LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Xorijiy investitsiyalarni jalb etgan holda geologiya-qidiruv ishlarini hamda O‘zbekiston Respublikasi hududida yuqori texnologiyalar industriyasini rivojlantirish uchun xomashyo bazasi hisoblangan qattiq foydali qazilmalar qazib olishni yanada kengaytirish maqsadida Vazirlar Mahkamasi qaror qiladi:
1. O‘zbekiston Respublikasi Davlat geologiya va mineral resurslar qo‘mitasining “NeoPLANT” kompaniyasi (Koreya Respublikasi) bilan birgalikda Qashqadaryo viloyatining Tolako‘l va Quduq hamda Samarqand viloyatining Sariko‘l istiqbolli maydonlarida kvars va kvarsitlar konlarini aniqlash va keyinchalik qazib olish maqsadida tadbirkorlik tavakkalchiligi shartlarida geologiya-qidiruv ishlarini amalga oshirish uchun “Uz-Kor Silicon” qo‘shma korxonasi tashkil etish to‘g‘risidagi taklifiga rozilik berilsin.
2. “Uz-Kor Silicon” mas’uliyati cheklangan jamiyat qo‘shma korxonasining ustav kapitali miqdori ekvivalentda 10,4 mln AQSh dollariga teng ekanligi, undan:
50 foiz miqdoridagi “NeoPLANT” kompaniyasi (Koreya Respublikasi) ulushining pul mablag‘lari va asbob-uskunalar hisobiga shakllanishi;
50 foiz miqdoridagi O‘zbekiston Respublikasi Davlat geologiya qo‘mitasi ulushining Qashqadaryo viloyatining Tolako‘l va Quduq hamda Samarqand viloyatining Sariko‘l istiqbolli maydonlarida tarkibida kvars mavjud bo‘lgan xomashyo yuzasidan ilgari o‘tkazilgan geologiya-qidiruv ishlari davomida olingan geologiya, geofizika axborotlari va boshqa axborotlar hisobiga shakllanishi ma’lumot uchun qabul qilinsin.
3. O‘zbekiston Respublikasi Davlat geologiya qo‘mitasi va “Uz-Kor Silicon” mas’uliyati cheklangan jamiyat qo‘shma korxonasining:
Qashqadaryo viloyatining Tolako‘l va Quduq hamda Samarqand viloyatining Sariko‘l istiqbolli maydonlari uchastkalari doirasida texnik kremniy, shuningdek kremniyning poli- va monokristallar ishlab chiqarish uchun yaroqli bo‘lgan kvars va kvarsitlar konlarini aniqlash bo‘yicha geologiya-qidiruv ishlari olib borish;
geologiya-qidiruv ishlari natijalari bo‘yicha texnik kremniy, shuningdek kremniyning poli- va monokristallari ishlab chiqarishini tashkil etish va keyinchalik ular asosida geologiya-qidiruv ishlari olib borish davomida aniqlangan konlar bazasida mikroelektronika elementlari, shu jumladan quyosh elementlari va fotoelektrik modullar ishlab chiqarishni tashkil etishning maqsadga muvofiqligi to‘g‘risida takliflar kiritish haqidagi taklifiga rozilik berilsin.
4. O‘zbekiston Respublikasi Davlat geologiya qo‘mitasi “Uz-Kor Silicon” mas’uliyati cheklangan jamiyat qo‘shma korxonasiga Sariko‘l, Tolako‘l va Quduq istiqbolli maydonlarini geologik o‘rganish maqsadida yer osti uchastkalaridan foydalanish huquqi uchun uch yil muddatga belgilangan tartibda litsenziya bersin.
5. Samarqand va Qashqadaryo viloyatlari hokimliklari “Uz-Kor Silicon” mas’uliyati cheklangan jamiyat qo‘shma korxonasiga Sariko‘l, Tolako‘l va Quduq istiqbolli maydonlarida yer osti uchastkalarini geologik o‘rganish uchun zarur bo‘lgan yer uchastkalarini belgilangan tartibda ajratsin.
6. O‘zbekiston Respublikasi Tashqi ishlar vazirligi “Uz-Kor Silicon” mas’uliyati cheklangan jamiyat qo‘shma korxonasining buyurtmanomalariga binoan qo‘shma korxona faoliyatida ishtirok etadigan xorijiy mutaxassislarga kirish vizalari, shu jumladan ko‘p martalik kirish vizalari belgilangan tartibda rasmiylashtirilishini ta’minlasin.
7. O‘zbekiston Respublikasi Ichki ishlar vazirligi “Uz-Kor Silicon” mas’uliyati cheklangan jamiyat qo‘shma korxonasining buyurtmanomalariga binoan qo‘shma korxona faoliyatida ishtirok etadigan xorijiy mutaxassislarga ko‘p martalik vizalar belgilangan tartibda berilishini, shuningdek ularning yashash joyida vaqtinchalik ro‘yxatdan o‘tkazilishini va vaqtinchalik ro‘yxatdan o‘tkazish muddati uzaytirilishini ta’minlasin.
8. O‘zbekiston Respublikasi Mehnat va aholini ijtimoiy muhofaza qilish vazirligi “Uz-Kor Silicon” mas’uliyati cheklangan jamiyat qo‘shma korxonasiga yuqori malakali xorijiy mutaxassislarni jalb etishga belgilangan tartibda ruxsatnomalar berilishini ta’minlasin.
9. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.