Qimmatli komponentlarni ajratib olgan holda tabiiy gazni chuqur qayta ishlash hisobiga polimer mahsulotlar ishlab chiqarishni tashkil etish, neftkimyo tarmogʻining xom ashyo va ishlab chiqarish bazasini yanada kengaytirish hamda Ustyurt gazkimyo kompleksi qurilishi loyihasini amalga oshira boshlash maqsadida:

1. Quyidagilar maʼlumot uchun qabul qilinsin:

Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasi tomonidan Surgil konining zaxiralari tasdiqlandi;

dastlabki qiymati 1,84 mlrd. dollarga teng, yiliga 4,0 mlrd. kub. m tabiiy gazni qayta ishlash va 362 ming tonna polietilen, 83 ming tonna polipropilen hamda 3,7 mlrd. kub. m tovar holatidagi tabiiy gaz ishlab chiqarish quvvatiga ega boʻlgan “Qimmatli komponentlarni ajratib olgan holda Surgil konini kompleks obodonlashtirish” loyihasining dastlabki texnik-iqtisodiy asosi tasdiqlandi;

Koreya gaz korporatsiyasi, “Lotte Daesan Petrochemical Corporation”, “LG International Corporation”, “SK Gas va STX Energy” kompaniyalaridan iborat Koreya kompaniyalari Konsorsiumi tuzildi;

loyihani amalga oshirish uchun Oʻzbekiston Respublikasi hududida “Oʻzbekneftgaz” MXK bilan Koreya kompaniyalari Konsorsiumi oʻrtasida xorijiy investitsiyalar ishtirokidagi korxona — bosqichma-bosqich uch yil davomida shakllantiriladigan ustav jamgʻarmasi ekvivalenti 600 mln. dollardan kam boʻlmagan, taʼsischilar oʻrtasida ulushlar teng miqdorda, 50 foizdan taqsimlanadigan Oʻzbekiston Respublikasi rezidenti tashkil qilinadi.

2. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi “Oʻzbekneftgaz” MXK bilan birgalikda ikki oy muddatda belgilangan tartibda Koreya kompaniyalari Konsorsiumi bilan jumladan, tomonlarning oʻzaro majburiyatlari va ularni bajarish kafolatlarini, qoʻshma korxona hisob raqamlaridagi mablagʻlar harakatini, shuningdek, investitsiya davrida qoʻshma korxona mablagʻlarining maqsadli va samarali sarf etilishini nazorat qilish tartibini nazarda tutadigan Investitsiya shartnomasini tuzsin.

3. “Oʻzbekneftgaz” MXK 2008-yilning 1-oktabrigacha boʻlgan muddatda loyiha moliyalashtirilishini tashkil etish va xorijiy qarz mablagʻlarini jalb etishda Oʻzbekiston Respublikasining amaldagi qonun hujjatlariga va xalqaro talablarga muvofiq holda loyihaning texnik-iqtisodiy asosini ishlab chiqsin hamda belgilangan tartibda tasdiqlash uchun Oʻzbekiston Respublikasi Vazirlar Mahkamasiga kiritsin.

4. Qoraqalpogʻiston Respublikasi Vazirlar Kengashi xorijiy korxona roʻyxatdan oʻtgach bir oy muddatda, qoʻshma korxona taqdim etgan zarur materiallarga muvofiq, obyektlar, jumladan gaz quduqlari qurish, quvurlar va tegishli muhandislik kommunikatsiyalarini yotqizish uchun yerlarni ajratsin.

5. Qoʻshma korxonaga loyihaning TIAsi uzil-kesil tasdiqlanguncha ish chizmalariga muvofiq barobar ravishda loyihalashtirgan va ularni amalda bajarilgan ish hajmlari boʻyicha moliyalashtirgan holda Surgil konida jumladan, “nulinchi sikl” boʻyicha yer ishlarini bajarishga, quduqlarni obodonlashtirish, tashqi infratuzilma obyektlari va muhandislik kommunikatsiyalarini qurishga ruxsat berilsin.

8. Oʻzbekiston Respublikasi Vazirlar Mahkamasi belgilangan tartibda qoʻshma korxonaga gaz va gaz kondensatini qazib olish, qayta ishlash va sotish, shuningdek gaz quvuri va gaz kondensati quvuri yotqizishni loyihalashtirish, qurish va foydalanish uchun litsenziya (ruxsatnoma) bersin.

9. Oʻzbekiston Respublikasi Davlat geologiya va mineral resurslar qoʻmitasi Surgil konidagi foydali qazilmalarni chiqarib olish uchun investitsiya shartnomalarining amal qilish muddatiga belgilangan tartibda qoʻshma korxonaga yer qaʼri uchastkalaridan foydalanish huquqini beruvchi litsenziya bersin.

Belgilansinki, Shimoliy Berdaq va Sharqiy Berdaq konlarida uglevodorod xomashyosini sanoat koʻlamida qazib olish maqsadida yer qaʼri uchastkalaridan foydalanish huquqini beruvchi litsenziyalar “Oʻzbekneftgaz” MXKga loyiha boʻyicha investitsiya shartnomalarining amal qilish muddatiga beriladi.

10. Aloqa, axborotlashtirish va telekommunikatsiya texnologiyalari davlat qoʻmitasi qoʻshma korxona, uning pudratchilari va subpudratchilarining murojaatnomalari boʻyicha loyihani amalga oshirish doirasida radioelektron aloqa vositalari va yuqori chastotali moslamalardan foydalanishga belgilangan tartibda ruxsatnomalar bersin.

12. Oʻzbekiston Respublikasi Tashqi ishlar vazirligi qoʻshma korxonaning “Oʻzbekneftgaz” MXK tomonidan tasdiqlangan talabnomalariga koʻra, loyihani amalga oshirishda ishtirok etayotgan xorijiy mutaxassislarning kirish vizalari konsullik yigʻimi va boshqa yigʻimlar undirib olinmasdan belgilangan tartibda rasmiylashtirilishini taʼminlasin.

13. Oʻzbekiston Respublikasi Ichki ishlar vazirligi qoʻshma korxonaning “Oʻzbekneftgaz” MXK tomonidan tasdiqlangan talabnomalariga koʻra, loyihani amalga oshirishda ishtirok etayotgan xorijiy kompaniyalar xodimlariga koʻp martalik vizalar berish, shuningdek muvaqqat yashash joyida vaqtincha roʻyxatda turish va uning muddatini uzaytirishni taʼminlasin, ular davlat boji toʻlashdan ozod qilinsin.

14. Oʻzbekiston Respublikasi Bandlik va mehnat munosabatlari vazirligi qoʻshma korxonaga soha mutaxassisliklari boʻyicha xorijiy ishchi kuchini Oʻzbekiston Respublikasiga jalb etishga belgilangan tartibda ruxsatnoma berilishi, shuningdek uning buyurtmanomalariga koʻra — xorijiy fuqarolarga Oʻzbekiston Respublikasi hududida mehnat faoliyatini yuritish huquqini beruvchi tasdiqnomalar taqdim etilishi (muddati uzaytirilishi)ni taʼminlasin.

15. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.