“Sudlar to‘g‘risida”gi O‘zbekiston Respublikasi Qonunining 47-moddasiga asoslanib, O‘zbekiston Respublikasi Oliy xo‘jalik sudining Plenumi qaror qiladi:

I. O‘zbekiston Respublikasi Oliy xo‘jalik sudi Plenumining 1993-yil 3-iyundagi “Mahsulotlar, tovarlar yetkazib berishda kamomad chiqishi bilan bog‘liq nizolarni hal etish amaliyoti to‘g‘risida”gi 17-sonli qaroriga quyidagi o‘zgartishlar kiritilsin:

1) kirish qismidagi “Hakamlik sudi va xo‘jalik nizolarini hal etish tartibi to‘g‘risida”gi O‘zbekiston Respublikasi Qonunining 24-moddasiga amal qilingan holda” so‘zlari “Sudlar to‘g‘risida”gi O‘zbekiston Respublikasi Qonunining 47-moddasiga asoslanib” so‘zlari bilan almashtirilsin;

2) 1 -band quyidagi tahrirda bayon etilsin:

“1. Mahsulotlar (tovarlar) yetkazib berishda kamomad chiqishi bilan bog‘liq nizolarni hal etishda xo‘jalik sudlari O‘zbekiston Respublikasi Fuqarolik kodeksi, “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi O‘zbekiston Respublikasi Qonuni va mahsulotlar (tovarlar) yetkazib berish hamda ularni qabul qilish qoidalarini tartibga soluvchi boshqa qonun hujjatlarini qo‘llashlari lozim”;

3) 2-band quyidagi tahrirda bayon etilsin:

“2. Xo‘jalik sudlarining e’tibori har bir ishni sud majlisiga puxta tayyorlash, kamomad paydo bo‘lishining sabablari va joyini aniqlash uchun zarur bo‘lgan hamma dalillarni taraflardan taqdim etilishini, sud majlisida nizolashayotgan taraflarning rahbarlarini yoki ular tomonidan vakil qilingan, mahsulotni yuklab jo‘natish, transportda tashish va qabul qilib olish masalalaridan xabardor bo‘lgan, mas’ul vakillarning ishtirokini ta’minlash lozimligiga qaratilsin.

Zarur hollarda sudlar mahsulotlar (tovarlar)ni yuklab jo‘natish va qabul qilishda qatnashgan shaxslardan tushuntirishlar talab qilish yoki ularni xo‘jalik sudi majlisiga chaqirish huquqiga ega. Bunday tushuntirishlar sudlar tomonidan ish bo‘yicha boshqa dalillar bilan bir qatorda baholanishi zarur”;

4) 4-bandning birinchi xatboshisi “Sudlarga tushuntirilsinki,” so‘zlari bilan to‘ldirilsin.

II. O‘zbekiston Respublikasi Oliy xo‘jalik sudi Plenumining 1994-yil 5-yanvardagi “Meva-sabzavot mahsulotlarini yetkazib berish va temir yo‘l orqali tashish chog‘idagi kamomad hamda buzilib qolishi bilan bog‘liq nizolarni hal qilish amaliyoti to‘g‘risida”gi 22-sonli qaroriga quyidagi o‘zgartishlar kiritilsin:

1) kirish qismidagi “O‘zbekiston Respublikasi “Sudlar to‘g‘risida”gi Qonunining 46-moddasiga asoslanib” so‘zlari ““Sudlar to‘g‘risida”gi O‘zbekiston Respublikasi Qonunining 47-moddasiga asoslanib” so‘zlari bilan almashtirilsin;

2) 1-banddagi “O‘zbekiston Respublikasi qonunlariga, xalq iste’moli mollarini yetkazib berish to‘g‘risidagi Nizomning” so‘zlari “O‘zbekiston Respublikasi Fuqarolik kodeksi, “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi O‘zbekiston Respublikasi Qonuni” so‘zlari bilan almashtirilsin;

3) 9-bandning ikkinchi xatboshisidagi “tovar ekspertizalari inspeksiyasi yoki byurosidan” so‘zlari “O‘zstandart” agentligi tomonidan tegishli tartibda akkreditatsiya qilingan mutaxassislar, tashkilotlar (sertifikatlash, yukni ortib jo‘natishdan oldin inspeksiya qiladigan organ)” so‘zlari bilan almashtirilsin.

III. O‘zbekiston Respublikasi Oliy xo‘jalik sudi Plenumining 1996-yil 1-martdagi “O‘zbekiston Respublikasi Oliy xo‘jalik sudi qoshidagi Ilmiy-maslahat kengashi to‘g‘risidagi Nizomni tasdiqlash haqida”gi 48-sonli qarori bilan tasdiqlangan Ilmiy-maslahat kengashi to‘g‘risidagi Nizomga quyidagi o‘zgartishlar kiritilsin:

1) 1-bandi birinchi xatboshisidagi “82-moddasiga binoan” degan so‘zlar “81-moddasiga binoan” so‘zlari bilan almashtirilsin;

2) 1-bandi uchinchi xatboshisidagi “Kengashga O‘zbekiston Respublikasi Oliy xo‘jalik sudi raisining o‘rinbosari boshchilik qiladi” degan so‘zlari “Kengashga O‘zbekiston Respublikasi Oliy xo‘jalik sudining raisi boshchilik qiladi” degan so‘zlar bilan almashtirilsin;

3) 1-bandining to‘rtinchi xatboshisi quyidagi tahrirda bayon etilsin:

“Kengashning yalpi yig‘ilishlari kengash raisi tomonidan zaruriyat tug‘ilganda chaqiriladi”;

4) 2-bandining 2.2-kichik bandi quyidagi tahrirda bayon etilsin:

“2.2. Xo‘jalik nizolarini ko‘rib chiqadigan O‘zbekiston Respublikasi xo‘jalik sudlari oldiga qo‘yilgan vazifalarni hal etish bo‘yicha ilmiy yondashuvlar ishlab chiqish va sud amaliyotini nazariy jihatdan umumlashtirish”;

5) 2-bandi 2.3-kichik bandining birinchi xatboshisidagi “xo‘jalik nizolarini hal etuvchi organlar” so‘zlari “xo‘jalik sudlari” so‘zlari bilan almashtirilsin;

6) 2-bandi 2.3-kichik bandining ikkinchi xatboshisidagi “xo‘jalik nizolarini hal etuvchi organlar” so‘zlari “xo‘jalik sudlari” so‘zlari bilan almashtirilsin;

7) 4-bandi 4.2-kichik bandining “xo‘jalik nizolarini hal etuvchi organ” so‘zlari “xo‘jalik sudlari” so‘zlari bilan almashtirilsin;

8) 7-bandning birinchi xatboshisidagi “O‘zbekiston Respublikasi Oliy xo‘jalik sudi va xo‘jalik nizolarini hal etuvchi boshqa organlar” so‘zlari “Xo‘jalik sudlari” so‘zlari bilan almashtirilsin;

9) 11-bandidagi “Qoraqalpog‘iston Respublikasi va viloyat xo‘jalik sudlarining raislari, boshqa xodimlari” so‘zlari “Qoraqalpog‘iston Respublikasi, viloyatlar va Toshkent shahar xo‘jalik sudlari raislari” so‘zlari bilan almashtirilsin;

10) 13-bandining ikkinchi xatboshisi chiqarilsin;

11) 14-bandi quyidagi tahrirda bayon etilsin:

“Ilmiy-maslahat kengashi ishini texnik jihatdan ta’minlash O‘zbekiston Respublikasi Oliy xo‘jalik sudi Plenumining kotibiyati tomonidan amalga oshiriladi”.

IV. O‘zbekiston Respublikasi Oliy xo‘jalik sudi Plenumining 1999-yil 4-martdagi “O‘zbekiston Respublikasining “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi Qonunini xo‘jalik sudlari amaliyotida qo‘llashning ayrim masalalari haqida”gi 103-sonli qaroriga quyidagi o‘zgartish kiritilsin:

16-bandidagi “Xo‘jalik sudlari tomonidan O‘zbekiston Respublikasi Fuqarolik kodeksining javobgarlik to‘g‘risidagi qoidalarini qo‘llashning ayrim masalalari haqida”gi 1999-yil 5-fevraldagi 77-son” so‘zlari “2007-yil 15-iyundagi “Majburiyatlarni bajarmaganlik yoki lozim darajada bajarmaganlik uchun mulkiy javobgarlikni belgilovchi fuqarolik qonun hujjatlarini qo‘llashning ayrim masalalari haqida”gi 163-sonli” so‘zlari bilan almashtirilsin.

V. O‘zbekiston Respublikasi Oliy xo‘jalik sudi Plenumining 1997-yil 28-fevraldagi “O‘zbekiston Respublikasi xo‘jalik sudlarining malaka darajasiga ega bo‘lgan sudya va xodimlariga uzoq muddatli xizmati uchun qo‘shimcha haq to‘lash tartibi to‘g‘risida”gi Nizomni tasdiqlash to‘g‘risida”gi 65-sonli qarori o‘z kuchini yo‘qotgan deb hisoblansin.

VI. O‘zbekiston Respublikasi Oliy xo‘jalik sudi Plenumining 2002-yil 26-iyuldagi “O‘zbekiston Respublikasi Fuqarolik kodeksining kafillik to‘g‘risidagi me’yorlarini qo‘llash bilan bog‘liq nizolarni hal qilishning ayrim masalalari haqida”gi 104-sonli qarori o‘z kuchini yo‘qotgan deb hisoblansin.

VII. O‘zbekiston Respublikasi Oliy xo‘jalik sudi Plenumining 2004-yil 23-iyuldagi “Nazorat qiluvchi organlar faoliyatini tartibga solishga oid qonun hujjatlarini amaliyotda qo‘llashning ayrim masalalari haqida”gi 116-sonli qarori o‘z kuchini yo‘qotgan deb hisoblansin.