Ishlab chiqarilayotgan pirovard mahsulotning, eng avvalo paxta moyining sifatini doimiy ravishda yaxshilashdan yogʻ-moy sanoati korxonalarining manfaatdorligini ragʻbatlantirishni kuchaytirish, shuningdek respublika paxta tozalash va yogʻ-moy korxonalari oʻrtasidagi oʻzaro munosabatlar mexanizmini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2008-yil 21-maydagi F-2996-son farmoyishiga muvofiq tashkil etilgan ishlab chiqarilayotgan paxta moyi sifatini oshirishni ragʻbatlantirish yuzasidan takliflar tayyorlash boʻyicha maxsus Idoralararo komissiya tomonidan ishlab chiqilgan:

ishlab chiqarilayotgan paxta moyi sifatini oshirishni ragʻbatlantirishga doir tashkiliy chora-tadbirlar 1-ilovaga* muvofiq;

oziq-ovqat uchun ishlatiladigan paxta moyi sifatini nazorat qilish tizimi 2-ilovaga* muvofiq maʼqullansin.

2. Oʻzbekiston Respublikasi Iqtisodiyot vazirligi, Moliya vazirligi hamda Yogʻ-moy va oziq-ovqat sanoati uyushmasining 2008—2011-yillar davrida yogʻ-moy sanoati korxonalari tomonidan oʻsimlik moyini qadoqlash va hidsizlantirish boʻyicha quvvatlarni 3-4 ilovalarga* muvofiq kuchaytirish toʻgʻrisidagi taklifiga rozilik berilsin.

3. Belgilansinki, 2008-yil paxta xom ashyosi hosilidan boshlab texnik chigitga ulgurji-sotish narxlari ularning navlari va klassi hisobga olingan holda tabaqalashtirilib “Oʻzpaxtasanoat” uyushmasi bilan kelishgan holda Oʻzbekiston Respublikasi Moliya vazirligi tomonidan belgilanadi.

4. Quyidagi tartib belgilansin, unga muvofiq 2009-yil paxta xom ashyosi hosilidan boshlab paxta moyi chiqishi normativlari har yili seleksiya navlari boʻyicha paxta xom ashyosi tayyorlashning haqiqiy hajmlari va chigitning Oʻzbekiston “Sifat” markazi tomonidan aniqlanadigan moydorligi hisobga olingan holda respublika mintaqalari boʻyicha Oʻzbekiston Respublikasi Iqtisodiyot vazirligi, Moliya vazirligi tomonidan oziq-ovqat sanoati korxonalari uyushmasi bilan birgalikda belgilanadi.

5. Oziq-ovqat sanoati korxonalari uyushmasi Oʻzbekiston Respublikasi Sogʻliqni saqlash vazirligi, “Oʻzstandart” agentligi, “Oʻzpaxtasanoat” uyushmasi va Oʻzbekiston “Sifat” markazi bilan birgalikda:

ishlab chiqarilayotgan paxta moyi sifatini oshirishni ragʻbatlantirish boʻyicha tashkiliy chora-tadbirlar 1-ilovada belgilangan muddatlarda soʻzsiz bajarilishini;

2-ilovaga muvofiq tasdiqlangan tizim asosida respublika yogʻ-moy korxonalarida ishlab chiqarilayotgan paxta moyi sifati kompleks nazorat qilinishini;

moy ishlab chiqarish jarayonida yogʻ-moy korxonalari tomonidan texnologik rejimlar normalariga rioya qilinishining tizimli monitoringi olib borilishini;

2009-yil 1-sentabrgacha boʻlgan muddatda texnik chigitning moydorligini aniqlashning ekspres-analizatorlarini mamlakatimizda ishlab chiqarishni oʻzlashtirish boʻyicha tashkiliy-texnik chora-tadbirlar amalga oshirilishini hamda “Sifat” markazi laboratoriyalari va yogʻ-moy korxonalari ular bilan jihozlanishini taʼminlasin.

6. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.