Oʻzbekiston Respublikasi Davlat bojxona qoʻmitasi va Federal bojxona xizmati (Rossiya FBX) (bundan keyin — Tomonlar),

Oʻzbekiston Respublikasi Hukumati va Rossiya Federatsiyasi Hukumati oʻrtasida 1994-yil 2-martda imzolangan bojxona ishlarida hamkorlik va oʻzaro yordam toʻgʻrisida Bitimni amalga oshirish maqsadida,

Tomonlarning davlat chegaralari (kelgusida — chegara) orqali tovarlar va transport vositalarining oʻtishi ustidan amalga oshirilayotgan bojxona nazorati samaradorligini oshirish zaruratini inobatga olib, Oʻzbekiston Respublikasi va Rossiya Federatsiyasi oʻrtasida savdo aloqalari uchun shart-sharoitlarni yaratish maqsadida,

Tomonlar davlatlari hududida bojxona boshqaruvi va chegara orqali tovarlar va transport vositalari oʻtishining bojxona rasmiylashtiruvini, xususan kirish hamda belgilangan bojxona organlarida, tezlashtirish samaradorligini oshirish maqsadida,

Tomonlar, bir Tomon hududidan olib chiqib ketilayotgan va boshqa Tomon hududiga olib kirish yoki uning hududi orqali olib oʻtishga moʻljallangan tovarlar va transport vositalarining bojxona rasmiylashtiruvi toʻgʻrisidagi maʼlumotlarini (kelgusida — oldindan beriladigan axborot), ular boshqa Tomon davlat chegarasini kesib oʻtishidan avval, shuningdek boshqa Tomon hududidan olib kirilayotgan tovarlar va transport vositalari toʻgʻrisidagi maʼlumotlarni (kelgusida — olib kirish toʻgʻrisidagi maʼlumot) muntazam ravishda almashishni tashkillashtiradilar va amalga oshiradilar.

Tomonlar oʻzaro kelishuvi asosida belgilangan axborot almashish texnik shartlarida oldindan beriladigan axborot va olib kirish toʻgʻrisidagi maʼlumotlar elektron hujjatlar shaklida taqdim qilinadi.

Axborot almashish Tomonlarning oʻz vakolatlari doirasida amalga oshiriladi.

Bunda Tomonlar oʻz davlatlari qonunchiligiga muvofiq amal qiladilar.

Tomonlar, tahlil qilish va xavflarni boshqarish usullarini qoʻllash asosida, chegara orqali tovarlar va transport vositalarining oʻtishi ustidan bojxona nazoratini amalga oshirishda oldindan beriladigan axborot va olib kirish toʻgʻrisidagi maʼlumotlardan foydalanishni taʼminlaydilar.

Mazkur Protokolga muvofiq, bir Tomon boshqa Tomondan olgan oldindan beriladigan axborot va olib kirish toʻgʻrisidagi maʼlumotlar xizmatda foydalanish xususiyatiga ega boʻlib, taqdim etgan Tomonning yozma roziligisiz uchinchi Tomonga berilishi mumkin emas, Tomonlar davlatlari qonunchilik hujjatlarida oʻrnatilgan holatlar bundan istisno.

Tomonlar, davlatlari qonunchiligida belgilangan tartibda, mazkur Protokol doirasida olingan axborotlar maxfiyligini taʼminlaydilar.

Tomonlarning har biri oʻzaro kelishilgan axborot almashinuvining texnik shartlari asosida tovarlar chiqarilgandan soʻng olib kirish toʻgʻrisidagi maʼlumotlarni taqdim etadi.

Tomonlar chegara orqali tovarlar va transport vositalarining oʻtishi haqida oldindan beriladigan axborot va olib kirish toʻgʻrisidagi maʼlumotlar almashinuvi natijasida olingan maʼlumotlar nomuvofiqligi aniqlangan har qanday holatlar toʻgʻrisida bir-birlariga xabar beradilar.

Tomonlar bir-birlariga, quyidagilar boʻyicha masʼul boʻlgan mansabdor shaxslar roʻyxati va Tomonlar bojxona organlari markaziy apparati tarkibiy tuzilmalari toʻgʻrisida xabar beradilar:

axborot almashinuvining texnik shartlarini va maʼlumotlarni qayta ishlashni va uzatish texnologiyalarini, axborotni himoyalash talablarini ishlab chiqish va kelishish;

chegara orqali tovarlar va transport vositalarining oʻtishi haqida oldindan beriladigan axborot va olib kirish toʻgʻrisidagi maʼlumotlarni almashishdagi maʼlumotlar tarkibini belgilash, shuningdek zaruriy tasniflarni ishlab chiqish va kelishish;

aniq miqdordagi tovarlar va (yoki) aniq transport vositalariga bogʻliqlik oldindan beriladigan axborot va olib kirish toʻgʻrisidagi maʼlumotlarni aniqlash maqsadida, tovarlar va transport vositalarini identifikatsiyalash usullarini kelishish;

mazkur Protokol qoidalarini amalga oshirish bilan bogʻliq masalalarni hal etish.

Mazkur Protokolni amalga oshirish, chegara orqali tovarlar va transport vositalarining oʻtishi haqida oldindan beriladigan axborot va olib kirish toʻgʻrisidagi maʼlumotlar almashish texnologiyasini ishlab chiqish uchun Tomonlar oldindan axborot almashish boʻyicha eksperiment tashkil etadilar va amalga oshiradilar.

Tomonlar, maʼlumot taqdim etilishi uchun moʻljallangan asosiy texnologik prinsiplarni, ularning roʻyxati va tarkibini, oldindan beriladigan axborot va olib kirish toʻgʻrisidagi maʼlumotlar berish tartibini, maʼlumotlar tarkibi va shaklini, oldindan beriladigan axborot va olib kirish toʻgʻrisidagi maʼlumotlarni himoyalash boʻyicha talablarni, aniq tovarlar va transport vositalari bilan oldindan beriladigan axborot va olib kirish toʻgʻrisidagi maʼlumotlarni identifikatsiyalash tartibini, Tomonlar davlatlarining eksperimentda ishtirok etuvchi bojxona organlari roʻyxatini, shu bilan birga eksperimentning boshlanish vaqti va zarur tadbirlarni amalga oshirish muddatlarini kelishib oladilar.

Mazkur moddada koʻrsatilgan masalalar boʻyicha kelishuvlardan soʻng, Tomonlar zarur tashkiliy va texnik tadbirlarni amalga oshiradilar va eksperimentni boshlashga tayyor ekanliklari haqida bir-birlarini yozma xabardor qiladilar.

Chegara orqali tovarlar va transport vositalari oʻtishi haqida oldindan beriladigan axborot va olib kirish toʻgʻrisidagi maʼlumotlarni almashish boʻyicha eksperiment olti oy mobaynida amalga oshiriladi. Tomonlarning oʻzaro yozma kelishuviga koʻra eksperiment oʻtkazish muddati uzaytirilishi mumkin.

Oʻtkazilgan eksperiment natijalari asosida, Tomonlar chegara orqali tovarlar va transport vositalari oʻtishi haqida oldindan beriladigan axborot va olib kirish toʻgʻrisidagi maʼlumotlar almashishni doimiy ravishda tashkil etish toʻgʻrisida qaror qabul qiladilar.

Mazkur Protokolni amalga oshirish maqsadida, Tomonlar maslahatlashuvlar oʻtkazadilar va chegara orqali tovarlar va transport vositalari oʻtishi haqida oldindan beriladigan axborot va olib kirish toʻgʻrisidagi maʼlumotlarni almashish uchun zarur boʻlgan axborot-maʼlumot materiallaridan va loyiha hujjatlaridan maʼlumotlarni bir-birlariga begʻaraz taqdim etadilar.

Tomonlarning oʻzaro kelishuviga koʻra, mazkur Protokolga, uning ajralmas qismi hisoblangan alohida protokollar bilan rasmiylashtiriladigan oʻzgartirish va qoʻshimchalar kiritilishi mumkin.

Mazkur Protokolni talqin qilish va qoʻllashda yuzaga keladigan nizolar va kelishmovchiliklar Tomonlar oʻrtasida maslahatlashuv va muzokaralar oʻtkazish yoʻli bilan hal etiladi.

Mazkur Protokol imzolangan sanadan kuchga kiradi va 5 yil davomida amal qiladi. Ushbu muddat tugagach, u oʻz-oʻzidan keyingi besh yillik muddatlarga uzayaveradi. Tomonlarning har biri navbatdagi muddat tugashidan kamida 6 oy oldin mazkur Protokol amalini tugatish niyati borligi toʻgʻrisida boshqa Tomonga yozma xabarnoma yuborish bilan uning amalini tugatish huquqiga ega.

Toshkent shahrida 2007-yil 28-noyabrda ikki asl nusxada, har biri oʻzbek va rus tillarida tuzildi, bunda matnlar bir xil kuchga ega.