Oʻzbekiston Respublikasi Prezidentining “Navoiy kon-metallurgiya kombinati” Davlat korxonasining Kuzatuvchi kengashini tashkil etish toʻgʻrisida” 2008-yil 3-martdagi PQ-809-son qarorini bajarish yuzasidan Vazirlar Mahkamasi qaror qiladi:

1. Quyidagilar:

“Navoiy kon-metallurgiya kombinati” Davlat korxonasining Ustavi 1-ilovaga muvofiq;

“Navoiy kon-metallurgiya kombinati” Davlat korxonasining Kuzatuvchi kengashi toʻgʻrisidagi nizom 2-ilovaga muvofiq tasdiqlansin.

2. Navoiy kon-metallurgiya kombinati bir oy muddatda:

Ustavni belgilangan tartibda roʻyxatdan oʻtkazsin;

oʻzining ichki hujjatlarini ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.S. Sanaqulov zimmasiga yuklansin.

1.1. “Navoiy kon-metallurgiya kombinati” Davlat korxonasi (keyingi oʻrinlarda “Kombinat” deb ataladi) unga tezkor boshqarish uchun berilgan davlat mulki boʻlgan mol-mulk negizida tashkil etilgan Davlat unitar korxonasi shaklidagi tijorat tashkiloti hisoblanadi. “Navoiy kon-metallurgiya kombinati” Davlat korxonasi oʻziga biriktirilgan mol-mulkka nisbatan qonunda belgilangan doirada oʻz faoliyati maqsadlariga, Muassisning topshiriqlariga muvofiq egalik qilish, foydalanish va tasarruf etish huquqini amalga oshiradi.

1.2. Kombinat yuridik shaxs hisoblanadi, alohida mol-mulkka, mustaqil balansga, bank hisob raqamlariga, shu jumladan valyuta hisob raqamlariga, emblemaga, shtamplarga va blankalarga, tovar belgilariga, Oʻzbekiston Respublikasining Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega.

1.3. Korxonaning davlat tilidagi rasmiy toʻliq va qisqartirilgan nomi: oʻzbek tilida: “Navoiy kon-metallurgiya kombinati” (NKMK) Davlat korxonasi, rus tilida: Gosudarstvennoye predpriyatiye “Navoiyskiy gorno-metallurgicheskiy kombinat” (NGMK), ingliz tilida: “Navoi Mining and Metallurgisal Combinat” State Compani (NMMC).

1.4. Kombinat joylashgan joy (pochta manzili): Oʻzbekiston Respublikasi, Navoiy shahri, Navoiy koʻchasi, 27.

1.5. Oʻzbekiston Respublikasi Vazirlar Mahkamasi (keyingi oʻrinlarda “Muassis” deb ataladi) Kombinatning muassisi hisoblanadi.

1.6. Kombinat qonun hujjatlarida belgilangan tartibda oʻz nomidan mulkiy va shaxsiy nomulkiy huquqlarni sotib olishi va amalga oshirishi, majburiyatlar olishi, sudda daʼvogar va javobgar boʻlishi, nizolarni hal etishda boshqa organlarda vakillik qilishi mumkin.

1.7. Kombinat Muassisning roziligi bilan qonun hujjatlariga muvofiq yuridik shaxslarning qatnashishiga yoʻl qoʻyiladigan tijorat tashkilotlarida, shuningdek notijorat tashkilotlarda qatnashchi (aʼzo) boʻlishi mumkin.

1.8. Kombinat boshqa davlat korxonasining muassisi boʻlishi mumkin emas.

2.1. Foyda olish, ishlab chiqarish-texnik maqsadlardagi mahsulotlarni ishlab chiqarish va sotish, qurilish, isteʼmol tovarlari ishlab chiqarish yuzasidan davlat dasturlari toʻliq va oʻz vaqtida bajarilishini taʼminlash, shuningdek ushbu Ustavda koʻrsatilgan, isteʼmol xossalari yuqori va kam xarajatli, ularning raqobatbardoshliligini taʼminlaydigan boshqa ishlarni bajarish va xizmatlar koʻrsatish Kombinat faoliyatining maqsadi hisoblanadi.

2.2. Quyidagilar Kombinat faoliyatining asosiy yoʻnalishlari hisoblanadi:

2.2.1. Foydali qazilmalarni kavlab olish;

2.2.2. Qimmatbaho va noyob metallarni, qimmatbaho toshlarni kavlab olish;

2.2.3. Tarkibida qimmatbaho va noyob metallar mavjud boʻlgan sanoat mahsulotlarini qayta ishlash;

2.2.4. Qimmatbaho metallar va toshlardan zargarlik buyumlari tayyorlash;

2.2.5. Qimmatbaho metallar va toshlardan tayyorlangan zargarlik buyumlarini transportda tashish va sotish;

2.2.6. Ionlashtiruvchi nurlanish manbalarini qazib olish, ishlab chiqarish, konni ochish, qayta ishlash, foydalanish, saqlash, xizmat koʻrsatish, transportda tashish, zararsizlantirish, utillashtirish va koʻmish;

2.2.7. Portlovchi va zaharli moddalarni, ular qoʻllaniladigan materiallar va buyumlarni, shuningdek portlatish vositalarini ishlab chiqarish, transportda tashish, saqlash va realizatsiya qilish;

2.2.8. Portlatish ishlarini bajarish;

2.2.9. Geologiya-razvedka ishlarini bajarish;

2.2.10. Geodeziya faoliyati;

2.2.11. Koʻpriklar va tonnellarni loyihalashtirish, qurish, ishlatish va taʼmirlash;

2.2.12. Xavfi yuqori boʻlgan obyektlarni va potensial xavfli ishlab chiqarishlarni loyihalashtirish, qurish va ishlatish;

2.2.13. Arxitektura-shaharsozlik hujjatlarini ishlab chiqish;

2.2.14. Kapital qurilish;

2.2.15. Teleradio eshittirishlar translyatsiyasi tarmoqlarini loyihalashtirish, qurish va ishlatish;

2.2.16. Telekommunikatsiyalarning mahalliy, shaharlararo va xalqaro tarmoqlarini loyihalashtirish, qurish va ishlatish va ularga xizmatlar koʻrsatish;

2.2.17. Harakatlanadigan radiotelefon aloqasi tarmoqlarini loyihalashtirish, qurish va ishlatish va ularga xizmatlar koʻrsatish;

2.2.18. Shaxsiy radio chaqiriq tarmoqlarini loyihalashtirish, qurish va ishlatish va ularga xizmatlar koʻrsatish;

2.2.19. Maʼlumotlar uzatish tarmoqlarini loyihalashtirish, qurish va ishlatish va ularga xizmatlar koʻrsatish;

2.2.20. Axborotni kriptografik himoya qilish vositalarini loyihalashtirish, qurish va ishlatish, taʼmirlash va ulardan foydalanish;

2.2.21. Yongʻinga qarshi avtomatlar, qoʻriqlash, yongʻin va qoʻriqlash-yongʻin signalizatsiyasi vositalarini loyihalashtirish, montaj qilish, sozlash, taʼmirlash va ularga texnik xizmat koʻrsatish;

2.2.22. Ichki qatnovda yoʻlovchilar va yuklarni temir yoʻlda tashish;

2.2.23. Avtomobil transportida yoʻlovchilar va yuklarni shahar, shahar atrofida, shaharlararo va xalqaro tashish;

2.2.24. Giyohvand vositalar, psixotrop moddalar va prekursorlarni olib kirish (olib chiqish), tashish, saqlash, realizatsiya qilish, tibbiy ehtiyojlar uchun foydalanish va yoʻq qilish. Prekursorlarni ishlab chiqarish va ishlab chiqarish ehtiyojlari uchun foydalanish;

2.2.25. Fosfor xom ashyosi va oʻgʻitlar ishlab chiqarish;

2.2.26. Stanoksozlik;

2.2.27. Qurilish materiallari ishlab chiqarish.

Agar qonun hujjatlarida ushbu bandda nazarda tutilgan tegishli faoliyat litsenziyalanishi belgilangan taqdirda, Kombinat faoliyatning ushbu turini tegishli litsenziyalovchi organ bilan tuzilgan litsenziya bitimi asosida litsenziya olmasdan amalga oshirishga haqlidir.

2.3. Kombinat shuningdek faoliyatning quyidagi turlarini amalga oshiradi:

tibbiy faoliyat;

farmatsevtika faoliyati;

noshirlik va matbaachilik faoliyati;

turistik faoliyat;

ulgurji savdo va savdo-vositachilik faoliyati;

tabiiy va suyultirilgan uglevodorod gazini realizatsiya qilish;

bojxona omborini taʼsis etish;

oʻlchov vositalarini tayyorlash, realizatsiya qilish va prokatga berish;

aeroportlarda yoʻlovchilar va yuklarni havoda tashish ishlarini bajarish bilan bogʻliq boʻlgan havo kemalariga xizmat koʻrsatish;

oʻz ehtiyojlari va boshqa isteʼmolchilarning ehtiyojlari uchun ishlab chiqarish-texnik maqsadlardagi mahsulotlarni ishlab chiqarish;

isteʼmol tovarlari ishlab chiqarish va aholiga xizmatlar koʻrsatish;

oziq-ovqat mahsulotlari va nooziq-ovqat tovarlari hamda alkogolli mahsulotlar ishlab chiqarish va ularni chakana tarmoq orqali sotish;

lyuminessent lampalarni demerkurizatsiyalash;

temir yoʻl transportida yuk karvonsaroylari tashkil etish;

bolalar, oʻsmirlar va yoshlar sogʻlomlashtirish oromgohlari va boshqalarni, dam olish zonalarini tashkil etish.

Agar qonun hujjatlarida ushbu bandda nazarda tutilgan tegishli faoliyat litsenziyalanishi belgilangan boʻlsa, Kombinat faoliyatning ushbu turini faqat litsenziya asosida amalga oshirishga haqlidir.

2.4. Kombinat faoliyatning qonun hujjatlarida taqiqlanmagan boshqa turlarini amalga oshiradi.

3.1. Kombinat oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga, shuningdek ushbu Ustavga amal qiladi.

3.2. Kombinat Muassisga hisobot beradi.

3.3. Muassis qonun hujjatlarida belgilangan tartibda quyidagi huquqlarga ega boʻladi:

Kombinatning maqsadlari, faoliyati predmeti va turlarini belgilash;

Kombinat Ustaviga oʻzgartirish va qoʻshimchalar kiritish toʻgʻrisida qarorlar qabul qilish;

qonun hujjatlarida belgilangan tartibda Kombinatning ijro etuvchi organi bilan tuzilgan mehnat shartnomasini muddatidan oldin toʻxtatish;

Kombinatni qayta tashkil etish va tugatish toʻgʻrisida qaror qabul qilish, tugatish komissiyasini tayinlash va tugatish balansini tasdiqlash;

Kombinatning ortiqcha, foydalanilmayotgan, yoxud boshqa maqsadda foydalanilayotgan mol-mulkini olib qoʻyish va uni tasarruf etish;

Kombinatga berilgan mol-mulkdan foydalanishdan olingan sof foydaning bir qismini yoki hammasini olish;

Kombinat mol-mulki bilan tuzilgan bitimni haqiqiy emas deb eʼtirof etish toʻgʻrisida sudga daʼvo bilan murojaat qilish;

Kombinatga yetkazilgan zararlarni qoplash toʻgʻrisida Kombinat ijro etuvchi organiga daʼvo taqdim etish.

3.4. Kombinatni boshqarish:

Kuzatuvchi kengash;

Ijro etuvchi organ tomonidan amalga oshiriladi.

3.5. Kuzatuvchi kengashning tarkibi Oʻzbekiston Respublikasi Prezidentining qarori bilan tasdiqlanadi.

3.6. Kuzatuvchi kengashning faoliyati Muassisning qarori bilan tasdiqlanadigan Kombinatning Kuzatuvchi kengashi toʻgʻrisidagi Nizom bilan tartibga solinadi.

3.7. Kuzatuvchi kengashning vakolatlariga quyidagilar tegishlidir:

qimmatbaho va nodir metallar, uran va fosfor xom ashyosini qazib olish uchun mineral-xom ashyo bazasidan toʻliqroq va samarali foydalanish maqsadida Kombinatning strategik vazifalarini va uni istiqbolli rivojlantirish yoʻnalishlarini belgilash;

qimmatbaho va nodir metallarning yangi ochilgan konlarida va ishlab turgan konlarida kavlab olishni oʻzlashtirish va kengaytirish maqsadida Kombinatni rivojlantirishning oʻrtacha muddatli va uzoq muddatli dasturlari ishlab chiqilishini tashkil etish;

zamonaviy ilmiy-texnik yutuqlarga muvofiq modernizatsiyalash, texnik va texnologik yangilash, ishlab chiqarishning yangi texnologiyalarini joriy etish dasturlari va loyihalarini ishlab chiqish va ular amalga oshirilishini nazorat qilish;

keyinchalik Muassisga kiritish uchun qimmatbaho metallar ishlab chiqarish boʻyicha har yillik davlat buyurtmasini koʻrib chiqish va maʼqullash;

qimmatbaho metallar ishlab chiqarish boʻyicha belgilangan tartibda tasdiqlangan davlat buyurtmasi bajarilishini taʼminlash uchun zarur boʻlgan Kombinat faoliyatining har yillik ishlab chiqarish biznes-rejalarini, investitsiya dasturlarini va boshqa tashkiliy-texnik chora-tadbirlarni tasdiqlash, shuningdek ularning bajarilishi toʻgʻrisidagi hisobotlarni koʻrib chiqish;

Kombinat moliya-xoʻjalik faoliyatining, zaruriyat boʻlganda, mustaqil ekspertlar va auditorlarni jalb etgan holda, shu jumladan tuziladigan kontraktlar, moliyalashtirish sxemalari va shartlarini ekspertizadan oʻtkazgan holda, ichki audit xizmati tomonidan yilning har choragida oʻrganilishini tashkil etish;

qoʻshma korxonalar tashkil etish bilan bogʻliq masalalarni koʻrib chiqish;

Kombinatning ishlab chiqarish va moliya-xoʻjalik faoliyati toʻgʻrisida ijro etuvchi organning hisobotini yilning har choragida eshitish;

Oʻzbekiston Respublikasi Prezidentining qarorlari asosida Kombinat bosh direktorini yollash toʻgʻrisida Muassisning nomidan mehnat shartnomasi tuzish va uni bekor qilish;

tashkiliy tuzilmani va Kombinatni boshqarish apparati tuzilmasini maʼqullash;

ichki audit xizmatini tashkil etish va uning xodimlarini tayinlash;

ijro etuvchi organ faoliyati tartibini belgilab beradigan hujjatlarni tasdiqlash;

Miqdori Kombinat aktivlarining 10 foizidan ortiqni tashkil etadigan mol-mulkni sotib olish va oʻzgaga berish bilan bogʻliq bitimlar tuzilishini maʼqullash.

3.8. Kuzatuvchi kengashning qarori boʻyicha Kuzatuvchi kengash aʼzolari Kombinat faoliyatiga tegishli boʻlgan hujjatlar bilan tanishish va Kuzatuvchi kengashga yuklangan majburiyatlarni ijro etish uchun ularni ijro etuvchi organdan talab qilish huquqiga egadir. Olingan hujjatlar Kuzatuvchi kengash va uning aʼzolari tomonidan faqat xizmat maqsadlarida foydalaniladi.

Kuzatuvchi kengash vakolatiga tegishli boʻlgan masalalar ijro etuvchi organning hal qilishi uchun berilishi mumkin emas.

3.9. Kombinatning joriy faoliyatiga rahbarlik qilish bosh direktor tomonidan amalga oshiriladi.

3.10. Bosh direktor yakkaboshchilik qiladigan ijro etuvchi organ hisoblanadi.

3.11. Kombinatning bosh direktori Muassis tomonidan lavozimga tayinlanadi va lavozimdan ozod qilinadi.

3.12. Bosh direktor Kuzatuvchi kengash bilan kelishgan holda Kombinatning shtat jadvalini va xodimlarning ish haqi miqdorini tasdiqlaydi.

3.13. Bosh direktor Kuzatuvchi kengash bilan kelishgan holda oʻz oʻrinbosarlarini qonun hujjatlarida belgilangan tartibda tayinlaydi va ozod qiladi.

4.1. Kombinatning ustav fondi oʻzida Kombinat tomonidan ishlab chiqarish-xoʻjalik faoliyatini amalga oshirish uchun unga Muassis tomonidan berilgan mablagʻlar, mol-mulk va boshqa aktivlar jamini ifodalaydi.

4.2. Kombinat ustav fondining miqdori 2008-yil 26-martdagi holatiga koʻra 980 381 010,0 ming soʻmni tashkil etadi.

5.1. Kombinatning ustav fondini koʻpaytirish va kamaytirish qonun hujjatlarida belgilangan tartibda, Kombinat ustaviga tegishli oʻzgartirishlar kiritish yoʻli bilan Muassisning qarori boʻyicha amalga oshiriladi.

6.1. Tezkor boshqarish huquqi bilan Muassis tomonidan Kombinatga biriktirilgan asosiy fondlar va aylanma mablagʻlar Kombinatning mol-mulkini tashkil etadi.

6.2. Kombinatning asosiy fondlari va aylanma mablagʻlari boʻlinmasdir va ulushlar (ulushlar, paylar) boʻyicha taqsimlanishi mumkin emas.

6.3. Kuzatuvchi kengash Muassis nomidan Kombinatga berilgan davlat mulkining oʻz vazifasiga koʻra foydalanilishi va saqlanishi, shuningdek oʻzgaga berilishi ustidan nazorat qiladi.

6.4. Muassis bilan kelishgan holda Kombinatning bosh direktori quyidagi hollarda Kombinatning mol-mulkini tasarruf etishi mumkin:

asosiy vositalarni realizatsiya qilish, ularni ijaraga berish yoki garovga qoʻyish;

mol-mulkni ulush sifatida boshqa xoʻjalik jamiyatining ustav fondiga qoʻyish;

boshqa xoʻjalik jamiyatlarining aksiyalari (ulushlari)ni sotib olish va realizatsiya qilish;

Kombinat faoliyati maqsadlariga muvofiq boʻlmagan mol-mulkni oʻzgacha tasarruf etish.

7.1. Barcha soliqlar hamda budjetga va budjetdan tashqari fondlarga boshqa majburiy toʻlovlar toʻlangandan keyin Kombinatda qoladigan sof foyda Kombinat tasarrufida qoladi va Muassisning yoki, agar Muassis ushbu huquqni Kuzatuvchi kengashga bersa, Kuzatuvchi kengashning qarori boʻyicha foydalaniladi.

7.2. Muassis oʻz qarori bilan boshqa yuridik va jismoniy shaxslarga xayriya maqsadlarida va homiylik yordami sifatida yoʻnaltiriladigan pul mablagʻlarining cheklangan summasini belgilaydi, ularni tasarruf etish huquqini Kombinatning bosh direktoriga beradi.

7.3. Kombinatning xoʻjalik faoliyati natijasida kelib chiqqan zararlarni qoplash ushbu maqsadlarda tashkil etilgan zaxira jamgʻarmasi mablagʻlari hisobiga amalga oshirilishi mumkin.

8.1. Kombinat oʻz tasarrufida qoladigan sof foyda hisobiga zaxira jamgʻarmasini, shuningdek miqdori va shakllantirish tartibi Muassis tomonidan tasdiqlanadigan boshqa jamgʻarmalarni tashkil etishi mumkin.

Asosiy vositalarni qayta baholash summasi va bepul olingan mol-mulk qiymati ham zaxira jamgʻarmasini toʻldirishga yoʻnaltiriladi.

9.1. Kombinatning bosh direktori:

Kombinat nomidan ishonchnomasiz ish koʻradi, mamlakatimiz va xorijning barcha korxonalari, firmalari va tashkilotlarida uning manfaatlarini ifodalaydi;

xodimlarni ishga qabul qiladi, ular bilan mehnat shartnomalari tuzadi, ularni oʻzgartiradi va toʻxtatadi;

qonun hujjatlarida belgilangan tartibda ishonchnomalar beradi, kadrlarni tayyorlash va oʻqitish, ularning malakasini oshirish chora-tadbirlarini koʻradi;

Kombinatning barcha xodimlari uchun majburiy boʻlgan buyruqlar, farmoyishlar chiqaradi, koʻrsatmalar beradi;

Kombinatning ichki tartib-qoidasi va xoʻjalik faoliyatini tartibga soladigan hujjatlarni tasdiqlaydi;

Kombinat tomonidan Oʻzbekiston Respublikasi qonun hujjatlariga rioya qilinishini tashkil etish va nazorat qilishni taʼminlaydi;

davlat buyurtmasi va tuzilgan toʻgʻridan-toʻgʻri shartnomalarni bajarishni hisobga olgan holda ishlab chiqilgan ishlab chiqarish dasturlari amalga oshirilishini tashkil etadi;

asosiy faoliyatni istiqbolli rivojlantirish, ishlab chiqarishni boshqarish tizimini takomillashtirish, ilmiy-texnik taraqqiyot yutuqlarini joriy etishga oid tadbirlarni amalga oshirish chora-tadbirlarni koʻradi;

yangi texnika va texnologiyalarni ishlab chiqish va qoʻllashni tashkil etadi;

faoliyatning yangi yoʻnalishlariga oid takliflarni ishlab chiqadi;

Kombinat xodimlari mehnatini muhofaza qilish va mehnat sharoitlarini yaxshilash, atrof muhit muhofazasi va tabiiy resurslardan oqilona foydalanish sohasidagi normalar va qoidalarga rioya qilish boʻyicha qonun hujjatlari talablari bajarilishiga yoʻnaltirilgan tadbirlarni ishlab chiqadi va joriy etadi;

Kombinatning xoʻjalik faoliyatini amalga oshirish uchun zarur boʻlgan boshqa funksiyalarni amalga oshiradi.

9.2. Bosh direktor oʻz huquqlarini amalga oshirishda va majburiyatlarni bajarishda Kombinat manfaatlarini koʻzlab ish koʻradi.

9.3. Bosh direktor budjetga va budjetdan tashqari fondlarga toʻlov oʻz vaqtida toʻlanishi, ish haqi toʻlanishi, mehnatga doir huquqiy munosabatlardan kelib chiqadigan talablar va ularga tenglashtirilgan toʻlovlar qondirilishi, bevosita ishlab chiqarish faoliyati bilan bogʻliq ehtiyojlar uchun pul mablagʻlari oʻtkazilishi, oʻzining xatti-harakatlari (harakatsizligi) bilan Kombinatga yetkazilgan zarar, shu jumladan korxonaga berilgan davlat mulki yoʻqotilgan holat uchun ham qonun hujjatlarida belgilangan tartibda javob beradi.

10.1. Kombinat hisobot davri tamom boʻlgandan keyin roʻyxati qonun hujjatlarida belgilangan vakolatli organlarga moliyaviy hisobotni va boshqa hujjatlarni taqdim etadi hamda hujjatlarning saqlanishi va ularning davlat tomonidan saqlash uchun belgilangan tartibda berilishi uchun javob beradi.

10.2. Xoʻjalik yurituvchi subyekt sifatida Kombinat faoliyatini nazorat qilish qonun hujjatlarida belgilangan tartibda Muassis va boshqa vakolatli organlar tomonidan amalga oshiriladi.

10.3. Bosh direktor yilning har choragida ishlab chiqarish-xoʻjalik faoliyati natijalari va Kombinatni rivojlantirishning tasdiqlangan eng muhim dasturlari amalga oshirilishi toʻgʻrisida Kuzatuvchi kengashga hisobot beradi.

11.1. Kombinat oʻz majburiyatlari boʻyicha oʻziga tegishli mol-mulk bilan javob beradi. Kombinatning mol-mulki yetarli boʻlmagan taqdirda Muassis Kombinat majburiyatlari boʻyicha subsidiar javob beradi.

11.2 Kombinat Muassisning majburiyatlari boʻyicha javob bermaydi.

12.1. Kombinat Muassis bilan kelishgan holda, qonun hujjatlari talablariga rioya qilgan holda, ham Oʻzbekiston Respublikasi hududida, ham uning tashqarisida filiallar tashkil etishi va vakolatxonalar ochishi mumkin.

12.2. Kombinatning filiallari va vakolatxonalari Kombinat tomonidan tasdiqlangan Nizom asosida Kombinat nomidan ish koʻradi.

12.3. Oʻzbekiston Respublikasidan tashqarida joylashgan vakolatxonalar va filiallar Kombinat tomonidan tasdiqlangan Nizom asosida va hududida oʻzlari joylashgan mamlakatlarning qonun hujjatlariga muvofiq ish koʻradilar.

12.4.Kombinatning filiali yoki vakolatxonasi rahbari Kuzatuvchi kengash bilan kelishgan holda bosh direktor tomonidan tayinlanadi va u tomonidan berilgan ishonchnoma asosida ish koʻradi. Ishonchnoma ushbu rahbar bilan mehnat shartnomasi toʻxtatilgan taqdirda bosh direktor tomonidan bekor qilinishi kerak.

12.5. Kombinat tomonidan tashkil etilayotgan filiallar va vakolatxonalarning majburiyatlari boʻyicha Kombinat javob beradi.

13.1. Kombinat qonun hujjatlarida nazarda tutilgan tartibda Muassisning qarori boʻyicha yoki sudning qarori boʻyicha tugatilishi yoki qayta tashkil etilishi mumkin.

13.2. Kombinatning tugatilishi huquq va majburiyatlar huquqiy vorislik tartibida boshqa shaxslarga oʻtmasdan Kombinat faoliyati toʻxtatilishiga olib keladi, qayta tashkil etishda huquq va majburiyatlar huquqiy vorisga oʻtadi.

1.1. Ushbu Nizom “Navoiy kon-metallurgiya kombinati” Davlat korxonasining Kuzatuvchi kengashini (keyingi oʻrinlarda “Kuzatuvchi kengash” deb ataladi) tashkil etish va uning faoliyati tartibini, shuningdek Kuzatuvchi kengash aʼzolarining huquq va majburiyatlarini belgilaydi.

1.2. Kuzatuvchi kengash “Navoiy kon-metallurgiya kombinati” Davlat korxonasi (keyingi oʻrinlarda “Kombinat” deb ataladi) faoliyatini boshqarish samaradorligini oshirish maqsadida tashkil etiladi. Kuzatuvchi kengashning tarkibi Oʻzbekiston Respublikasi Prezidentining qarori bilan tasdiqlanadi.

1.3. Kuzatuvchi kengash aʼzolari boshqa ishga oʻtganda uning tarkibiga asosiy ish joyida ushbu lavozimga yangidan tayinlangan shaxslar kiritiladi.

1.4. Kuzatuvchi kengash oʻz faoliyatida Oʻzbekiston Respublikasining normativ-huquqiy hujjatlariga, Kombinat Ustaviga, shuningdek ushbu Nizomga amal qiladi.

1.5. Vazirlar Mahkamasining mashinasozlik, metallurgiya, geologiya, mineral xom ashyoni qazib olish va qayta ishlashni rivojlantirish masalalari axborot-tahlil departamentining metallurgiya va qimmatbaho metallar shuʼbasi Kuzatuvchi kengashning ishchi organi hisoblanadi.

1.6. Kuzatuvchi kengash aʼzolarining vakolatlari, shuningdek Kuzatuvchi kengashning faoliyati Oʻzbekiston Respublikasi Prezidentining qarorlari bilan toʻxtatilishi mumkin.

2.1. Kuzatuvchi kengashning vakolatlariga quyidagilar tegishlidir:

qimmatbaho va nodir metallar, uran va fosfor xom ashyosini qazib olish uchun mineral-xom ashyo bazadan toʻliqroq va samarali foydalanish maqsadida Kombinatning strategik vazifalarini va uni istiqbolli rivojlantirish yoʻnalishlarini belgilash;

qimmatbaho va nodir metallarning yangi ochilgan konlarida va ishlab turgan konlarida kavlab olishni oʻzlashtirish va kengaytirish maqsadida Kombinatni rivojlantirishning oʻrta muddatli va uzoq muddatli dasturlari ishlab chiqilishini tashkil etish;

zamonaviy ilmiy-texnik yutuqlarga muvofiq modernizatsiyalash, texnik va texnologik yangilash, ishlab chiqarishning yangi texnologiyalarini joriy etish dasturlari va loyihalarini ishlab chiqish va ular amalga oshirilishini nazorat qilish;

keyinchalik Vazirlar Mahkamasiga kiritish uchun qimmatbaho metallar ishlab chiqarish boʻyicha har yillik davlat buyurtmasini koʻrib chiqish va maʼqullash;

qimmatbaho metallar ishlab chiqarish boʻyicha belgilangan tartibda tasdiqlangan davlat buyurtmasi bajarilishini taʼminlash uchun zarur boʻlgan Kombinat faoliyatining har yillik ishlab chiqarish biznes-rejalarini, investitsiya dasturlarini va boshqa tashkiliy-texnik chora-tadbirlarni tasdiqlash, shuningdek ularning bajarilishi toʻgʻrisidagi hisobotlarni koʻrib chiqish;

Kombinat moliya-xoʻjalik faoliyatining, zaruriyat boʻlganda, mustaqil ekspertlar va auditorlarni jalb etgan holda, shu jumladan tuziladigan kontraktlar, moliyalashtirish sxemalari va shartlarini ekspertizadan oʻtkazgan holda, ichki audit xizmati tomonidan yilning har choragida oʻrganilishini tashkil etish;

qoʻshma korxonalar tashkil etish bilan bogʻliq masalalarni koʻrib chiqish;

Kombinatning ishlab chiqarish va moliya-xoʻjalik faoliyati toʻgʻrisida ijro etuvchi organning hisobotini yilning har choragida eshitish;

Oʻzbekiston Respublikasi Prezidentining qarorlari asosida Kombinat bosh direktorini yollash toʻgʻrisida Muassisning nomidan mehnat shartnomasi tuzish va uni bekor qilish;

tashkiliy tuzilmani va Kombinatni boshqarish apparati tuzilmasini maʼqullash;

ichki audit xizmatini tashkil etish va uning xodimlarini tayinlash;

ijro etuvchi organ faoliyati tartibini belgilaydigan hujjatlarni tasdiqlash;

Miqdori Kombinat aktivlarining 10 foizidan ortiqni tashkil etadigan mol-mulkni sotib olish va oʻzgaga berish bilan bogʻliq bitimlar tuzilishini maʼqullash.

Kuzatuvchi kengashning vakolatiga tegishli boʻlgan masalalar hal etish uchun Kombinatning ijro etuvchi organiga berilishi mumkin emas.

2.2. Kombinat Kuzatuvchi kengashining vakolatiga oʻz vakolatlari doirasida qabul qilgan qarorlari uzil-kesil hamda Kuzatuvchi kengash aʼzolari va Kombinatning ijro etuvchi organi bajarishi uchun majburiy hisoblanadi.

3.1. Kuzatuvchi kengashning vakolatiga tegishli deb topilgan masalalar boʻyicha qarorlar uning majlislarida qabul qilinadi.

3.2. Kuzatuvchi kengash majlisi zaruriyatga koʻra, biroq bir chorakda kamida bir marta oʻtkaziladi.

3.3. Kuzatuvchi kengash aʼzolari masalani Kuzatuvchi kengash majlisi kun tartibiga kiritish toʻgʻrisida yozma taklif yuborishga haqlidir. Masalani kun tartibiga kiritish toʻgʻrisidagi taklifda masalaning aniq taʼrifi, maʼruzachining familiyasi, ismi va otasining ismi, taklif etilayotgan qaror loyihasi va Kuzatuvchi kengash majlisi kun tartibi masalasi boʻyicha materiallar koʻrsatilishi kerak.

3.4. Uzil-kesil kun tartibi Kuzatuvchi kengash majlisida tasdiqlanadi.

3.5. Kuzatuvchi kengash majlisida Kuzatuvchi kengash kun tartibida koʻrsatilmagan masalalar koʻrib chiqilmaydi.

3.6. Kuzatuvchi kengash faoliyatini tashkiliy-texnik taʼminlashni Kuzatuvchi kengashning ishchi organi amalga oshiradi.

3.7. Kuzatuvchi kengash majlisini oʻtkazish uchun kvorum Kuzatuvchi kengashning tayinlangan aʼzolari sonining kamida yetmish besh foizidan iborat boʻlishi kerak.

3.8. Kombinatning Kuzatuvchi kengashi majlisida qarorlar hozir boʻlganlarning koʻpchilik ovozi bilan qabul qilinadi. Kuzatuvchi kengash majlisi kun tartibi masalalari boʻyicha qarorlar qabul qilishda Kuzatuvchi kengashning har bir aʼzosi bir ovozga ega boʻladi. Kuzatuvchi kengash aʼzolari ovozlari teng boʻlgan taqdirda, raislik qiluvchining ovozi hal qiluvchi ovoz hisoblanadi.

3.9. Ovozning Kuzatuvchi kengash bir aʼzosi tomonidan Kuzatuvchi kengashning boshqa aʼzosiga berilishiga yoʻl qoʻyilmaydi.

3.10. Kuzatuvchi kengash raisiga Kuzatuvchi kengash majlisi oʻtkaziladigan sanagacha kamida 7 kalendar kundan kechikmay ishchi organ tomonidan:

Kuzatuvchi kengash majlisi kun tartibi loyihasi;

Kuzatuvchi kengash majlisi kun tartibi masalalari boʻyicha Kuzatuvchi kengash qarorlari loyihalari;

Kuzatuvchi kengash majlisi kun tartibi masalalari boʻyicha hujjatlar va axborot materiallari taqdim etiladi.

3.11. Kuzatuvchi kengash raisi tomonidan maʼqullangan kun tartibi loyihasi va tegishli materiallar Kuzatuvchi kengash majlisi oʻtkaziladigan sanagacha besh kundan kechikmay Kombinatning Kuzatuvchi kengashi aʼzolariga yuboriladi.

Ayni bir vaqtda Kuzatuvchi kengashning har bir aʼzosiga Kuzatuvchi kengash majlisi oʻtkazilishi toʻgʻrisidagi bildirishnoma yuboriladi. Bildirishnoma elektron, faksimil aloqa, telefonogramma orqali yoki Kuzatuvchi kengash aʼzosiga shaxsan topshirish yoʻli bilan yuborilishi mumkin va Kuzatuvchi kengash majlisi oʻtkaziladigan sana, vaqt va joy toʻgʻrisidagi maʼlumotlarni oʻz ichiga olishi kerak.

3.12. Kuzatuvchi kengash majlisiga axborotlar (materiallar) Kuzatuvchi kengashning ishchi organi tomonidan Kombinatning ijro etuvchi organi bilan birgalikda tayyorlanadi.

3.13. Zaruriyat boʻlganda Kuzatuvchi kengash majlisi oʻtkaziladigan sana, vaqt va joy Kuzatuvchi kengash aʼzolari koʻpchiligining roziligi bilan oʻzgartirilishi mumkin.

3.14. Zaruriyat boʻlganda Kuzatuvchi kengash majlisi Kuzatuvchi kengashning hozir boʻlgan barcha aʼzolarining roziligi bilan kechiktirilishi mumkin.

3.15. Kuzatuvchi kengash majlisida bayonnoma yuritiladi. Kuzatuvchi kengash majlisi bayonnomasi majlis oʻtkazilgan sanadan boshlab oʻn kundan kechikmay rasmiylashtiriladi.

3.16. Kuzatuvchi kengash majlisi bayonnomasida:

majlis oʻtkaziladigan joy va vaqt;

Kuzatuvchi kengash majlisida hozir boʻlgan shaxslar;

Kuzatuvchi kengash majlisining kun tartibi;

ovoz berishga qoʻyilgan masalalar, ular boʻyicha ovoz berish yakunlari;

qabul qilingan qarorlar koʻrsatiladi.

3.17. Kuzatuvchi kengash majlisi bayonnomasi raislik qiluvchi va Kuzatuvchi kengash majlisida hozir boʻlgan aʼzolar tomonidan imzolanadi.

3.18. Kuzatuvchi kengashning sirtdan ovoz bergan aʼzolarining yozma shaklda ifodalangan va ularning oʻz qoʻllari bilan imzolangan fikri Kuzatuvchi kengash majlisi bayonnomasiga tirkab qoʻyiladi.

3.19. Kuzatuvchi kengash bayonnomalari asl nusxalari saqlanishini Kuzatuvchi kengash kotibi taʼminlaydi. Bayonnomalarga xronologik tartibda tartib raqamlari qoʻyiladi, mufassal tartib raqamiga, alohida hujjatlar yigʻma jildiga ega boʻladi va foydalanish cheklangan axborotlarga ega boʻlgan hujjatlar uchun belgilangan tartibda saqlanadi.

3.20. Kuzatuvchi kengash majlisi bayonnomalari Kuzatuvchi kengash kotibi tomonidan Kombinatning bosh direktoriga, Kuzatuvchi kengash raisi va aʼzolariga yuboriladi.

4.1. Kuzatuvchi kengash raisi Oʻzbekiston Respublikasi Prezidentining qarori bilan tayinlanadi.

4.2. Kuzatuvchi kengash raisi uning ishini tashkil etadi, Kuzatuvchi kengash majlisini chaqiradi va unda raislik qiladi.

5.1. Kuzatuvchi kengash aʼzosi:

Kuzatuvchi kengash majlisida shaxsan qatnashish, ajratilgan vaqt reglamenti doirasida majlisda muhokama qilinayotgan masala boʻyicha soʻzga chiqish;

Kuzatuvchi kengashning qaroriga rozi boʻlmagan taqdirda, majlis bayonnomasiga tirkab qoʻyiladigan oʻzining alohida fikrini bayon qilish;

Kuzatuvchi kengashning qarori boʻyicha Kombinat faoliyatiga tegishli hujjatlardan foydalanish va ularni Kuzatuvchi kengashga yuklangan majburiyatlarni bajarish uchun ijro etuvchi organdan talab qilish huquqiga ega. Olingan hujjatlardan Kuzatuvchi kengash va uning aʼzolari faqat xizmat maqsadlarida foydalanadilar.

5.2. Kuzatuvchi kengash aʼzolari oʻrtasida funksiyalarni taqsimlash Kuzatuvchi kengash raisi tomonidan amalga oshiriladi.

5.3. Kuzatuvchi kengash aʼzolari Kuzatuvchi kengash ishida qatnashganligi uchun mukofot puli olish huquqiga egadir.

5.4. Kuzatuvchi kengash aʼzolari oʻz vazifalarini halol va davlat manfaatlarini koʻzlab amalga oshirishga majburdir.

6.1. Kuzatuvchi kengash aʼzolari Oʻzbekiston Respublikasi qonun hujjatlariga muvofiq Muassis oldida javob beradilar.

7.1. Kuzatuvchi kengash toʻgʻrisidagi Nizomga oʻzgartirish va qoʻshimchalar kiritish Oʻzbekiston Respublikasi Vazirlar Mahkamasining qarori bilan belgilangan tartibda amalga oshiriladi.

7.2. Oʻzbekiston Respublikasining qonun hujjatlariga ushbu Nizomning ayrim bandlariga zid boʻlgan oʻzgartirish va qoʻshimchalar kiritilgan taqdirda, Kuzatuvchi kengash Oʻzbekiston Respublikasining keyinroq qabul qilingan qonunchilik normalariga amal qilishi shart.