LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Mamlakatimiz fuqarolarining vijdon erkinligi borasidagi konstitutsiyaviy huquqlarini ta’minlash, muborak haj amallarini ado etishda qulaylik, imtiyoz va zarur sharoitlarni yaratishga davlat tomonidan yordam ko‘rsatish maqsadida Vazirlar Mahkamasi qaror qiladi:
1. O‘zbekiston musulmonlari idorasining 2003-yilda haj safarini tashkil etish to‘g‘risidagi taklifi qabul qilinsin.
Mahalliy hokimiyatlar safar oldidan fuqarolarimizning yurtimizdagi muqaddas qadamjo va osori-atiqalarni ziyorat etishlarida kerakli sharoitlar yaratib bersin.
2. Muborak haj safarini tashkil qilish, ziyoratchilar ro‘yxatini respublika “Ma’naviyat va ma’rifat” Kengashi, “Mahalla” va “Nuroniy” jamg‘armalarining joylardagi bo‘linmalari vakillari ishtirokida keng jamoatchilik fikrini e’tiborga olgan holda tuzish, musulmonlarning talab-ehtiyojlarini adolatli ravishda qondirish mas’uliyati O‘zbekiston musulmonlari idorasi rahbariyati, uning joylardagi mutasaddi vakillari zimmasida ekani, Vazirlar Mahkamasi huzuridagi Din ishlari bo‘yicha qo‘mita (Sh. Minovarov) ularga yordam ko‘rsatishi e’tiborga olinsin.
3. “O‘zbekiston havo yo‘llari” milliy aviakompaniyasi (V. Tyan) 2003-yil yanvar-fevral oylarida ziyoratchilarning haj safariga borib kelishlari uchun qulay sharoitlar yaratish, Toshkent—Jidda—Toshkent yo‘nalishidagi aviachiptalarning narxini arzonlashtirish choralarini ko‘rsin.
4. O‘zbekiston Respublikasi Ichki ishlar vazirligi (Z. Almatov), Tashqi ishlar vazirligi (A. Komilov), Davlat bojxona qo‘mitasi (R. Haydarov) O‘zbekiston musulmonlari idorasining taqdimiga ko‘ra ziyoratchilarning safar hujjatlarini belgilangan tartibda rasmiylashtirishni ta’minlasinlar.
5. O‘zbekiston Respublikasi Sog‘liqni saqlash vazirligi (F. Nazirov) Saudiya Arabistoni haj ishlari vazirligi tomonidan qo‘yilgan tibbiy talablar va mamlakatning iqlim sharoitini hisobga olgan holda ziyoratchilarni ko‘rikdan o‘tkazishni, haj davrida ularga yordam ko‘rsatishni tashkil etsin.
6. O‘zbekiston Respublikasi Ichki ishlar vazirligi (Z. Almatov) va Milliy xavfsizlik xizmati (R. Inoyatov) O‘zbekiston Respublikasi fuqarolarining noqonuniy yo‘llar bilan haj ziyoratiga borishi oqibatida ro‘y berishi mumkin bo‘lgan ko‘ngilsiz voqealarning oldini olish hamda ziyoratchilarning umumiy xavfsizligini ta’minlash chora-tadbirlarini belgilasinlar.
7. O‘zbekiston Respublikasi Markaziy banki (F. Mullajonov) va Tashqi iqtisodiy faoliyat milliy banki (Z. Mirxo‘jayev) O‘zbekiston musulmonlari idorasi tasdiqlagan ro‘yxatga binoan hajga ketayotgan fuqarolar uchun xorijiy valyuta almashtirish bilan bog‘liq masalalarni hal etsinlar.
8. O‘zbekiston musulmonlari idorasi hamda ommaviy axborot vositalariga muborak haj ziyoratining mohiyati, talablari va uni amalga oshirishning tartib-qoidalari hamda uning yakunlari, shuningdek haj ziyorati bilan bog‘liq barcha masalalarni keng va oshkora yoritib borish tavsiya etilsin.