LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Vazirlar Mahkamasi ta’kidlaydiki, qurilishda va binokorlik materiallari sanoatida Davlat qabulini joriy etish to‘g‘risida SSJ Ittifoqi va Jumhuriyat rahbar tashkilotlari qabul qilgan qarorlar kutilgan samarani bermadi hamda ishga tushiriladigan uy-joylar va ijtimoiy-madaniy, maishiy obyektlar sifatiga sezilarli ta’sir ko‘rsatmadi.
Davlat qabulining joriy qilinishi foydalanishga qabul qilingan uy-joylarga ko‘chib kirish muddatlarini ham qisqartirmadi.
Jumhuriyatda qurilish sifati ustidan yagona davlat nazorati sistemasini tashkil etish maqsadida Vazirlar Mahkamasi qaror qiladi:
1. O‘zbekiston SSJ Oliy Kengashi qurilish, arxitektura, uy-joy kommunal xo‘jaligi va obodonlashtirish qo‘mitasining xulosasini hisobga olib, O‘zbekiston SSJ xalq deputatlari guruhining O‘zbekiston SSJdagi qurilishlarda davlat qabulini tugatish to‘g‘risidagi taklifi qabul qilinsin. O‘zbekiston SSJ Davlat qurilish nazorati, Davlat qurilish ishlari qo‘mitasi, Qoraqalpog‘iston MSSJ organlari va xalq deputatlari mahalliy Sovetlarining tegishli boshqaruv organlari amalga oshirgan qurilishda sifatni nazorat qilishning ilgari mavjud bo‘lgan tartibi tiklansin.
2. O‘zbekiston SSJning qurilish vazirliklari va idoralari, jumhuriyat hududida joylashgan boshqa pudrat tashkilotlari o‘zlariga davlat korxonasi huquqi berilganligini hisobga olib, qurilish ishlab chiqarishining barcha texnologik darajalaridagi qurilish-montaj ishlarida yuksak sifatni ta’minlovchi barcha zarur, shu jumladan, iqtisodiy chora-tadbirlarni ko‘rsinlar, O‘zSSJ Davlat qurilish ishlari qo‘mitasi esa Davlat qurilish nazoratining joylardagi xo‘jalik hisobidagi organlari faoliyati ustidan nazoratni kuchaytirsin. Ularning ishi aniq va muntazam muvofiqlashtirib borilsin.
3. Qoraqalpog‘iston MSSJ Vazirlar Kengashi, viloyat ijroiya qo‘mitalari, Toshkent shahar ijroiya qo‘mitasi, O‘zSSJ Davlat qurilish ishlari qo‘mitasi, O‘zSSJ Davlat moddiy-texnika ta’minoti qo‘mitasi Davlat qurilish nazoratining mahalliy organlarini yuqori malakali mutaxassislar bilan to‘ldirsinlar va ularning moddiy bazasini mustahkamlasinlar. Ushbu organlarni zarur nazorat asboblari va apparatlar bilan jihozlash masalalarini hal qilsinlar.
Tugatilgan davlat qabuli organlari xodimlarini ishga joylashtirish masalalari belgilangan tartibda hal qilinsin.
4. SSJI Davlat standartlar qo‘mitasining O‘zbekiston jumhuriyat boshqarmasi SSJI Davlat standartlar qo‘mitasining 1990-yil 26-dekabrdagi ko‘rsatmasiga muvofiq 1990-yil 30-dekabrdagi buyrug‘i bilan sanoatda Davlat qabuli organlarini tugatganligi ma’lumot uchun qabul qilinsin.