Investitsiya loyihalari hujjatlarini ishlab chiqish, ekspertizadan oʻtkazish va tasdiqlash mexanizmini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.

1. Vazirlar Mahkamasining 2006-yil 1-dekabrdagi 247-son qarori bilan tasdiqlangan Oʻzbekiston Respublikasi Tashqi iqtisodiy aloqalar, investitsiyalar va savdo vazirligi huzuridagi Idoralararo ekspertlar kengashi tomonidan yengil sanoat korxonalarini qurish, qayta ixtisoslashtirish va modernizatsiya qilish boʻyicha takliflarni koʻrib chiqish tartibi toʻgʻrisida nizomda:

a) 9-bandning oʻn toʻrtinchi xatboshi quyidagi tahrirda bayon qilinsin:

“Ekspertlar kengashi tashabbuskor taklifining tasdiqlangan mezonlarga muvofiqligini oʻrganib hamda ishchi organning dastlabki bahosi natijalarini koʻrib chiqib oʻn ish kuni mobaynida bundan keyin ishlab chiqishning maqsadga muvofiqligi toʻgʻrisida rasmiy xulosa beradi”;

b) 10-bandning ikkinchi xatboshi quyidagi mazmundagi ikkinchi va uchinchi xatboshi bilan almashtirilsin:

“Loyihalarning texnik-iqtisodiy asoslashini ishlab chiqish Ekspertlar kengashi tomonidan tasdiqlanadigan yengil sanoat korxonalarini qurish, qayta ixtisoslashtirish va modernizatsiya qilish loyihalarini tanlab olish boʻyicha mezonlar asosida amalga oshiriladi.

Vazirlar Mahkamasining 2007-yil 7-iyundagi 110-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomning 1-bandida nazarda tutilgan tegishli talablarga muvofiq boʻlgan loyihalar boʻyicha loyihalarning texnik-iqtisodiy asoslashini ishlab chiqish va ekspertizadan oʻtkazish koʻrsatib oʻtilgan nizomning IV boʻlimiga muvofiq amalga oshiriladi”;

v) 11-bandda:

birinchi xatboshi quyidagi tahrirda bayon qilinsin:

“Loyihaning texnik-iqtisodiy asoslashi ekspertizadan oʻtkazish uchun “Oʻzbekyengilsanoat” davlat-aksiyadorlik kompaniyasiga beriladi. Loyihaning texnik-iqtisodiy asoslashini “Oʻzbekyengilsanoat” davlat-aksiyadorlik kompaniyasida ekspertizadan oʻtkazish loyiha boʻyicha qabul qilingan texnologik yechimni (foydalaniladigan texnologiyalar darajasi, asbob-uskunalarning — texnologik jarayonning tavsiya etilayotgan zanjirining kompleksliligi, yuqori sifatli va keng turdagi mahsulotlar ishlab chiqarishni tashkil etish imkoniyati, xalqaro standartlarga muvofiq boʻlgan sifatni boshqarish tizimining mavjudligi, xomashyo bazasi bilan taʼminlanganlik, shuningdek umuman tarmoq boʻyicha loyihani amalga oshirishning kompleksliligi) baholash yuzasidan ikki hafta muddatda amalga oshiriladi. Loyihaning texnik-iqtisodiy asoslashini “Oʻzbekyengilsanoat” davlat-aksiyadorlik kompaniyasida ekspertizadan oʻtkazish natijalariga koʻra tashabbuskor uni koʻrib chiqish uchun Ekspertlar kengashiga kiritadi”;

uchinchi xatboshi quyidagi tahrirda bayon qilinsin:

“Oʻzbekyengilsanoat” davlat-aksiyadorlik kompaniyasining texnik-iqtisodiy asoslash yuzasidan ekspert xulosasi”;

yettinchi xatboshi quyidagi tahrirda bayon qilinsin:

“Loyiha tashabbuskori “Oʻzbekyengilsanoat” davlat-aksiyadorlik kompaniyasi xulosasiga rozi boʻlmagan taqdirda Ekspertlar kengashiga asoslangan eʼtirozni taqdim etish huquqiga ega. Ekspertlar kengashi loyihaning texnik-iqtisodiy asoslashini “Oʻzbekyengilsanoat” davlat-aksiyadorlik kompaniyasi xulosalarini, shuningdek loyiha tashabbuskori fikrini hisobga olgan holda koʻrib chiqadi va tegishli qaror qabul qiladi”;

g) 14-bandning “v” kichik bandidagi “loyihaning texnik-iqtisodiy asoslashi boʻyicha bir yoki bir nechta vakolatli ekspertiza organlarining salbiy xulosasi mavjud boʻlgan taqdirda” soʻzlari chiqarib tashlansin;

d) 15-bandning ikkinchi xatboshi chiqarib tashlansin;

e) 16-band quyidagi tahrirda bayon qilinsin:

“16. Loyihaning texnik-iqtisodiy asoslashi boʻyicha Ekspertlar kengashining ijobiy qarori loyihaning texnik-iqtisodiy asoslashida nazarda tutilgan shartlar, talablar va parametrlarga muvofiq loyihani kelgusida amalga oshirish uchun asos hisoblanadi.

Ushbu Nizomning 10-bandi uchinchi xatboshida nazarda tutilgan loyihalarning texnik-iqtisodiy asoslashini tasdiqlash loyihaning texnik-iqtisodiy asoslashi boʻyicha Ekspertlar kengashining ijobiy qarori olingandan keyin Vazirlar Mahkamasining 2007-yil 7-iyundagi 110-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomning IV boʻlimiga muvofiq amalga oshiriladi”.

2. Vazirlar Mahkamasining 2007-yil 7-iyundagi 110-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomda (Oʻzbekiston Respublikasi QT, 2007-y., 6-son, 34-modda):

a) 1-bandda:

“g” kichik banddagi “kamida 25 foiz” soʻzlari “50 foizdan ortiq” soʻzlari bilan almashtirilsin;

“d” kichik band oʻz kuchini yoʻqotgan deb hisoblansin;

b) 6-band quyidagi tahrirda bayon qilinsin:

“6. DTIA (DTIH) loyiha tashabbuskori yoki uning buyurtmasi boʻyicha loyihalash tashkiloti yoki injiniring kompaniyasi tomonidan ishlanma yuzasidan topshiriq asosida ishlab chiqiladi.

Loyihaning DTIA (DTIH)ni ishlab chiquvchi, agar faoliyatning ushbu turini amalga oshirish uchun litsenziya olish Oʻzbekiston Respublikasi qonun hujjatlarida nazarda tutilgan boʻlsa, tegishli sohada obyektlarni loyihalashtirish uchun litsenziyaga ega boʻlishi kerak.

Loyihalashtirishning sifati uchun javobgarlik ishlab chiquvchiga yuklanadi”;

v) 9-bandga quyidagi mazmundagi xatboshi qoʻshilsin:

“Faqat ushbu Nizomning 1-bandi “b” kichik bandiga muvofiq amalga oshiriladigan loyihalar boʻyicha loyihaning TIA (TIH)ni loyihaning DTIA (DTIH)ni ishlab chiqmasdan ishlab chiqishga yoʻl qoʻyiladi”;

g) 11-banddan “tanlov asosida” soʻzlari chiqarib tashlansin;

d) 12-bandda:

“v” kichik banddan “texnik darajasi va” soʻzlari chiqarib tashlansin;

quyidagi mazmundagi xatboshi qoʻshilsin:

“Sanoatning bazaviy tarmoqlarida (elektr energetikasi, neft va gazni qayta ishlash, kimyo va ogʻir sanoatda) investitsiya loyihasining DTIA (DTIH) va TIA (TIH) faqat “Oʻzogʻirneftgazkimyoloyiha” instituti Ilmiy-texnik kengashining ijobiy xulosasidan keyin ushbu bandda koʻrsatilgan vakolatli organlarga ekspertiza qilish uchun kiritiladi”;

e) 13-band quyidagi tahrirda bayon qilinsin:

“13. Loyiha tashabbuskori Vazirlar Mahkamasining tegishli Axborot-tahlil departamentiga DTIA (DTIH)ni tegishli tushuntirish xatini, koʻrib chiqiladigan materiallarni, shuningdek ushbu Nizomning 12-bandida koʻrsatilgan vakolatli ekspertiza organlarining xulosalarini ilova qilgan holda ikki nusxada kiritadi”;

j) 14-band quyidagi tahrirda bayon qilinsin:

“14. Vazirlar Mahkamasining tegishli Axborot-tahlil departamenti uch kun muddatda ushbu Nizomga 4-ilovaga muvofiq shakl boʻyicha loyihaning DTIA (DTIH)ni tasdiqlash toʻgʻrisidagi hujjatni tayyorlaydi va ikki kun muddatda Vazirlar Mahkamasining Iqtisodiyot va tashqi iqtisodiy aloqalar masalalari kompleksi rahbari bilan kelishish uchun Vazirlar Mahkamasining Iqtisodiyot va tashqi iqtisodiy aloqalar masalalari yigʻma axborot-tahlil departamentiga taqdim etadi”;

z) 15-band oʻz kuchini yoʻqotgan deb hisoblansin;

i) 16-band quyidagi tahrirda bayon qilinsin:

“16. DTIA (DTIH) Vazirlar Mahkamasining tegishli Kompleksi rahbari tomonidan tasdiqlanadi.

Vazirlar Mahkamasining tegishli Kompleksi rahbari tomonidan tasdiqlangan loyihaning DTIA (DTIH) har bir sahifasiga “20__ y. _______da _____-son bilan tasdiqlangan” degan yozuvli shtempel bilan majburiy belgi qoʻyiladi. Tasdiqlangan DTIA (DTIH)ning bir nusxasi loyiha tashabbuskoriga beriladi, ikkinchi nusxasi esa Vazirlar Mahkamasining tegishli Axborot-tahlil departamentida qoladi, loyihaning TIA (TIH) tasdiqlanganda — Vazirlar Mahkamasining Umumiy boʻlimiga beriladi”.

k) 20-bandda:

ikkinchi xatboshidagi “qarori” soʻzi “qabul qilinadigan qarori” soʻzlari bilan almashtirilsin;

quyidagi mazmundagi uchinchi xatboshi qoʻshilsin:

“Vazirlar Mahkamasining qarori qabul qilinishi zarurligini asoslaydigan koʻrib chiqiladigan materiallar bilan birgalikda tegishli tushuntirish xatini”;

uchinchi—beshinchi xatboshi tegishli ravishda toʻrtinchi—oltinchi xatboshi deb hisoblansin;

l) 21-banddagi “qarori” soʻzi “qabul qiladigan qarori” soʻzlari bilan almashtirilsin;

m) 22-banddagi “qarori” va “qaroriga” soʻzlari “qabul qiladigan qarori” va “qabul qiladigan qaroriga” soʻzlari bilan almashtirilsin;

n) 23-bandga quyidagi mazmundagi xat boshi qoʻshilsin:

“Oʻzbekiston Respublikasi Vazirlar Mahkamasi tomonidan tasdiqlangan investitsiya loyihasining TIA (TIH) har bir sahifasiga “Oʻzbekiston Respublikasi Vazirlar Mahkamasining 20__ y. _______dagi ____ -son ____ bilan tasdiqlangan” degan yozuvli shtempel bilan majburiy belgi qoʻyiladi”;

o) V boʻlim va 31-band oʻz kuchini yoʻqotgan deb hisoblansin;

p) 36-band quyidagi tahrirda bayon qilinsin:

“36. Loyihani moliyalashtirish (birgalikda moliyalashtirish) toʻgʻrisidagi jamgʻarmani boshqarish boʻyicha Kengashning qarori, loyihaning tasdiqlangan DTIA (DTIH) asosida investitsiya loyihasining TIA (TIH) ishlab chiqiladi.

Jamgʻarma mablagʻlari hisobiga moliyalashtirish (birgalikda moliyalashtirish) tavsiya qilinayotgan investitsiya loyihasining TIA (TIH) sanoatning bazaviy tarmoqlarida (elektr energetikasi, neft va gazni qayta ishlash, kimyo va ogʻir sanoatda)gi loyihalar boʻyicha “Oʻzogʻirneftgazkimyoloyiha” instituti bilan kelishilishi kerak (investitsiya loyihasining TIA (TIH) ishlab chiquvchisi “Oʻzogʻirneftgazkimyoloyiha” instituti hisoblangan hollar bundan mustasno)”;

r) Investitsiya loyihasini texnik-iqtisodiy asoslash (TIA)ning namunaviy tarkibida (5-ilova):

11.4-11.5-bandlar quyidagi mazmundagi 11.4—11.8-bandlar bilan almashtirilsin:

“11.4. Iqtisodiy samaradorlikni baholash;

11.5. Qarzga olingan mablagʻlarning (ulardan foydalanilgan taqdirda) qoplanishini va oʻz vaqtida qaytarilishini hisobga olgan holda moliyaviy samaradorlikni baholash, valyutaning qoplanishi;

11.6. Loyihaning asosiy tavakkalchiliklarga sezgirligi;

11.7. Sof joriy qiymat koʻrsatkichlari va kapital qoʻyilmalar ichki qaytariluvchanligining iqtisodiy normasi;

11.8. Moliyaviy natijalarning mamlakat iqtisodiyotiga taʼsirini baholash”;

15-bandga “11.5” raqamlaridan keyin “11.8” raqamlari qoʻshilsin;

s) Loyihani texnik-iqtisodiy asoslashning asosiy texnik-iqtisodiy koʻrsatkichlarining 9-bandidagi (6-ilova) “qaytarish” soʻzi “taqdim etish” soʻzlari bilan almashtirilsin.