Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-son Farmonini hamda Oʻzbekiston Respublikasi Prezidentining “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida” 2009-yil 30-dekabrdagi PQ-1252-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi toʻgʻrisidagi nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. Ushbu Nizom Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining (keyingi oʻrinlarda Jamgʻarma deb ataladi) pensiyalar, ijtimoiy nafaqalar, kompensatsiya toʻlovlarini va boshqa toʻlovlarni tayinlashni, moliyalashtirishni, hisobga olishni va ularning toʻlanishi monitoringini olib borishni, ushbu maqsadlarga yoʻnaltiriladigan maqsadli moliyaviy resurslarni jamlashni, shuningdek tibbiy-mehnat ekspertizasi xizmatlari faoliyatini tashkil etishni amalga oshirish boʻyicha asosiy vazifalari, funksiyalari va vakolatlarini belgilaydi.

2. Jamgʻarma idoraviy jihatdan Oʻzbekiston Respublikasi Moliya vazirligiga qarashli hamda oʻz faoliyati toʻgʻrisida Oʻzbekiston Respublikasi Bosh vazirining birinchi oʻrinbosari — Moliya vaziriga, Jamgʻarmaning Kuzatuv kengashi raisiga hisob beradi.

3. Jamgʻarma oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga, shuningdek ushbu Nizomga amal qiladi.

4. Jamgʻarma oʻz ishlarini davlat organlari va boshqa tashkilotlar bilan oʻzaro hamkorlikda amalga oshiradi.

5. Jamgʻarma tizimiga:

Jamgʻarmaning Qoraqalpogʻiston Respublikasi, viloyatlar va Toshkent shahridagi boshqarmalari;

Jamgʻarmaning tuman (shahar) boʻlimlari;

Respublika tibbiy-ijtimoiy ekspertiza inspeksiyasi;

bosh, tuman, tumanlararo, shahar va ixtisoslashtirilgan tibbiy-mehnat ekspertizasi xizmatlari kiradi.

Jamgʻarma ijro etuvchi apparatining, uning hududiy boshqarmalari, tuman (shahar) boʻlimlari, Respublika tibbiy-ijtimoiy ekspertiza inspeksiyasi, tibbiy-mehnat ekspertizasi xizmatlari taʼminoti Oʻzbekiston Respublikasi respublika budjeti mablagʻlari hisobiga amalga oshiriladi.

6. Jamgʻarma hamda uning hududiy boshqarmalari va tuman (shahar) boʻlimlari yuridik shaxs hisoblanadi, mustaqil balansga, banklarda hisob raqamlariga, Oʻzbekiston Respublikasi Davlat gerbi tasviri tushirilgan muhrga, shuningdek tegishli muhr va shtamplarga ega boʻladi.

7. Quyidagilar Jamgʻarmaning asosiy vazifalari va funksiyalari hisoblanadi:

qonun hujjatlarida belgilangan tartibda fuqarolarning davlat pensiya taʼminotini tashkil etish, fuqarolarga pensiyalar, ijtimoiy nafaqalar, kompensatsiya toʻlovlari va boshqa toʻlovlarni tayinlash, pensiyalar va boshqa toʻlovlar miqdorlarining qayta hisoblab chiqilishini taʼminlash;

pensiyalar va boshqa toʻlovlarni toʻliq hajmda moliyalashtirish va toʻlanishini tashkil etish, ular boʻyicha hisob va hisobotni yuritish;

tizimli asosda pensiyalar tayinlash va ularni qayta hisoblashning doimiy tahlilini oʻtkazish va monitoringini olib borish, fuqarolarning pensiya taʼminotiga yoʻnaltiriladigan mablagʻlardan qatʼiy maqsadli foydalanilishini taʼminlash;

boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarga toʻlangan mablagʻlarni daʼvolar boʻyicha aybdor yuridik va jismoniy shaxslardan belgilangan tartibda undirib olishni tashkil etish.

“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 12-moddasi “b”-“j”-bandlariga muvofiq tayinlangan imtiyozli pensiyalarni toʻlashga xarajatlarni qoplash uchun mablagʻlarni yuridik shaxslardan belgilangan tartibda undirib olishni tashkil etish;

tibbiy-mehnat ekspertizasi xizmatlari faoliyatini tashkil etish.

8. Jamgʻarma oʻziga yuklangan vazifalarga muvofiq quyidagi funksiyalarni amalga oshiradi:

a) Jamgʻarmaning daromadlari boʻyicha:

Jamgʻarma mablagʻlari boʻyicha majburiy toʻlovlar, badallardan mablagʻlarni hamda boshqa toʻlovlarni Oʻzbekiston Respublikasi Moliya vazirligining Gʻaznachiligidagi (keyingi oʻrinlarda Gʻaznachilik deb yuritiladi) hisob raqamiga jamlaydi hamda pensiyalar, ijtimoiy nafaqalar, kompensatsiya va boshqa toʻlovlarga xarajatlarni moliyalashtirishni taʼminlaydi;

har yili manfaatdor vazirliklar va idoralar bilan birgalikda Jamgʻarma daromadlari tushumlar prognozini ishlab chiqadi;

davlat ijtimoiy sugʻurtasi tizimining barqarorligini taʼminlash va uni yanada takomillashtirish boʻyicha chora-tadbirlar ishlab chiqish maqsadida Jamgʻarma daromadlari va xarajatlarining oʻrtacha va uzoq muddatli prognozlarini tayyorlaydi;

boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarga sarflangan mablagʻlarni “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq aybdor yuridik va jismoniy shaxslardan regress daʼvolar boʻyicha belgilangan tartibda undirib oladi.

“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 12-moddasi “b” — “j”-bandlariga muvofiq tayinlangan imtiyozli pensiyalarni toʻlashga sarflangan mablagʻlarni yuridik shaxslardan regress daʼvolar boʻyicha belgilangan tartibda undirib oladi;

badallar va boshqa toʻlovlar tushishi hisobini olib boradi, shuningdek yuridik shaxs boʻlmasdan tadbirkorlik faoliyati bilan shugʻullanuvchi shaxslarning hamda dehqon xoʻjaliklari aʼzolarining mehnat daftarchalarini belgilangan tartibda yuritadi va saqlaydi;

b) pensiyalar va ijtimoiy nafaqalarni tayinlash hamda qayta hisoblab chiqish boʻyicha:

pensiyalar va ijtimoiy nafaqalarni tayinlash va qayta hisoblab chiqish uchun zarur boʻlgan taqdimnomalar, arizalar va boshqa hujjatlarni qabul qiladi, ularni qonun hujjatlariga muvofiq rasmiylashtiradi;

pensiyalar va ijtimoiy nafaqalarni tayinlash uchun yuridik shaxslar va fuqarolar tomonidan taqdim etilgan hujjatlarni belgilangan tartibda tayyorlaydi, koʻrib chiqadi va tekshiradi;

Jamgʻarmaning tuman (shahar) boʻlimlarida pensiyalar tayinlash boʻyicha komissiyalar faoliyatini tashkil etadi;

zarur tarzda rasmiylashtirgan hujjatlarga muvofiq va pensiyalar tayinlash boʻyicha komissiyalar qarorlari asosida qonun hujjatlarida belgilangan tartibda pensiyalarni tayinlaydi va ularni qayta hisoblab chiqadi;

pensionerlarning pensiya ishlarini va ijtimoiy nafaqa oluvchi shaxslarning ishlarini, qonun hujjatlarida nazarda tutilgan boshqa hujjatlarni rasmiylashtiradi, pensionerlarga pensiya guvohnomalari beradi;

pensiyalar va ijtimoiy nafaqalar tayinlash uchun hujjatlarni rasmiylashtirishning qonun hujjatlarida belgilangan tartibiga rioya etilishini nazorat qiladi;

tashkilotlar, yakka tartibdagi tadbirkorlar va dehqon xoʻjaliklari aʼzolari tomonidan taqdim etilgan pensiyalar, Davlat ijtimoiy sugʻurtasi boʻyicha nafaqalar olish huquqini beradigan hujjatlarning ishonchliligini tekshiradi;

v) pensiyalar, ijtimoiy nafaqalar, kompensatsiya va boshqa toʻlovlarga xarajatlarni amalga oshirish boʻyicha:

pensiyalar va ijtimoiy nafaqalarni hisoblab chiqish boʻyicha operatsiyalarni amalga oshiradi, ishlamaydigan pensionerlarga aloqa tashkilotlari va banklar orqali, ishlaydigan pensionerlarga esa — tashkilotlar orqali pensiyalar va ijtimoiy nafaqalar toʻlash yuzasidan topshiriqlarni rasmiylashtiradi va beradi;

aloqa tashkilotlari, banklar tomonidan pensiyalar va ijtimoiy nafaqalarning oʻz vaqtida va toʻgʻri yetkazib berilishi hamda toʻlanishi yuzasidan doimiy monitoring va nazoratni amalga oshiradi;

yuridik shaxs boʻlmasdan tadbirkorlik faoliyati bilan shugʻullanuvchi shaxslarga, shuningdek dehqon xoʻjaliklari aʼzolariga — ular tomonidan ijtimoiy sugʻurta boʻyicha badallar toʻlangan taqdirda, chaqaloq tugʻilganda beriladigan nafaqalar hamda dafn marosimi nafaqalarini hisoblaydi va toʻlaydi;

tashkilotlarning ishlaydigan pensionerlarga pensiyalar, 16 yoshgacha boʻlgan nogiron bolaning ota-onalaridan biriga (vasiyga, homiyga) bir oyda qoʻshimcha dam olish kuni uchun toʻlov, Chernobil halokati oqibatida zarar koʻrgan fuqarolarga kompensatsiya toʻlovlarini va qonun hujjatlarida nazarda tutilgan boshqa toʻlovlarga xarajatlarini moliyalashtiradi;

g) fuqarolarning pensiya taʼminoti bilan bogʻliq boshqa masalalar boʻyicha:

ommaviy axborot vositalari yordamida respublika aholisini fuqarolarning pensiya taʼminoti masalalari boʻyicha xabardor qiladi;

belgilangan tartibda tayinlangan shaxsiy pensiyalar toʻlanishini tashkil etadi;

imtiyozli pensiya taʼminoti huquqini beradigan ishlab chiqarishlar, ishlar, kasblar, lavozimlar va koʻrsatkichlar roʻyxatlarini qoʻllash masalalari boʻyicha davlat va xoʻjalik boshqaruvi organlari bilan oʻzaro hamkorlik qiladi, imtiyozli pensiyalarni takomillashtirish va tartibga solish boʻyicha takliflar ishlab chiqilishini tashkil etadi;

jismoniy shaxslar va yuridik shaxslarning murojaatlarini qonun hujjatlarida belgilangan muddatlarda koʻrib chiqadi, jismoniy shaxslarni va yuridik shaxslarning vakillarini qabul qiladi;

“OʻZBEKISTON POCNTASI” AJ va tijorat banklarida pensiyalar, ijtimoiy nafaqalar, kompensatsiya toʻlovlari hamda boshqa toʻlovlarning oʻz vaqtida toʻlanishi monitoringini olib boradi;

normativ-huquqiy hujjatlar loyihalarini ishlab chiqishda qatnashadi, fuqarolarning pensiya taʼminoti masalalari boʻyicha zamonaviy nazariy ishlanmalarni va xorijiy tajribani oʻrganadi;

Jamgʻarmaning mablagʻlarini oluvchilar, pensiyalar hamda Davlat ijtimoiy sugʻurtasi boʻyicha nafaqalar tayinlash va toʻlash toʻgʻrisidagi axborotni ishlab chiqishda qatnashadi va avtomatlashtirilgan tizimda qayta ishlashni joriy etadi;

pensiya taʼminoti masalalari boʻyicha davlat organlari va boshqa tashkilotlar bilan oʻzaro hamkorlik qiladi;

Jamgʻarma vakolatiga tegishli boʻlgan masalalar boʻyicha qonun hujjatlarini qoʻllash amaliyotini umumlashtiradi;

pensiya taʼminoti masalalari va Jamgʻarmaning vakolatiga tegishli boʻlgan boshqa masalalar boʻyicha xodimlarni qayta tayyorlash va ularning malakasini oshirish tadbirlarini amalga oshiradi;

d) Jamgʻarmaning vakolatiga kiradigan boshqa masalalar boʻyicha:

Respublika tibbiy-ijtimoiy ekspertiza inspeksiyasi, bosh, tumanlararo, tuman, shahar va ixtisoslashtirilgan tibbiy-mehnat ekspert komissiyalari faoliyatiga rahbarlik qiladi;

Jamgʻarma vakolatiga tegishli boʻlgan masalalar boʻyicha eʼtiroz-daʼvo ishlari olib borilishini tashkil etadi va amalga oshiradi.

9. Jamgʻarma oʻziga yuklangan vazifalar va funksiyalarni bajarish uchun quyidagi huquqlarga ega:

Jamgʻarma vakolatiga tegishli masalalar boʻyicha axborotni davlat organlari va boshqa tashkilotlardan belgilangan tartibda soʻrash va olish;

oʻz vakolatlari doirasida Jamgʻarmaning vazifalarini amalga oshirish uchun zarur boʻlgan idoraviy normativ-huquqiy hujjatlarni va metodik hujjatlarni ishlab chiqish;

majburiy toʻlovlar, badallar va boshqa toʻlovlar miqdorlarini belgilash, shuningdek pensiya taʼminotiga tegishli boʻlgan boshqa masalalar boʻyicha takliflar kiritish;

Jamgʻarma vakolatiga kiradigan masalalar boʻyicha xalqaro hamkorlikni amalga oshirish.

Jamgʻarma qonun hujjatlariga muvofiq boshqa huquqlarga ham ega boʻlishi mumkin.

10. Jamgʻarma daromadlari quyidagi manbalar hisobiga shakllantiriladi:

a) majburiy toʻlovlar va badallar:

belgilangan miqdorlardagi yagona ijtimoiy toʻlov tushumlari;

alohida yuridik shaxslarning ijtimoiy sugʻurta badallari;

fuqarolarning sugʻurta badallari;

jismoniy shaxslar ayrim toifalarining sugʻurta badallari;

majburiy ajratmalar;

b) boshqa toʻlovlar:

boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarni toʻlashga xarajatlarni toʻlash uchun regressiv talablar (daʼvolar) boʻyicha ish beruvchilar va fuqarolardan “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq undiriladigan mablagʻlarning 85 foizi;

“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 14-moddasiga muvofiq muddatidan oldin tayinlangan yoshga doir pensiyalarni toʻlash xarajatlarini qoplash uchun oʻtkaziladigan Oʻzbekiston Respublikasi Bandlikka koʻmaklashish davlat jamgʻarmasi mablagʻlari;

“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 12-moddasiga muvofiq tayinlangan imtiyozli pensiyalarni toʻlash xarajatlarini qoplash hisobiga oʻtkaziladigan yuridik shaxslar mablagʻlari;

dehqon xoʻjaliklari aʼzolari tomonidan qonun hujjatlarida belgilangan tartibda toʻlanadigan sugʻurta badallari;

hisoblangan jarimalar summasining bir qismi hamda majburiy toʻlovlar, badallar va boshqa toʻlovlar oʻz vaqtida toʻlanmaganligi uchun penyalar (qonun hujjatlariga muvofiq davlat soliq xizmati organlarini ijtimoiy rivojlantirish va moddiy-texnik taʼminlash maxsus jamgʻarmasiga hamda Jamgʻarma xodimlarini ijtimoiy rivojlantirish va moddiy ragʻbatlantirish jamgʻarmasiga undiriladigan summalardan tashqari);

yuridik shaxs tugatilganda, qishloq xoʻjaligi kooperativi (shirkati), fermer va dehqon xoʻjaligi qayta tashkil etilganda yoki tugatilganda mehnat vazifalarini bajarish bilan bogʻliq holda mayib boʻlgan, kasb kasalligiga chalingan yoki sogʻligʻiga boshqacha shikast yetkazilgan xodimga yetkazilgan zararni qoplash uchun toʻlanadigan summalar;

qonun hujjatlarida taqiqlanmagan boshqa manbalar, shu jumladan Oʻzbekiston Respublikasi Davlat budjeti mablagʻlari va ixtiyoriy badallar.

11. Majburiy toʻlovlar, badallar va boshqa toʻlovlarni oʻtkazish Jamgʻarma daromadlarining belgilangan tasniflariga muvofiq tushumlarning har bir turi boʻyicha Jamgʻarmaning banklardagi tegishli hisob raqamlari boʻyicha amalga oshiriladi.

12. Oʻzbekiston Respublikasi Davlat soliq qoʻmitasi va davlat soliq xizmatining hududiy organlari:

manbalar turlari boʻyicha Jamgʻarmaga majburiy toʻlovlar, badallar va boshqa toʻlovlarning toʻgʻri hisoblanishi, toʻliqligi va oʻz vaqtida toʻlanishi nazorat qilinishini;

manbalar turlari va toʻlovchilar boʻyicha Jamgʻarmaga majburiy toʻlovlar, badallar va boshqa toʻlovlar hisobi yuritilishini;

yuridik va jismoniy shaxslar tomonidan Jamgʻarmaga majburiy toʻlovlar, badallar va boshqa toʻlovlar toʻgʻri hisoblanishini, shuningdek Jamgʻarma bilan oʻzaro hisob-kitoblarning holati tekshirilishini;

qonun hujjatlariga muvofiq majburiy toʻlovlar, badallar va boshqa toʻlovlarni hisoblash tartibi va toʻlash muddatlari buzilganligi uchun yuridik va jismoniy shaxslarga nisbatan moliyaviy va maʼmuriy javobgarlik choralari qoʻllanilishini;

badallarning shaxslar boʻyicha hisobini amalga oshirish va mehnat daftarchalarini yuritish uchun har chorakda Jamgʻarmaga yuridik shaxs boʻlmasdan tadbirkorlik faoliyati bilan shugʻullanadigan shaxslar va dehqon xoʻjaliklari aʼzolari tomonidan toʻlangan badallarning miqdorlari toʻgʻrisidagi maʼlumotlar taqdim etilishini taʼminlaydi.

13. Oʻzbekiston Respublikasi Davlat soliq qoʻmitasi Jamgʻarmaning ijro etuvchi apparatiga:

tushgan majburiy toʻlovlar, badallar va toʻlovlar toʻgʻrisidagi, Jamgʻarmaga majburiy ajratmalar, badallar va boshqa toʻlovlar turlari boʻyicha qarzlar toʻgʻrisidagi tezkor hisobotni har oyda hisobot oyidan keyingi oyning 10-kunigacha;

majburiy toʻlovlar, badallar va boshqa toʻlovlarni hisoblash va toʻlash toʻgʻrisidagi hisobotni yuridik shaxslar tomonidan choraklik va yillik hisobot taqdim etilgandan keyin 15 kun mobaynida taqdim etadi.

14. Jamgʻarma mablagʻlari:

a) ishlamaydigan fuqarolarga:

davlat pensiyalarining barcha turlari;

dafn marosimi uchun nafaqalar;

davlat pensiya taʼminotiga huquqi boʻlmagan keksa va mehnatga layoqatsiz fuqarolarga nafaqalar;

qonun hujjatlariga muvofiq Jamgʻarma mablagʻlaridan moliyalashtiriladigan kompensatsiya toʻlovlari va boshqa toʻlovlarni toʻlash uchun;

b) ishlaydigan fuqarolarga:

davlat pensiyalarining barcha turlari;

dafn marosimi uchun nafaqalar;

16 yoshgacha boʻlgan nogiron bolaning ota-onalaridan biriga (vasiyga, homiyga) bir oyda qoʻshimcha dam olish kuni uchun toʻlovlar;

qonun hujjatlariga muvofiq Jamgʻarma mablagʻlaridan moliyalashtiriladigan kompensatsiya toʻlovlari va boshqa toʻlovlar uchun sarflanadi.

15. Ishlamaydigan va ishlaydigan fuqarolarga pensiyalar, ijtimoiy nafaqalar va kompensatsiya toʻlovlari va boshqa toʻlovlarni moliyalashtirish uchun Jamgʻarmaning hududiy boʻlinmalari tomonidan Gʻaznachilikning boʻlinmalarida hisob raqamlari ochiladi.

16. Jamgʻarmaning hududiy boshqarmalari toʻlov toʻlanadigan har bir oyning 15-kunigacha ishlamaydigan va ishlaydigan fuqarolarga pensiyalar, ijtimoiy nafaqalar, kompensatsiya toʻlovlari va boshqa toʻlovlar toʻlash uchun mablagʻlarga boʻlgan ehtiyoj hajmini belgilaydi hamda Jamgʻarmaning ijro etuvchi apparatiga buyurtmanoma taqdim etadi.

17. Jamgʻarmaning ijro etuvchi apparati Jamgʻarma xarajatlarini Oʻzbekiston Respublikasi Moliya vazirligi tomonidan belgilangan tartibda:

joriy toʻlov oyining 15-kunigacha — oʻtgan oyning ehtiyoji hisob-kitobidan kelib chiqib 50 foiz miqdoridagi summani;

joriy toʻlov oyining 27-kunigacha — amaldagi ehtiyojning taqdim etilgan miqdoridan qolgan summani moliyalashtiradi.

18. Jamgʻarmaning tuman (shahar) boʻlimlari pensiyalar, ijtimoiy nafaqalar, kompensatsiya va boshqa toʻlovlar uchun mablagʻlarni aloqa tashkilotlari va banklarning hisob raqamlariga oʻtkazadi.

Jamgʻarmaning tuman (shahar) boʻlimlari tashkilotlarning buyurtmanomalari boʻyicha ishlaydigan pensionerlarga pensiyalar, dafn marosimi uchun nafaqalar, 16 yoshgacha boʻlgan nogiron bolalarning ota-onalaridan biriga qoʻshimcha dam olish kunlari uchun va qonun hujjatlarida nazarda tutilgan boshqa toʻlovlarni toʻlashga mablagʻlarni moliyalashtiradi.

19. Jamgʻarmaning hisob raqamlaridan mablagʻlarni qonun hujjatlarida nazarda tutilmagan maqsadlarda oʻtkazish va vaqtincha olib qoʻyish taqiqlanadi.

20. Jamgʻarmaning hududiy boshqarmalari har yili 15-iyundan kechikmay Jamgʻarmaning ijro etuvchi apparatiga joriy yil uchun xarajatlarning kutilayotgan ijrosini va kelgusi yilga Jamgʻarma xarajatlari prognozini taqdim etadi.

21. Kelgusi yilga manbalar va foydalanish yoʻnalishlari boʻyicha Jamgʻarmaning daromadlari va xarajatlari prognozlari Jamgʻarmaning ijro etuvchi apparati tomonidan ishlab chiqiladi va Jamgʻarmaning Kuzatuv kengashiga koʻrib chiqish uchun kiritiladi.

22. Oʻzbekiston Respublikasining Davlat budjeti belgilangan tartibda qabul qilingandan va kelgusi yilga uning asosiy parametrlari tasdiqlangandan keyin Jamgʻarmaning ijro etuvchi apparati besh kun muddatda:

Oʻzbekiston Respublikasi Davlat soliq qoʻmitasiga — mintaqalar boʻyicha kelgusi yilga Jamgʻarma daromadlarining tasdiqlangan asosiy parametrlarini;

Jamgʻarmaning hududiy boshqarmalari va tuman (shahar) boʻlimlariga — turlar va mintaqalar boʻyicha kelgusi yilga Jamgʻarma xarajatlarining tasdiqlangan asosiy parametrlarini (yoʻnalishlarini) yetkazadi.

23. Jamgʻarma daromadlari va xarajatlarining tasdiqlangan koʻrsatkichlarini bajarish:

yuridik va jismoniy shaxslardan majburiy toʻlovlar, badallar va boshqa toʻlovlar tushishining va yigʻilishining toʻliqligi yuzasidan — davlat soliq xizmati organlari tomonidan;

Jamgʻarma mablagʻlarini belgilangan tartibda oʻz vaqtida va toʻliq moliyalashtirish, oʻz vaqtida tayinlash, toʻlash va manzilli ravishda sarflash, shuningdek Jamgʻarma mablagʻlaridan maqsadli va samarali foydalanilishini nazorat qilish yuzasidan — Jamgʻarmaning hududiy boshqarmalari va tuman (shahar) boʻlimlari tomonidan taʼminlanadi.

24. Jamgʻarmaning hududiy boshqarmalari Jamgʻarmaning ijro etuvchi apparatiga:

har oyda, hisobot oyidan keyingi oyning 10-kunigacha — hududlar boʻyicha toʻlangan pensiyalar, ijtimoiy nafaqalar, kompensatsiya toʻlovlari va boshqa toʻlovlar toʻgʻrisidagi tezkor axborotni;

tasdiqlangan shakl boʻyicha yuridik shaxslarning choraklik va yillik hisobotlari taqdim etilgandan keyin 15 kun mobaynida — mablagʻlardan foydalanish toʻgʻrisidagi hisobotni taqdim etadi.

25. Jamgʻarmaning Kuzatuv kengashi Jamgʻarmani boshqarishning yuqori organi hisoblanadi, uning tarkibi Oʻzbekiston Respublikasi Prezidentining qarori bilan tasdiqlanadi. Jamgʻarma Kuzatuv kengashining majlislari yil choragida kamida bir marta oʻtkaziladi. Jamgʻarmaning ijro etuvchi apparati Kuzatuv kengashining ishchi organi hisoblanadi.

Majlisni Kuzatuv kengashi raisi, u boʻlmaganda esa — raisning oʻrinbosari oʻtkazadi. Kuzatuv kengashi majlisi, agar unda kengash aʼzolarining kamida uchdan ikki qismi qatnashsa huquqiy vakolatli boʻladi (kvorumga ega boʻladi).

Kuzatuv kengashining qarori uning majlisda qatnashgan aʼzolarining oddiy koʻpchilik ovozi bilan qabul qilinadi. Ovozlar teng boʻlgan taqdirda Kuzatuv kengashi raisining ovozi hal qiluvchi ovoz hisoblanadi.

26. Jamgʻarmaning Kuzatuv kengashi vakolatlariga quyidagilar tegishli boʻladi:

Oʻzbekiston Respublikasi Moliya vazirligi bilan kelishgan holda Jamgʻarmaning daromadlari va xarajatlari prognoz parametrlarini, shuningdek Jamgʻarma xarajatlarining har yilgi smetasini koʻrib chiqish va tasdiqlash;

Jamgʻarma ijro etuvchi apparati, hududiy boshqarmalarining amalga oshiriladigan ishlar toʻgʻrisidagi hisobotlarini eshitish va tasdiqlash;

vazirliklar va idoralar, mahalliy davlat hokimiyati organlari, Respublika tibbiy-ijtimoiy ekspertiza inspeksiyasi, tibbiy-mehnat ekspertizasi xizmatlari va boshqa tashkilotlar masʼul xodimlarining Jamgʻarma vakolatiga tegishli boʻlgan masalalar boʻyicha hisobotlarini eshitish;

Oʻzbekiston Respublikasi Davlat soliq qoʻmitasining Jamgʻarmaga majburiy ajratmalar, badallar va boshqa toʻlovlarning toʻliq va oʻz vaqtida toʻlanishini taʼminlash toʻgʻrisidagi axborotini eshitish;

Oʻzbekiston Respublikasi Vazirlar Mahkamasiga Jamgʻarmaning ijro etuvchi direktorini, uning oʻrinbosarlarini lavozimga tayinlash va lavozimdan ozod qilish toʻgʻrisida taqdimnoma kiritish;

Jamgʻarmaning hududiy boshqarmalari toʻgʻrisidagi namunaviy nizomni tasdiqlash;

Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining Pensiyalar tayinlash boʻyicha tuman (shahar) boʻlimi komissiyalari toʻgʻrisidagi namunaviy nizomni tasdiqlash;

Jamgʻarmaning ijro etuvchi apparati faoliyatini, ayniqsa Jamgʻarma daromadlarini shakllantirish, uni oʻz vaqtida moliyalashtirish va undan maqsadli foydalanish yuzasidan nazorat qilish;

topshiriqlar, vedomostlar va pochta oʻtkazmalari boʻyicha toʻlanadigan pensiyalar, ijtimoiy nafaqalar, kompensatsiya va boshqa toʻlovlar joʻnatilishi va yetkazib berilishi boʻyicha xizmatlarga haq toʻlash miqdorlarini tasdiqlash;

Jamgʻarma faoliyati hamda fuqarolarning ijtimoiy taʼminotga va davlat ijtimoiy sugʻurtasiga boʻlgan davlat tomonidan kafolatlangan huquqlari amalga oshirilishi bilan bogʻliq boshqa funksiyalarni amalga oshirish.

27. Budjetdan tashqari Pensiya jamgʻarmasining ijro etuvchi apparati tuzilmasi, uning hududiy boshqarmalari va tuman (shahar) boʻlimlarining namunaviy tuzilmalari Oʻzbekiston Respublikasi Prezidentining hujjatlari bilan tasdiqlanadi.

28. Jamgʻarmaning ijro etuvchi apparatiga Jamgʻarma Kuzatuv kengashining taqdimnomasi boʻyicha, belgilangan tartibda Oʻzbekiston Respublikasi Vazirlar Mahkamasining qarori bilan lavozimga tayinlanadigan ijro etuvchi direktor boshchilik qiladi. Ijro etuvchi direktor Jamgʻarmaga yuklangan vazifalarning bajarilishi va oʻz funksiyalarining amalga oshirilishi uchun shaxsan javob beradi.

Jamgʻarma ijro etuvchi direktorining birinchi oʻrinbosari va oʻrinbosari Jamgʻarma Kuzatuvchi kengashining taqdimnomasi boʻyicha, Oʻzbekiston Respublikasi Vazirlar Mahkamasining qarori bilan lavozimga tayinlanadi.

29. Jamgʻarmaning Qoraqalpogʻiston Respublikasi, viloyatlar va Toshkent shahar boshqarmalari boshliqlari Jamgʻarma ijro etuvchi direktorining taqdimnomasiga binoan Oʻzbekiston Respublikasi Moliya vazirining qaroriga muvofiq lavozimga tayinlanadilar va lavozimdan ozod etiladilar.

Respublika tibbiy-ijtimoiy ekspertiza inspeksiyasi boshligʻi Oʻzbekiston Respublikasi Prezidenti Devoni bilan kelishgan holda Oʻzbekiston Respublikasi moliya vaziri qarori bilan lavozimga tayinlanadi va lavozimdan ozod etiladi.

Respublika tibbiy-ijtimoiy ekspertiza inspeksiyasi boshligʻining oʻrinbosari, Qoraqalpogʻiston Respublikasi, viloyatlar va Toshkent shahar bosh tibbiy-mehnat ekspert komissiyalari raislari Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi direktori taqdimnomasiga binoan Oʻzbekiston Respublikasi Moliya vaziri qarori bilan lavozimga tayinlanadilar va lavozimdan ozod etiladilar.

30. Jamgʻarmaning Qoraqalpogʻiston Respublikasi, viloyatlar va Toshkent shahridagi boshqarmalari boshliqlarining oʻrinbosarlari, Jamgʻarmaning tuman (shahar) boʻlimlari boshliqlari Jamgʻarmaning tegishli hududiy boshqarmalari boshliqlarining taqdimnomasi boʻyicha Jamgʻarmaning ijro etuvchi direktori tomonidan lavozimga tayinlanadi va lavozimdan ozod qilinadi.

31. Tumanlararo, tuman (shahar) va ixtisoslashtirilgan tibbiy-mehnat ekspert komissiyalari rahbarlari Respublika tibbiy-ijtimoiy ekspertiza inspeksiyasi boshligʻining taqdimnomasi boʻyicha Jamgʻarma ijro etuvchi direktori tomonidan lavozimga tayinlanadi.

32. Jamgʻarmaning ijro etuvchi apparati, uning hududiy boshqarmalari va tuman (shahar) boʻlimlari yagona markazlashtirilgan tizimni tashkil etadi hamda quyi boshliqlarning yuqori boshliqlarga hamda Jamgʻarma Kuzatuv kengashining raisiga boʻysunishi va hisob berishi asosida ishlaydi.

33. Jamgʻarmaning ijro etuvchi direktori:

Jamgʻarma faoliyatiga rahbarlik qiladi;

oʻz vakolatlari doirasida ijro etuvchi direktorning oʻrinbosarlari hamda hududiy boshqarmalar, tuman (shahar) boʻlimlari rahbarlari, shuningdek Respublika tibbiy-ijtimoiy ekspertiza inspeksiyasi va tibbiy-mehnat ekspertizasi xizmatlari rahbarlari oʻrtasida lavozim vazifalarini taqsimlaydi;

oʻz vakolatlari doirasida hududiy boshqarmalar va tuman (shahar) boʻlimlari rahbarlari, Respublika tibbiy-ijtimoiy ekspertiza inspeksiyasi va tibbiy-mehnat ekspertizasi xizmatlari tomonidan bajarilishi majburiy boʻlgan buyruqlar, yoʻriqnomalar chiqaradi va koʻrsatmalar beradi;

belgilangan mehnatga haq toʻlash fondi va xodimlarning soni doirasida ijro etuvchi apparatning shtatlar jadvaliga oʻzgartirishlar kiritadi va uni tasdiqlaydi, Jamgʻarmaning tarkibiy boshqarmalari toʻgʻrisidagi nizomni tasdiqlaydi;

Jamgʻarmaning ijro etuvchi apparati xodimlarini, Jamgʻarmaning Qoraqalpogʻiston Respublikasi, viloyatlar va Toshkent shahridagi boshqarmalarining boshliqlari oʻrinbosarlarini, Jamgʻarmaning tuman (shahar) boʻlimlari boshliqlarini Qoraqalpogʻiston Respublikasi, viloyatlar va Toshkent shahar bosh tibbiy-mehnat ekspert komissiyalari raislari oʻrinbosarlarini lavozimga tayinlaydi va lavozimdan ozod qiladi;

tibbiy-mehnat ekspertizasi xizmatlari faoliyatiga rahbarlik qiladi;

Oʻzbekiston Respublikasi Sogʻliqni saqlash vazirligi hamda Mehnat vazirligi bilan kelishgan holda Moliya vazirligiga TMEKni tashkil etish, qayta tashkil etish va tugatish boʻyicha takliflar kiritadi;

pul mablagʻlari va moddiy boyliklarning buxgalteriya hisobi yuritilishini, statistika va buxgalteriya hisobotlari tuzilishini va belgilangan tartibda taqdim etilishini tashkil qiladi;

Jamgʻarmaning vaqtincha boʻsh mablagʻlarini tijorat banklaridagi depozitlarga va boshqa moliyaviy vositalarga joylashtiradi;

qonun hujjatlariga muvofiq boshqa vazifalar va vakolatlarni amalga oshiradi.

34. Jamgʻarma Jamgʻarma va Respublika tibbiy-ijtimoiy ekspertiza inspeksiyasi xodimlarini ijtimoiy rivojlantirish va moddiy ragʻbatlantirish jamgʻarmasini quyidagi manbalar hisobiga shakllantiradi:

boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarni toʻlashga xarajatlarni toʻlash uchun regressiv talablar (daʼvolar) boʻyicha ish beruvchilar va fuqarolardan “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq undiriladigan mablagʻlarning 15 foizi;

majburiy ajratmalar, badallar va Jamgʻarmaga boshqa toʻlovlarning oʻz vaqtida toʻlanmaganligi uchun hisoblangan jarimalar, penyalar summasining 5 foizi.

Ijtimoiy rivojlantirish va moddiy ragʻbatlantirish jamgʻarmasi, shuningdek Jamgʻarma mablagʻlarini sarflash tartibi toʻgʻrisidagi Nizom Jamgʻarmaning Kuzatuv kengashi tomonidan tasdiqlanadi.

35. Jamgʻarmaning ijro etuvchi apparati, hududiy boshqarmalari va tuman (shahar) boʻlimlari pensiyalar, ijtimoiy nafaqalar, kompensatsiya toʻlovlari va boshqa toʻlovlarni toʻlash uchun nazarda tutilgan Jamgʻarma mablagʻlarining oʻz vaqtida va toʻliq moliyalashtirilishi, Jamgʻarma mablagʻlaridan qatʼiy maqsadli foydalanilishi uchun javobgardir.

36. Pensiyalar, ijtimoiy nafaqalar, kompensatsiya toʻlovlari va boshqa toʻlovlarni toʻlaydigan tashkilotlar Jamgʻarma mablagʻlarining oʻz vaqtida va maqsadli toʻlanishi uchun javobgardir.

37. Jamgʻarmaning ijro etuvchi apparati Oʻzbekiston Respublikasi Moliya vazirligiga belgilangan muddatlarda davriy buxgalteriya hisobotlarini taqdim etadi.

38. Jamgʻarmaga muddatida toʻlanmagan majburiy toʻlovlar, badallar va boshqa toʻlovlarni undirish qonun hujjatlarida belgilangan tartibda amalga oshiriladi.

39. Pensiyalar, ijtimoiy nafaqalar, kompensatsiya toʻlovlari va boshqa toʻlovlarni toʻlashda Jamgʻarma mablagʻlaridan toʻgʻri foydalanilishini nazorat qilish Jamgʻarmaning ijro etuvchi apparati va uning hududiy boshqarmalari hamda tuman (shahar) boʻlimlari, shuningdek tashkilotlarning rahbarlari va bosh buxgalterlari tomonidan amalga oshiriladi.

40. Pensiyalar, ijtimoiy nafaqalar va kompensatsiya toʻlovlari va boshqa toʻlovlarning toʻgʻri tayinlanishi va toʻlanishini, shuningdek Jamgʻarma mablagʻlaridan maqsadli foydalanilishini nazorat qilish Oʻzbekiston Respublikasi Moliya vazirligining Nazorat-taftish bosh boshqarmasi va uning mahalliy organlari tomonidan amalga oshiriladi.

Zarurat boʻlganda, Oʻzbekiston Respublikasi Moliya vazirligining Nazorat-taftish bosh boshqarmasi organlari tomonidan, mustaqil ekspertlar jalb qilingan holda bosh, tumanlararo, tuman va shahar tibbiy-mehnat ekspert komissiyalari tomonidan berilgan koʻrikdan oʻtkazish dalolatnomalari va xulosalar hujjatlari takroran ekspertizadan oʻtkazilishi mumkin.

41. Pensiyalar, ijtimoiy nafaqalar, kompensatsiya toʻlovlari va boshqa toʻlovlarni toʻlash boʻyicha xarajatlarning, shuningdek tashkilotlarning ijtimoiy sugʻurta boʻyicha xarajatlarining oʻz vaqtida moliyalashtirilishi yuzasidan monitoring olib borish Jamgʻarmaning ijro etuvchi apparati va uning hududiy boshqarmalari hamda joylardagi tuman (shahar) boʻlimlari tomonidan amalga oshiriladi.