Sugʻurta xizmatlari sohasidagi erkinlashtirish jarayonini yanada rivojlantirish va iqtisodiy islohotlarni chuqurlashtirish, respublikada sugʻurta bozorini taraqqiy ettirishning iqtisodiy omillarini kuchaytirish, sugʻurta tashkilotlarining moddiy-texnika bazasini mustahkamlash hamda ularning moliyaviy barqarorligini taʼminlash maqsadida:

1. 2002-yilning 1-fevralidan boshlab, mulkchilik shakllaridan qatʼi nazar, sugʻurta tashkilotlari 3 yil muddatga daromad (foyda) soligʻi toʻlashdan ozod qilinsin va buning natijasida boʻshaydigan mablagʻlar aniq maqsadni koʻzlagan holda mazkur tashkilotlarning moddiy-texnika bazasini rivojlantirishga, mintaqalarda keng tarmoqli agentlik shoxobchalarini tashkil etishga, kadrlarni tayyorlash va qayta tayyorlashga, shu jumladan, chet ellarda tayyorlash va qayta tayyorlashga yoʻnaltirilsin.

2. Quyidagilar belgilab qoʻyilsin:

soliq olishdan boʻshaydigan mablagʻlarni tarkibida davlat ulushi boʻlgan sugʻurta tashkilotlari ustav jamgʻarmalarini koʻpaytirishga yoʻnaltirish chogʻida mazkur mablagʻlar davlatga tegishli ulush miqdoriga qoʻshib hisoblanadi;

2002-yilning 1-fevralidan boshlab toʻrt yil mobaynida sugʻurta tashkiloti tugatilgan yoki u sugʻurta faoliyatini toʻxtatgan hollarda daromad (foyda) soligʻining summasi ushbu Farmonga muvofiq berilgan butun imtiyozli davr uchun toʻliq miqdorda undirib olinadi.

3. Belgilab qoʻyilsinki, yuridik shaxslarning ixtiyoriy sugʻurta turlari boʻyicha sarf-xarajatlari daromad (foyda) soligʻini hisob-kitob qilish chogʻida qonunchilikda belgilangan meʼyorlar doirasida soliqqa tortiladigan baza hisobidan chegirib tashlanishi lozim.

4. Oʻzbekiston Respublikasi Prezidentining “Tovarlar (ishlar, xizmatlar) eksportini ragʻbatlantirish boʻyicha qoʻshimcha chora-tadbirlar toʻgʻrisida” 1997-yil 10-oktabrdagi PF-1871-sonli Farmonining 2-bandi quyidagi tahrirda bayon etilsin:

“Belgilab qoʻyilsinki, 2002-yilning 1-fevralidan boshlab xoʻjalik yurituvchi subyektlar xaridorlarga xizmat qiladigan banklarning kafolatlari yoki eksport shartnomalarining siyosiy va tijorat tavakkalchiliklaridan sugʻurta polisi mavjud boʻlgan taqdirda oldindan haq olmasdan va akkreditiv ochmasdan erkin almashtiriladigan valyutaga tovarlar (ishlar, xizmatlar)ni eksport qilishlari mumkin”.

5. Oʻzbekiston Respublikasi Adliya vazirligi Moliya vazirligi bilan birgalikda bir oy muddatda amaldagi qonunchilikka mazkur Farmondan kelib chiqadigan oʻzgartish va qoʻshimchalarni kiritish toʻgʻrisidagi takliflarni Vazirlar Mahkamasiga taqdim etsin.

6. Ushbu Farmonning ijrosini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.