LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Chirchiq shahrida 1977-yildan kuzatila boshlangan III va IV aholi yashash joylaridagi yerning cho‘kish holatlari keyingi ikki yilda ancha tezlashdi va tabiiy ofat tusini ola boshladi. 1993-yilning o‘zida jiddiy deformatsiyalar tufayli odamlar yashaydigan uchta uy avariya holatiga kelib qolganligi sababli mazkur uylarda yashovchi aholini boshqa joyga ko‘chirishga majbur bo‘lindi.
Yerning cho‘kish holatlari tezlashishi sabablarini mufassal tadqiq qilish, ularni bartaraf qilish hamda shikastlangan bino va inshootlarning, poydevorlarini va deformatsiyaga uchragan konstruksiyalarini mustahkamlash chora-tadbirlarini ishlab chiqish va amalga oshirish maqsadida Vazirlar Mahkamasi qaror qiladi:
1. O‘zbekiston Respublikasi Davlat arxitektura va qurilish qo‘mitasi (G‘aniyev) o‘ziga qarashli institutlar va tashkilotlar kuchi bilan Chirchiq shahrining III va IV aholi yashash joylarida kompleks loyiha-qidiruv ishlarini amalga oshirib, yerning cho‘kish holatlarini bartaraf qilish, turarjoy, ijtimoiy-madaniy maishiy obyektlarni, muhandislik kommunikatsiyalarini qayta qurish va tiklash hamda tevarak atrofni obodonlashtirishga oid tavsiyalarni ishlab chiqsin va loyiha-smeta hujjatlarini taqdim etsin.
“O‘zsanoatxo‘jalikqurilish” korporatsiyasi ushbu chora-tadbirlarni amalga oshiruvchi bosh pudratchi etib belgilansin.
2. Toshkent viloyati hokimligi (Ikromov) Chirchiq shahrining III va IV aholi yashaydigan joylaridagi ayrim binolar va inshootlar, muhandislik kommunikatsiyalarini tiklash hamda qayta qurish va tevarak atrofni obodonlashtirish ishlarini 1994-yilda kapital qurilish uchun ajratilgan umumiy hajmlar hisobiga amalga oshirsin. 1994-yilning birinchi yarim yili yakunlari bo‘yicha, zaruriyat bo‘lsa, Vazirlar Mahkamasiga taklif kiritilsin.
3. “O‘zistiqbolstat” davlat qo‘mitasi (Golishev), Moliya vazirligi (Guskova) kapital qurilish istiqbol parametrlarida Toshkent viloyati hokimligiga, asoslovchi materiallar taqdim etilishiga ko‘ra Chirchiq shahrining III va IV aholi yashash joylarida tadqiqot, loyiha-qidiruv, tiklash va qayta qo‘rish ishlarini bajarish uchun maqsadli markazlashgan mablag‘larni nazarda tutsin.
4. Toshkent viloyati hokimligi, O‘zbekiston Respublikasi Davlat arxitektura va qurilish qo‘mitasi Chirchiq shahrining III va IV aholi yashash joylarida tadqiqot, obyektlarni loyihalash hamda qurish ishlarida xatoliklarga yo‘l qo‘ygan, irrigatsiya tarmoqlaridan va inshootlardan zarur darajada foydalanishni ta’minlamagan mansabdor shaxslarning javobgarligi masalasini ko‘rib chiqsinlar.