Oʻzbekiston Respublikasi Oliy Majlisi Senatining “Oʻzbekiston Respublikasining 2009-yilgi Davlat budjeti toʻgʻrisida” 2008-yil 4-dekabrdagi 570-I-son qaroriga muvofiq:

1. Quyidagilar:

2009-yilda Oʻzbekiston Respublikasini rivojlantirishning asosiy makroiqtisodiy koʻrsatkichlari prognozi 1-ilovaga* muvofiq;

Oʻzbekiston Respublikasining 2009-yilgi Davlat budjeti asosiy parametrlari 2-ilovaga* muvofiq;

Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining, Respublika yoʻl jamgʻarmasining, budjetdan tashqari Maktab taʼlimi jamgʻarmasining, Sugʻoriladigan yerlarning meliorativ holatini yaxshilash jamgʻarmasining 2009-yilgi asosiy parametrlari 3 — 6-ilovalarga* muvofiq tasdiqlansin.

2. 2009-yilgi Davlat budjeti taqchilligining cheklangan miqdori yalpi ichki mahsulot hajmiga nisbatan 1,0 foiz miqdorida belgilansin.

Belgilab qoʻyilsinki, Davlat budjeti taqchilligini moliyalashtirish respublika budjeti mablagʻlarining 2009-yil boshidagi boʻsh qoldiqlari va boshqa qadrsizlanmaydigan manbalar hisobidan amalga oshiriladi.

3. 2009-yil uchun:

yuridik shaxslardan olinadigan foyda soligʻi stavkalari 7-ilovaga** muvofiq;

jismoniy shaxslardan olinadigan daromad soligʻi stavkalari 8-ilovaga** muvofiq;

yagona soliq toʻlovi stavkalari 9-1, 9-2 va 9-3-ilovalarga** muvofiq;

tadbirkorlik faoliyati ayrim turlari boʻyicha yuridik va jismoniy shaxslarga belgilab qoʻyilgan soliq stavkalari 10-ilovaga** muvofiq;

yuridik shaxs boʻlmagan tadbirkorlik faoliyati bilan shugʻullanuvchi jismoniy shaxslar (yakka tartibdagi tadbirkorlar)ga belgilab qoʻyilgan soliq stavkalari 11-ilovaga** muvofiq;

Oʻzbekiston Respublikasi rezidentlariga dividendlar va foizlar tarzida toʻlanadigan daromad soligʻi stavkalari 10 foiz miqdorida;

qoʻshilgan qiymat soligʻi stavkalari 20 foiz miqdorida;

respublikada ishlab chiqariladigan va roʻyxat boʻyicha chetdan keltiriladigan tovarlarga aksiz soligʻi stavkalari 12-1 va 12-2-ilovalarga** muvofiq;

suv resurslaridan foydalanganlik uchun soliq stavkalari 13-ilovaga** muvofiq;

yer osti boyliklaridan foydalanganlik uchun soliq stavkalari 14-ilovaga** muvofiq;

ayrim turdagi mahsulotlar boʻyicha ortiqcha foydadan soliq stavkalari 15-ilovaga** muvofiq;

yuridik va jismoniy shaxslardan olinadigan mulk soligʻi stavkalari 16 va 17-ilovalarga** muvofiq;

yuridik va jismoniy shaxslardan olinadigan yer soligʻi stavkalari 18-ilovaga** muvofiq;

yagona yer soligʻi stavkalari 19-ilovaga** muvofiq;

mahalliy soliqlar va yigʻimlar stavkalari 20-ilovaga** muvofiq;

Oʻzbekiston Respublikasi Moliya vazirligi huzuridagi Respublika yoʻl jamgʻarmasiga majburiy ajratmalar va yigʻimlar stavkalari 21 va 22-ilovalarga** muvofiq;

23-ilovada** belgilangan soliqqa tortish obyektlarining Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga va budjetdan tashqari Maktab taʼlimi jamgʻarmasiga majburiy ajratmalar stavkalari bir foiz miqdorida;

mablagʻlarni budjetdan tashqari Pensiya jamgʻarmasi, Bandlikka koʻmaklashish davlat jamgʻarmasi va Oʻzbekiston Kasaba uyushmalari Federatsiyasi oʻrtasida 24-ilovada** keltirilgan normativlarga muvofiq taqsimlagan holda yagona ijtimoiy toʻlov stavkasi 24 foiz miqdorida;

fuqarolarning budjetdan tashqari Pensiya jamgʻarmasiga ularning mehnat haqi daromadlaridan majburiy sugʻurta badallari stavkasi 3,5 foiz miqdorida tasdiqlansin.

4. Oʻzbekiston Respublikasi Moliya vazirligiga Respublika yoʻl jamgʻarmasining prognozdan ortiq daromadlarini Oʻzbekiston Respublikasi Moliya vazirligi huzuridagi Pensiya jamgʻarmasiga yoʻnaltirish huquqi berilsin.

5. Quyidagilar:

jismoniy shaxslarning mikrofirma va kichik korxonalarni taʼsis etishdan olinadigan dividend tarzidagi daromadlari;

yuridik shaxslarning kapitallashtirishga, investitsiyalarga, avval olingan kreditlar uchun hisob-kitob qilishga yoʻnaltirilgan mablagʻlari 5 yil muddatga soliqqa tortishdan ozod etilsin.

Oʻzbekiston Respublikasi Moliya vazirligi Iqtisodiyot vazirligi va Davlat soliq qoʻmitasi bilan birgalikda bir oy muddatda mazkur imtiyozlarni qoʻllash tartibini ishlab chiqsin va tasdiqlasin.

6. Belgilansinki:

yagona soliq toʻlovidan tushumlar Davlat budjeti, Respublika yoʻl jamgʻarmasi, budjetdan tashqari Pensiya jamgʻarmasi va budjetdan tashqari Maktab taʼlimi jamgʻarmasi oʻrtasida Oʻzbekiston Respublikasi Moliya vazirligi tomonidan belgilanadigan miqdorlarda taqsimlanadi;

Oʻzbekiston Respublikasining investorlar bilan mahsulotni taqsimlash toʻgʻrisidagi bitim doirasida mahsulotni sotishdan olinadigan daromadlari Davlat budjetiga oʻtkaziladi;

xoʻjalik yurituvchi subyektlarga, istisno tariqasida, 2009-2010-yillarda amortizatsiya ajratmalarini belgilangan normalardan past boʻlgan holda, qoʻshish, ular ishlab chiqarayotgan mahsulotning jahon narxlari tannarxdan ham tushib ketgan hollarda esa — Oʻzbekiston Respublikasi Moliya vazirligi bilan kelishilgan holda amortizatsiya ajratmalarini 6 oy muddatga toʻxtatib turish huquqi beriladi;

oʻzlari ishlab chiqargan tovarlarni tannarxdan past narxda erkin almashtiriladigan valyutaga eksport qiladigan korxonalar uchun, soliqqa tortish maqsadida sotishdan tushadigan tushum miqdori eksport tovarlari sotilgan haqiqiy narxdan kelib chiqqan holda belgilanadi.

7. Yagona ijtimoiy toʻlovlar toʻliq tushishini taʼminlash uchun 2009-yil 1-yanvardan boshlab shunday tartib oʻrnatilsinki, unga koʻra yagona ijtimoiy soliqni hisoblab chiqarish va toʻlash mehnat haqi fondining 24 foizi, lekin:

barcha xoʻjalik yurituvchi subyektlar uchun (fermer xoʻjaliklari bundan mustasno) har bir xodim hisobiga eng kam oylik ish haqining bir baravaridan kam boʻlmagan miqdorda;

fermer xoʻjaliklari uchun har bir xodim hisobiga eng kam oylik ish haqining 50 foizi miqdorida amalga oshiriladi.

Davlat soliq xizmati organlariga belgilangan tartibga rioya qilinmagan taqdirda toʻlovchining ixtiyorida qolayotgan foyda hisobidan yagona ijtimoiy toʻlovni uning belgilangan miqdoridan kelib chiqqan holda toʻliq undirib olish huquqi berilsin.

9. Valyuta tushumidan 50 foizini majburiy sotishning amaldagi tartibi tabiiy gaz eksporti va tranzitini amalga oshiruvchi barcha korxonalarga (mahsulot taqsimoti toʻgʻrisidagi bitim doirasida oʻz faoliyatini amalga oshiruvchi investorlar bundan mustasno) tatbiq etilsin, olinadigan mablagʻlar birinchi navbatda budjetga, maqsadli davlat jamgʻarmalariga va budjetdan tashqari Taʼlim va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasiga toʻlovlar boʻyicha qarzlarni toʻlashga yoʻnaltirilsin.

Oʻzbekiston Respublikasi Moliya vazirligi Davlat soliq qoʻmitasi bilan birgalikda oʻn kun muddatda tabiiy gaz eksporti va tranzitidan tushgan valyuta tushumlarini sotishdan olingan mablagʻlarni taqsimlash toʻgʻrisidagi Nizomni ishlab chiqsin va belgilangan tartibda tasdiqlasin.

13. Mahalliy hokimiyat va boshqaruv organlarining barcha darajalardagi mahalliy budjetlar daromadlari va xarajatlarini shakllantirishdagi roli, mustaqilligi va masʼuliyatini oshirish, mahalliy budjetlarning Davlat budjetidagi ulushini koʻpaytirish maqsadida quyidagi umumdavlat soliqlari:

suv resurslaridan foydalanganlik uchun soliq;

yuridik va jismoniy shaxslarning tadbirkorlik faoliyati ayrim turlari boʻyicha qatʼiy belgilangan soliq;

yuridik shaxs boʻlmagan tadbirkorlik faoliyati bilan shugʻullanuvchi jismoniy shaxslardan olinadigan qatʼiy belgilangan soliq;

respublikada ishlab chiqariladigan pivo va oʻsimlik yogʻiga aksiz soligʻi boʻyicha tushumlar toʻliq miqdorda mahalliy budjetlar daromadlariga oʻtkazilsin.

14. 2009-yil uchun:

Qoraqalpogʻiston Respublikasi budjeti, viloyatlar va Toshkent shahar mahalliy budjetlarining daromad va xarajat hajmlari, respublika budjetidan dotatsiyalar va maqsadli subvensiyalarning cheklangan miqdorlari 25-ilovaga* muvofiq;

Qoraqalpogʻiston Respublikasi budjetiga, viloyatlar va Toshkent shahar mahalliy budjetlariga umumdavlat soliqlari tushumlaridan ajratmalar normativlari 26-ilovaga* muvofiq;

respublika budjeti, Qoraqalpogʻiston Respublikasi budjetining, viloyatlar va Toshkent shahar mahalliy budjetlarining naqd pul kassa aylanmasining yoʻl qoʻyiladigan eng kam miqdorlari 27-ilovaga* muvofiq tasdiqlansin.

Oʻzbekiston Respublikasi Moliya vazirligi, Iqtisodiyot vazirligi manfaatdor vazirliklar va idoralar, shuningdek Qoraqalpogʻiston Respublikasi Vazirlar Kengashi hamda viloyatlar hokimliklari bilan birgalikda joylarda yangi ishlab chiqarishlarni tashkil etish va amalda ishlab turganlarini rivojlantirish, kichik va xususiy biznes rivojlantirilishini ragʻbatlantirish yoʻli bilan aholi bandligini oshirish, shuningdek budjet tashkilotlarining xarajatlari va tarmoqlarini maqbullashtirishni nazarda tutgan holda mahalliy budjetlarning dotatsiyaga muhtojligini kamaytirish boʻyicha aniq maqsadga yoʻnaltirilgan ishlarni davom ettirsin.

15. Oʻzbekiston Respublikasi Moliya vazirligiga:

tegishli budjetlarga dotatsiyalar, maqsadli subvensiyalar va budjet ssudalari (daromadlar va xarajatlar oʻrtasidagi vaqtinchalik kassa tafovutlarini qoplash uchun) ajratishda ularning miqdorlarini hududlar boʻyicha barcha soliqlar va boshqa majburiy toʻlovlarning toʻliq tushishidan, shuningdek Davlat budjetining birinchi navbatdagi xarajatlarini (hisoblab yozilgan ish haqi, stipendiyalar, nafaqalar va ularga tenglashtirilgan toʻlovlarni) soʻzsiz moliyalashtirish zarurligidan kelib chiqqan holda aniqlashtirish;

respublika budjetidan Qoraqalpogʻiston Respublikasi budjeti va Andijon, Jizzax, Samarqand hamda Xorazm viloyatlari mahalliy budjetlariga beriladigan daromadlarning tasdiqlangan hajmlariga ushbu hududlarda shakllanadigan soliq tushumlarini hisobga olib, daromadlar va xarajatlar oʻrtasida vujudga keladigan kassa boʻyicha tafovutlarni oʻzaro hisob-kitob qilish orqali tartibga solgan holda aniqlashtirishlar kiritish huquqi berilsin.

16. 2009-yil uchun Oʻzbekiston Respublikasi Vazirlar Mahkamasining zaxira jamgʻarmasi hamda Qoraqalpogʻiston Respublikasi budjeti, viloyatlar va Toshkent shahar mahalliy budjetlarining zaxira jamgʻarmalari miqdorlari 28-ilovaga* muvofiq tasdiqlansin.

17. Belgilansinki, 2009-yilda Oʻzbekiston Respublikasi nomidan yoki uning kafolati ostida jalb qilingan xorijiy kreditlar hajmi 2008-yildagi xorijiy kreditlar boʻyicha asosiy qarzni toʻlash hajmidan ortiq boʻlmasligi kerak.

20. Oʻzbekiston Respublikasi Moliya vazirligi Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligi bilan birgalikda 2009-yilda bir nafar oʻquvchiga (tarbiyalanuvchiga) xarajatlarning bazaviy meʼyorlaridan kelib chiqqan holda maktabgacha tarbiya bolalar muassasalari, umumtaʼlim maktablari va kasb-hunar kollejlarining budjetini rejalashtirish va xarajatlarini moliyalashtirish tartibi, ixcham maktabgacha tarbiya umumtaʼlim muassasalarini qayta tashkil etish boʻyicha chora-tadbirlarning amalga oshirilishini hisobga olgan holda, Namangan, Sirdaryo va Xorazm viloyatlari muassasalariga tatbiq etilsin hamda budjetni rejalashtirish va xarajatlarni moliyalashtirishning yangi tartibi bilan qamrab olinadigan har bir budjet tashkilotiga moliyalashtirish meʼyorlari yetkazilishi taʼminlansin.

21. Oʻzbekiston Respublikasi Moliya vazirligi Fanlar akademiyasi, Fan va texnologiyalarni rivojlantirish qoʻmitasi, boshqa vazirliklar va idoralar bilan birgalikda 2009-yilgi Davlat budjeti parametrlarida nazarda tutilgan budjet mablagʻlari hisobidan ilmiy-tadqiqot ishlarini moliyalashtirishda, 2009-yilning 1-yanvaridan boshlab, xodimlarning aniq ilmiy va mehnat hissasiga qarab, oliy taʼlim tizimi xodimlari uchun belgilangan ish haqi miqdorlarini hisobga olgan holda ilmiy xodimlarning ish haqi oshirilishini taʼminlasin.

22. Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi 2009-yilning 1-yanvaridan boshlab bolalikdan nogironlarga nafaqalarni, ularning joylardagi Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimlari orqali tayinlanishi va toʻlanishi tartibini saqlab qolgan holda respublika budjetidan moliyalashtirilishini taʼminlasin.

23. Oʻzbekiston Respublikasi Moliya vazirligi 2009-yildan boshlab 29-ilovadagi** roʻyxatga muvofiq davlat maqsadli va boshqa budjetdan tashqari jamgʻarmalar daromadlari va xarajatlarining gʻaznachilik ijrosi mexanizmlarini joriy etish chora-tadbirlari amalga oshirilishini taʼminlasin.

24. 2008-yilgi makroiqtisodiy koʻrsatkichlarning oʻzgarishi munosabati bilan Oʻzbekiston Respublikasi Moliya vazirligining 2008-yilgi Oʻzbekiston Respublikasi Davlat budjeti asosiy parametrlarini quyidagi hajmlarda aniqlashtirish toʻgʻrisidagi taklifi qabul qilinsin:

Davlat budjeti daromadlari 8559,7 mlrd. soʻm, xarajatlari — 8196,1 mlrd. soʻm miqdorida (shu jumladan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga dotatsiyalar 194,5 mlrd. soʻm miqdorida), budjet profitsiti yalpi ichki mahsulot hajmiga nisbatan 1,0 foiz boʻlgan holda;

Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining kassa aylanmasi naqd summasi normativlari 2009-yilning 1-yanvarigacha respublika budjeti mablagʻlari hisobiga 160,0 mlrd. soʻm miqdorida boʻldi.

Oʻzbekiston Respublikasi Moliya vazirligi, Moliya vazirligining gʻaznachiligi budjet tashkilotlari va Oʻzbekiston Respublikasi Markaziy banki bilan birgalikda 2009-yilning yanvar oyida, oʻtkazilgan operatsiyalarni 2008-yilgi Davlat budjetining ijrosi toʻgʻrisidagi hisobotda aks ettirgan holda 2008-yilgi Davlat budjeti ijrosi boʻyicha qonun hujjatlarida belgilangan tartibda yakuniy operatsiyalar oʻtkazsin.

25. Oʻzbekiston Respublikasi Moliya vazirligi Iqtisodiyot vazirligi bilan birgalikda makroiqtisodiy koʻrsatkichlar prognozi har chorakda bajarilishini va Oʻzbekiston Respublikasi Davlat budjetining 2009-yilgi ijrosini tahlil etish natijalari boʻyicha, zarurat boʻlganda, Oʻzbekiston Respublikasi Vazirlar Mahkamasiga Davlat budjeti asosiy parametrlarini Davlat budjetining belgilangan taqchilligi doirasida aniqlashtirishga doir takliflar kiritsin.

26. Belgilansinki, 2009-yilning 1-yanvaridan boshlab pensiyalarni hisoblab chiqish uchun mavjud boʻlgan uzilishlardan qatʼi nazar, mehnat faoliyatining oxirgi oʻn yili mobaynidagi istalgan ketma-ket besh yilning (pensiyaga murojaat qilganning tanloviga koʻra) amaldagi oʻrtacha oylik ish haqi olinadi.

Oʻzbekiston Respublikasi Vazirlar Mahkamasi bir hafta muddatda “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” Oʻzbekiston Respublikasi Qonuni loyihasini pensiyalarni tayinlashdagi samarasiz imtiyozlarni maqbullashtirish va pensiya toʻlashni tartibga solishni hisobga olgan holda Oʻzbekiston Respublikasi Oliy Majlisining Qonunchilik palatasiga koʻrib chiqish uchun kiritsin.

27. Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining 30-ilovaga muvofiq qarorlari oʻz kuchini yoʻqotgan deb hisoblansin.

2009-yilning 1-yanvaridan Oʻzbekiston Respublikasi Prezidenti va Oʻzbekiston Respublikasi Hukumatining ayrim qarorlariga 31-ilovaga muvofiq oʻzgartish va qoʻshimchalar kiritilsin.

28. Oʻzbekiston Respublikasi Moliya vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda mazkur qarorning qabul qilinishi munosabati bilan qonun hujjatlariga oʻzgartirishlar va qoʻshimchalar boʻyicha Vazirlar Mahkamasiga takliflar kiritsin.

Vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir hafta muddatda ilgari chiqarilgan normativ hujjatlarini ushbu qarorga muvofiqlashtirsinlar.

29. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 2009-yil 1-yanvardan — Oʻzbekiston Respublikasi Prezidentining “Oʻzbekiston Respublikasining Tiklanish va taraqqiyot jamgʻarmasi faoliyatini tashkil qilish chora-tadbirlari toʻgʻrisida” 2006-yil 16-maydagi PQ-350-son qarori 3-bandining beshinchi xatboshi.

2. 2009-yil 1-sentabrdan:

Vazirlar Mahkamasining “Oʻzbekiston Respublikasining tashqi siyosiy va tashqi iqtisodiy xizmatlari uchun kadrlar tayyorlashni takomillashtirish chora-tadbirlari toʻgʻrisida” 1998-yil 2-oktabrdagi 417-son qarori 2-bandining ikkinchi xatboshi;

Vazirlar Mahkamasining “Toshkent Islom universiteti faoliyatini tashkil etish toʻgʻrisida” 1999-yil 6-maydagi 224-son qarorining 4-bandi.

1. Oʻzbekiston Respublikasi Prezidentining “Shaxsiy yordamchi, dehqon va fermer xoʻjaliklarida, chorva mollarni koʻpaytirishni ragʻbatlantirish chora-tadbirlari toʻgʻrisida” 2006-yil 23-martdagi PQ-308-son qarori 1-bandining ikkinchi xatboshi quyidagi tahrirda bayon qilinsin:

“Shaxsiy yordamchi va dehqon xoʻjaligida qoramol oʻstirish bilan shugʻullanuvchi jismoniy shaxslarga pensiyalar tayinlashda mehnat staji ular tomonidan budjetdan tashqari Pensiya jamgʻarmasiga sugʻurta badallari bir yilda eng kam oylik ish haqining kamida toʻrt yarim baravari miqdorida toʻlangan taqdirda hisoblab chiqiladi”.

3. Oʻzbekiston Respublikasi Prezidentining 2006-yil 25-oktabrdagi PQ-499-son qarori bilan tasdiqlangan Oʻzbekiston Respublikasi Moliya vazirligi huzuridagi Respublika yoʻl jamgʻarmasi daromadlarini shakllantirish va mablagʻlarini sarflash tartibi toʻgʻrisidagi nizomda:

7-band quyidagi tahrirda bayon qilinsin:

“7. Jamgʻarma daromadlari Oʻzbekiston Respublikasi Soliq kodeksiga muvofiq Jamgʻarmaga toʻlanadigan majburiy toʻlovlar (ajratmalar va yigʻimlar) hamda Oʻzbekiston Respublikasi qonun hujjatlarida taqiqlanmagan boshqa manbalar, shu jumladan ixtiyoriy badallar, xorijiy investitsiyalar va kreditlar mablagʻlari hisobiga shakllantiriladi.

Bunda Jamgʻarmaning vaqtinchalik boʻsh mablagʻlarini moliyaviy bozorlarda joylashtirishdan foizlar tarzida olinadigan daromadlar soliqqa tortilmaydi”;

V boʻlimning nomi quyidagi tahrirda bayon qilinsin:

31-band quyidagi tahrirda bayon qilinsin:

“31. Majburiy ajratmalarni hisoblash, hisob-kitobini taqdim etish va toʻlash tartibi Oʻzbekiston Respublikasi Soliq kodeksiga muvofiq amalga oshiriladi”;

quyidagi tahrirdagi 32¹-band qoʻshilsin:

“32¹. Jamgʻarmaga majburiy ajratmalarning ortiqcha toʻlangan summasi toʻlovning ushbu turi boʻyicha kelgusidagi majburiy ajratmalar hisobiga qoʻshiladi yoxud toʻlovchining yozma arizasi asosida toʻlovchiga qaytariladi yoki Jamgʻarmaga toʻlovning boshqa turi boʻyicha boqimandani toʻlash hisobiga oʻtkaziladi.

Jamgʻarmaga majburiy ajratmalar boʻyicha ortiqcha toʻlangan summalarni qaytarish tuman (shahar) moliya organi bilan kelishilgan holda davlat soliq xizmatining tegishli tuman (shahar) organi tomonidan toʻlovchining hisob-kitob raqamiga, uning Jamgʻarmadan boshqa toʻlovlar boʻyicha qarzi boʻlmagan taqdirda, ariza berilgan kundan boshlab oʻttiz kun muddatda amalga oshiriladi.

Oʻzbekiston Respublikasi Ichki ishlar vazirligi organlarida avtotransport vositalarini roʻyxatdan oʻtkazishda yigʻimlar boʻyicha ortiqcha toʻlangan summani qaytarish davlat soliq xizmatining tegishli tuman (shahar) organi tomonidan, toʻlovchining arizasi va Oʻzbekiston Respublikasi Ichki ishlar vazirligi tegishli organining maʼlumotnomasi asosida amalga oshiriladi. Qaytarish davlat soliq xizmatining tegishli tuman (shahar) organining toʻlovchining mablagʻi hisoblab kiritilgan tranzit hisob raqamidan toʻlovchining hisob-kitob raqamiga, davlat soliq xizmati tegishli organining tuman (shahar) moliya organi bilan kelishilgan xulosasi asosida, ariza berilgan kundan boshlab oʻttiz kun muddat mobaynida amalga oshiriladi.

Xorijiy avtotashuvchilarning Oʻzbekiston Respublikasi hududiga kirishda va tranzitda yigʻimlar boʻyicha ortiqcha toʻlangan summasini qaytarish Jamgʻarma tomonidan toʻlovchining hisob-kitob raqamiga tegishli bojxona organining qoʻshimcha toʻlov toʻgʻrisidagi va yigʻim toʻlangan xizmat koʻrsatuvchi bankning maʼlumotnomasi bilan tasdiqlangan toʻlovchi arizasi asosida amalga oshiriladi”.

4. Oʻzbekiston Respublikasi Prezidentining “Davlat budjeti gʻazna ijrosi tizimini yanada rivojlantirish chora-tadbirlari toʻgʻrisida” 2007-yil 28-fevraldagi PQ-594-son qarorida:

3-bandning ikkinchi xatboshi quyidagi tahrirda bayon etilsin:

“Oʻzbekiston Respublikasi moliya vaziriga, zarur hollarda, gʻaznachilikning markaziy apparati va uning boʻlinmalari tuzilmasiga gʻaznachilik xodimlarining cheklangan umumiy soni va moliya organlari boshqaruv xodimlarining belgilangan soni doirasida oʻzgartishlar kiritish huquqi berilsin”;

6-bandda:

ikkinchi xatboshiga “va faqat u amalga oshirilgandan keyin kuchga kiradi” soʻzlari qoʻshilsin;

quyidagi mazmundagi xatboshi qoʻshilsin:

“tashkilotlar nomidan va ularning topshirigʻiga koʻra gʻaznachilik tomonidan toʻlovlarni amalga oshirishda xizmat koʻrsatuvchi banklarga vositachilik haqlarini hisob-kitobning akkreditiv shaklidan foydalangan holda toʻlash ularning xarajatlar smetalarida nazarda tutilgan mablagʻlar hisobidan amalga oshiriladi”.

5. Oʻzbekiston Respublikasi Prezidentining “Oʻzbekiston Respublikasida 2010-yilgacha boʻlgan davrda xizmat koʻrsatish va servis sohasini rivojlantirishni jadallashtirishga oid qoʻshimcha chora-tadbirlar toʻgʻrisida” 2007-yil 21-maydagi PQ-640-son qarorining 6-bandi ikkinchi xatboshidagi “2010-yil 31-dekabrgacha” soʻzlari “2012-yil 1-yanvargacha” soʻzlari bilan almashtirilsin.

6. Oʻzbekiston Respublikasi Prezidentining “Xorijiy investitsiyalar ishtirokida “Jeneral Motors Oʻzbekiston” korxonasini barpo etish toʻgʻrisida” 2008-yil 21-fevraldagi PQ-800-son qarori 8-bandiga quyidagi mazmundagi xatboshi qoʻshilsin:

“Belgilab qoʻyilsinki, “Jeneral Motors Oʻzbekiston” yopiq aksiyadorlik jamiyati rasmiy dilerlarining avtomobillarni taʼmirlash va ularga servis xizmatlari koʻrsatish, jumladan ushbu xizmatlarni koʻrsatish vaqtida oʻrnatiladigan ehtiyot qismlar, uzellar, agregatlar va materiallarning narxlari, shuningdek ehtiyot qismlar, uzellar, agregatlar va materiallarni ularning savdo tarmoqlari orqali sotish qoʻshilgan qiymat soligʻisiz amalga oshiriladi”.

7. Vazirlar Mahkamasining 1994-yil 9-martdagi 124-son qarori bilan tasdiqlangan Yoqilgʻi-energetika resurslaridan foydalanish qoidalarini buzganlik uchun iqtisodiy jazolarni qoʻllash toʻgʻrisidagi Nizom III boʻlimining 5-bandidagi “Oʻzbekiston Respublikasi Moliya vazirligining gʻaznachiligi va uning hududiy boʻlinmalari” soʻzlari “Oʻzbekiston Respublikasi Moliya vazirligi va uning boʻlinmalari” soʻzlari bilan almashtirilsin.

8. Vazirlar Mahkamasining “Xalqaro tiklanish va taraqqiyot banki reabilitatsiya qarzidan foydalanish va hamkorlik dasturini amalga oshirish chora-tadbirlari toʻgʻrisida” 1995-yil 4-maydagi 160-son qarorining 1-bandi quyidagi tahrirda bayon qilinsin:

“1. Quyidagilar:

160 mln. AQSH dollari miqdorida 20 yil muddatga, jumladan besh yillik imtiyozli davr bilan beriladigan reabilitatsiya qarzi Oʻzbekiston Respublikasi milliy valyutasini qoʻllab-quvvatlashga yoʻnaltirilishi;

asosiy qarz, foizlar va komissiyalarni toʻlash Davlat budjeti mablagʻlari hisobidan amalga oshirilishi maʼlumot uchun qabul qilinsin”.

9. Vazirlar Mahkamasining 1997-yil 31-martdagi 165-son qarori bilan tasdiqlangan Narxlar (tariflar)ni shakllantirish va ularning qoʻllanilishini nazorat qilish tartibi 26-bandining birinchi xatboshidagi “Oʻzbekiston Respublikasi Moliya vazirligining gʻaznachiligi va uning hududiy boʻlinmalari” soʻzlari “Oʻzbekiston Respublikasi Moliya vazirligi va uning boʻlinmalari” soʻzlari bilan almashtirilsin.

10. Vazirlar Mahkamasining “Birjadan tashqari valyuta bozorini yanada rivojlantirish va mustahkamlash chora-tadbirlari toʻgʻrisida” 2000-yil 29-iyundagi 245-son qarori (Oʻzbekiston Respublikasi QT, 2000-y., 6-son, 33-modda) 4-bandining uchinchi xatboshi quyidagi tahrirda bayon qilinsin:

“belgilangan muddatlari oʻtgandan keyin xorijiy valyuta tushumi tushishini 30 bank kunidan koʻproq (2009-yilda — 60 bank kuni) kechikishiga yoʻl qoʻygan yuridik shaxs-rezidentlar, respublika budjeti foydasiga tushmagan valyuta mablagʻlari summasiga nisbatan 100 foiz ekvivalentida jarima toʻlaydilar;

11. Vazirlar Mahkamasining 2000-yil 21-noyabrdagi 456-son qarori (Oʻzbekiston Respublikasi QT, 2000-y., 11-son, 72-modda) bilan tasdiqlangan Xom ashyo, materiallar, butlovchi buyumlar va asbob-uskunalarni xarid qilish boʻyicha tender savdolari oʻtkazish toʻgʻrisidagi nizomga:

kuyidagi mazmundagi 5¹ va 5²-bandlar qoʻshilsin:

“5¹. Quyidagi hollarda tender (tanlov) oʻtkazmasdan tovar yetkazib beruvchilar (bajaruvchilar, pudratchilar) bilan kontraktlar tuzilishi mumkin:

1) tovarlar yetkazib berish, tabiiy monopoliyalar subyektlari faoliyati sohasiga tegishli boʻlganda;

2) tovarlar birja orqali xarid qilinganda;

3) shartnoma tuzish vaqtida eng kam ish haqining oʻn baravaridan oshmagan summada tovarlar sotib olinganda;

4) tarix va madaniyat yodgorliklari sifatida davlat muhofazasiga olingan hamda davlat muzey, kutubxona, arxiv fondlarini, kinofotofondini va boshqa shunga oʻxshash fondlarni toʻldirish uchun moʻljallangan tarixiy, badiiy yoki boshqa madaniyat ahamiyatiga molik madaniy boyliklar (kartinalar, skulpturalar, adabiy asarlar va boshqalar), shu jumladan muzey predmetlari va muzey kolleksiyalari, shuningdek nodir va qimmatli nashrlar va qoʻlyozmalar, arxiv hujjatlari, jumladan ularning nusxalarini yetkazib berishni amalga oshirganda;

5) tovarlarni sotishga alohida huquqi boʻlgan faqat bitta yetkazib beruvchidan tovarlar xarid qilish mumkin boʻlganda;

6) tuzilgan kontraktning shartlari dastlabki kontrakt umumiy summasining 20 foizidan oshmaydigan summaga teng qoʻshimcha ishlarni bajarish maqsadida oʻzgarganda;

7) bajarish yoki xizmat koʻrsatishni amalga oshirish faqat davlat hokimiyati va boshqaruv organlari tomonidan yoki ularga boʻysunuvchi davlat muassasalari va korxonalari tomonidan ularning vakolatlariga muvofiq mumkin boʻlgan ishlar yoki xizmatlarga ehtiyoj tugʻilganda;

8) yengib boʻlmas kuchlar (tabiiy ofatlar, yongʻinlar, falokatlar, avariyalar va hokazolar) oqibatlarini bartaraf etish (oldini olish) uchun zarur boʻlgan muayyan tovarlarga tezkor ehtiyoj tugʻilganda, buning natijasida vaqtning yoʻqotilishi talab qilinadigan boshqa buyurtmani joylashtirish usullarini qoʻllash maqsadga muvofiq boʻlmaganda (tegishli moliya organlari kelishuvi boʻyicha);

9) yetkazib beruvchilarning yoki kontraktda ularning manfaatdorligi yoʻqligi sababli buyurtmachi tomonidan tender (tanlov) boʻlib oʻtmagan deb hisoblash natijasida, agar buyurtmachi uzoq tumanlarda joylashgan boʻlsa, buyurtmachining faoliyat koʻrsatish hududida va yaqin joylashgan tumanlarda faqat bitta yetkazib beruvchi mavjud boʻlsa, shuningdek boshqa joylardan narx kotirovkalarini olish hech qanday foyda olish yoki iqtisod qilish aniqlanganda va transport xarajatlari uchun narxlar oshib ketishiga olib kelganda. Bunda yagona yetkazib beruvchiga buyurtmalarni joylashtirish tegishli moliya organlari bilan kelishgan holda amalga oshiriladi.

5². Yengib boʻlmas kuchlar oqibatlarini bartaraf etish (oldini olish) uchun tovarlarga shoshilinch ehtiyoj vujudga kelgan taqdirda yoki kontraktda ularning manfaatdorligi yoʻqligi sababli tender (tanlov)ni boʻlib oʻtmagan deb hisoblash natijasida buyurtmachi tender (tanlov) oʻtkazmasdan yagona yetkazib beruvchiga buyurtmani joylashtirish toʻgʻrisidagi qarorni kelishish uchun tegishli moliya organlariga yozma murojaat yuboradi.

Yagona yetkazib beruvchiga buyurtmani joylashtirish toʻgʻrisidagi qarorning kelishish muddati tegishli moliya organiga kelishish toʻgʻrisida murojaat kelib tushgan kundan boshlab oʻn ish kunidan oshmasligi kerak.

Buyurtmachi tomonidan tender. (tanlov) boʻlib oʻtmagan deb hisoblash natijasida yagona yetkazib beruvchiga buyurtmani joylashtirish toʻgʻrisidagi qaror qabul qilingan taqdirda uni kelishish uchun tegishli moliya organiga murojaatdan tashqari, shuningdek tender (tanlov) oʻtkazish va uni boʻlib oʻtmagan deb hisoblash toʻgʻrisidagi hujjatlarning nusxalari taqdim qilinadi.

Bunda kontrakt yagona yetkazib beruvchi bilan faqat tender (tanlov) hujjatlarida nazarda tutilgan shartlarda tuzilishi mumkin, tuzilgan kontrakt bahosi tender (tanlov) oʻtkazish toʻgʻrisidagi xabarnomada koʻrsatilgan kontraktning dastlabki bahosidan oshmasligi kerak”;

13-bandning ikkinchi xatboshida “qabul qiladi” soʻzlaridan keyin “sotib olinadigan tovarlarning eng yuqori bahosini belgilaydi” soʻzlari qoʻshilsin;

20-bandda:

quyidagi mazmundagi beshinchi xatboshi qoʻshilsin:

“sotib olinadigan tovarning eng yuqori narxi”;

beshinchi xatboshi oltinchi xatboshi deb hisoblansin;

55-bandga quyidagi mazmundagi xatboshi qoʻshilsin:

“Bunda, agar tenderda xorijiy yetkazib beruvchilar bilan birga mamlakatimiz korxonalari — ishlab chiqaruvchilari ishtirok etsa, bu korxonalarga tovarlar va xizmatlar davlat xaridi (Davlat budjeti, Respublika yoʻl jamgʻarmasi, Oʻzbekiston Respublikasi Moliya vazirligi huzuridagi budjetdan tashqari Maktab taʼlimi jamgʻarmasi va ijtimoiy soha muassasalarining budjetdan tashqari mablagʻlari), shuningdek davlat ulushi 50 foizdan ortiq boʻlgan korxonalar mablagʻlari hisobiga xarid qilish doirasida amalga oshiriladigan tender savdolarida ishtirok etganda 20 foizgacha miqdorda narx imtiyozlari beriladi”.

12. Vazirlar Mahkamasining 2001-yil 3-martdagi “Oʻzbekiston temir yoʻllari” davlat-aksiyadorlik kompaniyasini boshqarishni tashkil etishni takomillashtirish toʻgʻrisida”gi 108-son qarori 4-bandining beshinchi xatboshiga quyidagi mazmundagi ibora qoʻshilsin:

“Oʻzbekiston temir yoʻllari” davlat aksiyadorlik kompaniyasi tizimiga kiradigan korxonalar oʻrtasida mol-mulkni bepul berishda daromad soligʻi va qoʻshilgan qiymat soligʻi boʻyicha markazlashgan tartibdagi hisob-kitoblarda qabul qiluvchi va beruvchi tomonlar foyda soligʻi va qoʻshilgan qiymat soligʻi solish obyekti hisoblanmaydi”.

13. Vazirlar Mahkamasining 2001-yil 24-avgustdagi 351-son qarori (Oʻzbekiston Respublikasi QT, 2001-y., 8-son, 50-modda) bilan tasdiqlangan Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizomda:

6-band quyidagi tahrirda bayon qilinsin:

“Budjetdan tashqari Pensiya jamgʻarmasiga toʻlanadigan sugʻurta badallarining eng kam miqdori bir yilda eng kam oylik ish haqining toʻrt yarim barobaridan kam boʻlmagan miqdorni tashkil etishi kerak”;

7-band quyidagi tahrirda bayon qilinsin:

“7. Sugʻurta badallari hisobot yilining 1-oktabriga qadar toʻlanadi. Bunda sugʻurta badallari miqdori toʻlov kuniga belgilangan eng kam oylik ish haqi miqdoridan kelib chiqqan holda hisoblanadi”.

14. Vazirlar Mahkamasining 2002-yil 15-noyabrdagi 393-son qarori (Oʻzbekiston Respublikasi QT, 2002-y., 11-son 69-modda) bilan tasdiqlangan Oʻzbekiston Respublikasi Moliya vazirligining Nazorat-taftish bosh boshqarmasi va uning hududiy nazorat-taftish boshqarmalari toʻgʻrisidagi nizomda:

7-band yigirma uchinchi xatboshidan “budjetdan mablagʻ oluvchilarning xarid qilinadigan tovarlar (ishlar, xizmatlar) narxini sunʼiy ravishda oshirib yuborishini” soʻzlari chiqarib tashlansin;

8-band oʻn toʻrtinchi xatboshidan “budjetdan mablagʻ oluvchilarning xarid qilinadigan tovarlar (ishlar, xizmatlar) narxini sunʼiy ravishda oshirib yuborishini” soʻzlari chiqarib tashlansin.

15. Vazirlar Mahkamasining “Respublika toʻqimachilik tarmogʻiga investitsiyalar jalb etish chora-tadbirlari toʻgʻrisida” 2005-yil 27-yanvardagi 38-son qarori 5-bandidagi “2009-yil” soʻzlari “2012-yil” soʻzlari bilan almashtirilsin.

16. Vazirlar Mahkamasining 2006-yil 21-apreldagi 67-son qarori (Oʻzbekiston Respublikasi QT, 2006 y,. 4-son, 27-modda) bilan tasdiqlangan Shaxsiy yordamchi va dehqon xoʻjaliklarida qoramol boqayotgan va yetishtirilgan chorvachilik mahsulotlarini sotayotgan fuqarolarning bandligi toʻgʻrisidagi nizomda:

2-band uchinchi xatboshidagi “har oyda eng kam oylik ish haqining kamida 50 foizi miqdorida” soʻzlari “bir yilda eng kam oylik ish haqining toʻrt yarim barobaridan kam boʻlmagan miqdorda” soʻzlari bilan almashtirilsin;

16-banddagi “eng kam oylik ish haqining 50 foizidan kam boʻlmagan” soʻzlari “bir yilda eng kam oylik ish haqining toʻrt yarim barobaridan kam boʻlmagan miqdorda” soʻzlari bilan almashtirilsin;

17-banddagi “har oyda, jismoniy shaxslarning daromad soliqlarini toʻlash uchun belgilangan muddatlarda” soʻzlari “hisobot yilining 1-oktabriga qadar” soʻzlari bilan almashtirilsin;

18-bandning uchinchi xatboshi quyidagi tahrirda bayon qilinsin:

“badallar toʻlanmagan oldingi davrlar uchun bir yilda eng kam oylik ish haqining toʻrt yarim barobaridan kam boʻlmagan summada, toʻlov kunidagi eng kam oylik ish haqi miqdoridan kelib chiqqan holda sugʻurta badallarini toʻlashga yoʻl qoʻyiladi”.

17. Vazirlar Mahkamasining “Don va donni qayta ishlash mahsulotlari hisobini yuritish tizimini takomillashtirishga, ularning saqlanishi ustidan nazoratni kuchaytirishga doir qoʻshimcha chora-tadbirlar toʻgʻrisida” 2006-yil 25-maydagi 95-son qarori (Oʻzbekiston Respublikasi QT, 2006-y., 5-son, 35-modda) 4-bandiga quyidagi mazmundagi xatboshi qoʻshilsin:

“Oʻzdonmahsulot” aksiyadorlik kompaniyasi tizimi tarkibiga kiradigan, don, davlat resursidagi donni dastlabki qayta ishlovdan keyingi qoʻshimcha mahsulotlar va chiqindilarni sanoat yoʻli bilan qayta ishlash uchun sotishni amalga oshiruvchi korxonalar uchun qoʻshilgan qiymat soligʻi boʻyicha soliqqa tortiladigan mahsulot aylanmasi miqdori ustama narx summasidan kelib chiqqan holda belgilanadi. Bunda boshqa tashkilotlarga, shu jumladan spirt ishlab chiqarish uchun, don sotish aylanmasi umumiy belgilangan tartibda qoʻshilgan qiymat soligʻi boʻyicha soliqqa tortiladi”.

18. Vazirlar Mahkamasining 2007-yil 13-iyuldagi 143-son qarori bilan tasdiqlangan Xalqaro tiklanish va taraqqiyot banki tomonidan berilgan institutsional kreditiga xizmat koʻrsatish tartibi toʻgʻrisidagi nizomning 11-bandidagi “haqiqiy toʻlov sanasidagi Oʻzbekiston Respublikasi Markaziy banki” soʻzlari “haqiqiy toʻlov sanasidagi banklararo savdo sessiyalarida belgilangan” soʻzlari bilan almashtirilsin.