Oʻzbekiston Respublikasi Prezidentining “Respublika tibbiyot muassasalari faoliyatini tashkil etishni takomillashtirish chora-tadbirlari toʻgʻrisida” 2007-yil 2-oktabrdagi PQ-700-son qaroriga muvofiq hamda tibbiy faoliyatni litsenziyalash tartibini takomillashtirish maqsadida Vazirlar Mahkamasi qaror qiladi:

1. Quyidagilar:

Tibbiy faoliyatni litsenziyalash toʻgʻrisidagi nizom 1-ilovaga muvofiq;

Oʻzbekiston Respublikasi Sogʻliqni saqlash vazirligining Litsenziyalash va nodavlat tibbiyot muassasalari tomonidan koʻrsatilayotgan tibbiy xizmatlar sifatini nazorat qilish boshqarmasi toʻgʻrisidagi nizom 3-ilovaga muvofiq tasdiqlansin.

2. Belgilab qoʻyilsinki, tibbiy faoliyatni amalga oshirish uchun ilgari berilgan litsenziyalar litsenziatlar ushbu qarorda belgilangan yangi litsenziya talablari va shartlariga muvofiq boʻlgan taqdirda ushbu qaror chiqqan kundan boshlab 5 yil mobaynida amal qiladi.

3. Oʻzbekiston Respublikasi Sogʻliqni saqlash vazirligi:

tibbiy faoliyatni amalga oshirish huquqi uchun litsenziyalar qatʼiy ravishda ushbu qarorga muvofiq berilishini taʼminlasin;

ilgari berilgan litsenziya egalarining ushbu qarorda belgilangan litsenziya talablari va shartlariga muvofiqligini uch oy muddatda koʻrib chiqsin hamda egalari mazkur talablar va shartlarga javob bermaydigan litsenziyalarning amal qilishini belgilangan tartibda toʻxtatish chora-tadbirlarini koʻrsin;

bir oy muddatda Oʻzbekiston Respublikasi Sogʻliqni saqlash vazirligining Litsenziyalash va nodavlat tibbiyot muassasalari tomonidan koʻrsatilayotgan tibbiy xizmatlar sifatini nazorat qilish boshqarmasi apparatini hamda sogʻliqni saqlashni boshqarish hududiy organlaridagi tegishli boʻlinmalarni yuqori malakali va tajribali mutaxassislar bilan butlasin;

uch oy muddatda litsenziatlar tomonidan litsenziya talablari va shartlarining, shu jumladan ular tomonidan koʻrsatilayotgan xizmatlar sifatiga qoʻyiladigan talablarning bajarilishi toʻgʻrisidagi axborotlarni oʻz ichiga oladigan markazlashtirilgan maʼlumotlar bazasini yaratsin;

aholini ommaviy axborot vositalari, shu jumladan Internet tarmogʻi orqali litsenziya talablari va shartlari, shu jumladan koʻrsatilayotgan xizmatlar sifatiga qoʻyiladigan talablar, shuningdek litsenziyasining amal qilishi toʻxtatib qoʻyilgan, toʻxtatilgan yoxud litsenziyasi bekor qilingan litsenziatlar toʻgʻrisida muntazam ravishda xabardor qilib borsin.

4. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

1. Mazkur Nizom tibbiy faoliyatni litsenziyalash tartibini belgilaydi.

2. Tibbiy faoliyatni litsenziyalash Oʻzbekiston Respublikasi Sogʻliqni saqlash vazirligi (keyingi oʻrinlarda litsenziyalovchi organ deb ataladi) tomonidan amalga oshiriladi.

Litsenziyalovchi organda litsenziyalar berish toʻgʻrisidagi hujjatlarni koʻrib chiqish, ular yuzasidan xulosalar tayyorlash Oʻzbekiston Respublikasi Sogʻliqni saqlash vazirligining Litsenziyalash va nodavlat tibbiyot muassasalari tomonidan koʻrsatilayotgan tibbiy xizmatlar sifatini nazorat qilish boshqarmasi (keyingi oʻrinlarda Litsenziyalash va nazorat qilish boshqarmasi deb ataladi) tomonidan amalga oshiriladi.

3. Kasalliklarni profilaktika, diagnostika qilish va davolashga, chalingan kasallik (kasalliklar)dan keyin reabilitatsiya qilishga yoʻnaltirilgan, maxsus tibbiy maʼlumotni va koʻnikmalarni talab qiluvchi muayyan tibbiy ixtisoslik (ixtisosliklar) boʻyicha faoliyat litsenziyalanadigan tibbiy faoliyat hisoblanadi.

4. Ushbu Nizomda nazarda tutilgan talablar va shartlarga muvofiq boʻlgan yuridik shaxslar litsenziya talabgorlari boʻlishi mumkin.

Davlat tibbiyot muassasalari, shuningdek Oʻzbekiston Respublikasi Vazirlar Mahkamasi qarorlariga muvofiq tashkil etilgan tibbiyot muassasalari tibbiy faoliyatni amalga oshirishi ularni tashkil etish toʻgʻrisidagi dalolatnomalarda nazarda tutilgan taqdirda tibbiy faoliyatni litsenziya olmasdan amalga oshirishga haqlidir. Ushbu qoida koʻrsatib oʻtilgan muassasalarni mazkur Nizomda nazarda tutilgan litsenziya talablari va shartlarini, shuningdek qonun hujjatlariga muvofiq qoʻyiladigan tibbiy faoliyatni amalga oshirish bilan bogʻliq boshqa talablarni bajarishdan ozod qilmaydi.

5. Tibbiy faoliyatni amalga oshirish huquqi uchun litsenziyalar faqat muayyan ixtisoslik turlari boʻyicha beriladi, ularning yagona roʻyxati Oʻzbekiston Respublikasi Vazirlar Mahkamasi tomonidan tasdiqlanadi.

Ixtisoslik turlari boʻyicha tibbiy faoliyat hajmi Oʻzbekiston Respublikasi Sogʻliqni saqlash vazirligi tomonidan belgilanadi.

6. Tibbiy faoliyatni amalga oshirish uchun namunaviy (oddiy) litsenziyalar beriladi.

7. Tibbiy faoliyatni amalga oshirish huquqi uchun litsenziyalar 5 yil muddatga beriladi. Litsenziya 5 yildan kam muddatga litsenziya talabgorining arizasiga koʻra berilishi mumkin.

8. Quyidagilar tibbiy faoliyatni amalga oshirishda litsenziya talablari va shartlari hisoblanadi:

faoliyatni qonun hujjatlariga qatʼiy muvofiq ravishda amalga oshirish;

bosh vrach uchun — oliy tibbiy maʼlumotga va mutaxassisligi boʻyicha kamida 5 yil ish stajiga, tegishli mutaxassislik boʻyicha malaka toifasiga, shuningdek boshqa mutaxassis vrachlar uchun — oliy tibbiy maʼlumotga va tegishli mutaxassislik boʻyicha malaka toifasiga ega boʻlishi;

tibbiyot muassasasida ishlayotgan mutaxassis vrachlarning va oʻrta tibbiyot xodimlarining kamida 5 yilda bir marta malaka oshirish talablariga rioya etgan holda zarur kasb darajasini taʼminlash;

litsenziya talabgorida litsenziyalanayotgan faoliyat turini bajarish uchun moʻljallangan, unga mulk huquqi bilan yoki boshqa qonuniy asosda tegishli boʻlgan, sanitariya qoidalari va normalariga muvofiq binolarning mavjud boʻlishi;

tibbiy faoliyatning litsenziyalanayotgan tegishli turiga muvofiq boʻlgan tashkiliy-texnik shart-sharoitlar va moddiy-texnika jihozlarining, shu jumladan:

a) litsenziya talabgoriga mulk huquqi bilan yoki boshqa qonuniy asosda tegishli boʻlgan, metrologiya normalariga va texnika xavfsizligi normalariga muvofiq boʻlgan zamonaviy diagnostika va davolash asbob-uskunalarining mavjud boʻlishi;

b) Oʻzbekiston Respublikasi Sogʻliqni saqlash vazirligi tomonidan qoʻllashga ruxsat berilgan tibbiy texnologiyalardan foydalanishni taʼminlaydigan asboblar, qattiq va yumshoq maxsus inventarlar, transport vositalari va hujjatlarning mavjud boʻlishi;

Oʻzbekiston Respublikasi Sogʻliqni saqlash vazirligi tomonidan tasdiqlangan namunalar va shakllar boʻyicha dastlabki tibbiy hujjatlarni yuritish, shuningdek statistika maʼlumotlarini qonun hujjatlarida belgilangan tartibda taqdim etish;

sanitariya-gigiyena normalari va qoidalariga rioya qilish;

Oʻzbekiston Respublikasi Sogʻliqni saqlash vazirligi tomonidan ruxsat etilgan diagnostika, profilaktika va davolash metodlarini, shuningdek dori-darmonlarni qoʻllash;

faoliyatni litsenziyada koʻrsatilgan tur va/yoki ixtisoslik doirasida, shuningdek litsenziya bitimiga muvofiq manzil (manzillar) boʻyicha amalga oshirish.

9. Tibbiy faoliyatning tegishli turini amalga oshirish uchun zarur boʻlgan moddiy-texnik bazaga, asbob-uskunalarga va boshqa texnika vositalariga, shuningdek mutaxassisning tibbiyot anjomlarining majburiy toʻplami bilan taʼminlanganligiga minimal talablar belgilangan tartibda Oʻzbekiston Respublikasi Sogʻliqni saqlash vazirligi tomonidan belgilanadi.

Tibbiy faoliyatni amalga oshirishda maʼnaviy eskirgan uskunalardan foydalanilishiga yoʻl qoʻyilmaydi. Zamonaviy va maʼnaviy eskirgan tibbiy uskunalar roʻyxati belgilangan tartibda Oʻzbekiston Respublikasi Sogʻliqni saqlash vazirligi tomonidan belgilanadi.

10. Litsenziya talabgori litsenziya olish uchun litsenziyalovchi organga quyidagi hujjatlarni taqdim etadi:

a) litsenziya berish toʻgʻrisida ariza, unda quyidagilar koʻrsatiladi:

yuridik shaxsning nomi va tashkiliy-huquqiy shakli, uning joylashgan joyi (pochta manzili) va tibbiy faoliyatni amalga oshirish manzili, bank muassasasining nomi va bank muassasasidagi hisob raqami;

yuridik shaxs amalga oshirishni moʻljallayotgan tibbiy faoliyatning litsenziyalanadigan turi hamda faoliyatning koʻrsatilgan turi amalga oshiriladigan muddat;

b) yuridik shaxsning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) hududiy sanitariya-epidemiologiya nazorati organining arizada koʻrsatilgan turi boʻyicha amalga oshirish uchun moʻljallangan binolarning sanitariya normalari va qoidalariga muvofiqligi toʻgʻrisidagi xulosasi;

g) litsenziya talabgorida muayyan ixtisoslik boʻyicha tibbiy faoliyatni amalga oshirish uchun zarur boʻlgan mavjud tibbiyot asbob-uskunalari va apparatlari roʻyxati va ularning mavjudligini tasdiqlaydigan boshqa hujjatlar;

d) “Oʻzstandart” agentligi organlari yoki “Oʻzstandart” agentligida tegishli xulosalar berish huquqi uchun akkreditatsiya qilingan metrologiya xizmatlari tomonidan tibbiyot asbob-uskunalari va apparatlarining metrologiya normalari va standartlariga muvofiqligi toʻgʻrisida berilgan xulosa;

e) bosh vrach uchun — mehnat daftarchasi va tayinlash toʻgʻrisidagi buyruqning nusxasi, oliy tibbiy maʼlumot toʻgʻrisidagi diplomning, malaka toifasi berilganligi toʻgʻrisidagi sertifikatning, keyingi 5 yilda malaka oshirganlik va/yoki ixtisoslashuvdan oʻtganlik toʻgʻrisidagi hujjatning notarial tasdiqlangan nusxalari, shuningdek mutaxassis vrachlar uchun — oliy tibbiy maʼlumot toʻgʻrisidagi diplomning, malaka toifasi berilganligi toʻgʻrisidagi sertifikatning, keyingi 5 yilda malaka oshirganlik va/yoki ixtisoslashuvdan oʻtganlik toʻgʻrisidagi hujjatning notarial tasdiqlangan nusxalari;

z) litsenziya talabgori tomonidan litsenziya talabgorining arizasi litsenziyalovchi organ tomonidan koʻrib chiqilganligi uchun yigʻim toʻlanganligini tasdiqlovchi hujjat.

11. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

12. Hujjatlar litsenziya talabgori tomonidan litsenziyalovchi organga chopar orqali yoxud olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

Hujjatlar Oʻzbekiston Respublikasi Sogʻliqni saqlash vazirligining Litsenziyalash va nazorat qilish boshqarmasining masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda arizachiga yuboriladi (topshiriladi).

13. Litsenziya talabgori notoʻgʻri yoki buzilgan maʼlumotlar taqdim etilganligi uchun qonun hujjatlariga muvofiq javob beradi.

14. Ariza koʻrib chiqilganligi uchun litsenziya talabgoridan qonun hujjatlarida belgilangan eng kam oylik ish haqining besh baravari miqdorida yigʻim undiriladi.

Ariza koʻrib chiqilganligi uchun yigʻim summasi litsenziyalovchi organning hisob raqamiga oʻtkaziladi. Litsenziya talabgori berilgan arizadan voz kechgan taqdirda toʻlangan yigʻim summasi qaytarilmaydi.

15. Tibbiy faoliyatni litsenziyalash ushbu Nizomga ilova qilinayotgan sxemaga muvofiq amalga oshiriladi.

Litsenziya berish yoki litsenziya berishni rad etish toʻgʻrisidagi qaror barcha zarur hujjatlar bilan birgalikda litsenziya talabgorining arizasi olingan kundan boshlab yigirma kundan ortiq boʻlmagan muddatda litsenziyalovchi organ tomonidan qabul qilinadi.

16. Litsenziya talabgorining barcha zarur hujjatlar ilova qilingan arizasi ariza olingan kunda koʻrib chiqish uchun Litsenziyalash va nazorat qilish boshqarmasiga kiritiladi.

Litsenziya talabgori tomonidan taqdim etilgan hujjatlar ular olingan kundan boshlab oʻn besh kun muddatda (zarurat boʻlganda joyiga borib) ekspertizadan oʻtkazilishi kerak.

Zarurat boʻlganda litsenziyalovchi organ hujjatlarni ekspertizadan oʻtkazish uchun qoʻshimcha ravishda tegishli ixtisosga ega boʻlgan yuqori malakali mutaxassislarni jalb qilishga haqlidir.

17. Litsenziya talabgorining litsenziya talablari va shartlariga muvofiqligini aniqlash uchun litsenziyalovchi organ Litsenziyalash va nazorat qilish boshqarmasining taqdimnomasi boʻyicha oʻz mablagʻlari hisobiga:

litsenziya talabgorida litsenziyalanadigan faoliyat turini amalga oshirish uchun mavjud sharoitlarni joyiga borib baholash;

tegishli xulosalar tayyorlash uchun shartnoma asosida ekspertlarni jalb qilish huquqiga ega.

18. Taqdim etilgan hujjatlar boʻyicha litsenziya talabgoriga litsenziya berish yoxud litsenziya berishni rad etish toʻgʻrisidagi taklif bilan xulosa tuziladi.

19. Litsenziyalovchi organ uch kun muddatda Litsenziyalash va nazorat qilish boshqarmasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi hamda qabul qilingan qaror toʻgʻrisida litsenziatni ikki kun muddatda xabardor qiladi.

Litsenziyalovchi organning litsenziya berishni rad etish toʻgʻrisidagi qarori yuzasidan qonun hujjatlarida belgilangan tartibda shikoyat qilinishi mumkin.

20. Litsenziya berilganligi uchun eng kam oylik ish haqining oʻn baravari miqdorida davlat boji undiriladi. Davlat boji summasi respublika budjetiga oʻtkaziladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

21. Litsenziya litsenziya talabgori tomonidan davlat boji toʻlanganligini tasdiqlovchi hujjat taqdim etilgandan va u litsenziya bitimini imzolagandan keyin ikki kun muddatda beriladi.

Litsenziya bitimida quyidagilar mavjud boʻladi:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan tibbiy faoliyat turining nomi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziyalanadigan tibbiy faoliyat turi amalga oshiriladigan manzil (manzillar);

litsenziya bitimi talablari va shartlari buzilganligi uchun tomonlarning javobgarligi;

litsenziya bitimi talablari va shartlari bajarilishini litsenziyalovchi organ tomonidan nazorat qilish tartibi;

tibbiy faoliyatning muayyan turi amalga oshirish xususiyatlariga taalluqli boshqa shartlar.

Litsenziya qayta rasmiylashtirilgan yoki filial ochilgan taqdirda litsenziya bitimiga oʻzgartirish yoki qoʻshimchalar kiritiladi yoxud yangi litsenziya bitimi tuziladi.

Litsenziya bitimi ikki nusxada — litsenziat va litsenziyalovchi organ uchun bir nusxadan tuziladi.

22. Litsenziyalar maxsus blankalarda rasmiylashtiriladi. Litsenziya blankasi namunasi Oʻzbekiston Respublikasi Vazirlar Mahkamasining 2000-yil 20-dekabrdagi 488-son qaroriga muvofiq litsenziyalovchi organ tomonidan tasdiqlanadi.

Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari litsenziyalovchi organ buyurtmasiga koʻra “Davlat belgisi” davlat-ishlab chiqarish birlashmasi tomonidan bosmaxona usulida tayyorlanadi. Litsenziyalar blankalarining hisobga olinishi, saqlanishi va ulardan maqsadli foydalanilishi uchun Litsenziyalash va nazorat qilish boshqarmasi rahbari shaxsan javob beradi.

23. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, litsenziyalovchi organ litsenziyani bekor qilish toʻgʻrisida qaror qabul qilishga haqlidir.

24. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida belgilangan asoslar boʻyicha rad etilishi mumkin.

Litsenziya talabgori litsenziyalovchi organning litsenziya berishni rad etish toʻgʻrisidagi qarori, shuningdek litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

25. Litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma ikki kun muddatda litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib, hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

Litsenziya berish rad etilishiga asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziyalovchi organ tomonidan litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Bunda takroran taqdim etilgan hujjatlar koʻrib chiqish uchun litsenziyalovchi organga ular qabul qilingan kunda kiritiladi.

Litsenziyalash va nazorat qilish boshqarmasi taqdim etilgan hujjatlarni olti kundan ortiq boʻlmagan muddatda takroran koʻrib chiqadi va ular boʻyicha litsenziya berish yoki litsenziya berishni rad etish toʻgʻrisida ekspert xulosasi tayyorlaydi.

Litsenziyalovchi organ uch kun muddatda Litsenziyalash va nazorat qilish boshqarmasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi va litsenziya talabgorini qabul qilingan qaror haqida ikki kun muddatda xabardor qiladi.

Litsenziya talabgorlarining arizalari takroran koʻrib chiqilganligi uchun yigʻim undirilmaydi. Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

26. Litsenziat qayta tashkil etilganda, uning nomi yoki pochta manzili va tibbiy faoliyatni amalga oshirish joyi oʻzgarganda, litsenziat yoki uning huquqiy vorisi qayta roʻyxatdan oʻtkazilgandan keyin bir hafta muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlarni ilova qilgan holda litsenziyani qayta rasmiylashtirish toʻgʻrisida ariza berishi shart.

27. Litsenziat litsenziya qayta rasmiylashtirilgunga qadar unda koʻrsatilgan faoliyat turini ilgari berilgan litsenziya asosida amalga oshiradi.

28. Litsenziyani qayta rasmiylashtirishda litsenziyalovchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish litsenziyalovchi organ tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisida ariza olingan kundan boshlab oʻn kun mobaynida amalga oshiriladi.

Litsenziyani qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

29. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza litsenziyalovchi organga litsenziyaning amal qilish muddati oʻtgunga qadar ikki oydan kechikmay berilishi kerak.

Litsenziyaning amal qilish muddatini uzaytirish litsenziya berish uchun nazarda tutilgan tartibda amalga oshiriladi.

30. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziyalar dublikatlarini berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

31. Litsenziat tomonidan litsenziya talablari va shartlariga rioya etilishi ustidan nazorat qonun hujjatlariga muvofiq litsenziyalovchi organ tomonidan amalga oshiriladi.

32. Litsenziya talablari va shartlariga rioya etilishi ustidan nazoratni amalga oshirishda litsenziyalovchi organ oʻz vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziat tomonidan litsenziya talablari va shartlarining buzilganligidan dalolat beruvchi holatlar mavjud boʻlganda litsenziatning ularga rioya qilishini qonun hujjatlarida belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyalarning amal qilishini toʻxtatib turish, toʻxtatish yoki ularni bekor qilish toʻgʻrisida qonun hujjatlarida belgilangan tartibda qarorlar chiqarish va taqdimnoma bilan sudga murojaat qilish;

xoʻjalik yurituvchi subyektlar tomonidan tibbiy faoliyatni litsenziya olmasdan amalga oshirishning aniqlangan hollari toʻgʻrisidagi materiallarni qonun hujjatlarida nazarda tutilgan choralar koʻrish uchun belgilangan tartibda davlat soliq xizmati organlariga yuborish.

33. Litsenziya talablari va shartlariga rioya etilishini tekshirishda litsenziyalovchi organ xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi litsenziyalovchi organda qoladi.

34. Litsenziyalovchi organ shuningdek:

aholi oʻrtasida, shu jumladan savolnoma-soʻrovnomalardan foydalangan holda soʻrov oʻtkazish;

fuqarolarni belgilangan tartibda qabul qilish va ularning murojaatlarini oʻrganish;

Oʻzbekiston Respublikasi Sogʻliqni saqlash vazirligining markaziy apparatida va sogʻliqni saqlashni boshqarish hududiy organlarida oʻrnatilgan “ishonch telefoni” boʻyicha axborot olish;

boshqa nazorat organlari tomonidan nodavlat muassasalarida oʻtkazilgan litsenziatlarni tekshirishlar yakunlari boʻyicha tushadigan axborotlarni toʻplash, umumlashtirish va tahlil qilish yoʻli bilan litsenziatlar tomonidan litsenziya talablari va shartlariga rioya qilinishi ustidan monitoring olib borishi mumkin;

joyning oʻzida, moliyaviy-xoʻjalik faoliyatga aralashmasdan, litsenziyalanadigan faoliyatni amalga oshirishning holati va shart-sharoitlari bilan tanishish.

35. Litsenziyaning amal qilishini toʻxtatib turish va toʻxtatish, uni bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22—24-moddalarida nazarda tutilgan hollarda va tartibda amalga oshiriladi.

Litsenziyalovchi organning litsenziyaning amal qilishini toʻxtatib turish toʻgʻrisidagi qarori yuzasidan sudga shikoyat qilish mumkin. Litsenziyalovchi organ qarorining asossiz ekanligi sud tomonidan eʼtirof etilgan taqdirda litsenziyalovchi organ litsenziat oldida litsenziat koʻrgan zarar miqdorida javob beradi.

36. Litsenziyalovchi organ litsenziyalar reyestrini yuritadi.

Litsenziyalar reyestrida quyidagilar koʻrsatiladi:

a) yuridik shaxsning nomi va soliq toʻlovchining identifikatsiya raqami, mulkchilik shakli, filiallar toʻgʻrisidagi maʼlumotlar, yuridik shaxs rahbarining familiyasi, ismi, otasining ismi;

b) litsenziyaning berilgan sanasi va tartib raqami;

v) litsenziya blankasining seriyasi va tartib raqami;

g) litsenziyaning amal qilish muddati;

d) litsenziyalanadigan faoliyat turi;

e) litsenziyalanadigan faoliyat turi amalga oshiriladigan manzil, ish telefoni, faks;

e) litsenziyalanadigan faoliyat turi amalga oshiriladigan manzil, ish telefoni, faks;

z) litsenziyaning amal qilishini toʻxtatish yoki uni bekor qilishning asoslari va sanasi.

37. Litsenziyalar reyestridagi maʼlumotlar ular bilan yuridik va jismoniy shaxslarning tanishishi uchun ochiq hisoblanadi, ular toʻlov asosida litsenziyalovchi organdan aniq litsenziatlar toʻgʻrisida litsenziyalar reyestridan koʻchirma tarzida maʼlumot olishga haqlidir.

Litsenziyalar reyestridan maʼlumot berilganligi uchun eng kam oylik ish haqining yarmi miqdorida toʻlov undiriladi, toʻlov litsenziyalovchi organning hisob raqamiga oʻtkaziladi.

Litsenziyalar reyestridan davlat hokimiyati va boshqaruvi organlariga maʼlumotlar tekin beriladi.

38. Ushbu Nizomning buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Ushbu Nizom Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-son Farmoniga hamda Oʻzbekiston Respublikasi Prezidentining “Respublika tibbiyot muassasalari faoliyatini tashkil etishni takomillashtirish chora-tadbirlari toʻgʻrisida” 2007-yil 2-oktabrdagi PQ-700-son qaroriga muvofiq ishlab chiqilgan va Oʻzbekiston Respublikasi Sogʻliqni saqlash vazirligining Litsenziyalash va nodavlat tibbiyot muassasalari tomonidan koʻrsatilayotgan tibbiy xizmatlar sifatini nazorat qilish boshqarmasining (keyingi oʻrinlarda Litsenziyalash va nazorat qilish boshqarmasi deb ataladi) vazifalari, funksiyalari, huquqlari va javobgarligini belgilaydi.

2. Litsenziyalash va nazorat qilish boshqarmasi Oʻzbekiston Respublikasi Sogʻliqni saqlash vazirligi markaziy apparatining tarkibiy boʻlinmasi hisoblanadi.

3. Litsenziyalash va nazorat qilish boshqarmasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga, boshqa qonun hujjatlariga, shuningdek Oʻzbekiston Respublikasi Sogʻliqni saqlash vazirligining buyruqlari va farmoyishlariga amal qiladi.

4. Quyidagilar Litsenziyalash va nazorat qilish boshqarmasining asosiy vazifalari hisoblanadi:

tibbiy faoliyatni litsenziyalash ishlarini tashkil etish;

litsenziyalar talabgorlarining litsenziya talablari va shartlariga muvofiqligini chuqur oʻrganib chiqish;

litsenziatlar tomonidan koʻrsatiladigan tibbiy xizmatlarning qonun hujjatlarida belgilangan tartibda qoʻllanishga ruxsat etilgan profilaktika, diagnostika va davolash vositalariga muvofiqligini nazorat qilish;

monitoring olib borish davomida va tekshirishlar natijalari boʻyicha olingan litsenziatlarning litsenziya talablari va shartlariga rioya qilishi, litsenziatlarning tibbiy xizmatlari sifati haqidagi axborotlarni umumlashtirish va tahlil qilish;

qoida buzilishlari aniqlangan taqdirda Oʻzbekiston Respublikasi Sogʻliqni saqlash vazirligi rahbariyatiga litsenziyaning amal qilishini toʻxtatib turish, toʻxtatish yoxud litsenziyani bekor qilish toʻgʻrisida belgilangan tartibda takliflar kiritish.

5. Litsenziyalash va nazorat qilish boshqarmasi oʻziga yuklangan vazifalarga muvofiq quyidagi funksiyalarni amalga oshiradi:

talabgorlar tomonidan tibbiy faoliyatni amalga oshirish huquqiga litsenziya olish uchun taqdim etilgan hujjatlarni ekspertizadan oʻtkazadi;

ekspertlar guruhini shakllantiradi, litsenziyalar talabgorlari tomonidan tibbiy faoliyatni amalga oshirish sharoitlarining dastlabki, zarurat boʻlganda esa qoʻshimcha ekspertizasini tashkil qiladi;

oʻz vakolatlari doirasida litsenziyalar talabgorlariga zarur axborotlarni taqdim etadi, ularga konsultativ-metodik yordam koʻrsatadi;

litsenziyalar blankalarini rasmiylashtiradi, litsenziya talabgorlarini Oʻzbekiston Respublikasi Sogʻliqni saqlash vazirligi tomonidan litsenziyalar berish bilan bogʻliq masalalar boʻyicha qabul qilinadigan qarorlar toʻgʻrisida xabardor qiladi, litsenziya bitimlarini rasmiylashtiradi, litsenziatlarga litsenziyalar beradi, litsenziyalarni belgilangan tartibda qayta rasmiylashtiradi yoki ularning dublikatlarini beradi;

litsenziatlar tomonidan litsenziya talablari va shartlarining, shu jumladan ular tomonidan koʻrsatiladigan xizmatlar sifatiga qoʻyiladigan talablarning bajarilishi toʻgʻrisidagi axborotlardan iborat boʻlgan reyestrni va markazlashtirilgan maʼlumotlar bazasini yuritadi;

Oʻzbekiston Respublikasi Sogʻliqni saqlash vazirligi tomonidan litsenziatlarning litsenziya talablari va shartlariga rioya etishlarini tekshirishlarda (nazorat tartibidagi tekshirishlarda) belgilangan tartibda qatnashadi;

litsenziatlar tomonidan litsenziya talablari va shartlarining, shuningdek ular tomonidan koʻrsatiladigan xizmatlar sifatiga qoʻyiladigan talablarning buzilishi hollari aniqlangan hollarda bajarilishi majburiy boʻlgan koʻrsatmalar beradi;

qonun hujjatlarida belgilangan tartibda tibbiy faoliyatni amalga oshirish huquqi uchun litsenziyalarning amal qilishini toʻxtatib turish, toʻxtatish yoxud litsenziyalarni bekor qilish haqida taqdimnoma taqdim etgan holda qaror qabul qilish yoki sudga murojaat qilish uchun zarur hujjatlarni rasmiylashtiradi;

tibbiy faoliyatni litsenziyalash sohasidagi normativ-huquqiy hujjatlar loyihalarini ishlab chiqishda qatnashadi;

litsenziatlar tomonidan koʻrsatiladigan tibbiy xizmatlarning sifati toʻgʻrisida monitoring oʻtkazish davomida va tekshirishlar natijalari boʻyicha olingan axborotlarni umumlashtiradi va tahlil qiladi;

Oʻzbekiston Respublikasi Sogʻliqni saqlash vazirligining tegishli boʻlinmalari bilan birgalikda diagnostika va davolash standartlarini, klinik protokollar va tavsiyalarni ishlab chiqishda hamda tibbiy amaliyotga joriy qilishda qatnashadi.

6. Litsenziyalash va nazorat qilish boshqarmasi litsenziatlar tomonidan litsenziya talablari va shartlariga rioya qilinishi yuzasidan quyidagi yoʻllar bilan doimiy monitoringni amalga oshiradi:

aholi oʻrtasida, shu jumladan savolnoma-anketalardan foydalangan holda soʻrovlar oʻtkazish;

fuqarolarni belgilangan tartibda qabul qilish va ularning murojaatlarini oʻrganish;

Oʻzbekiston Respublikasi Sogʻliqni saqlash vazirligining markaziy apparatida va sogʻliqni saqlashni boshqarish hududiy organlarida oʻrnatilgan “ishonch telefonlari” orqali axborotlar olish;

boshqa nazorat qiluvchi organlar tomonidan oʻtkazilgan litsenziatlar faoliyatini tekshirishlar yakunlari boʻyicha tushadigan axborotlarni toʻplash, umumlashtirish va tahlil qilish;

joyning oʻzida, moliyaviy-xoʻjalik faoliyatga aralashmasdan, litsenziyalanadigan faoliyatni amalga oshirishning holati va shart-sharoitlari bilan tanishish.

7. Litsenziyalash va nazorat qilish boshqarmasi oʻziga yuklangan vazifalar va funksiyalarni bajarish uchun oʻz vakolatlari doirasida quyidagi huquqlarga ega:

litsenziatlardan tekshirishlar oʻtkazish chogʻida zarur hujjatlarni va tekshirish bilan bevosita bogʻliq boʻlgan boshqa axborotlarni soʻrash va olish;

litsenziatlarga aniqlangan qoida buzilishlarini bartaraf etish toʻgʻrisida bajarilishi majburiy boʻlgan koʻrsatmalar berish, bunday qoida buzishlarni bartaraf etish zarur boʻlgan muddatlarni belgilash;

boshqa nazorat qiluvchi organlardan ular tomonidan oʻtkazilgan litsenziatlar faoliyatini tekshirishlar natijalari toʻgʻrisidagi ular tomonidan koʻrsatiladigan tibbiy xizmatlar sifati masalalariga taalluqli axborotlarni soʻrash va olish;

Oʻzbekiston Respublikasi Sogʻliqni saqlash vazirligi rahbariyatiga tibbiy faoliyatni litsenziyalash, litsenziatlar tomonidan litsenziya talablari va shartlariga, shuningdek tibbiy xizmatlar sifatiga rioya qilinishini nazorat qilish bilan bogʻliq boʻlgan ishlarni takomillashtirish boʻyicha takliflar kiritish.

8. Litsenziyalash va nazorat qilish boshqarmasi oʻziga yuklangan vazifalar va funksiyalarning samarali bajarilishi, taqdim etiladigan tahliliy hujjatlarning xolisonaligi va toʻliqligi uchun javob beradi.

9. Litsenziyalash va nazorat qilish boshqarmasi oliy tibbiy, farmatsevtika va yuridik maʼlumotga ega boʻlgan yuqori malakali mutaxassislar bilan butlanadi.

Litsenziyalash va nazorat qilish boshqarmasi bevosita Oʻzbekiston Respublikasi Sogʻliqni saqlash vaziriga boʻysunadi.

10. Litsenziyalash va nazorat qilish boshqarmasiga Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan boshliq rahbarlik qiladi.

Litsenziyalash va nazorat qilish boshqarmasi boshligʻining bir nafar oʻrinbosari boʻladi. Litsenziyalash va nazorat qilish boshqarmasi boshligʻi boʻlmagan taqdirda uning funksiyasini boshliqning oʻrinbosari bajaradi.

11. Litsenziyalash va nazorat qilish boshqarmasi boshligʻi:

Litsenziyalash va nazorat qilish boshqarmasiga umumiy rahbarlikni amalga oshiradi, boshqarma ishlarini tashkil etadi va nazorat qiladi;

Litsenziyalash va nazorat qilish boshqarmasiga yuklangan vazifalar va funksiyalarning samarali bajarilishi, taqdim etiladigan tahliliy materiallar va hujjatlarning toʻliqligi uchun shaxsan javob beradi;

Litsenziyalash va nazorat qilish boshqarmasi boʻlimlari faoliyatini muvofiqlashtiradi, boʻlimlar xodimlari oʻrtasida funksional vazifalarni taqsimlaydi, har bir xodimning aniq topshiriqlarning bajarilishi uchun javobgarligi darajasini belgilaydi;

Oʻzbekiston Respublikasi Sogʻliqni saqlash vaziriga boshqarma xodimlarini lavozimga tayinlash va lavozimdan ozod qilish, shuningdek Litsenziyalash va nazorat qilish boshqarmasi xodimlarini ragʻbatlantirish yoki ularni intizomiy javobgarlikka tortish toʻgʻrisida takliflar kiritadi;

Litsenziyalash va nazorat qilish boshqarmasi faoliyatini takomillashtirish boʻyicha takliflarni ishlab chiqadi va vazirlik rahbariyatiga kiritadi;

Oʻzbekiston Respublikasi Sogʻliqni saqlash vazirini Litsenziyalash va nazorat qilish boshqarmasi faoliyati toʻgʻrisida muntazam ravishda xabardor qiladi.

12. Litsenziyalash va nazorat qilish boshqarmasi quyidagi ikkita boʻlimdan iborat boʻladi:

tibbiy faoliyatni litsenziyalash boʻlimi;

Xususiy tibbiy faoliyat bilan shugʻullanuvchi nodavlat tibbiyot muassasalari tomonidan koʻrsatiladigan tibbiy xizmatlar sifatini nazorat qilish boʻlimi.

13. Litsenziyalash va nazorat qilish boshqarmasi xodimlari Litsenziyalash va nazorat qilish boshqarmasi boshligʻi taqdimnomasiga binoan Oʻzbekiston Respublikasi Sogʻliqni saqlash vaziri tomonidan lavozimga tayinlanadi va lavozimdan ozod qilinadi.

Litsenziyalash va nazorat qilish boshqarmasi xodimlari oʻz faoliyatini boshqarma boshligʻi tomonidan tasdiqlanadigan funksional vazifalarga muvofiq amalga oshiradilar.

14. Sogʻliqni saqlashni boshqarish hududiy organlarida litsenziatlar tomonidan koʻrsatiladigan tibbiy xizmatlar sifati ustidan nazorat Qoraqalpogʻiston Respublikasi Sogʻliqni saqlash vazirligi, viloyatlar va Toshkent shahar sogʻliqni saqlash boshqarmalarining tibbiyot xizmatlari sifatini nazorat qilish boʻyicha bosh mutaxassislar (keyingi oʻrinlarda bosh mutaxassislar deb ataladi) tomonidan amalga oshiriladi.

Bosh mutaxassislar Qoraqalpogʻiston Respublikasi Sogʻliqni saqlash vaziri, viloyatlar va Toshkent shahar sogʻliqni saqlash boshqarmalari boshliqlari tomonidan, Oʻzbekiston Respublikasi Sogʻliqni saqlash vazirligining Litsenziyalash va nazorat qilish boshqarmasi bilan kelishgan holda lavozimga tayinlanadi va lavozimdan ozod qilinadi.

15. Litsenziyalash va nazorat qilish boshqarmasi xodimlarini, shuningdek bosh mutaxassislarni attestatsiyadan oʻtkazish qonun hujjatlarida belgilangan tartibda amalga oshiriladi.

1. Vazirlar Mahkamasining “Tibbiy faoliyatni va farmatsevtika faoliyatini litsenziyalash toʻgʻrisidagi nizomlarni tasdiqlash haqida” 2003-yil 31-oktabrdagi 477-son qarori 1-bandining ikkinchi xatboshi va ushbu qarorga 1-ilova (Oʻzbekiston Respublikasi QT, 2003-y., 10-son, 106-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” (Oʻzbekiston Respublikasi Prezidentining “Tadbirkorlik faoliyati yuritish uchun ruxsatnoma turlarini qisqartirish va ularni berish tartib-qoidalarini soddalashtirish toʻgʻrisida” 2005-yil 21-sentabrdagi PQ-186-son qarori) 2006-yil 22-maydagi 92-son qaroriga ilova 28-bandining “a” kichik bandi (Oʻzbekiston Respublikasi QT, 2006-y., 5-son, 34-modda).

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” (“Tadbirkorlik subyektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” Oʻzbekiston Respublikasining 2006-yil 10-oktabrdagi OʻRQ-59-son Qonuni) 2006-yil 10-noyabrdagi 235-son qaroriga 1-ilova 50-bandining “a” kichik bandi (Oʻzbekiston Respublikasi QT, 2006-y., 11-son, 86-modda).

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2007-yil 18-maydagi 104-son qaroriga ilovaning 1-bandi (Oʻzbekiston Respublikasi QT, 2007-y., 5-son, 30-modda).