LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
O‘zbekiston Respublikasi xalqlarining qardoshlarcha do‘stligini yanada mustahkamlash, milliy madaniyatlarining bir-birini o‘zaro boyitishi jarayonini chuqurlashtirish, Toshkent shahri madaniyati va san’ati yutuqlarini Qoraqalpog‘iston Respublikasida keng targ‘ib qilish maqsadida Vazirlar Mahkamasi qaror qiladi:
1. Qoraqalpog‘iston Respublikasi Oliy Kengashining Qoraqalpog‘istonda Toshkent shahri madaniyati kunlarini o‘tkazish to‘g‘risidagi taklifi ma’qullanib, 1993-yil noyabr oyining ikkinchi yarmida o‘tkazilsin.
2. Qoraqalpog‘iston Respublikasida Toshkent shahri madaniyati kunlari ishtirokchilarining soni 150 kishidan iborat qilib belgilansin.
3. Toshkent shahar hokimligi (A. Fozilbekov)ga Qoraqalpog‘iston Respublikasida Toshkent shahri madaniyati kunlarini o‘tkazish bo‘yicha tegishli chora-tadbirlarni ko‘rish topshirilsin.
4. O‘zbekiston Respublikasi Davlat matbuot qo‘mitasi va “Sharq” nashriyot-matbaa konserni zarur bosma materiallarni chop etishni ta’minlasinlar.
5. “O‘zbekiston havo yo‘llari” milliy aviakompaniyasi, O‘rta Osiyo Temir yo‘l boshqarmasi madaniyat kunlari qatnashchilarining Qoraqalpog‘iston Respublikasiga borishi va kelishi bilan bog‘liq masalalarni chop etsinlar.
6. O‘zbekiston Milliy axborot agentligi, O‘zbekiston Davlat teleradiokompaniyasi, gazetalar tahririyatlariga Toshkent shahri madaniyati kunlarini tayyorlash va o‘tkazish jarayonini keng yoritish tavsiya etilsin.
7. Qoraqalpog‘iston Respublikasida Toshkent shahri madaniyati kunlarini o‘tkazish munosabati bilan sarflangan mablag‘lar taqdim etilgan sarf-xarajatlar ro‘yxatiga binoan Toshkent shahri mahalliy budjeti va Qoraqalpog‘iston Respublikasi budjeti hisobidan qoplansin.