Oʻzbekiston Respublikasining “Fuqarolarning davlat pensiya taʼminoti toʻgʻrisida”gi Qonuni (Oʻzbekiston Respublikasi Oliy Kengashining Axborotnomasi, 1993-yil., 9-son, 338-modda), Oʻzbekiston Respublikasi Prezidentining 2009-yil 30-dekabrdagi PF-4161-son “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida”gi Farmoni (Oʻzbekiston Respublikasi qonun hujjatlari toʻplami, 2009-y., 52-son, 559-modda), 2009-yil 30-dekabrdagi PQ-1251-son “Oʻzbekiston Respublikasi Mehnat va aholini ijtimoiy muhofaza qilish vazirligi tuzilmasini takomillashtirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 52-son, 562-modda) hamda 2009-yil 30-dekabrdagi PQ-1252-son “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi tashkiliy tuzilmasini takomillashtirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 52-son, 563-modda) qarorlariga muvofiq buyuraman:

1. Oʻzbekiston Respublikasi Mehnat vazirligi va Oʻzbekiston Respublikasi Ijtimoiy taʼminot vazirligi tomonidan 1998-yil 7-yanvarda 8/04-01, 32/01-son bilan tasdiqlangan Mehnat daftarchalarini yuritish tartibi toʻgʻrisidagi yoʻriqnomaga (roʻyxat raqami 402, 1998-yil 29-yanvar) ilovaga muvofiq oʻzgartirish va qoʻshimchalar kiritilsin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. 1.2-bandda:

birinchi, ikkinchi va uchinchi xatboshilaridagi “tuman (shahar) ijtimoiy taʼminot boʻlimlari” degan soʻzlar “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlari” degan soʻzlar bilan almashtirilsin;

toʻrtinchi xatboshisidagi “tuman (shahar) ijtimoiy taʼminot boʻlimlarida” degan soʻzlar “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlarida” degan soʻzlar bilan almashtirilsin;

quyidagi mazmundagi xatboshilar bilan toʻldirilsin:

“Oʻzbekiston Respublikasi fuqarolarining qonun hujjatlariga muvofiq hukumatlararo, idoralararo shartnomalar (bitimlar) asosida va xususiy mehnat kontraktlari boʻyicha faqat Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligi va Fuqarolarni chet ellarda ishga joylashtirish boʻyicha xoʻjalik hisobidagi mintaqaviy byurolarning koʻmagida chet ellarda amalga oshirgan mehnat faoliyati toʻgʻrisidagi maʼlumotlarga koʻra mehnat daftarchalariga tegishli yozuvlar kiritiladi.

Ilk bor oʻzining mehnat faoliyatini chet ellarda boshlagan fuqarolarga mehnat daftarchalari Tashqi mehnat migratsiyasi masalalari agentligi tomonidan rasmiylashtirib beriladi”.

2. 2.16-bandning birinchi xatboshisidagi, 2.21-bandning birinchi xatboshisidagi va 3.2-banddagi “tuman (shahar) ijtimoiy taʼminot boʻlimlari” degan soʻzlar “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlari” degan soʻzlar bilan almashtirilsin.

3. II-boʻlim 3-bob quyidagi mazmundagi 2.17¹-band bilan toʻldirilsin:

“2.17¹. Oʻzbekiston Respublikasi fuqarolarining mehnat daftarchalariga chet elda (shartnoma asosida) ishlagan ish davri haqidagi yozuvlar, Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga belgilangan sugʻurta badallari toʻlangan taqdirda, agar davlatlararo bitimlarda oʻzgacha qoidalar nazarda tutilmagan boʻlsa, Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligi tomonidan tegishli maʼlumotnomalarga asoslanib kiritiladi.

Fuqarolarning chet elda (shartnoma asosida) ishlagan ish davri umumiy ish staji jamlanib, yaʼni qaysi korxonada, qaysi davrda va qaysi lavozimlarda ishlagan yillari, oylari va kunlari umumiy tarzda yoziladi.

Hujjat bilan tasdiqlangan (shartnoma, ish beruvchi tomonidan berilgan mehnat faoliyati toʻgʻrisidagi maʼlumotnoma, Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining sugʻurta badali toʻlanganligi toʻgʻrisida maʼlumotnoma) va belgilangan tartibda rasmiylashtirilgan umumiy ish staji mehnat faoliyatining davrlari boʻyicha quyidagicha yoziladi:

1-ustunda — tartib raqami koʻrsatiladi;

2-ustunda — dastlab chet elda ishga qabul qilingan sana.

3-ustunda — xodim ishlagan xorijiy mamlakat, korxona nomi va lavozimi yoziladi.

4-ustunda — qaysi hujjatga asosan yozilganligi (shartnoma yoki ish beruvchi tomonidan berilgan mehnat faoliyati toʻgʻrisidagi maʼlumotnomaning sanasi, tartib raqami) qayd qilinadi”.

4. 2.19-band uchinchi xatboshisi quyidagi tahrirda bayon qilinsin:

“Ishsiz shaxs deb eʼtirof etilgan fuqarolar mahalliy mehnat organiga belgilangan muddatda roʻyxatdan oʻtish uchun kelganlarida mehnat daftarchalarini mahalliy mehnat organi xodimiga koʻrsatishlari shart”.

5. 2.22-banddagi “ijtimoiy taʼminot organlari” degan soʻzlar “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi tuman (shahar) boʻlimlari” degan soʻzlar bilan almashtirilsin.

6. 5.1-band birinchi xatboshisi quyidagi tahrirda bayon qilinsin:

“Yangi mehnat daftarchalari (dublikati)ni berishda ish beruvchi xodimdan qonun hujjatlarida belgilangan eng kam ish haqining 10 foizigacha miqdorida haq olish huquqiga ega”.

7. Mazkur oʻzgartirish va qoʻshimchalar Oʻzbekiston Respublikasi Moliya vazirligi hamda Oʻzbekiston Kasaba uyushmalari Federatsiyasi Kengashi bilan kelishilgan.