LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Pekin shahrida 2008-yilgi XXIX yozgi Olimpiya o‘yinlarida muvaffaqiyatli qatnashgan O‘zbekiston Respublikasi sportchilarining xizmatlarini, ularning mamlakatimizning xalqaro nufuzi va obro‘-e’tiborini oshirishga, respublikada bolalar va o‘smirlar sportining ommaviyligini yanada o‘stirishga qo‘shgan hissasini munosib baholash, o‘sib kelayotgan yosh avlod ongida o‘z Vatanidan g‘ururlanish va unga muhabbat, atoqli sportchilarimizning yangidan-yangi sport cho‘qqilarini ishg‘ol qilish namunasidan ibrat olishga intilish his-tuyg‘ularini mustahkamlash maqsadida:
1. O‘zbekiston homiylari, xo‘jalik yurituvchi subyektlari va jamoatchiligining Pekin shahridagi XXIX yozgi Olimpiya o‘yinlarining g‘oliblari, sovrindorlari va qatnashchilariga bir yo‘la beriladigan mukofotlarni quyidagi miqdorlarda belgilash to‘g‘risidagi taklifi qabul qilinsin:
oltin medal sohibiga — 200,0 ming dollar, shu jumladan homiylar mablag‘lari hisobidan 100,0 ming dollar;
kumush medal sohibiga — 100,0 ming dollar, shu jumladan homiylar mablag‘lari hisobidan 50,0 ming dollar;
bronza medali sohibiga — 50,0 ming dollar, shu jumladan homiylar mablag‘lari hisobidan 25,0 ming dollar;
2. Belgilansinki, XXIX yozgi Olimpiya o‘yinlari sovrindorlari va qatnashchilari bo‘lgan sportchilarga pul mukofotlari Tashqi iqtisodiy faoliyat milliy banki tomonidan xorijiy valyutada — jismoniy shaxslar uchun belgilangan tartibda bankda ochiladigan depozit valyuta hisobvaraqlaridan soliqlar undirilmagan holda AQSh dollarida to‘lanadi.
3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda, zaruratni hisobga olgan holda, yozgi Olimpiya o‘yinlarining sovrindorlari bo‘lgan sportchilarning uy-joy-maishiy sharoitlarini yaxshilash choralarini ko‘rsin.
4. O‘zbekiston Respublikasi Vazirlar Mahkamasi London shahrida o‘tkaziladigan 2012-yilgi XXX yozgi Olimpiya o‘yinlariga sportchilarni tayyorlashni tashkil qilish va takomillashtirish bo‘yicha Respublika komissiyasini tuzsin.
5. Ushbu Qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.