Oʻzbekiston Respublikasi Prezidentining 2008-yil 8-iyuldagi PQ-910-son “Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009 — 2014-yillarga moʻljallangan Davlat dasturi toʻgʻrisida”gi qarori (Oʻzbekiston Respublikasi qonun hujjatlari toʻplami, 2008-y., 28-son, 267-modda) va Oʻzbekiston Respublikasi Vazirlar Mahkamasining 2005-yil 21-dekabrdagi 275-son “Xalq taʼlimi xodimlari mehnatiga haq toʻlashni takomillashtirilgan tizimini tasdiqlash toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2005-y., 51-son, 379-modda) muvofiq Oʻzbekiston Respublikasi Mehnat va aholini ijtimoiy muhofaza qilish vazirligi, Xalq taʼlimi vazirligi hamda Vazirlar Mahkamasi huzuridagi Davlat test markazi qaror qiladilar:

1. Oʻzbekiston Respublikasi Mehnat va aholini ijtimoiy muhofaza qilish vazirligi, Xalq taʼlimi vazirligi va Vazirlar Mahkamasi huzuridagi Davlat test markazining 2005-yil 30-dekabrdagi 105, 42 va 01-357-son qarori (roʻyxat raqami 1541, 2006-yil 18-yanvar) (Oʻzbekiston Respublikasi qonun hujjatlari toʻplami, 2006-y., 3-son, 20-modda) bilan tasdiqlangan Xalq taʼlimi xodimlari asosiy lavozimlarining malaka tavsiflariga ilovaga muvofiq qoʻshimchalar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Xalq taʼlimi xodimlari asosiy lavozimlarining malaka tavsiflari quyidagi mazmundagi 31—34-paragraflar bilan toʻldirilsin:

101. Bolalar musiqa va sanʼat maktabi direktorining lavozim majburiyatlariga quyidagilar kiradi:

a) maktab faoliyatiga umumiy rahbarlik qiladi, oʻquv-tarbiya jarayonlari va taʼlim tizimini rivojlantirish hamda takomillashtirishning, shuningdek maktabda taʼlim sifatini yaxshilashning asosiy yoʻnalishlarini belgilaydi, davlat va jamoat tashkilotlarida maktab manfaatlarini himoya qiladi;

b) maktabning yillik oʻquv-tarbiya rejasini tasdiqlaydi va pedagogik jamoa tomonidan ushbu rejaning amalga oshirilishini nazorat qiladi;

v) musiqiy va badiiy pedagogikaning yangi yutuqlarini oʻquv jarayoniga tatbiq etishga rahbarlik qiladi;

g) oʻz vakolati doirasida maktabning moliya-xoʻjalik faoliyatini amalga oshiradi;

d) maktabning pedagog kadrlarga boʻlgan ehtiyojini aniqlaydi, kadrlarni tanlash va joy-joyiga qoʻyishni amalga oshiradi, pedagog kadrlar attestatsiyasini tashkil qiladi;

e) maktabda taʼlim olayotgan oʻquvchilarning bilimlarini ularning bilimiga qoʻyilgan davlat talablariga mos kelishini taʼminlaydi va nazorat qiladi;

j) oʻquvchilarni maktabga qabul qilish, keyingi sinfga oʻtkazish va taʼlim olganlik toʻgʻrisidagi hujjatlar berishni tashkil qiladi;

z) ota-onalar, mahalla qoʻmitalari va jamoat tashkilotlari bilan oʻquv-tarbiyaviy ishlarni takomillashtirish boʻyicha hamkorlikni tashkil qiladi;

i) xodimlarga mehnat qilish va malakasini oshirish uchun sharoitlar yaratadi, maktab faoliyati boʻyicha hisobotlar tuzadi, buyruqlar chiqaradi, maktab xodimlarining vazifalari va majburiyatlarini belgilaydi, ularni moddiy va maʼnaviy jihatdan ragʻbatlantiradi hamda oʻz vakolati doirasida intizomiy jazo choralarini qoʻllaydi;

k) mehnat muhofazasi va texnika xavfsizligi qoidalariga rioya qilinishini taʼminlaydi.

102. Bolalar musiqa va sanʼat maktabi direktori taʼlim sohasidagi va bolalar huquqlarini tartibga soluvchi normativ-huquqiy hujjatlarni, Oʻzbekiston Respublikasi Xalq taʼlimi vazirligining bolalar musiqa va sanʼat maktablari faoliyatini tashkil etish va yaxshilashga oid qarorlari, buyruqlari va farmoyishlarini, maktab faoliyati va uni rivojlantirishning iqtisodiy asoslarini, jamoani boshqarishning samarali usullarini, oʻquv va tarbiya sifati, kadrlarni tanlash va joy-joyiga qoʻyish usullari, ularning malakasini oshirish va qayta tayyorlash tartibini, maktab faoliyatiga qoʻyilgan sanitariya-gigiyena talablarini hamda texnika xavfsizligi va yongʻin xavfsizligini taʼminlash qoidalarini bilishi kerak.

103. Bolalar musiqa va sanʼat maktabi direktori quyidagilarni bajara olishi kerak:

a) maktab faoliyatini tahlil qila olishni, muammolarini aniqlash va ularni hal qilishning samarali yoʻllarini topishni;

b) maktab faoliyatini zamonaviy texnologiyalar asosida monitoring qilishni, oʻquv jarayonida ilgʻor pedagogik va axborot texnologiyalarini qoʻllay bilishni;

v) maktabni rivojlantirish dasturini ishlab chiqishni, shartnomalar tuzishni, nizomlar, qoidalar va lavozim yoʻriqnomalarini ishlab chiqishni;

g) pedagogik jamoada qulay psixologik va ijodiy muhit yaratishni.

104. Bolalar musiqa va sanʼat maktabi direktori lavozimiga quyidagi malaka talablari qoʻyiladi:

a) musiqa va sanʼat sohasi boʻyicha kamida bakalavr darajasidagi oliy maʼlumot;

b) besh yildan kam boʻlmagan pedagogik ish staji;

v) malaka toifasi — kamida ikkinchi toifali oʻqituvchi.

105. Bolalar musiqa va sanʼat maktabining maʼnaviy-maʼrifiy va oʻquv ishlari boʻyicha direktor oʻrinbosarining lavozim majburiyatlariga quyidagilar kiradi:

a) maʼnaviy-axloqiy tarbiyaviy ishlarni va oʻquv jarayonini tashkil qiladi, oʻquv-tarbiyaviy rejalar va dasturlarning bajarilishini taʼminlaydi, tarbiyaviy ishlarning yillik va oylik rejalarini ishlab chiqadi;

b) kadrlarni tanlash hamda ularni joy-joyiga qoʻyishda ishtirok etadi;

v) pedagog kadrlarga metodik yordam koʻrsatadi, pedagog kadrlarning pedagogik faoliyatini tahlil qilishni tashkil qiladi va amalga oshiradi;

g) pedagog kadrlar faoliyatining oylik, choraklik va yillik rejalarini, musiqa va sanʼat yoʻnalishlari boʻyicha kalendar ish rejalarini tasdiqlaydi, shuningdek yakka tartibdagi va guruh mashgʻulotlari jadvalini tuzadi hamda ularning bajarilishini nazorat qiladi, pedagog kadrlarning ish vaqti hisobini olib boradi, darslar, imtihonlar jadvali va boshqa oʻquv tadbirlarini ishlab chiqadi;

d) oʻquvchilarning oʻzlashtirishi va xulqining monitoringini amalga oshiradi;

e) yakka tartibdagi va guruh jurnallarining belgilangan tartibda yuritilishini taʼminlaydi, oʻquv-tarbiyaviy ishlar ahvoli va natijalari boʻyicha hisobotlar tuzadi;

j) oʻquv yili davomida pedagog kadrlarning oʻquv yuklamalaridagi oʻzgarishlarni muvofiqlashtirib boradi;

z) direktor boʻlmaganda uning vazifasini bajaradi.

106. Bolalar musiqa va sanʼat maktabining maʼnaviy-maʼrifiy va oʻquv ishlari boʻyicha direktor oʻrinbosari Oʻzbekiston Respublikasi Xalq taʼlimi vazirligining bolalar musiqa va sanʼat maktablari faoliyatini tashkil etish va yaxshilashga oid qarorlari, buyruqlari va farmoyishlarini, musiqiy taʼlimning davlat talablari mazmunini, jamoaga rahbarlik qilishning metodlarini, kadrlarni tanlash va joy-joyiga qoʻyish usullarini, ularning malakasini oshirish va qayta tayyorlash tartibini bilishi kerak.

107. Bolalar musiqa va sanʼat maktabining maʼnaviy-maʼrifiy va oʻquv ishlari boʻyicha direktor oʻrinbosari quyidagilarni bajara olishi kerak:

a) maktabni boshqarishning tashkiliy tarkibini tuzishni, metodik tavsiyalar, oʻquv rejalari va dasturlarini ishlab chiqishni;

b) maktab faoliyatini zamonaviy texnologiyalar asosida monitoring qilishni, oʻquv jarayonida ilgʻor pedagogik va axborot texnologiyalarini qoʻllay bilishni;

v) pedagogik jamoada qulay psixologik va ijodiy iqlim yaratishni.

108. Bolalar musiqa va sanʼat maktabining maʼnaviy-maʼrifiy va oʻquv ishlari boʻyicha direktor oʻrinbosari lavozimiga quyidagi malaka talablari qoʻyiladi:

a) musiqa va sanʼat sohasi boʻyicha kamida bakalavr darajasidagi oliy maʼlumot;

b) uch yildan kam boʻlmagan pedagogik ish staji;

v) malaka toifasi — kamida ikkinchi toifali oʻqituvchi.

109. Bolalar musiqa va sanʼat maktabining pedagog kadrlarining lavozim majburiyatlariga quyidagilar kiradi:

a) yosh avlodning isteʼdodini har tomonlama kamol toptirish, milliy va jahon madaniyatining durdona namunalariga tayanib yoshlarning estetik didini oʻstirish hamda yuksak maʼnaviy ruhda tarbiyalash ishlarini amalga oshiradi;

b) pedagogik axloq normalariga rioya qiladi, oʻquvchilarni tarbiyalash va oʻqitish masalalari boʻyicha ularning ota-onalari bilan individual uchrashuvlar va suhbatlar oʻtkazadi;

v) oʻquvchilarni koʻrik-tanlovlar, olimpiadalar va festivallarda ishtirok etishga tayyorlaydi;

g) yakka darslarni olib boruvchi pedagog kadrlar har bir oʻquvchiga yarim yillik shaxsiy va oʻquv yili boshida nazariy fanlar boʻyicha taqvimiy ish rejalarini tuzadi.

110. Pedagog kadrlar Oʻzbekiston Respublikasi Xalq taʼlimi vazirligining bolalar musiqa va sanʼat maktablari faoliyatini tashkil etish va yaxshilashga oid qarorlari, buyruqlari va farmoyishlarini, musiqiy taʼlimga oid davlat talablari mazmunini, oʻquv rejalari va dars berayotgan fani boʻyicha dasturiy talablarni, oʻqitishning ilgʻor shakl va uslublarini, darslarni tashkil etish va uni oʻtkazish uslublarini, oʻquv va tarbiya sifatini, nazorat vositalarini hamda oʻquvchilarning bilimini baholash mezonlarini bilishi kerak.

111. Bolalar musiqa va sanʼat maktabining pedagog kadrlari kamida oʻrta maxsus musiqaviy maʼlumotga ega boʻlishi lozim.

112. Konsertmeysterlarning lavozim majburiyatlariga quyidagilar kiradi:

a) oʻzbek mumtoz va xorijiy klassik musiqa va sanʼat namunalari asosida oʻquvchilarni musiqiy va badiiy saviyasini oʻstirishni taʼminlaydi;

b) pedagog kadrlarga musiqiy taʼlimga oid davlat talablari va oʻquv dasturlari asosida darslarni tayyorlash va oʻtkazishda amaliy yordam beradi;

v) cholgʻular, xor, estrada va anʼanaviy xonandalik, xoreografiya, turli ansambllar mashgʻulotlarida joʻrnavozlik qilish, koʻrik-tanlov va festivallar, konsertlar va boshqa tadbirlarda ishtirok etadi.

113. Konsertmeysterlar Oʻzbekiston Respublikasi Xalq taʼlimi vazirligining bolalar musiqa va sanʼat maktablari faoliyatini tashkil etish va yaxshilashga oid qarorlari, buyruqlari va farmoyishlarini hamda ularning bilimiga qoʻyilgan davlat talablarining mazmunini bilishi kerak.

114. Konsertmeyster lavozimiga kamida oʻrta-maxsus maʼlumotga ega boʻlgan mutaxassislar qabul qilinadi”.