“Oʻzbekiston Respublikasining Vazirlar Mahkamasi toʻgʻrisida”gi Qonunga muvofiq hamda Vazirlar Mahkamasining ijro etuvchi apparati tarkibiy boʻlinmalariga rahbarlik va ular faoliyatini muvofiqlashtirish darajasini oshirish, tahliliy materiallar va hukumat qarorlarining loyihalari har tomonlama, chuqur hamda sifatli tayyorlanishini taʼminlash, ijrochilik intizomini mustahkamlash, Oʻzbekiston Respublikasi Prezidenti va Hukumati qabul qilgan qarorlar, Oʻzbekiston Respublikasining imzolangan xalqaro shartnomalari, xorijiy mamlakatlar va xalqaro tashkilotlar bilan investitsiyaviy va tashqi iqtisodiy shartnomalar hamda bitimlarning amalga oshirilishi ustidan nazoratni kuchaytirish maqsadida:

1. Oʻzbekiston Respublikasi Vazirlar Mahkamasining ijro etuvchi apparati tuzilmasiga Ijro etuvchi apparat boshqaruvchisi lavozimi kiritilsin, Vazirlar Mahkamasi Apparati rahbari lavozimi tugatilsin.

Belgilansinki, Oʻzbekiston Respublikasi Vazirlar Mahkamasining Ijro etuvchi apparati boshqaruvchisi oʻz mavqeyi, moddiy taʼminoti; ijtimoiy-maishiy, transport va tibbiy xizmat koʻrsatish sharoitlari boʻyicha vazirga tenglashtiriladi, Oʻzbekiston Respublikasi Prezidenti Farmoni bilan lavozimga tayinlanadi va ozod etiladi.

2. Oʻzbekiston Respublikasi Vazirlar Mahkamasining Ijro etuvchi apparati boshqaruvchisi zimmasiga quyidagi asosiy vakolat va vazifalar yuklatilsin:

Vazirlar Mahkamasining ijro etuvchi apparati faoliyatini tashkil etadi va ijro etuvchi apparatga yuklatilgan vazifalarning bajarilishi uchun masʼul hisoblanadi;

Oʻzbekiston Respublikasi Prezidenti Farmon va qarorlari, Hukumat qarorlari loyihalari ekspertizasi hamda sifatli tayyorlanishini tashkil etish boʻyicha Oʻzbekiston Respublikasi Bosh vazirining oʻrinbosarlari bilan yaqin hamkorlikda boʻladi;

Vazirlar Mahkamasiga kiritiladigan normativ-huquqiy hujjatlarning loyihalarini, tahliliy materiallarni chuqur va sifatli tayyorlash, Oʻzbekiston Respublikasi Prezidenti Farmon va qarorlari, Oʻzbekiston Respublikasi Hukumati qarorlari loyihalarini har tomonlama ekspertizadan oʻtkazish maqsadida Vazirlar Mahkamasining axborot-tahlil departamentlari faoliyati muvofiqlashtirilishini taʼminlaydi;

Qonunlar, Oʻzbekiston Respublikasi Prezidentining Farmon va qarorlari, Oʻzbekiston Respublikasi Vazirlar Mahkamasining qarorlari va farmoyishlari, Oʻzbekiston Respublikasining xalqaro shartnomalari va Hukumatda koʻrib chiqilishi zarur boʻlgan boshqa hujjatlarning loyihalari Vazirlar Mahkamasiga kiritilishida ijro etuvchi organlar tomonidan belgilangan reglament talablariga rioya etilishi ustidan nazoratni amalga oshiradi;

ijro etuvchi hokimiyat organlari tomonidan ijrochilik intizomini mustahkamlash hamda Oʻzbekiston Respublikasi Prezidentining Farmon, qaror va topshiriqlari, Hukumat qarorlarining bajarilishini nazorat qilish chora-tadbirlarini amalga oshiradi;

Oʻzbekiston Respublikasi Hukumati ijro etuvchi apparatining unga bevosita boʻysunuvchi tarkibiy boʻlinmalari faoliyatiga rahbarlik qiladi, Bosh vazir Kotibiyati va Bosh vazirning oʻrinbosarlari kotibiyatlari ishini muvofiqlashtiradi;

Hukumat qarorlariga muvofiq boshqa vakolatlarni amalga oshiradi.

3. Belgilansinki, Vazirlar Mahkamasining eng muhim komplekslar, mamlakat iqtisodiyoti tarmoqlari va sohalari boʻyicha Axborot-tahlil departamentlari oʻz faoliyatida tegishli ravishda Oʻzbekiston Respublikasi Bosh vaziri va uning oʻrinbosarlariga boʻysunadi va ayni vaqtda ularning faoliyati Vazirlar Mahkamasi Ijro etuvchi apparati boshqaruvchisi tomonidan muvofiqlashtirib boriladi.

4. Oʻzbekiston Respublikasi Vazirlar Mahkamasining Yuridik boʻlimi Huquqiy ekspertiza va xalqaro shartnomalar boshqarmasi etib qayta tashkil qilinsin.

Huquqiy ekspertiza va xalqaro shartnomalar boshqarmasining asosiy vazifalari etib quyidagilar belgilansin:

davlat va xoʻjalik boshqaruvi organlari tomonidan Oʻzbekiston Respublikasi Vazirlar Mahkamasiga kiritiladigan qonun hujjatlari hamda boshqa normativ-huquqiy hujjatlar loyihalarini har tomonlama huquqiy ekspertizadan oʻtkazishni tashkil etish, qonun hujjatlari, Oʻzbekiston Respublikasi Prezidentining Farmon, qaror va farmoyishlari, Oʻzbekiston Respublikasi Vazirlar Mahkamasi qarorlari loyihalarini tayyorlashda qatnashish;

Oʻzbekiston Respublikasi Hukumati qonun loyihasiga oid ish rejalarini ishlab chiqish va amalga oshirishni tashkil etish, Oʻzbekiston Respublikasi Hukumati tomonidan kiritilgan qonun loyihalari hamda boshqa masalalar boʻyicha Oʻzbekiston Respublikasi Oliy Majlisi palatalari va ularning qoʻmitalari bilan oʻzaro hamkorlikni taʼminlash;

xalqaro shartnomalar loyihalarini va xalqaro shartnomalarni imzolash, ularga qoʻshilish, ratifikatsiya qilish va tasdiqlashning maqsadga muvofiqligi toʻgʻrisidagi takliflarni ekspertizadan oʻtkazishni tashkil etish, Oʻzbekiston Respublikasining xalqaro shartnomalari loyihalarini tayyorlashda qatnashish;

strategik muhim investitsiya va tashqi savdo shartnomalari (kontraktlari)ni tayyorlashda Oʻzbekiston Respublikasi iqtisodiy manfaatlari hamda tashqi iqtisodiy xavfsizligiga rioya etilishini taʼminlash;

tizimlashtirilgan maʼlumotlar bankini shakllantirish va olib borish hamda Oʻzbekiston Respublikasining xalqaro shartnomalari hamda Oʻzbekiston Respublikasi Prezidentining xorijiy davlatlarga qilgan tashriflari, shuningdek xorijiy davlatlar va hukumatlar, xalqaro tashkilotlar rahbarlarining Oʻzbekiston Respublikasiga tashriflari davomida imzolangan investitsiya hamda tashqi savdo shartnomalarining amalga oshirilishi monitoringini yuritish.

Vazirlar Mahkamasining Iqtisodiyot va tashqi iqtisodiy aloqalar masalalari yigʻma axborot-tahlil departamentining xalqaro shartnomalarni ekspertizadan oʻtkazish boʻyicha yetakchi mutaxassis (yurist) lavozimi qisqartirilsin.

5. Quyidagilar:

Vazirlar Mahkamasining yangi ijro etuvchi tuzilmasi 1-ilovaga* muvofiq;

Huquqiy ekspertiza va xalqaro shartnomalar boshqarmasi tuzilmasi 2-ilovaga* muvofiq tasdiqlansin.

6. Oʻzbekiston Respublikasi Bosh vaziri Sh.M. Mirziyoyev zimmasiga:

Oʻzbekiston Respublikasi Vazirlar Mahkamasi ijro etuvchi apparatining shtat jadvaliga mazkur Qarorga muvofiq oʻzgartishlar kiritish;

ikki hafta muddatda Oʻzbekiston Respublikasi Vazirlar Mahkamasi Ijro etuvchi apparati toʻgʻrisida Nizom hamda Huquqiy ekspertiza va xalqaro shartnomalar boshqarmasi toʻgʻrisidagi Nizomni tasdiqlash;

bir oy muddatda Boshqarmani chuqur bilim va amaliy ish tajribasiga ega yuqori malakali kadrlar bilan toʻldirish vazifasi yuklansin, bunda shuni nazarda tutish kerakki, xalqaro shartnomalarni ekspertizadan oʻtkazish va ularning amalga oshirilishi monitoringi boʻlimi mudiri lavozimiga oliy iqtisodiy maʼlumotga ega shaxs tayinlanadi, uning oʻrinbosarlari esa Oʻzbekiston Respublikasi Tashqi ishlar vazirligi tizimida — siyosiy sohada hamkorlik qilish masalalari boʻyicha hamda Milliy xavfsizlik xizmati tizimida — iqtisodiy xavfsizlik sohasida hamkorlik masalalari boʻyicha ish tajribasiga ega mutaxassislardan tayinlanadilar.

7. Oʻzbekiston Respublikasi Tashqi ishlar vazirligi, Tashqi iqtisodiy aloqalar, investitsiyalar va savdo vazirligi, Adliya vazirligi, boshqa vazirliklar, idoralar va tashkilotlar quyidagilarni:

ikki oy muddatda Huquqiy ekspertiza va xalqaro shartnomalar boshqarmasiga Oʻzbekiston Respublikasining amaldagi xalqaro shartnomalari matnlari, Oʻzbekiston Respublikasi Prezidentining tashriflari davomida hamda Oʻzbekiston Respublikasi Hukumati nomidan imzolangan, shuningdek xorijiy davlatlar va hukumatlar, xalqaro tashkilotlar rahbarlarining Oʻzbekiston Respublikasiga qilgan tashriflari davomida imzolangan investitsiya hamda tashqi savdo shartnomalarining matnlari taqdim etilishini;

xalqaro shartnomalar tuzilishiga qarab ularning matnlarini, shuningdek Oʻzbekiston Respublikasi Prezidentining rasmiy tashriflari davomida hamda Oʻzbekiston Respublikasi Hukumati nomidan imzolanadigan, shuningdek xorijiy davlatlar va hukumatlar, xalqaro tashkilotlar rahbarlarining Oʻzbekiston Respublikasiga tashriflari davomida imzolanadigan investitsiya hamda tashqi savdo shartnomalarining matnlari Boshqarmaga yuborilishini;

Boshqarma soʻrovlariga muvofiq Oʻzbekiston Respublikasining xalqaro shartnomalari, investitsiya va tashqi savdo shartnomalarini bajarish masalalari boʻyicha zarur materiallar va hujjatlar taqdim etilishini taʼminlasin.

8. Oʻzbekiston Respublikasi Vazirlar Mahkamasi Ijro etuvchi apparati boshqaruvchisi Adliya vazirligi bilan birgalikda bir oy muddatda qonun hujjatlariga ushbu Qarordan kelib chiqadigan oʻzgartishlar toʻgʻrisida Vazirlar Mahkamasiga takliflar kiritsin;

9. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.