Oʻzbekiston Respublikasi Vazirlar Mahkamasining 2008-yil 1-avgustdagi “Oʻrta maxsus, kasb-hunar taʼlimi muassasalari xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi 165-sonli qarorining ijrosini taʼminlash maqsadida qaror qilamiz:

1. Oʻrta maxsus, kasb-hunar taʼlimi muassasasi huzuridagi alohida oʻrnak koʻrsatgan xodimlarni ragʻbatlantirish boʻyicha maxsus komissiya toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

Ushbu Nizom Oʻzbekiston Respublikasi Vazirlar Mahkamasining “Oʻrta maxsus, kasb-hunar taʼlimi muassasalari xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi 2008-yil 1-avgustdagi 165-sonli qaroriga (Oʻzbekiston Respublikasi qonun hujjatlari toʻplami, 2008-y., 31-32-son, 303-modda) muvofiq, oʻrta maxsus, kasb-hunar taʼlimi muassasasi huzuridagi alohida oʻrnak koʻrsatgan xodimlarni ragʻbatlantirish boʻyicha maxsus komissiya faoliyatini hamda oʻrta maxsus, kasb-hunar taʼlimi muassasasi Direktor jamgʻarmasi (bundan keyingi oʻrinlarda Direktor jamgʻarmasi deb yuritiladi) hisobidan oʻrta maxsus, kasb-hunar taʼlimi muassasasi yuqori kasb mahoratiga ega boʻlgan va oʻquv-tarbiya jarayoni sifatini oshirishga aniq shaxsiy hissa qoʻshayotgan oʻqituvchilari va ishlab chiqarish taʼlimi ustalari bazaviy tarif stavkalariga har oylik ustamalar belgilash, shuningdek, oʻrta maxsus, kasb-hunar taʼlimi muassasalari xodimlariga bir yoʻla mukofotlar toʻlash va moddiy yordam koʻrsatishni tashkil qilish tartibini belgilaydi.

1. Oʻrta maxsus, kasb-hunar taʼlimi muassasasi huzuridagi alohida oʻrnak koʻrsatgan xodimlarni ragʻbatlantirish boʻyicha maxsus komissiya (keyingi oʻrinlarda matnda Maxsus komissiya deb yuritiladi) oʻz faoliyatini mazkur Nizom va boshqa qonun hujjatlari asosida olib boradi.

2. Maxsus komissiya oʻz faoliyatini qarorlar qabul qilishda xolislik, ochiqlik, oshkoralik va belgilangan tartibga amal qilishlik tamoyillariga tayangan holda olib boradi.

3. Ushbu Nizom barcha oʻrta maxsus, kasb-hunar taʼlimi tizimiga taalluqlidir.

4. Mazkur Nizom talablari Oʻzbekiston Respublikasi Vazirlar Mahkamasining “Budjet tashkilotlarini mablagʻ bilan taʼminlash tartibini takomillashtirish toʻgʻrisida”gi 1999-yil 3-sentabrdagi 414-sonli qaroriga (Oʻzbekiston Respublikasi Hukumatining qarorlari toʻplami, 1999-y., 9-son, 51-modda) muvofiq, oʻrta maxsus, kasb-hunar taʼlimi muassasalari xodimlarini budjetdan tashqari mablagʻlar hisobidan moddiy ragʻbatlantirishga joriy qilinmaydi.

5. Maxsus komissiyaga quyidagi asosiy vazifalar yuklanadi:

oʻrta maxsus, kasb-hunar taʼlimi muassasalarining yuqori kasb mahoratiga ega boʻlgan va oʻquv-tarbiya jarayoni sifatini oshirishga aniq shaxsiy hissa qoʻshayotgan oʻqituvchilari va ishlab chiqarish taʼlimi ustalari bazaviy tarif stavkalariga har oylik ustamalar belgilash, shuningdek, oʻrta maxsus, kasb-hunar taʼlimi muassasalari xodimlariga bir yoʻla mukofotlar toʻlash va moddiy yordam koʻrsatish maqsadida munosib nomzodlarni aniqlash va tasdiqlash;

oʻqituvchi va ishlab chiqarish taʼlimi ustalari bazaviy tarif stavkalariga Direktor jamgʻarmasidan har oylik ustama va bir yoʻla toʻlanadigan mukofotlarning aniq turi va miqdorini belgilash;

kasb mahorati va oʻquv jarayoniga shaxsiy hissa qoʻshganligi, oʻquvchilarning imkoniyatlari va qiziqishlarini hisobga olgan holda chuqurlashtirilgan ixtisosli tabaqalashtirilgan oʻqitishdagi yuksak samaradorlik va sifat uchun, oʻquvchilarning bilimlarini reyting baholash natijalari boʻyicha aniqlanadigan tegishli guruhlar va oʻquv fanlari uchun Oʻrta maxsus, kasb-hunar taʼlimi davlat taʼlim standartlari bilan belgilangan bilimlar va koʻnikmalarning zarur hajmi oʻquvchilar tomonidan oʻzlashtirilishiga qarab, tarbiyaviy jarayonning, auditoriyadan tashqari ishlarning sifati va uni amalga oshirish samaradorligiga bogʻliq ravishda ular tomonidan amalga oshiriladigan tarbiyaviy va auditoriyadan tashqari ish hamda oʻquvchilarni insonparvarlik va yuksak axloqiy ruhda tarbiyalashga shaxsiy qoʻshgan aniq hissasi uchun oʻqituvchilar va ishlab chiqarish taʼlimi ustalari faoliyatining reyting koʻrsatkichlari asosida ularning bazaviy tarif stavkalariga nisbatan oylik ustamalar belgilash;

taʼlim muassasasi xodimlarining murojaatiga koʻra yoki kasaba uyushmasi tashkilotining tashabbusi boʻyicha favqulodda hollarda (yaqin qarindoshi vafot etganda, ogʻir jarohat olinganda, ogʻir kasallikka chalinganda, tabiiy ofatdan zarar koʻrilganda va h.k) ularga koʻrsatiladigan moddiy yordam miqdorini belgilash;

oʻqituvchilar va ishlab chiqarish taʼlimi ustalarining oldingi oʻquv davridagi (semestr, oʻquv yili) faoliyatini baholash yakunlari boʻyicha hamda ayrim oʻqituvchilar va ishlab chiqarish taʼlimi ustalari ish sifatidagi aniqlangan oʻzgarishlar asosida belgilangan bazaviy tarif stavkalariga oylik ustamalar miqdorlarini qayta koʻrib chiqish yoki bekor qilish hamda bu haqda taʼlim muassasasining pedagogik kengashida hisobotlar berib borish;

oʻqituvchi va ishlab chiqarish taʼlimi ustalari bazaviy tarif stavkalariga har oylik ustama haq belgilash va oʻrta maxsus, kasb-hunar taʼlimi muassasalari xodimlarini bir yoʻla mukofotlash va moddiy yordam koʻrsatishni taʼminlash;

navbatdagi semestr davomida oylik ustama haq belgilangan oʻqituvchi va ishlab chiqarish taʼlimi ustalarining pedagogik faoliyati natijalari boʻyicha monitoring ishlarini tizimli ravishda amalga oshirish;

monitoring natijalarini doimiy ravishda oʻz majlislarida koʻrib chiqish, oʻqituvchi va ishlab chiqarish taʼlimi ustalariga ustama belgilash haqidagi oldingi qarorlarni saqlash yoki ularga oʻzgartirishlar kiritish masalasini koʻrib chiqish.

6. Maxsus komissiya oʻzining faoliyatini amalga oshirishda quyidagi huquqlarga ega:

har bir oʻqituvchi va ishlab chiqarish taʼlimi ustalarining kasb mahorati va oʻtgan oʻquv yilidagi oʻquv-tarbiya faoliyatida erishgan natijalarini tahlil qilish va baholash;

har bir oʻqituvchi va ishlab chiqarish taʼlimi ustalarining tarbiyaviy va auditoriyadan tashqari ishlarni samarali amalga oshirish, kasb mahorati va oʻquv jarayoniga qoʻshgan aniq hissasi, yuqori natija va taʼlim sifati uchun oylik ustama haqlarni belgilashga oʻqituvchi va ishlab chiqarish taʼlimi ustalari nomzodlarini aniqlash;

zarur hollarda oʻqituvchi va ishlab chiqarish taʼlimi ustalariga oʻquv yili boshida belgilangan oylik ustama haq miqdoriga muddatidan oldin oʻzgartirish kiritish.

7. Maxsus komissiya barcha oʻrta maxsus, kasb-hunar taʼlimi muassasalari huzurida tashkil etiladi.

8. Maxsus komissiya tarkibi kamida 7 kishidan iborat boʻlib, oʻrta maxsus, kasb-hunar taʼlimi muassasasi direktori buyrugʻi bilan tasdiqlanadi va quyidagi tarkibda tuziladi:

komissiya raisi — taʼlim muassasasi direktori;

masʼul kotib — ichki monitoringni tashkil etilishi uchun masʼul boʻlgan direktorning oʻquv ishlari boʻyicha oʻrinbosari;

pedagogik kengash tomonidan tayinlanadigan, pedagogik jamoaning kamida ikki nafar vakili;

kasaba uyushmasi tashkiloti raisi;

vasiylik kengashi vakili;

ota-onalar qoʻmitasining vakili.

9. Maxsus komissiyaning doimiy faoliyat yurituvchi ishchi organi uch nafar oʻqituvchi va ishlab chiqarish taʼlimi ustalaridan vakillar va oʻrta maxsus, kasb-hunar taʼlimi muassasasi ota-onalar qoʻmitasining ikki nafar vakilidan tashkil topgan monitoring guruhi hisoblanadi. Monitoring guruhi tarkibi Maxsus komissiyaning qarori bilan belgilanadi va oʻrta maxsus, kasb-hunar taʼlimi muassasasi direktorining buyrugʻi bilan tasdiqlanadi.

10. Maxsus komissiya majlisi semestr yakuni boʻyicha kamida bir marta, istisno tariqasida esa zaruriyatga koʻra oʻtkaziladi.

11. Maxsus komissiyaning masʼul kotibi komissiya majlisini oʻtkazish uchun zarur boʻlgan hujjatlarni tayyorlaydi va majlisdan kamida 3 kun oldin ularni Maxsus komissiya raisi va aʼzolariga taqdim etadi.

Maxsus komissiyaning masʼul kotibi komissiya hujjatlarini yuritish va ularni saqlashni taʼminlaydi.

12. Maxsus komissiya majlisi uning aʼzolarining kamida uchdan ikki qismi ishtirok etganda haqiqiy hisoblanadi. Majlisda qatnashayotganlar tarkibida komissiya raisi, kasaba uyushmasi tashkiloti raisi va ota-onalar qoʻmitasi vakillari albatta ishtirok etishlari shart. Qaror majlisda ishtirok etayotganlarning koʻpchilik ovozi bilan qabul qilinadi. Maxsus komissiya aʼzolarining ovozlari teng boʻlganda, raisning ovozi hal qiluvchi hisoblanadi.

13. Maxsus komissiya qarori bayonnoma bilan rasmiylashtiriladi, Maxsus komissiya raisi va aʼzolari tomonidan imzolanadi hamda oʻrta maxsus, kasb-hunar taʼlimi muassasasi muhri bilan tasdiqlanadi.

14. Maxsus komissiya qarori ikki nusxada rasmiylashtiriladi. Bir nusxa oʻrta maxsus, kasb-hunar taʼlimi muassasasi direktorida, ikkinchisi Maxsus komissiya masʼul kotibida saqlanadi va ularning nusxasi zarur hollarda oʻrta maxsus, kasb-hunar taʼlimi hududiy boshqarmasiga taqdim etiladi.

Oʻqituvchilar va ishlab chiqarish taʼlimi ustalari bazaviy tarif stavkalariga har oylik ustamalar, shuningdek, oʻrta maxsus, kasb-hunar taʼlimi muassasalari xodimlariga bir yoʻla toʻlanadigan mukofotlar va moddiy yordamlarning xolisona, oshkora muhokama qilinishi va toʻgʻri belgilanishi uchun masʼullik shaxsan Maxsus komissiya raisi zimmasiga yuklatiladi.

15. Direktor jamgʻarmasining mablagʻlari hisobidan moddiy ragʻbatlantirishning barcha turlari Maxsus komissiya majlisi qaroriga asosan taʼlim muassasasi direktorining buyrugʻi bilan rasmiylashtiriladi.

16. Har bir oʻrta maxsus, kasb-hunar taʼlimi muassasasining oʻqituvchilar xonasida, muqarrar tartibda, xodimlar koʻrishi uchun qulay boʻlgan joyda Maxsus komissiya qarorining nusxasi va unga bevosita tegishli maʼlumotlar aks ettirilgan maxsus stend tashkil qilinadi. Stendda taʼlim-tarbiya jarayoni natijalari, oʻqituvchi va ishlab chiqarish taʼlimi ustalari amalga oshirgan oʻquv-tarbiya faoliyati samaradorligi koʻrsatkichlari kabi zarur maʼlumotlar eʼlon qilinadi.

17. Oʻqituvchilar va ishlab chiqarish taʼlimi ustalari mehnat faoliyatining reyting koʻrsatkichlari mazkur Nizomning ilovasida keltirilgan oʻqituvchi va ishlab chiqarish taʼlimi ustalarining faoliyati samaradorligini hisoblash mezonlari asosida aniqlanadi.

18. Oʻqituvchilar va ishlab chiqarish taʼlimi ustalari mehnat faoliyatining reyting koʻrsatkichlari taʼlim muassasasi hamda uning boʻlimlari doirasida aniqlanadi.

19. Oʻqituvchi yoki ishlab chiqarish taʼlimi ustasi oʻquv yili davomidagi faoliyatida xato va kamchiliklarga yoʻl qoʻysa, unga jarima ballar belgilanadi. Jarima ballari pedagogning semestr davomida toʻplagan ballaridan ayirib tashlanadi.

20. Semestr davomida joriy reyting ballarini hisoblash taʼlim muassasasidagi yoʻnalishlar boʻyicha mavjud boʻlim mudirlari va oʻqituvchilar tomonidan amalga oshiriladi.

21. Pedagoglar toʻplagan reyting ballari semestr yakunida taʼlim muassasasi pedagogik kengashida tasdiqlanadi. Ushbu hujjatlar jamlanmasi Maxsus komissiyaga taqdim etiladi.

22. Taʼlim muassasasi pedagogik kengashida reyting koʻrsatkichi eng yuqori boʻlgan oʻqituvchilar va ishlab chiqarish taʼlimi ustalari haqida elektron maʼlumotlar bazasi tashkil etilib, har semestr yakunida yangilab boriladi.

23. Maxsus komissiya boʻlimlar va pedagog xodimlardan qoʻshimcha maʼlumotlar olishga haqlidir.

24. Maxsus komissiya majlisida Direktor jamgʻarmasidan oʻqituvchilar va ishlab chiqarish taʼlimi ustalari bazaviy tarif stavkalariga har oylik ustamalar, shuningdek, oʻrta maxsus, kasb-hunar taʼlimi muassasalari xodimlariga bir yoʻla toʻlanadigan mukofotlar va moddiy yordam koʻrsatish miqdorlarini Direktor jamgʻarmasi mablagʻlari doirasida aniqlaydi.

25. Pedagogik kengashdan olingan hujjatlar jamlanmasi asosida bazaviy tarif stavkalariga har oylik ustamalar belgilanadigan oʻqituvchilar va ishlab chiqarish taʼlimi ustalari nomzodi aniqlanadi.

26. Mehnat faoliyatining reyting koʻrsatkichlari yuqori boʻlib, hisobot davri uchun shaxsiy ish rejasidagi yuklamalarni toʻliq bajargan oʻqituvchilar va ishlab chiqarish taʼlimi ustalariga bazaviy tarif stavkalariga nisbatan 40 foizgacha har oylik ustamalar belgilanadi. Bunda ajratilgan har oylik ustamalar miqdori Direktor jamgʻarmasidan oʻqituvchilar va ishlab chiqarish taʼlimi ustalari bazaviy tarif stavkalariga har oylik ustamalar uchun ajratilgan mablagʻlar miqdoridan oshib ketmasligi lozim.

27. Oʻqituvchilar va ishlab chiqarish taʼlimi ustalari mehnat faoliyatining reyting koʻrsatkichlarini aniqlash natijalari oʻrta maxsus, kasb-hunar taʼlimi muassasasining ichki va tashqi monitoringini amalga oshirish boʻyicha belgilangan tartibda rasmiylashtiriladi hamda talab etilgan joylarga taqdim qilish uchun oʻrnatilgan tartibda 5 yil mobaynida saqlanadi.

28. Oʻrta maxsus, kasb-hunar taʼlimining yuqori va hududiy boshqaruv organlari vazifalari:

Direktor jamgʻarmasining mehnatga haq toʻlash fondiga nisbatan foizlardagi miqdori Davlat budjeti qabul qilingandan keyin, taʼlim muassasasi xarajatlarining belgilangan hajmini ular eʼtiboriga yetkazish yuzasidan qonun hujjatlarida belgilangan muddatlarda, Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi va Moliya vazirligining qoʻshma xati bilan barcha oʻrta maxsus, kasb-hunar taʼlimi muassasalari, vazirliklar (idoralar) va moliya organlariga yetkazadi;

budjetdan moliyalashtiriladigan oʻrta maxsus, kasb-hunar taʼlimi muassasalari taʼminotiga xarajatlarning yillik smetalarini moliya organlarida roʻyxatdan oʻtkazishda tegishli moliya organiga belgilangan tartibda har bir oʻrta maxsus, kasb-hunar taʼlimi muassasasi boʻyicha ushbu xarajatlarga foiz nisbatida belgilangan miqdordan kelib chiqib hisoblangan Direktor jamgʻarmasi mablagʻlarini ajratib koʻrsatgan holda mehnatga haq toʻlash xarajatlari yillik hajmini taqdim etadi;

tizimdagi har bir taʼlim muassasasida Direktor jamgʻarmasining miqdori Oʻzbekiston Respublikasi Vazirlar Mahkamasining 2008-yil 1-avgustdagi 165-sonli qarori bilan tasdiqlangan “Oʻrta maxsus, kasb-hunar taʼlimi muassasasining Direktor jamgʻarmasi toʻgʻrisida”gi Nizom talablariga mos kelishini taʼminlaydi.

29. Oʻrta maxsus, kasb-hunar taʼlimining yuqori va hududiy boshqaruv organlari vakolatlari:

barcha oʻrta maxsus, kasb-hunar taʼlimi muassasalari uchun oʻqituvchi va ishlab chiqarish taʼlimi ustalarining kasb mahorati va samaradorligi koʻrsatkichlari, maʼnaviy-maʼrifiy, tarbiyaviy va darsdan tashqari ishlar samaradorligini aniqlashda yagona yondashuvga rioya etilishi yuzasidan nazoratni amalga oshiradi;

joriy oʻquv yili davomida oʻqituvchi va ishlab chiqarish taʼlimi ustalarining pedagogik faoliyati samaradorligi va yuqori natijalari tashqi monitoringini amalga oshiradi;

Maxsus komissiya qaroridan norozi boʻlgan oʻqituvchi va ishlab chiqarish taʼlimi ustalarining eʼtirozlarini koʻrib chiqadi hamda tegishli qaror qabul qiladi. Odatda, Maxsus komissiya qaroridan norozi boʻlgan oʻqituvchi yoki ishlab chiqarish taʼlimi ustasi qaror qabul qilingan kundan boshlab 10 kun muddatda oʻrta maxsus, kasb-hunar taʼlimi hududiy boshqarmasiga ariza bilan murojaat etishi koʻzda tutiladi.

30. Oʻrta maxsus, kasb-hunar taʼlimi boshqaruv organlari oʻrta maxsus, kasb-hunar taʼlimi muassasalarining oʻqituvchilari va ishlab chiqarish taʼlimi ustalari bazaviy tarif stavkalariga har oylik ustamalar belgilash, shuningdek, oʻrta maxsus, kasb-hunar taʼlimi muassasalari xodimlariga bir yoʻla mukofotlar toʻlash va moddiy yordam koʻrsatish haqidagi buyruqlarini tekshirishni quyidagi maqsadlarda amalga oshiradi:

oʻqituvchilar va ishlab chiqarish taʼlimi ustalari bazaviy tarif stavkalariga har oylik ustamalar ajratish miqdorining toʻgʻriligini (pedagogik yuklamani hisobga olgan holda belgilangan tegishli bazaviy tarif stavkalariga nisbatan belgilangan foiz miqdorining muvofiqligi) aniqlash;

Oʻzbekiston Respublikasi Vazirlar Mahkamasining 2008-yil 1-avgustdagi 165-sonli qarori bilan tasdiqlangan “Oʻrta maxsus, kasb-hunar taʼlimi muassasasining direktor jamgʻarmasi toʻgʻrisida”gi Nizomning 14-bandiga muvofiq, bazaviy tarif stavkalariga har oylik ustamalar belgilangan oʻqituvchilar va ishlab chiqarish taʼlimi ustalari soni bir vaqtning oʻzida ular umumiy sonining 50 foizidan ortib ketmasligini nazorat qilish;

oʻrta maxsus, kasb-hunar taʼlimi muassasalari xarajatlar smetasida oʻtgan choraklarda foydalanilmagan qoldiq mablagʻlarni joriy chorakda oʻqituvchi va ishlab chiqarish taʼlimi ustalariga belgilangan har oylik ustama, oʻrta maxsus, kasb-hunar taʼlimi muassasalari xodimlariga beriladigan bir yoʻla mukofot va moddiy yordamlarni moliyalashtirish uchun yoʻnaltirishni taʼminlash.

31. Oʻrta maxsus, kasb-hunar taʼlimi muassasasining oʻqituvchilar va ishlab chiqarish taʼlimi ustalari bazaviy tarif stavkalariga har oylik ustamalar belgilash, shuningdek, oʻrta maxsus, kasb-hunar taʼlimi muassasalari xodimlariga bir yoʻla mukofotlar toʻlash va moddiy yordam koʻrsatish toʻgʻrisidagi buyrugʻi oʻrnatilgan tartiblarga muvofiq kelmasligi aniqlangan hollarda oʻrta maxsus, kasb-hunar taʼlimi boshqaruv organlarining tegishli xodimlari oʻrta maxsus, kasb-hunar taʼlimi muassasalari direktorlari bilan tushuntirish ishlarini olib boradi hamda mavjud kamchiliklarni bartaraf etish boʻyicha amaliy yordam koʻrsatadi.

32. Maxsus komissiya, oʻrta maxsus, kasb-hunar taʼlimi muassasalari rahbarlari va bosh hisobchilari Direktor jamgʻarmasi mablagʻlarining maqsadli sarflanishi, shuningdek, oʻqituvchilar va ishlab chiqarish taʼlimi ustalari bazaviy tarif stavkalariga har oylik ustamalar, xodimlarga bir yoʻla mukofotlar va moddiy yordamlar miqdorining toʻgʻri yoʻnaltirilishi uchun javobgar hisoblanadilar.

33. Oʻzbekiston Respublikasi Moliya vazirligining nazorat-taftish bosh boshqarmasi va uning hududiy boʻlimlari Direktor jamgʻarmasi mablagʻlarining maqsadli sarflanishini oʻrnatilgan tartibda tekshirishni amalga oshiradi.

34. Ushbu Nizom Oʻzbekiston Respublikasi Moliya vazirligi bilan kelishilgan.