Oʻzbekiston Respublikasining 2000-yil 14-dekabrdagi “Budjet tizimi toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 2001-y., 1-2-son, 6-modda), Oʻzbekiston Respublikasi Prezidentining 2009-yil 30-dekabrdagi PF-4161-sonli “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2009-y., 52-son, 559-modda) muvofiq buyuraman:

1. Oʻzbekiston Respublikasi Moliya vazirining 2009-yil 24-fevraldagi 27-son buyrugʻi (roʻyxat raqami 1927, 2009-yil 27-mart) (Oʻzbekiston Respublikasi qonun hujjatlari toʻplami, 2009-y., 13-son, 151-modda) bilan tasdiqlangan “Bolalikdan nogironlarga nafaqalar toʻlash boʻyicha xarajatlarni moliyalashtirish tartibi toʻgʻrisida”gi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. Kirish qismidagi “(Oʻzbekiston Respublikasi Oliy Majlisining Axborotnomasi, 2001-y., 1-2-son, 6-modda)” soʻzlaridan keyin “Oʻzbekiston Respublikasi Prezidentining 2009-yil 30-dekabrdagi PF-4161-sonli “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2009-y., 52-son, 559-modda)” soʻzlar qoʻshilsin.

2. 2-banddagi “tuman (shahar) ijtimoiy taʼminot” soʻzlari “Jamgʻarmaning tuman (shahar)” soʻzlar bilan almashtirilsin.

3. 6-banddagi “Oʻzbekiston Respublikasi Mehnat va aholini ijtimoiy muhofaza qilish vazirligi” soʻzlari “Jamgʻarmaning hududiy boʻlinmalari” soʻzlari bilan almashtirilsin.

4. 11-banddagi “Tuman (shahar) ijtimoiy taʼminot” soʻzlari “Jamgʻarmaning tuman (shahar)” soʻzlari bilan almashtirilsin.

5. 12-bandda:

birinchi xatboshidan “Oʻzbekiston Respublikasi Mehnat va aholini ijtimoiy muhofaza qilish vazirligi” soʻzlari chiqarib tashlansin;

ikkinchi xatboshidagi “tuman (shahar) ijtimoiy taʼminot” soʻzlari “Jamgʻarmaning tuman (shahar)” soʻzlari bilan almashtirilsin.

6. 13 va 14-bandlar quyidagi tahrirda bayon qilinsin:

“13. Agar yil mobaynida nogironlar miqdorining oʻzgarishi nafaqa toʻlash boʻyicha xarajatlar smetasida koʻzda tutilgan xarajatlarning oshishiga (kamayishiga) olib kelsa, Jamgʻarma oʻrnatilgan tartibda Oʻzbekiston Respublikasi Moliya vazirligiga nafaqalarni toʻlash boʻyicha xarajatlar smetasiga oʻzgartirish kiritish uchun nafaqa oluvchilarning oʻzgargan miqdoriga zarur boʻlgan mablagʻlarni asoslangan hisob-kitoblarini taqdim qiladi. Xarajatlar smetasiga oʻzgartirishlar kiritish avvalo, respublika budjetida nafaqalarni toʻlash uchun koʻzda tutilgan mablagʻlar doirasida amalga oshiriladi.

Jamgʻarma xarajatlar smetasiga kiritilayotgan oʻzgartirishlar, oʻrnatilgan tartibda gʻaznachilik boʻlinmalari bilan kelishilishi shart.

14. Nafaqalarni toʻlash boʻyicha xarajatlar smetasi nafaqa oluvchilarning miqdori boʻyicha maʼlumotlarni ilova qilgan holda, Jamgʻarmaning tegishli tuman (shahar) boʻlimlari bosh hisobchilari va rahbarlari tomonidan imzolanadi.

Oʻrnatilgan tartibda rasmiylashtirilgan har bir tuman (shahar) boʻyicha nafaqalarni toʻlash boʻyicha xarajatlar smetasi Jamgʻarmaning hududiy boshqarmalari orqali Jamgʻarmaga umumlashtirish va respublika boʻyicha jamlangan xarajatlar smetasini tuzish uchun taqdim qilinadi. Jamgʻarma tegishli tekshirishlar va umumlashtirishlardan soʻng Oʻzbekiston Respublikasi boʻyicha tuman va shaharlarning tasdiqlangan xarajatlar smetalari nusxalarini ilova qilgan holda jamlangan xarajatlar smetasini tuzadi va tasdiqlaydi hamda oʻrnatilgan tartibda roʻyxatdan oʻtkazish uchun Oʻzbekiston Respublikasi Moliya vazirligining tarmoqlarni moliyalashtiruvchi tegishli boshqarmasiga taqdim qiladi.

Jamgʻarma Oʻzbekiston Respublikasi Moliya vazirligining Gʻaznachiligiga Oʻzbekiston Respublikasi boʻyicha tuman va shaharlarining tasdiqlangan xarajatlar smetalari nusxalarini ilova qilgan holda jamlangan xarajatlar smetasini taqdim qiladi.”.

7. 15-band quyidagi mazmundagi xatboshi bilan toʻldirilsin:

“Jamgʻarmaning tegishli hisobvaraqlariga tushgan mablagʻlar Jamgʻarma budjeti ijrosi toʻgʻrisidagi hisobotda Jamgʻarma daromadi sifatida aks ettiriladi.”.

8. 17-band quyidagi tahrirda bayon qilinsin:

“17. Jamgʻarma har chorakda hisobot choragidan keyingi oyning 15-sanasiga qadar Oʻzbekiston Respublikasi Gʻaznachiligi bilan kelishilgan nafaqalarning hisoblanishi va toʻlanishi boʻyicha hisobotni tuman (shahar) va oylar boʻyicha tuzib Oʻzbekiston Respublikasi Moliya vazirligiga taqdim qiladi.”.

9. 19-banddan “va Mehnat va aholini ijtimoiy muhofaza qilish vazirligi” soʻzlari chiqarib tashlansin.

10. Mazkur oʻzgartirish va qoʻshimchalar Oʻzbekiston Respublikasi Mehnat va aholini ijtimoiy muhofaza qilish vazirligi bilan kelishilgan.