Kichik va xususiy tadbirkorlik subyektlarini moddiy-xomashyo resurslari bilan taʼminlash va ular tomonidan ishlab chiqarilayotgan mahsulotlarni birja orqali sotish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Vazirlar Mahkamasining “Tovar-xomashyo birjalari faoliyatini takomillashtirishga doir qoʻshimcha chora-tadbirlar toʻgʻrisida” 2004-yil 31-maydagi 251-son qaroriga (Oʻzbekiston Respublikasi QT, 2004-y., 5-son, 50-modda) ilovaga muvofiq oʻzgartirish va qoʻshimchalar kiritilsin.

2. Vazirliklar va idoralar bir oy muddatda idoraviy normativ-huquqiy hujjatlarning ushbu qarorga muvofiqlashtirilishini taʼminlasinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 1-bandning toʻrtinchi xatboshi quyidagi tahrirda bayon qilinsin:

“koʻrgazma-yarmarka savdolari — birjalarning ixtisoslashtirilgan savdo maydonchalarida ular tomonidan tasdiqlanadigan qoidalariga muvofiq tovarlar oldindan majburiy koʻzdan kechirilishi hisobga olingan holda yoki mijozlar — jismoniy va yuridik shaxslarga taqdim etiladigan koʻrgazma-yarmarka savdolarining elektron tizimiga Internet orqali toʻgʻridan-toʻgʻri kirish rejimida amalga oshiriladi”.

2. 3-bandda:

a) ikkinchi xatboshi quyidagi tahrirda bayon qilinsin:

“koʻrgazma-yarmarka savdolari elektron tizimiga Internet orqali toʻgʻridan-toʻgʻri kirish rejimida va savdo maydonchalarida, shu jumladan ixtisoslashtirilgan qurilish materiallari bozorlari hududlarida ulgurji savdo qilish huquqi faqat tovar-xomashyo birjalari aʼzolariga, ularda savdoni amalga oshirish huquqiga tegishli ruxsat beruvchi hujjatlar mavjud boʻlganda beriladi”.

b) quyidagi mazmundagi oltinchi xatboshi qoʻshilsin:

“jismoniy shaxslar, shuningdek birja aʼzolari boʻlmagan yuridik shaxslar koʻrgazma-yarmarka savdolarida brokerlar orqali yoki birja tomonidan tasdiqlanadigan qoidalarga muvofiq mustaqil ravishda ishtirok etishi mumkin”.

3. 4-bandga quyidagi mazmundagi beshinchi — yettinchi xatboshi qoʻshilsin:

“ishlab chiqaruvchilarga va birinchi navbatda, kichik biznes va xususiy tadbirkorlik subyektlariga mahsulotlarni sotish, shuningdek bitimlar boʻyicha elektron hisob-kitoblarni elektron toʻlov tizimi orqali amalga oshirish imkonini beradigan Internet orqali savdo tizimiga toʻgʻridan-toʻgʻri kirish rejimida koʻrgazma-yarmarka savdolarida ishtirok etish imkoniyatini taʼminlash;

birja aʼzolariga ixtisoslashtirilgan savdo maydonchalari orqali birja savdolari tizimiga kirish, savdolar natijalariga koʻra tuzilgan bitimlarni roʻyxatdan oʻtkazish va qonun hujjatlarida belgilangan tartibda ular boʻyicha elektron hisob-kitoblarni amalga oshirish imkonini berish;

birja aʼzolariga koʻrgazma-yarmarka savdolari tizimiga Internet orqali toʻgʻridan-toʻgʻri kirish rejimida belgilangan tartibda birja savdolariga kirish imkonini nazarda tutish tavsiya etilsin”.

4. 5-bandga quyidagi mazmundagi toʻrtinchi xatboshi qoʻshilsin:

“koʻrgazma-yarmarka savdolarida birja orqali sotish taqiqlanmagan va sotishga maxsus tartib joriy qilinmagan tovarlarning barcha turlari (ishlar, xizmatlar) sotilishi mumkin”.

5. 8-bandga quyidagi mazmundagi toʻrtinchi xatboshi qoʻshilsin:

“Belgilansinki, “Oʻzbekiston respublika tovar-xomashyo birjasi” aksiyadorlik jamiyatining birja bitimlaridan undiriladigan vositachilik yigʻimlari cheklangan miqdorlariga deklaratsiya toʻldirishda, birja tovarlarining moddiy balanslarini ishlab chiqish va ularni amalga oshirish yuzasidan monitoringni amalga oshiradigan Iqtisodiyot vazirligining budjetdan tashqari jamgʻarmasiga oʻtkaziladigan “Oʻzbekiston respublika tovar-xomashyo birjasi” aksiyadorlik jamiyatining yuqori likvidli tovarlar turlarini sotish boʻyicha xizmatlari uchun 0,075% miqdoridagi vositachilik yigʻimlari hisobga olinadi”;

toʻrtinchi xatboshi beshinchi xatboshi deb hisoblansin.

6. 9-band quyidagi tahrirda bayon qilinsin:

“Oʻzbekiston respublika tovar-xomashyo birjasining xodimlarning cheklangan umumiy soni 100 nafar boʻlgan tashkiliy tuzilmasi 1-ilovaga muvofiq maʼqullansin.

“Oʻzbekiston respublika tovar-xomashyo birjasi” ochiq aksiyadorlik jamiyati boshqaruvi raisi birjaning tashkiliy tuzilmasiga xodimlarning belgilangan soni doirasida belgilangan tartibda oʻzgartirishlar kiritish huquqiga ega ekanligi maʼlumot uchun qabul qilinsin”.

7. Qarorga 1-ilova matni quyidagi tahrirda bayon qilinsin: