Oʻzbekiston Respublikasi Qishloq va suv xoʻjaligi vazirligi bilan Turkmaniston Qishloq xoʻjaligi vazirligi, bundan keyin “Tomonlar” deb ataluvchilar,

chigirtkalar, boshqa zararkunandalar va oʻsimliklar kasalliklarining qishloq xoʻjaligi ekinlari va yaylovlari uchun oʻta xavfli ekanligini hamda Tomonlar davlatlarining chegaradosh hududlariga ularning koʻchishini eʼtiborga olgan holda,

Oʻzbekistonda va Turkmanistonda hosilning yoʻq boʻlishiga yoʻl qoʻymaslik maqsadida,

Tomonlar davlatlarining subyektlari oʻrtasidagi savdo aloqalarining rivojlanishida va munosabatlarni amalga oshirishda Tomonlar davlatlarining hududiga chigirtkalar, boshqa qishloq xoʻjaligi zararkunandalari va oʻsimliklar kasalliklarining kirib kelishini oldini olishdagi oʻzaro manfaatlardan kelib chiqib,

chigirtkalar va boshqa qishloq xoʻjaligi zararkunandalari hamda oʻsimliklarning kasalliklariga qarshi kurash sohasida hamkorlikni davom ettirish va kengaytirish istagiga amal qilib, oʻsimliklarni himoya qilish sohasida hamkorlikni rivojlantirishga intilib,

Tomonlar hosilning yoʻq boʻlishiga yoʻl qoʻymaslik maqsadida chigirtkalar va boshqa qishloq xoʻjaligi zararkunandalari hamda oʻsimliklarning kasalliklariga qarshi kurash boʻyicha chora-tadbirlarni tashkillashtirishda qoʻshma ishchi guruhini tuzadilar.

Qoʻshma ishchi guruhlariga kiritilgan aʼzolar tarkibini Tomonlar diplomatik kanallar orqali kelishib oladilar.

Tomonlar ilmiy tadqiqotlar, oʻsimliklarni himoya qilish vositalarining davlat roʻyxatidan oʻtkazilish hamda Tomonlar davlatlarining chegaradosh hududlaridagi fitosanitariya holati toʻgʻrisida doimiy ravishda axborot almashib boradilar, Tomonlar davlatlarining qonun hujjatlari bilan muhofaza etiladigan davlat siri yoki boshqa axborot bundan mustasno.

Tomonlar va ularning mutaxassislari oʻz davlatlarining qonun hujjatlariga muvofiq, oʻz davlatlarining chegaradosh hududlarida oʻsimliklarni himoya qilish boʻyicha quyidagi ishlarni amalga oshiradilar:

chigirtkalar va boshqa zararkunandalar, shuningdek oʻsimliklarning kasalliklari tarqalgan joylarini kuzatish;

ishlarni oʻtkazish muddatlari, uslublari va texnologiyasini, shuningdek foydalaniladigan pestitsidlarning turlarini aniqlash va kelishish;

chigirtkalar, shu jumladan ularning mahalliy turlari va boshqa qishloq xoʻjaligi zararkunandalari, hamda oʻsimliklarning kasalliklari tarqalishi boʻyicha bashorat maʼlumotlari, shuningdek bu yoʻnalishdagi rejalashtirilayotgan va oʻtkazilgan tadbirlar toʻgʻrisida oʻzaro axborot almashish.

Ommaviy koʻpayish oʻchoqlarida zararkunandalarning faollashgan holatlarda Tomonlar zudlik bilan bir-birlarini xabardor qiladilar va ikkala davlatga iqtisodiy zarar yetkazilishiga yoʻl qoʻymaslik maqsadida oʻz davlatlarining hududlarida harakatlarni birgalikda muvofiqlashtirishga kirishadilar.

Tomonlar oʻz vaqtida pestitsidlarni sotib olish hamda oʻz davlatlarining hududlarida zararkunandalarning ommaviy koʻpayish oʻchoqlarini yoʻq qilish boʻyicha ishlarning bajarilishi uchun choralarni koʻradilar, zararkunandalar va qishloq xoʻjaligi ekinlari kasalliklarining yoʻq qilinishi yuzasidan tajriba almashadilar.

Zarur hollarda Tomonlar oʻz davlatlarining chegaradosh hududlarida chigirtkalar va boshqa qishloq xoʻjaligi zararkunandalari hamda oʻsimliklarning kasalliklari oʻchoqlarini yoʻq qilish uchun oʻsimliklarni himoya qilish boʻyicha guruhlarni tashkil etish yuzasidan choralarini koʻradilar.

Har bir Tomon oʻz davlatlarini chegaradosh hududlarida chigirtkalar va boshqa qishloq xoʻjaligi zararkunandalari va kasalliklariga qarshi kurash boʻyicha tadbirlarga ketgan xarajatlarni mustaqil moliyalashtiradilar.

Ushbu Bitim qoidalarini talqin qilish va qoʻllash bilan bogʻliq barcha nizoli masalalar Tomonlar oʻrtasida muzokara va maslahatlashuvlar yoʻli bilan hal etiladi.

Ushbu Bitimga Tomonlarning oʻzaro roziligiga koʻra ushbu Bitimning ajralmas qismlari hisoblangan alohida bayonnomalar bilan rasmiylashtiriladigan va ushbu Bitim uchun belgilangan tartibda kuchga kiruvchi oʻzgartish va qoʻshimchalar kiritilishi mumkin.

Ushbu Bitim imzolangan kundan boshlab kuchga kiradi.

Ushbu Bitim besh yil muddatga tuziladi va Tomonlardan biri navbatdagi davrning tugashidan olti oy avval boshqa Tomonga uning amal qilishini toʻxtatish niyati toʻgʻrisida yozma xabarnomani yubormasa, keyingi besh yillik davrlarga oʻz-oʻzidan uzayadi.

Tomonlar oʻzgacha kelishmagan boʻlsalar, ushbu Bitim amal qilishining toʻxtatilishi ushbu Bitim amal qilish davrida boshlangan qoʻshma dastur va loyihalarga daxl qilmaydi.

Ashxobod shahrida 2007-yil 18-oktabrda (Garashsizlik) ikki asl nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilish maqsadlarida rus tilidagi matndan foydalaniladi.