyalash, sertifikatlash tizimini joriy etish va sanoat xavfsizligini ekspertizadan oʻtkazish, qonun hujjatlariga muvofiq boshqa choralar koʻrish;

“Oʻzstandart” agentligi tomonidan belgilangan tartibda tayyor mahsulotning metrologik taʼminoti, kirish nazorati va sifat nazoratini tashkil etish;

ishlab chiqariladigan pirotexnika buyumlarining har bir turi boʻyicha guvohnomalar, sertifikatlar, texnologik yoʻriqnomalar, texnik shartlar, qoʻllash boʻyicha yoʻriqnomalar hamda texnik reglamentlarga yoki standartlarga muvofiq ishlab chiqilgan boshqa ilova qilinadigan hujjatlar mavjudligi;

buyumlarni ishlab chiqarishda shu jumladan import boʻyicha olib kelingan, texnik reglamentlar yoki standartlar talablariga javob beradigan va qonun hujjatlarida belgilangan tartibda berilgan muvofiqlik sertifikatlariga ega boʻlgan portlash va yongʻin chiqishi xavfi boʻlgan xom ashyo va komponentlardan foydalanish;

foydalaniladigan binolar, inshootlar va ombor obyektlari qurollangan holda qoʻriqlanishini taʼminlash;

rahbarning rejim boʻyicha oʻrinbosari mavjudligi;

v) pirotexnika buyumlarini tashish boʻyicha:

tashish yoʻnalishlari va sxemalari ishlab chiqilishi va yoʻl harakati xavfsizligi hududiy organlari bilan kelishilishini taʼminlash;

yoʻl harakati xavfsizligi organlari tomonidan xavfli yuklarni tashishga qoʻyish toʻgʻrisidagi guvohnomalar rasmiylashtirilgan holda maxsus (ixtisoslashtirilgan) avtotransport vositalarining belgilangan tartibda texnik koʻrikdan oʻtganligini va texnik sozligini tasdiqlaydigan hujjatlarning mavjudligi;

avtotransport vositalarining yoʻl harakati xavfsizligi organlari tomonidan qurollangan holda kuzatib borilishini taʼminlash;

qonun hujjatlarida belgilangan hollarda pirotexnika buyumlarining ayrim turkumlarini ichki ishlar organlarining ruxsatnomalari asosida tashish (shahar va tuman ichida tashishlar bundan mustasno);

g) pirotexnika buyumlarini saqlash boʻyicha — bazis va oraliq (sarflash) omborlari hududi va binolarining qurollangan holda qoʻriqlanishini taʼminlash;

d) pirotexnika buyumlarini realizatsiya qilish boʻyicha:

16 yoshga toʻlmagan shaxslarga pirotexnika buyumlari sotilishiga yoʻl qoʻymaslik;

xaridorlardan texnik va maxsus maqsaddagi pirotexnika buyumlarini sotib olish uchun ruxsatnoma koʻrsatilishini talab qilish, qonun hujjatlariga muvofiq bunday ruxsatnoma talab qilinmaydigan hollar bundan mustasno;

e) pirotexnika buyumlaridan foydalanish boʻyicha:

pirotexnika buyumlaridan foydalanish joyi (obyekti)ni, vaqtini va shart-sharoitlarini ichki ishlar va davlat yongʻin nazorati hududiy organlari bilan oldindan kelishish;

12. Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni amalga oshirishda shaxslarning quyidagi toifalarini yollash yoki ishga jalb etishga yoʻl qoʻyilmaydi:

oʻn sakkiz yoshga toʻlmagan shaxslar;

maxsus oʻqitilmagan yoki qonun hujjatlariga muvofiq malaka talablariga javob bermaydigan shaxslar;

doimiy yashash joyiga ega boʻlmagan shaxslar;

ularga nisbatan jinoiy ish qoʻzgʻatilgan shaxslar;

qasddan jinoyat sodir etganligi uchun sudlangan shaxslar;

jinoiy jazoni oʻtayotgan shaxslar;

bir yil mobaynida jamoat tartibiga yoki boshqaruvning belgilangan tartibiga tajovuz qilgan huquqbuzarliklarni sodir etganligi uchun maʼmuriy javobgarlikka takroran tortilgan shaxslar;

ruhiy kasalliklar, giyohvandlik, toksikomaniya, alkogolizm bilan bogʻliq holda dispanser hisobida turgan shaxslar.

13. Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatni amalga oshirish uchun zarur boʻlgan rahbarlar va xodimlarga qoʻyiladigan eng kam malaka talablari Oʻzbekiston Respublikasi Ichki ishlar vazirligi bilan kelishilgan holda “Sanoatgeokontexnazorat” davlat inspeksiyasi hamda Oʻzbekiston Respublikasi Oliy va oʻrta maxsus taʼlim vazirligi tomonidan belgilanadi.

14. Litsenziya bitimida mazkur Nizomning 10-11-bandlarida sanab oʻtilganlardan kelib chiquvchi aniq litsenziya talablari va shartlari nazarda tutilishi mumkin.

15. Litsenziya olish uchun litsenziya talabgori quyidagi hujjatlarni taqdim etadi:

litsenziya berish toʻgʻrisida ariza, unda quyidagilar koʻrsatiladi: yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasidagi hisob raqami, litsenziyalanayotgan faoliyatning (uning bir qismining) yuridik shaxs tomonidan amalga oshirilishi moʻljallanayotgan turi, litsenziya talablari va shartlariga litsenziyalanayotgan faoliyat turining alohida hududdagi muayyan obyektlarda amalga oshirilishi kiradigan hollarda esa — ular joylashgan joy;

yuridik shaxsning davlat roʻyxatidan oʻtkazilganligi toʻgʻrisidagi guvohnomaning nusxasi;

faoliyatning litsenziyalanayotgan turlari boʻyicha koʻrsatilgan barcha zarur ishlarni litsenziya talablari va shartlariga muvofiq amalga oshirish uchun moddiy-texnika baza toʻgʻrisidagi maʼlumotlar (ichki ishlar organlarining texnikani qoʻriqlash punkti tomonidan qoʻriqlashga qabul qilinganlik shartnomasi hamda pirotexnika buyumlari omborining pasporti, pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish yoki utilizatsiya qilish uchun inshootlar va asbob-uskunalarni qabul qilish dalolatnomasi, yashindan himoya qilish, qoʻriqlash-yongʻin signalizatsiyasi vositalarini foydalanishga qabul qilish dalolatnomalari);

xodimning litsenziyalanayotgan faoliyat turlari bilan bogʻliq yongʻinlar va boshqa halokatli vaziyatlarni bartaraf etish boʻyicha harakatlar rejasi;

faoliyatning litsenziyalanayotgan turlariga ruxsat etilgan yuridik shaxs rahbarlari va xodimlari roʻyxati, unda ularning familiyasi, ismi, otasining ismi, tugʻilgan sanalari va joylari, doimiy yashash joylari, egallab turgan lavozimlari, belgilangan tartibda hududiy ichki ishlar organlari bilan kelishilgan faoliyatning litsenziyalanayotgan turlari yoki sanoat maqsadidagi portlovchi materiallar bilan ishlash boʻyicha staji koʻrsatiladi;

faoliyatning litsenziyalanayotgan turlari bilan bogʻliq ishlarni bevosita bajaruvchi yuridik shaxs rahbarlari va xodimlarining malakaviy tarkibi toʻgʻrisidagi maʼlumotlar, unga tegishli hujjatlar (oliy va/yoki oʻrta kon-texnika boʻyicha yoxud boshqa oʻrta maxsus maʼlumot toʻgʻrisidagi diplomlarning, mehnat daftarchalarining, xavfli yuklarni tashishga ruxsat berish toʻgʻrisidagi guvohnomalarning, malaka toifasi berish, oxirgi 5 yilda malaka oshirish va/yoki maxsus tayyorgarlik kurslaridan oʻtganlik toʻgʻrisidagi sertifikatlar va hujjatlarning notarial tasdiqlangan nusxalari);

xodimlar shtatida ruhiy kasalliklar, giyohvandlik, toksikomaniya, alkogolizm sababli dispanser hisobida turuvchilarning, shuningdek qasddan sodir etilgan jinoyat uchun muddati oʻtalmagan yoki olib tashlanmagan sudlanganligi boʻlgan, jamoat tartibini yoki belgilangan boshqaruv tartibini saqlash sohasida jinoiy yoxud bir yil mobaynida takroran maʼmuriy javobgarlikka tortilgan xodimlar yoʻqligi haqidagi maʼlumotlar, ularga tegishli tibbiyot muassasalari va hududiy ichki ishlar organlarining maʼlumotnomalari ilova qilinadi;

hududiy ichki ishlar organlarining va “Sanoatgeokontexnazorat” davlat inspeksiyasi mintaqaviy kon-texnika inspeksiyalarining moddiy-texnikaviy bazaning, amalga oshirilgan rejim-qoʻriqlash choralarining, hisobga olish, texnologik jarayonlarni tashkil etishning, texnologik asbob-uskunalarning va xodimlarni tayyorlash darajasining arizada koʻrsatilgan litsenziyalanayotgan faoliyat turlari (pirotexnika buyumlarini tashish va ulardan foydalanish faoliyati bundan mustasno) boʻyicha belgilangan talablarga muvofiqligi toʻgʻrisidagi xulosalari;

Davlat yongʻinga qarshi xizmat hududiy organlarining moddiy-texnikaviy bazaning, texnologik jarayonlarning, texnologik asbob-uskunalar holatining va xodimlar tayyorlash darajasining arizada koʻrsatilgan litsenziyalanayotgan faoliyat turlari (pirotexnika buyumlarini tashish va ulardan foydalanish boʻyicha faoliyat bundan mustasno) boʻyicha belgilangan talablarga muvofiqligi toʻgʻrisidagi xulosasi;

Oʻzbekiston Respublikasi Davlat tabiatni muhofaza qilish qoʻmitasining hamda sanitariya-epidemiologiya nazorati organlarining moddiy-texnikaviy bazaning, texnologik jarayonlarning, texnologik asbob-uskunalar holatining va xodimlar tayyorlash darajasining arizada koʻrsatilgan litsenziyalanayotgan faoliyat turi boʻyicha (pirotexnika buyumlarini tashish, realizatsiya qilish va ulardan foydalanish boʻyicha faoliyat bundan mustasno) tabiatni muhofaza qilish, ekologiya va sanitariya-gigiyena norma va qoidalariga muvofiqligi toʻgʻrisidagi xulosalari;

litsenziya talabgorida haydovchilarni tibbiy koʻrikdan oʻtkazish va avtotransport vositalarini texnik koʻrikdan oʻtkazish punktlari mavjudligi toʻgʻrisidagi maʼlumotlar yoxud litsenziya talabgori tomonidan tegishli soha tashkiloti bilan oʻziga tibbiy va texnik koʻrikni oʻtkazish imkoniyatini berish toʻgʻrisida tuzilgan shartnoma nusxasi (pirotexnika buyumlarini tashish boʻyicha faoliyat uchun);

litsenziya talabgori tomonidan uning arizasi koʻrib chiqilganligi uchun yigʻim toʻlanganligini tasdiqlovchi hujjat.

Ishchi organ litsenziya berish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlari va axborotlar bundan mustasno.

16. Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

17. Hujjatlar Ishchi organga litsenziya talabgori tomonidan bevosita yoxud ularning olinganligi toʻgʻrisidagi bildirishnoma bilan pochta aloqa vositasi orqali yetkazib beriladi.

Hujjatlar Ishchi organning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda ariza beruvchiga topshiriladi (yuboriladi).

18. Ishonchli boʻlmagan yoki buzilgan maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

19. Litsenziya talabgorining arizasi koʻrib chiqilganligi uchun qonun hujjatlarida belgilangan eng kam oylik ish haqining ikki baravari miqdorida yigʻim undiriladi. Ariza koʻrib chiqilganligi uchun yigʻim summasi Ishchi organning hisob raqamiga oʻtkaziladi. Litsenziya talabgori berilgan arizadan voz kechgan yoki litsenziyalovchi organ tomonidan litsenziya berishni rad etish toʻgʻrisida qaror qabul qilingan taqdirda toʻlangan yigʻim summasi qaytarilmaydi.

20. Pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish, utilizatsiya qilish boʻyicha faoliyatni litsenziyalash ushbu Nizomga ilova qilinayotgan sxemaga muvofiq amalga oshiriladi.

Litsenziya talabgoriga litsenziya berish yoki litsenziya berishni rad etish toʻgʻrisidagi qaror litsenziya talabgorining arizasi Ishchi organ tomonidan barcha zarur hujjatlar bilan birga olingan kundan boshlab oʻttiz kundan ortiq boʻlmagan muddatda qabul qilinadi.

21. Ishchi organ litsenziya talabgorining arizasi olingan kundan boshlab yigirma kundan ortiq boʻlmagan muddatda hujjatlarni koʻrib chiqadi, ular boʻyicha ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga tasdiqlash uchun Komissiyaga taqdim etadi.

Ishchi organ litsenziya talabgorining litsenziya talablari va shartlariga muvofiqligini aniqlash uchun yuqorida koʻrsatib oʻtilgan muddat doirasida:

litsenziya talabgorida litsenziyalanayotgan faoliyat turini amalga oshirish uchun mavjud shart-sharoitlarni joyiga borib baholash;

hujjatlarni ekspertizadan oʻtkazish uchun shartnoma asosida tegishli sohaning yuqori malakali mutaxassislarini qoʻshimcha ravishda jalb etish huquqiga ega.

Komissiya Ishchi organning taklifi olingandan keyin oʻn kundan ortiq boʻlmagan muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi. Komissiya qarorlari istisno hollarda soʻrov oʻtkazish yoʻli bilan qabul qilinishi mumkin.

22. Ishchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank muassasasining nomi va bank muassasasidagi hisob raqami, davlat boji toʻlash muddati koʻrsatilgan holda yozma shaklda, shuningdek litsenziat imzolashi uchun litsenziya bitimi ilova qilingan holda yuboriladi (topshiriladi).

23. Litsenziya berilganligi va uning amal qilish muddati uzaytirilganligi uchun qonun hujjatlarida belgilangan eng kam oylik ish haqining oʻn baravari miqdorida davlat boji olinadi.

Davlat boji summasi respublika budjetiga oʻtkaziladi.

24. Litsenziat va Ishchi organning oʻzaro huquqlari va majburiyatlarini belgilovchi litsenziya bitimida quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan faoliyat turining nomi;

litsenziyalanayotgan faoliyat turi (pirotexnika buyumlarini tashish va ulardan foydalanish boʻyicha faoliyat bundan mustasno) amalga oshiriladigan manzil (manzillar);

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini Ishchi organ tomonidan nazorat qilish tartibi;

pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyatning muayyan turlarini amalga oshirish xususiyatlariga taalluqli boshqa shart-sharoitlar.

Litsenziya qayta rasmiylashtirilgan taqdirda litsenziya bitimiga tegishli oʻzgartirishlar va qoʻshimchalar kiritiladi yoxud yangi litsenziya bitimi tuziladi.

Litsenziya bitimi ikki nusxada — litsenziat va Ishchi organ uchun bir nusxadan tuziladi.

25. Litsenziyalar qatʼiy hisobda turadigan hujjatlar hisoblanadigan, hisobga olish seriyasiga, tartib raqamiga va himoyalanganlik darajasiga ega boʻlgan maxsus blankalarda rasmiylashtiriladi.

Litsenziya blankalari namunalari Ishchi organ tomonidan ishlab chiqiladi, qonun hujjatlarida belgilangan tartibda Komissiya tomonidan tasdiqlanadi va Ishchi organ buyurtmasi boʻyicha “Davlat belgisi” davlat-ishlab chiqarish birlashmasida bosmaxona usulida tayyorlanadi. Ishchi organ rahbari litsenziyalar blankalarining hisobga olinishi, saqlanishi va ulardan maqsadli foydalanilishi uchun javob beradi.

Litsenziyalar Ishchi organ tomonidan rasmiylashtiriladi va Komissiya raisi (uning oʻrinbosari) tomonidan imzolanadi.

26. Litsenziya litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda rasmiylashtiriladi va beriladi.

Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida Ishchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, Komissiya litsenziyani bekor qilish toʻgʻrisida qaror qabul qilishga haqlidir.

27. Litsenziya berish faqat “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

Litsenziya talabgori litsenziya berishni rad etish toʻgʻrisidagi qaror, shuningdek Ishchi organning mansabdor shaxsi xatti-harakatlari (harakatsizligi) yuzasidan qonun hujjatlarida belgilangan tartibda shikoyat qilish huquqiga ega.

28. Litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi). Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

29. Litsenziya berishni rad etish uchun asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi. Bunda Ishchi organ hujjatlar qayta taqdim etilgandan keyin besh kun mobaynida litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga Komissiyaga tasdiqlash uchun taqdim etadi.

Komissiya Ishchi organ taklifi olingandan keyin besh kun muddatda uni koʻrib chiqadi va qabul qilingan qaror protokolini tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi.

Ishchi organ qabul qilingan qaror toʻgʻrisida litsenziya talabgorini ikki kun muddatda xabardor qiladi.

Litsenziya talabgorlarining arizalari takroran koʻrib chiqilganligi uchun yigʻim undirilmaydi.

Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

30. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda Ishchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

31. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

32. Litsenziyani qayta rasmiylashtirishda Ishchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish Ishchi organ tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi Ishchi organning hisob raqamiga oʻtkaziladi.

33. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza Ishchi organga litsenziyaning amal qilish muddati oʻtgunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

34. Litsenziya qayta rasmiylashtirilganda yoki uning amal qilish muddati uzaytirilganda litsenziat ilgari berilgan litsenziyani Ishchi organga qaytarib beradi.

35. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra dublikat berilishi mumkin. Bunda litsenziat davriy nashrlarda yoʻqolgan litsenziyaning haqiqiy emasligi toʻgʻrisida xabar chop ettirishi, shuningdek chop etilgan xabarni ishchi organga taqdim etishi kerak.

Dublikat berishda litsenziyalovchi organ tomonidan “Dublikat” belgisi qoʻyilgan yangi litsenziya beriladi, unda oldingi litsenziyada koʻrsatilgan amal qilish muddati mavjud boʻlishi kerak.

Litsenziya dublikatini berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi Ishchi organning maxsus hisob raqamiga oʻtkaziladi.

36. Litsenziat tomonidan litsenziya talablari va shartlariga rioya etilishi yuzasidan nazoratni Ishchi organ qonun hujjatlarida belgilangan tartibda amalga oshiradi.

37. Litsenziya talablari va shartlariga rioya etilishi yuzasidan nazoratni amalga oshirishda Ishchi organ oʻz vakolatlari doirasida:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziatning ularga rioya etishini qonunda belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

aniqlangan buzilishlarni bartaraf etish yuzasidan litsenziatga bajarish majburiy boʻlgan koʻrsatma yuborish, unda bunday buzilishlarni bartaraf etish uchun zarur boʻladigan muddatlarni belgilash;

litsenziyaning amal qilishini toʻxtatish yoki uni bekor qilish toʻgʻrisida Komissiyaga koʻrib chiqish uchun taklif kiritish;

bartaraf etilmagan aniqlangan qonun buzilishlari pirotexnika buyumlari yoʻqolishi yoki oʻgʻirlanishi xavfini tugʻdiradigan hollarda — ularni zudlik bilan boshqa saqlash joylariga tashib ketish;

qonun hujjatlariga muvofiq boshqa huquqlardan foydalanish.

Xoʻjalik yurituvchi subyektlar tomonidan pirotexnika buyumlarini yaratish, ishlab chiqarish, tashish, saqlash, realizatsiya qilish, ulardan foydalanish, ularni yoʻq qilish va utilizatsiya qilish boʻyicha faoliyat litsenziya olmasdan amalga oshirilgan holatlar aniqlangan materiallarni qonun hujjatlarida nazarda tutilgan choralar koʻrish uchun davlat soliq xizmati organlariga belgilangan tartibda yuborish.

38. Litsenziya talablari va shartlariga rioya etilishini tekshirish chogʻida Ishchi organning tekshiruvchi xodimlari tomonidan ikki nusxada dalolatnoma tuziladi, uning bir nusxasi litsenziatga beriladi, ikkinchi nusxasi Ishchi organda qoladi.

39. Litsenziyaning amal qilishini toʻxtatib turish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-moddasida nazarda tutilgan hollarda va tartibda Ishchi organ tomonidan amalga oshiriladi.

40. Litsenziyaning amal qilishini toʻxtatish va litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 23-24-moddalarida nazarda tutilgan hollarda va tartibda Komissiya qaroriga koʻra amalga oshiriladi.

41. Litsenziyaning amal qilishini toʻxtatib turish, toʻxtatish yoki litsenziyani bekor qilish toʻgʻrisidagi qaror yuzasidan sudga shikoyat qilinishi mumkin. Bunday qarorning asossiz ekanligi sud tomonidan eʼtirof etilgan taqdirda, ushbu qarorni qabul qilgan organ litsenziat oldida litsenziat koʻrgan zarar miqdorida javob beradi.

42. Ishchi organ litsenziyalar reyestrini yuritadi. Reyestrda quyidagilar koʻrsatiladi:

yuridik shaxsning nomi, uning tashkiliy-huquqiy shakli, pochta manzili, telefoni, rahbarining familiyasi, ismi, otasining ismi;

litsenziya berilgan sana, litsenziya blankasining seriyasi va tartib raqami;

litsenziyaning amal qilish muddati;

faoliyatning litsenziyalanayotgan turi (turlari);

faoliyatning litsenziyalanayotgan turi amalga oshiriladigan manzil (manzillar) (pirotexnika buyumlarini tashish va ulardan foydalanish boʻyicha faoliyat bundan mustasno), ish telefoni, faks;

litsenziyani qayta rasmiylashtirish, uning amal qilish muddatini uzaytirish, toʻxtatib turish va tiklashning asoslari va sanasi;

litsenziyaning amal qilishini toʻxtatish yoki litsenziyani bekor qilish asoslari va sanasi;

dublikat berish asoslari va sanasi.

Litsenziat uch kun muddatda Ishchi organga litsenziyalar reyestrida koʻrsatilgan maʼlumotlardagi har qanday oʻzgarishlar toʻgʻrisida axborot taqdim etishi shart.

43. Litsenziyalarning reyestrlarida mavjud boʻlgan maʼlumotlar litsenziyalovchi organning veb-saytida joylashtiriladi va tanishish uchun ochiq boʻladi.

44. Ushbu Nizom buzilishida aybdor boʻlgan shaxslar qonun hujjatlarida belgilangan tartibda javob beradilar.