Oʻzbekiston Respublikasi Prezidentining “Tijorat banklari depozitlariga aholi va xoʻjalik subyektlari boʻsh pul mablagʻlarini jalb etishni yanada ragʻbatlantirish qoʻshimcha chora-tadbirlari toʻgʻrisida” 2009-yil 6-apreldagi PQ-1090-son qaroriga muvofiq hamda respublikada ishlab chiqarilayotgan va sotilayotgan isteʼmol tovarlari sifati, ularning sanitariya normalari va qoidalariga muvofiqligi yuzasidan nazoratni kuchaytirish, shuningdek odamlarning hayoti va sogʻligʻi xavfsizligini taʼminlash maqsadida Vazirlar Mahkamasi qaror qiladi:

1. 2010-yil 1-yanvardan boshlab Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. Vazirlar Mahkamasining 2002-yil 5-noyabrdagi 380-son qarori (Oʻzbekiston Respublikasi QT, 2002-y., 11-son, 66-modda) bilan tasdiqlangan Qonun hujjatlarida belgilangan tartibda faqat yuridik shaxs shaklida tashkil etilgan tadbirkorlik subyektlari tomonidan amalga oshiriladigan faoliyatning ayrim turlari roʻyxatida:

a) 14-band quyidagi tahrirda bayon qilinsin:

“14. Oʻsimlik yogʻi ishlab chiqarish va sotish”;

b) 18-banddagi “bolalar quruq sut mahsulotlari, sutli bolalar taomlari” soʻzlari “bolalar oziq-ovqat mahsulotlari (Oʻzbekiston Respublikasi Sogʻliqni saqlash vazirligi tomonidan maʼqullangan barcha turlari)” soʻzlari bilan almashtirilsin;

v) quyidagi mazmundagi 19 — 21-bandlar qoʻshilsin:

“19. Quyidagilar:

margarin va mayonez mahsulotlari;

konfet va shokolad (milliy shirinliklardan tashqari);

tuxum kukuni;

mineral suvlar, sharbatlar va salqin ichimliklarning boshqa turlari (shisha idishda, plastik, aseptik va noaseptik oʻramlarda);

shaxsiy gigiyena buyumlari;

qurilish materiallari (qoʻlda va qoʻl asboblari hamda kichik mexanizatsiya vositalaridan foydalangan holda tayyorlanadigan materiallardan tashqari);

mebellar (badiiy xalq hunarmandchiligi va amaliy-dekorativ sanʼat buyumlaridan tashqari) ishlab chiqarish.

20. Polietilen xomashyosini sanoat yoʻli bilan qayta ishlash va undan tayyor mahsulot ishlab chiqarish.

21. Kinovideomahsulotlarni ishlab chiqarish, koʻpaytirish, dublyaj qilish, sotish va ularning prokati”.

2. Vazirlar Mahkamasining 2004-yil 22-martdagi 135-son qarori (Oʻzbekiston Respublikasi QT, 2004-y., 3-son, 31-modda) bilan tasdiqlangan Kinovideomahsulotlarni ishlab chiqarish, koʻpaytirish, dublyaj qilish, sotish va ularning prokati boʻyicha faoliyat turlarini litsenziyalash toʻgʻrisidagi Nizomda:

a) 4-banddagi “va jismoniy” soʻzlari chiqarib tashlansin;

b) 9-band quyidagi tahrirda bayon qilinsin:

“9. Litsenziya talabgori litsenziya olish uchun ishchi organga quyidagi hujjatlarni taqdim etadi:

a) litsenziya berish toʻgʻrisida ariza, unda quyidagilar koʻrsatiladi:

yuridik shaxsning nomi va tashkiliy-huquqiy shakli, joylashgan joyi (pochta manzili), xizmat koʻrsatuvchi bankning nomi va bankdagi talab qilib olinadigan asosiy depozit hisob raqami;

litsenziyalanayotgan faoliyat turi (yoxud uning bir qismi);

b) yuridik shaxs davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) ariza koʻrib chiqilganligi uchun litsenziya talabgori tomonidan yigʻim toʻlanganligini tasdiqlaydigan hujjat”;

v) 22-bandning ikkinchi xatboshi va 32-bandning toʻrtinchi xatboshi chiqarib tashlansin;

g) Nizomga ilovaning “Subyektlar” ustuni birinchi pozitsiyasidagi “va jismoniy” soʻzlari chiqarib tashlansin.