LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Kuchli jala va seysmik ta’sir natijasida 1991-yilning 4-may kuni Toshkent viloyatining Angren shahridagi Jigariston posyolkasi rayonida tabiiy ofat — ko‘chki yuz berdi va u moddiy zarar yetkazdi. Uy-joylar, xo‘jalik imoratlari, kommunikatsiyalar, yo‘llar va boshqa inshootlar zararlandi. Qurbon bo‘lganlar bor.
Vazirlar Mahkamasi qayd qiladiki, Jigariston posyolkasida yuz bergan ko‘chki tasodifiy va kutilmagan hodisa emas. 1990-yilning aprel oyidayoq yoki voqea yuz berishidan bir yil oldin O‘zSSJ Davlat geologiya qo‘mitasining injenerlik-geologiya xizmati 33 xonadondan aholini xavfsiz joyga darhol ko‘chirish haqida xalq deputatlari Angren shahar Soveti (o‘rtoq Yusupaliyev)ga rasmiy xatlar yo‘llagan edi.
O‘zSSJ Vazirlar Mahkamasi 1990-yilning 5-may kuni Toshkent viloyat ijroiya qo‘mitasi (o‘rtoq Saydaliyev)ga va “Sredazugol” ishlab chiqarish birlashmasi (o‘rtoq Leleko)ga bu masalani darhol ko‘rib chiqib, qabul qilingan chora-tadbirlar haqida jumhuriyat Hukumatini 10 kun muddat ichida xabardor qilishni topshirgan edi. Lekin hech qanday amaliy chora-tadbirlar ko‘rilmadi.
Bu masalaga noma’lum sabablarga ko‘ra xavfli zonadan ko‘chishni rad etgan Jigariston aholisining gaplariga uchib, Angren shahar ijroiya qo‘mitasi rahbarlari mazkur masalaga murosasozlik bilan, befarq munosabatda bo‘lganliklarini alohida qayd qilish kerak.
Mazkur rahbarlar sansalorlik, ishda uyushqoqsizlikka yo‘l qo‘ydilar, bu bilan ana shu fojianing oldini olish yuzasidan o‘z vaqtida chora ko‘rilmadi.
Zarar ko‘rgan aholiga zarur yordam ko‘rsatish va tabiiy ofat oqibatlarini tugatish uchun hukumat komissiyasi va favqulodda jumhuriyat shtabi tuzildi. Odamlar xavfli zonadan darhol ko‘chirildi, ularga uy-joy berildi, moddiy yordam ko‘rsatildi. Ovqatlanish va tibbiy yordam ko‘rsatish, jamoat tartibini saqlash, kundalik ehtiyoj mollari va qurilish materiallari bilan savdo qilish punktlari tashkil etildi.
1. Xalq deputatlari Angren shahar Sovetining raisi o‘rtoq S.Y.Yusupaliyevning va Angren shahar ijroiya qo‘mitasining raisi o‘rtoq A.M.Aliqulovning bo‘lib o‘tgan voqea yuzasidan javobgarliklari haqidagi masalani xalq deputatlari Toshkent viloyat Sovetida ko‘rib chiqish zarur va maqsadga muvofiq deb hisoblansin.
2. Kechiktirib bo‘lmaydigan masalalarni hal etishda sustkashlikka yo‘l qo‘yganligi va yuzaga kelgan xavfli vaziyatda odamlar taqdiriga befarq munosabatda bo‘lganligi uchun “Sredazugol” ishlab chiqarish birlashmasining bosh direktori o‘rtoq A.I.Leleko qattiq ogohlantirilsin. O‘rtoq A.I.Leleko mansabdor shaxslarning javobgarlik darajasini aniqlab, Vazirlar Mahkamasiga axborot bersin.
3. Toshkent viloyat ijroiya qo‘mitasi, Angren shahar ijroiya qo‘mitasi, “Sredazugol” ishlab chiqarish birlashmasi 2 hafta muddat ichida odamlarning ko‘chki xavfi bo‘lgan zonada bundan buyon xavf-xatarsiz yashashini ta’minlaydigan chora-tadbirlarni ishlab chiqsinlar.
4. Vazirliklar, idoralar, Toshkent viloyat ijroiya qo‘mitasi, Angren shahar ijroiya qo‘mitasi, “Sredazugol” ishlab chiqarish birlashmasi hamda Jigariston posyolkasidagi tabiiy ofat — ko‘chki oqibatlarini tugatishda qatnashuvchi boshqa tashkilotlarning birinchi rahbarlari zimmasiga qisqa muddat ichida barcha zarur kuchlar, texnika va moddiy resurslarni to‘plab, sentyabr oyida 50 ta yakka tartibdagi uy-joylarni foydalanishga topshirish vazifasi yuklansin, ular suv, elektr energiya, aloqa va yo‘llar bilan ta’minlansin, shuningdek, 1176 o‘quvchi o‘rniga ega bo‘lgan umumiy ta’lim maktabi, 280 o‘rinli bolalar bog‘chasi qurilishi boshlab yuborilsin.
5. O‘zSSJ Davlat qurilish ishlari qo‘mitasi (o‘rtoq Temkin), O‘zSSJ Davlat geologiya qo‘mitasi (o‘rtoq Shoyoqubov), “O‘zgidromet” (o‘rtoq Chub) xalq deputatlari mahalliy Sovetlarining ijroiya qo‘mitalari, vazirliklar va idoralar bilan birgalikda 2 oy muddat ichida aholi yashaydigan joylarni, sanoat korxonalarini va boshqa xalq xo‘jaligi obyektlarini tabiatning xavfli hurujidan himoya qilish masalalarini kompleks hal etishga qaratilgan takliflarni tayyorlab Vazirlar Mahkamasiga taqdim etsinlar.
6. O‘zSSJ Davlat qurilish ishlari qo‘mitasi manfaatdor tashkilotlar ishtirokida 3 oy muddat ichida ilmiy-ishlab chikarish kompleksi (O‘zbekiston SSJ “GlavINJzashchita”)ni tashkil etish haqida taklif kiritsin, u prognozlash, loyihalash, himoya inshootlarini qurish va ishga tushirish, ekzogen jarayonlarning oldini olish yuzasidan profilaktik chora-tadbirlarni o‘tkazish masalalarini hal qilishi kerak.