Aviatsiya texnikasi ishlab chiqarish va undan foydalanish sohasida yuqori malakali mutaxassislar tayyorlashni tashkil etishni takomillashtirish va uning sifatini oshirish, buning uchun zamonaviy talablarga javob beradigan zarur oʻquv va moddiy-texnik bazani yaratish, umumtexnik va maxsus predmetlar oʻrtasidagi predmetlararo uzviy aloqalarni taʼminlash, boʻlajak mutaxassislarni oʻqitish jarayonini ularning kasb malakalarini egallashi bilan bogʻlanishini kuchaytirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, “Oʻzbekiston havo yoʻllari” milliy aviakompaniyasi, “Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining Toshkent davlat aviatsiya institutini tugatish va uning negizida Toshkent davlat texnika universitetining Aviatsiya fakultetini tashkil etish toʻgʻrisidagi taklifi qabul qilinsin.

4. Toshkent davlat texnika universitetining Aviatsiya fakultetiga 2008/2009 oʻquv yili uchun “Samolyotsozlik”, “Aviatsiya va raketa-kosmik texnikadan foydalanish”, “Uchish apparatlari va aeroportlarning radioelektron asbob-uskunalaridan foydalanish” hamda “Havodagi harakatlarni boshqarish” yoʻnalishlari boʻyicha qabul qilish umumiy kvotasi bakalavrlar tayyorlash boʻyicha 100 kishi, shu jumladan davlat grantlari boʻyicha 40 kishi va pulli-kontrakt asosida 60 kishi etib belgilansin, bunda har bir yoʻnalish boʻyicha umumiy kvotaning 25 kishidan, shu jumladan davlat grantlari boʻyicha 10 kishi va pulli-kontrakt asosida 15 kishi boʻlishi nazarda tutilsin.

Oʻzbekiston Respublikasi Oliy va oʻrta maxsus taʼlim vazirligi, Iqtisodiyot vazirligi, Moliya vazirligi manfaatdor tuzilmalar bilan birgalikda kelgusi yillarda Toshkent davlat texnika universitetining Aviatsiya fakultetiga taʼlimning aniq yoʻnalishlari boʻyicha oʻqishga qabul qilish kvotasini belgilashda respublika korxonalari va iqtisodiyoti sohalari uchun tayyorlanayotgan mutaxassislarga boʻlgan aniq ehtiyojdan kelib chiqsinlar.

5. Oʻzbekiston Respublikasi Oliy va oʻrta maxsus taʼlim vazirligi, Davlat mulki qoʻmitasi tugatilayotgan Toshkent davlat aviatsiya institutining 2-ilovaga muvofiq binolari va inshootlarini, boshqa mol-mulki hamda aktivlarini Toshkent davlat texnika universiteti balansiga bepul oʻtkazsinlar.

Toshkent davlat texnika universiteti Toshkent shahar hokimligi bilan birgalikda 2008-yil 20-avgustgacha boʻlgan muddatda 2-ilovaga muvofiq berilgan binolarni, ularga oʻzga tuzilmalarning joylashtirilishiga yoʻl qoʻymasdan, ulardan faqat oʻquv jarayonida foydalanish uchun tayyorlashni taʼminlasin.

6. Toshkent davlat aviatsiya instituti tugatilishi va uning negizida Toshkent davlat texnika universiteti Aviatsiya fakultetining tashkil etilishi bilan bogʻliq ishlarni muvofiqlashtirish uchun 3-ilovaga muvofiq tarkibda Komissiya tuzilsin.

Komissiya (A.P. Parpiyev):

Toshkent davlat aviatsiya institutining tugatilishi bilan bogʻliq chora-tadbirlar kompleksini qonun hujjatlarida belgilangan tartibda amalga oshirsin;

Toshkent davlat aviatsiya instituti va uning tarkibiy boʻlinmalari mol-mulkining saqlanishi, Toshkent davlat texnika universiteti balansiga berilgandan soʻng ulardan maqsadli foydalanilishi ustidan nazoratni taʼminlasin;

Oʻzbekiston Respublikasi Davlat mulki qoʻmitasi bilan birgalikda, tugatilayotgan Toshkent davlat aviatsiya instituti binolari, mol-mulki va aktivlarining Toshkent davlat texnika universiteti balansiga belgilangan tartibda berilishini taʼminlasin.

7. Oʻzbekiston Respublikasi Oliy va oʻrta maxsus taʼlim vazirligi bir oy muddatda:

Toshkent davlat texnika universiteti tuzilmasini ushbu qaror bilan tasdiqlangan 1-ilovaga muvofiq tuzilma bilan toʻliq muvofiqlashtirsin;

Toshkent davlat texnika universitetining yangilangan ustavini tasdiqlasin;

tugatilayotgan Toshkent davlat aviatsiya institutining oʻqiyotgan talabalar kontingentini Toshkent davlat texnika universiteti tarkibiga oʻtkazsin;

Toshkent davlat texnika universitetining maʼmuriy-boshqaruv va oʻquv-yordamchi xodimlari sonini qonun hujjatlarida belgilangan normalarga muvofiqlashtirsin;

tugatilayotgan Toshkent davlat aviatsiya institutining professor-oʻqituvchilar tarkibini attestatsiyadan oʻtkazsin va Toshkent davlat texnika universitetining Aviatsiya fakulteti kafedralarini yuqori malakali kadrlar bilan taʼminlasin;

Toshkent davlat aviatsiya instituti huzuridagi akademik litseyni Toshkent davlat texnika universiteti huzuridagi 5-son akademik litsey deb qayta nomlasin;

oʻquv, laboratoriya va yordamchi boʻlinmalar tarkibi va tuzilmasini qayta koʻrib chiqsin, bunda universitet faoliyatida, shu jumladan uning binolari va xonalaridan foydalanish masalalarida bir-birini takrorlash va parallelizmga yoʻl qoʻymaslikni nazarda tutsin.

9. Oʻzbekiston Respublikasi Moliya vazirligi Toshkent davlat texnika universitetining 2008-yil uchun xarajatlar smetasiga ushbu qaror qoidalarini hisobga olgan holda zarur oʻzgartirishlar kiritsin.

10. Oʻzbekiston Respublikasi Mehnat va aholini ijtimoiy muhofaza qilish vazirligi Oliy va oʻrta maxsus taʼlim vazirligi bilan birgalikda Toshkent davlat aviatsiya institutining tugatilishi munosabati bilan boʻshab qoladigan xodimlarni belgilangan tartibda ishga joylashtirish chora-tadbirlarini koʻrsin.

11. Oʻzbekiston Respublikasi Oliy va oʻrta maxsus taʼlim vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.