Savdo va umumiy ovqatlanish sohasida band boʻlgan yuridik va jismoniy shaxslarni soliqqa tortish tizimini yanada soddalashtirish va tartibga solish, budjetga soliqlar tushumi toʻliq yigʻilishini taʼminlash maqsadida:

1. 2002-yilning 1-iyulidan boshlab chakana savdo sohasidagi kichik korxonalar va mikrofirmalar uchun belgilangan daromadidan olinadigan yagona soliq joriy etilsin.

Belgilab qoʻyilsinki, chakana savdo sohasidagi kichik korxonalar va mikrofirmalar uchun belgilangan daromadidan olinadigan yagona soliq foydalaniladigan umumiy maydon birligini hisobga olgan holda Vazirlar Mahkamasi tomonidan tasdiqlanadigan soliqning bazaviy stavkasiga asoslanib joriy etiladi va bunda savdo korxonalarining qayerda joylashganiga, ular sotadigan isteʼmol mollarining turi, nomi va assortimentiga qarab oʻzgaruvchan koeffitsiyentlar qoʻllaniladi.

2. Belgilansinki, 2002-yilning 1-iyulidan boshlab ulgurji va chakana savdo korxonalari (kichik korxonalar va mikrofirmalar bundan mustasno), umumiy ovqatlanish korxonalari yalpi daromad soligʻi, mulk soligʻi, shuningdek yagona soliq oʻrniga yalpi tushum (tovar oboroti hajmi)dan yagona soliq toʻlaydilar.

Yalpi tushum (tovar oboroti hajmi)dan yagona soliq toʻlovchi ulgurji savdo korxonalari belgilangan tartibda qoʻshilgan qiymat soligʻini ham toʻlovchilar ekanligi belgilab qoʻyilsin.

3. Ulgurji va chakana savdo, umumiy ovqatlanish korxonalari uchun bojxona toʻlovlari, davlat poshlinalari, savdo qilish huquqi uchun yigʻim, shu jumladan tovarlarning ayrim turlari bilan savdo qilish huquqini beradigan litsenziya yigʻimlari, shuningdek davlatning maqsadli jamgʻarmalariga ajratmalar toʻlashning amaldagi tartibi saqlab qolinsin.

4. Oʻzbekiston Respublikasi Adliya vazirligi bir oy muddatda amaldagi qonun hujjatlari va normativ-huquqiy hujjatlarga mazkur Farmondan kelib chiqadigan oʻzgartirish va qoʻshimchalar kiritish toʻgʻrisidagi takliflarni Vazirlar Mahkamasiga taqdim etsin. Bunda soliqqa tortish tizimini oʻzgartirish va soliqlar stavkasini indekslash bilan bogʻliq oʻzgarishlar, shuningdek yuridik va jismoniy shaxslarning ayrim faoliyat turlarini amalga oshirishdan oladigan daromadlariga qatʼiy belgilangan soliqning joriy etilishi tadbirkorlik, shu jumladan kichik va xususiy biznes subyektlarining faoliyati uchun nisbatan noqulay shart-sharoitni vujudga keltiruvchi omillar emasligi nazarda tutilsin.

5. Oʻzbekiston Respublikasi Vazirlar Mahkamasi oʻn kun muddat ichida ushbu Farmonni ijro etish yuzasidan qaror qabul qilsin.