Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-son Farmoni ijrosini taʼminlash hamda mehnat va aholini ijtimoiy muhofaza qilish organlari tuzilmasini yanada maqbullashtirish, ularning aholi bandligini taʼminlash, yolgʻiz qariyalar, nogironlar va aholining boshqa zaif qatlamlarini bozor iqtisodiyoti sharoitlarida ijtimoiy qoʻllab-quvvatlash va muhofaza qilish boʻyicha manzilli chora-tadbirlarni amalga oshirish yuzasidan javobgarligini oshirish maqsadida:

1. Quyidagilar Oʻzbekiston Respublikasi Mehnat va aholini ijtimoiy muhofaza qilish vazirligining asosiy vazifalari va funksiyalari etib belgilansin:

ijtimoiy-iqtisodiy rivojlanishning uzoq muddatli ustuvorliklarini hisobga olgan holda mehnat, aholining bandligi va ijtimoiy muhofazasi sohasidagi qonun hujjatlarini takomillashtirish boʻyicha takliflarni ishlab chiqish;

mehnat bozorini rivojlantirish va boshqarish, aholining bandligini, shu jumladan xorijda ishlashini taʼminlash, demografik omillar va iqtisodiyotni rivojlantirish istiqbollarini hisobga olgan holda ish bilan taʼminlashning ilgʻor shakllarini joriy etish boʻyicha samarali chora-tadbirlarni tayyorlash va amalga oshirish;

band boʻlmagan aholi va ishsizlarga, birinchi navbatda yoshlarga, ayollarga, imkoniyatlari cheklangan shaxslarga professional qayta tayyorlash va ish bilan taʼminlash boʻyicha, shuningdek ishsizlarni moddiy qoʻllab-quvvatlash boʻyicha sifatli xizmatlar koʻrsatishni tashkil etish;

yolgʻiz qariyalar, nogironlar, kam taʼminlangan oilalar va aholining boshqa zaif toifalarini ijtimoiy muhofaza qilish boʻyicha amaliy va manzilli chora-tadbirlar amalga oshirilishini taʼminlash, ijtimoiy xizmat koʻrsatish mexanizmlarini takomillashtirish, tibbiy-ijtimoiy muassasalarning moddiy bazasini mustahkamlash;

mehnat, bandlik va aholini ijtimoiy muhofaza qilish sohasidagi qonun hujjatlari talablariga rioya etilishi ustidan nazoratni, mehnat munosabatlari, mehnatni moddiy ragʻbatlantirish va muhofaza qilish mexanizmlarini takomillashtirish boʻyicha chora-tadbirlarni amalga oshirish.

2. Quyidagilar:

Oʻzbekiston Respublikasi Mehnat va aholini ijtimoiy muhofaza qilish vazirligining xodimlarning umumiy cheklangan soni 60 nafar, shu jumladan boshqaruv xodimlarining soni 41 nafar boʻlgan yangilangan tashkiliy tuzilmasi hamda markaziy apparatining tuzilmasi 1 va 2-ilovalarga* muvofiq;

Qoraqalpogʻiston Respublikasi Mehnat va aholini ijtimoiy muhofaza qilish vazirligining tuzilmasi, viloyatlar va Toshkent shahri mehnat va aholini ijtimoiy muhofaza qilish hududiy boshqarmalarining namunaviy tuzilmalari 3 va 4-ilovalarga* muvofiq;

tuman (shahar) Bandlikka koʻmaklashish va aholini ijtimoiy muhofaza qilish markazlari tuzilmasi 5-ilovaga* muvofiq tasdiqlansin.

Mehnat va aholini ijtimoiy muhofaza qilish vaziriga, zarur hollarda, belgilangan xodimlar soni va mehnat haqi fondi doirasida Vazirlikning tasdiqlangan markaziy apparati tuzilmasiga oʻzgartirishlar kiritish huquqi berilsin.

3. Oʻzbekiston Respublikasi Mehnat va aholini ijtimoiy muhofaza qilish vazirligi ikki hafta muddatda oʻz zimmasiga yuklatilgan vazifalar va funksiyalarni hisobga olgan holda vazirlik toʻgʻrisidagi yangilangan Nizomni Vazirlar Mahkamasiga tasdiqlash uchun kiritsin.

4. Oʻzbekiston Respublikasi Prezidentining “Aholi bandligini oshirish hamda mehnat va aholini ijtimoiy muhofaza qilish organlari faoliyatini takomillashtirish chora-tadbirlari toʻgʻrisida” 2007-yil 6-apreldagi PQ-616-son qarori 6-bandining birinchi—beshinchi xatboshilari hamda uning 2 — 4, 4a,5 va 6-ilovalari oʻz kuchini yoʻqotgan deb hisoblansin.

5. Oʻzbekiston Respublikasi Mehnat va aholini ijtimoiy muhofaza qilish vazirligi Adliya vazirligi bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

6. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.