Markaziy Qizilqum mintaqasida nodir fosforit koni bosqichma-bosqich, kompleks va samarali oʻzlashtirilishini taʼminlash, uning negizida respublikada fosforli mineral oʻgʻitlar va eksportga yoʻnaltirilgan boshqa mahsulotlar ishlab chiqaruvchi zamonaviy korxonalar tashkil etish maqsadida Vazirlar Mahkamasi qaror qiladi:

1. Quyidagilar:

Markaziy Qizilqum mintaqasidagi Jeroy fosforit koni zaxiralari va baholangan resurslari, ularning sifati, kon qazishning kon-geologiya va kon-texnika shart-sharoitlariga koʻra MDH mamlakatlarida bunga oʻxshash kon yoʻqligi hamda jahondagi konlarning birinchi oʻnligiga kirishi;

fosforit xom ashyosi zaxirasi sanoat kategoriyalari boʻyicha 40 — 50 metr chuqurlikkacha 303,6 mln tonna ruda, 57,7 mln tonna fosfor besh oksidi miqdorida baholanishi, bu qishloq xoʻjaligining fosforli oʻgʻitlarga boʻlgan ehtiyojini 100 yildan ortiq muddatga taʼminlashi;

qurilayotgan Qizilqum fosforit kompleksining xom ashyo bazasi Jeroy koni zaxiralariga, shuningdek fosforit rudalarining prognoz resurslari 5,0 mlrd tonnadan ortiq boʻlgan Karakat, Shimoliy Jetimtov kabi va boshqa yangi konlar jalb etilishi hisobiga asoslanishi;

amalda Qizilqum fosforit kombinatida 1,0 mln tonna fosforit rudasi qazib olinganligi va unga qayta ishlanganligi, “Krup Polizius” firmasi (Germaniya)ning tez kuydiruvchi vertikal pechidan foydalangan holda 27 foiz ozuqa moddasi (P₂O₅) boʻlgan konsentrat ishlab chiqarish boshlanganligi;

boʻsh jinslar ichki agʻdarilgan qatlam hosil qiladigan qazishning qabul qilingan sxemasi yerning texnik rekultivatsiyasini kon qazish ishlari bilan bir vaqtda bajarish imkonini berishi;

Qizilqum fosforit kompleksi rivojlanishiga konsentratsiyasiga koʻra turlicha fosforli oʻgʻitlar ishlab chiqarish uchun 16 foizdan 28 foizgacha ozuqa moddalari (P₂O₅) olingan holda jinsni selektiv oʻyishdan tortib fosforit xom ashyosini izchil boyitishgacha boʻlgan butun texnologiya zanjiri boʻyicha ilgʻor texnologiyalardan foydalanilgan ishlab chiqarish quvvatlari yaratish imkonini beruvchi katta hajmda investitsiyalar jalb qilinganligi maʼlumot uchun qabul qilinsin.

2. Quyidagilar:

Jeroy koni fosforitlaridan oddiy fosfor, azot-fosfor, azot-kalsiy, organik mineral oʻgʻitlar, konsentratsiyalangan fosfor kislota ishlab chiqarish uchun foydalanishning istiqbol yoʻnalishlari va muddatlari 1-ilovaga* muvofiq;

Navoiy kon-metallurgiya kombinati va “Oʻzkimyosanoat” davlat-aksiyadorlik kompaniyasining Qizilqum fosforit kompleksida Jeroy konining fosforit rudalarini qazib olishni bosqichma-bosqich kengaytirish, ishlab chiqarish va chuqur qayta ishlash hamda respublika kimyo korxonalari tomonidan fosforli oʻgʻitlar ishlab chiqarishni koʻpaytirish yuzasidan 2-ilovaga* muvofiq takliflari maʼqullansin.

3. Qizilqum fosforit kompleksidan respublika kimyo korxonalariga, ular rekonstruksiya qilingungacha, fosforit xom ashyosini quyidagi yillik hajmlarda yetkazib berishga rozilik berilsin:

Samarqand kimyo zavodiga — 200-250 ming tonna kuydirilgan fosforit konsentrati (27-28% P₂O₅) va 100 ming tonna fosforit kukuni (16 — 18% P₂O₅), shuningdek zavod buyurtmasi boʻyicha minerallashtirilgan massa (12 — 14% P₂O₅);

Olmaliq “Ammofos” ishlab chiqarish birlashmasiga 200 — 250 ming tonna kuydirilgan fosforit konsentrati (27-28% P₂O₅);

“Qoʻqon superfosfat zavodi” ochiq aksiyadorlik jamiyatiga 200 ming tonna fosforit kukuni (16-17% P₂O₅).

4. Oʻzbekiston Respublikasi Davlat geologiya va mineral resurslar qoʻmitasi:

2001 — 2003-yillarda Markaziy Qizilqum konlari yer osti suvlarining tabiiy resurslarini va mintaqaviy foydalanish zaxiralarini qayta baholasin hamda ularni Qizilqum mintaqasining jadal oʻzlashtirilishi va suvdan foydalanishning oʻzgargan shart-sharoitlari munosabati bilan 2004-yilda Oʻzbekiston Respublikasi Davlat geologiya qoʻmitasi huzuridagi Foydali qazilma boyliklar zaxiralari boʻyicha davlat komissiyasida tasdiqlasin;

2002 — 2005-yillarda Karakat va Shimoliy Jetimtov konlarining fosforit zaxiralarini razvedka qilsin hamda ularni 2006-yilda Foydali qazilma boyliklar zaxiralari boʻyicha davlat komissiyasida himoya qilsin, shuningdek Qizilqum fosforit kompleksining moddiy-xom ashyo bazasini mustahkamlash va yanada kengaytirish maqsadida Boʻkantov togʻlaridagi Jaxau va Zirabuloq togʻlaridagi Ziyoviddin istiqbolli maydonlarida fosforit zaxiralarini dastlabki baholasin.

6. “Oʻzkimyosanoat” davlat-aksiyadorlik kompaniyasi:

bir oy muddatda “Qoʻqon superfosfat zavodi” ochiq aksiyadorlik jamiyatida 300 ming tonna kuydirilmagan fosforit konsentratini qayta ishlash loyihasining texnik-iqtisodiy asoslarini:

ikki oy muddatda Jeroy konidan olingan fosforit konsentrantlarining oʻziga xosligini hisobga olgan holda oʻgʻitlar olishning texnologiyalarini ishlab chiqish va keyinchalik doimiy ravishda takomillashtirish maqsadida, 2002-yilning III choragida foydalanishga topshirgan holda, Samarqand kimyo zavodida tajriba-sanoat qurilmasiga ega boʻlgan eksperimental laboratoriya tashkil etish loyihasining texnik-iqtisodiy asoslarini;

olti oy muddatda Olmaliq “Ammofos” ishlab chiqarish birlashmasini rekonstruksiya qilish va 500 ming tonna yuvilgan kuydirilgan fosforit konsentratidan (28% P₂O₅) va 200 ming tonna yuvilgan fosforit konsentratidan (19% P₂O₅) 200 ming tonna fosforli oʻgʻitlar (100% P₂O₅) ishlab chiqaruvchi quvvatlar tashkil etish loyihasining texnik-iqtisodiy asoslarini ishlab chiqsin va belgilangan tartibda tasdiqlash uchun kiritsin.

9. Oʻzbekiston Respublikasi Qishloq va suv xoʻjaligi vazirligi manfaatdor idoralar va tashkilotlar bilan birgalikda:

ikki hafta muddatda fosforit rudasini qayta ishlash chogʻida hosil boʻlgan past navli fosforit xom ashyosidan olingan oʻgʻitlardan foydalanishga doir takliflar tayyorlash uchun maxsus ekspertlar guruhini tashkil etsin;

2001 — 2003-yillarda Qoraqalpogʻiston Respublikasi, Xorazm, Buxoro va Navoiy viloyatlarida oddiy fosforli va azot-kalsiyli oʻgʻitlar qoʻllash samaradorligining dala sinovlarini oʻtkazsin.

10. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi 2001-yildan boshlab yiliga 200 ming tonna hajmida organik mineral oʻgʻitlar ishlab chiqarish maqsadida tarkibida 12—14% P₂O₅ boʻlgan fosforit xom ashyoni kompostlashni tashkil etsinlar.

14. Oʻzbekiston Respublikasi Iqtisodiyot vazirligi, Moliya vazirligi 2002-yildan boshlab investitsiya dasturlarida Qizilqum fosforit kompleksini kengaytirish, Samarqand kimyo zavodini, Olmaliq “Ammofos” ishlab chiqarish birlashmasi, “Qoʻqon superfosfot zavodi” ochiq aksiyadorlik jamiyatini rekonstruksiya qilish va zamonaviylashtirish, shuningdek Samarqand kimyo zavodida eksperimental laboratoriya tashkil etish loyihalari amalga oshirilishini nazarda tutsinlar.

15. Vazirlar Mahkamasining “Fosforli oʻgʻitlar ishlab chiqarishni koʻpaytirish chora-tadbirlari toʻgʻrisida” 1999-yil 26-noyabrdagi 509-son qarori oʻz kuchini yoʻqotgan deb hisoblansin.

16. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.