Import operatsiyalarini yanada tartibga solish va ularning oʻz vaqtida amalga oshirilishi yuzasidan nazoratni kuchaytirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Belgilab qoʻyilsinki, ushbu qarorning amal qilishi qaror kuchga kirgandan keyin tuziladigan kontraktlarga nisbatan tatbiq etiladi.

3. Vazirliklar va idoralar bir oy muddatda oʻz normativ-huquqiy hujjatlarini ushbu qarorga muvofiqlashtirsinlar.

4. Ushbu qaror 2009-yil 1-sentabrdan boshlab kuchga kiradi.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 1996-yil 13-martdagi 95-son qarori bilan tasdiqlangan Import operatsiyalari boʻyicha kontraktlarni hisobga olish va ularning bajarilishini nazorat qilish toʻgʻrisidagi Nizomda:

a) V boʻlimning nomi quyidagi tahrirda bayon qilinsin:

“Tashqi savdo import operatsiyalarini nazorat qilish”;

b) 25-band quyidagi tahrirda bayon qilinsin:

“ 25. Pul mablagʻlari oʻtkazilgan sanadan boshlab 180 kalendar kun mobaynida tovarlarni respublikaga keltirish va erkin muomalaga chiqarish rejimiga rasmiylashtirish, import kontraktlari boʻyicha ishlar va xizmatlar koʻrsatishni bajarish yoki ular uchun toʻlangan pul mablagʻlarini qaytarishning taʼminlanmaganligi toʻlov muddati oʻtgan debitorlik qarz hisoblanadi.

Agar pul mablagʻlari oʻtkazilgan sanadan boshlab 180 kalendar kun mobaynida import qiluvchi korxona tomonidan vakolatli bankka tovarlarning Oʻzbekiston Respublikasi hududiga keltirilganligi toʻgʻrisida bojxona xizmatlarining tegishli qaydlari yozilgan kartochka, bajarilgan ishlar va koʻrsatilgan xizmatlar boʻyicha esa — bajarilgan ishlarning invoyslari, schyot-fakturalari, dalolatnomalari taqdim etilmasa, u holda vakolatli banklar koʻrsatib oʻtilgan muddat tugagandan keyin oʻn kun muddatda import qiluvchi korxona davlat roʻyxatidan oʻtkazilgan joydagi davlat soliq inspeksiyasiga tegishli axborotni joʻnatadi”.

2. Vazirlar Mahkamasining 2003-yil 30-sentabrdagi 416-son qarori (Oʻzbekiston Respublikasi QT, 2003-y., 9-son, 92-modda) bilan tasdiqlangan Import kontraktlarini hisobga qoʻyish va tashqi savdo operatsiyalarining bojxona monitoringini amalga oshirish tartibi toʻgʻrisidagi nizomning 9.5-bandiga quyidagi mazmundagi xatboshi qoʻshilsin:

“Etkazib beruvchilar tomonidan montaj va (yoki) ishga tushirish-sozlash ishlari amalga oshirilishini, ular tomonidan xodimlarni oʻqitish, royalti toʻlovi xizmatlari va boshqa xizmatlar koʻrsatilishini nazarda tutuvchi asbob-uskunalar, qurilmalar, mexanizmlar, butlovchi buyumlar va ehtiyot qismlar xarid qilish yuzasidan import kontraktlari boʻyicha bajariladigan ishlar, koʻrsatiladigan xizmatlar va royalti summasi kontraktlarda (spetsifikatsiyalarda) alohida koʻrsatiladi”.