Oʻzbekiston Respublikasi Prezidentining “Toshkent shahrida Singapur menejmentni rivojlantirish instituti faoliyatini tashkil etish toʻgʻrisida” 2007-yil 5-sentabrdagi PQ-691-son qarorini bajarish yuzasidan hamda Toshkent shahridagi Singapur menejmentni rivojlantirish institutining barcha bino va inshootlar kompleksi qurilishini, rekonstruksiya qilinishini, kapital taʼmirlanishini, zarur asbob-uskunalar bilan jihozlanishini oʻz vaqtida tugallash, shuningdek uning 2008-2009 oʻquv yili boshlangungacha foydalanishga topshirilishini taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining “Toshkent shahrida Singapur menejmentni rivojlantirish instituti faoliyatini tashkil etish toʻgʻrisida” 2007-yil 5-sentabrdagi PQ-691-son qaroriga muvofiq Toshkent shahridagi Singapur menejmentni rivojlantirish instituti 5 yil muddatga, shu jumladan institutni jihozlash va faoliyat koʻrsatishi uchun respublikaga keltirilayotgan asbob-uskunalar, multimediy mahsulotlari, adabiyotlar, inventarlar va moddiy-texnika resurslarini olib kirishda soliqlarning barcha turlaridan va bojxona toʻlovlaridan (bojxona rasmiylashtiruvi yigʻimlaridan tashqari) ozod qilinganligi;

“Toshkent shahridagi Singapur menejmentni rivojlantirish instituti” obyekti boʻyicha “OʻzshaharsozlikLITI” ochiq aksiyadorlik jamiyati — bosh loyihachi, “12-trest” ochiq aksiyadorlik jamiyati — bosh pudratchi etib belgilanganligi maʼlumot uchun qabul qilinsin.

2. “Toshkent shahridagi Singapur menejmentni rivojlantirish instituti” obyekti boʻyicha bosh loyihachi va bosh pudratchilar tomonidan bajariladigan va buyurtmachilarga — Oʻzbekiston banklar assotsiatsiyasi va Toshkent shahridagi Singapur menejmentni rivojlantirish institutiga toʻlov uchun taqdim qilinadigan loyiha-qidiruv va qurilish ishlari uchun qoʻshilgan qiymat soligʻi boʻyicha “nol stavkasi” qoʻllanilsin.

3. “Toshkent shahridagi Singapur menejmentni rivojlantirish instituti” obyekti boʻyicha bosh pudratchi va uning subpudratchi tashkilotlari, istisno tariqasida, Oʻzbekiston Respublikasi Vazirlar Mahkamasi tomonidan tasdiqlanadigan roʻyxat boʻyicha ushbu obyektni rekonstruksiya qilish va jihozlash uchun ular tomonidan keltiriladigan asbob-uskunalar, qurilish materiallari va mebellar uchun bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod qilinsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.