Oʻzbekiston Respublikasi Hukumati bilan Hindiston Respublikasi Hukumati bundan keyin “Tomonlar” deb ataluvchilar,

taʼlim sohasida ikki tomonlama aloqalarni mustahkamlash yoʻlida,

taʼlimning inson resurslariga, iqtisodiyotga va ijtimoiy rivojlanishga boʻlgan chuqur taʼsirini esda tutgan holda,

taʼlim sohasida ikki tomon oʻrtasidagi aloqalarning mustahkamlanishi oʻzaro foydali boʻlishini tan olgan holda,

Oʻzbekiston Respublikasi Hukumati bilan Hindiston Respublikasi Hukumati oʻrtasidagi 1991-yil 17-avgustda imzolangan Madaniyat hamda taʼlim sohasidagi hamkorligi boʻyicha bitimni yodda tutgan holda;

Tomonlar, zarur boʻlganda, tegishlicha oʻquv va taʼlim ehtiyojlaridan kelib chiqqan holda taʼlim vazirliklari hamda taʼlim muassasalari oʻrtasida aloqalar va hamkorlikning muayyan rivojlanishini qoʻllab-quvvatlaydi. Bu quyidagilarni yoki ulardan bir qismini oʻz ichiga olishi mumkin:

a) tadqiqotlar natijalari, nashrlar, darsliklar, dars berish vositalari, namoyish materiallari va maʼlumotlar bilan almashish;

b) qoʻshma konferensiya, koʻrgazma va seminarlarni tashkil etish;

c) qoʻshma tadqiqotlar, tadqiqot dasturlarni tuzish va maqolalarni nashrga tayyorlash;

d) oʻqituvchilar va oʻquv jarayoni tashkilotchilarini tayyorlash dasturlarini tashkil etish;

e) akademik va boshqa maʼmuriy tarkiblar bilan almashish;

f) aspirantlar, oʻqituvchilar, ekspert hamda talabalar bilan almashish;

q) oliy oʻquv yurtlarida oʻzaro oʻquv kurslarini tashkil etish;

h) oʻquv-tayyorlash muassasalarini tashkil etish, hamda oʻrta maxsus va hunar oʻquv muassasalari oʻrtasida ikki tomonlama dasturlarni yanada rivojlantirish;

i) taʼlim darajalarining oʻzaro tan olinishining imkoniyatlarini oʻrganib chiqish;

j) zamonaviy tadqiqotlar boʻyicha kafedralarni tashkil etish;

k) tan olingan oliy taʼlim muassasalarida ishni davom ettirish uchun stipendiyalar ajratish;

l) axborot texnologiyalari, kompyuter fanlari, matematika va tabiiy fanlar sohasida oʻzaro yordam berish;

m) mutaxassislarning tajriba almashinuvi: pedagogik va rahbar kadrlari attestatsiyasi, taʼlim muassasalarining attestatsiyasi va davlat akkreditatsiyasi, kadrlarni tayyorlash sifatini nazorat qilish va monitoringi, nodavlat taʼlim muassasalarini litsenziyalashtirish hamda testologiyaga oid masalalar;

Ikkala tomon bilan kelishilgan holda har qanday boshqa faoliyatni amalga oshirish.

Ushbu Taʼlim sohasidagi hamkorlik toʻgʻrisida almashuv Dasturining amal qilish muddati doirasidagi faoliyati yoki hamkorligining mazmuni, koʻlami va qoʻllanilishi mana shu taʼlim sohasidagi hamkorlik toʻgʻrisida almashuv Dasturining asosi va shartlari koʻlami boʻyicha ikkala davlatdagi taʼlim muassasalari oʻrtasida imzolangan yanada aniqroq bitimlarga asos boʻlishi mumkin.

Tomonlarning toʻla erkinligini hech nima cheklamaydi va tomonlarning hech qaysi biri taʼlim sohasidagi hamkorlik toʻgʻrisida almashuv Dasturini amalga oshirish jarayonida boshqa bir tomonni moliyaviy majburiyatlarni amalga oshirishga undash yoki bularni ularning zimmasiga yuklashi mumkin emas.

Ushbu Dasturga binoan oʻzaro tadbirlarga sarflanadigan mablagʻlar oʻzaro ahdlashuvlar boʻyicha va mavjud mablagʻlar asosida qoplanilishi zarur.

Tomonlar taʼlim sohasidagi hamkorlik toʻgʻrisida almashuv Dasturining amalga oshirilishi uchun oʻzaro qoʻshma ishchi guruh tashkil etadilar. Qoʻshma ishchi guruhni Oʻzbekiston Respublikasi Hukumati nomidan Oliy va oʻrta maxsus taʼlim vazirligining vakili, Hindiston Respublikasi Hukumati nomidan Inson resurslarini rivojlantirish vazirligining Oliy va oʻrta taʼlim Departamentining vakili, zaruriyat boʻlgan holda ikkala tomonning boshqa tegishli idoralarining vakillari boshqaradi. Hindiston hamda Oʻzbekistondagi qoʻshma ishchi guruh kamida yiliga bir marta, Hindiston yoki Oʻzbekistonda tomonlar kelishilgan holda ushbu Dasturning amalga oshirilish surʼatini koʻrib chiqish uchun yigʻilish oʻtkazadilar.

Tomonlarning yozma ravishda Dasturni qayta koʻrib chiqish yoki oʻzgartirish kiritish iltimosi bilan murojaat qilishi mumkin. Tomonlar oʻzaro kelishilgan har qanday qayta koʻrib chiqish yoki oʻzgartirish yozma ravishda qabul qilinadi va ushbu Dasturning uzviy qismini tashkil qiladi. Bunday qayta koʻrib chiqish yoki oʻzgartirish ikkala tomon belgilagan muddatdan boshlab kuchga kiradi.

Ushbu Dasturni qoʻllash va talqin qilish bilan bogʻliq nizo va kelishmovchiliklar yuzaga kelsa, Tomonlar ularni diplomatik kanallar orqali maslahatlashuvlar va muzokaralar yoʻli bilan hal etadilar.

Taʼlim sohasida hamkorlik toʻgʻrisida almashuv Dasturi ikkala tomon uni imzolagan kundan boshlab kuchga kiradi va 5 yil muddat davomida amal qiladi. Har bir tomon xavfsizlik, ijtimoiy tartib yoki sogʻliqni saqlash zaruriyatlaridan kelib chiqib vaqtincha ushbu taʼlim sohasidagi hamkorlik toʻgʻrisida almashuv Dasturini qisman yoki butunlay amalga oshirishni toʻxtatib turish huquqiga ega. Tomonlarning biri mazkur Dasturning amal qilish muddatini toʻxtatish haqidagi istagidan kamida olti oy oldin yozma ravishda ikkinchi tomonni xabardor qilmasa, Dasturning amal qilish muddati oʻz-oʻzidan keyingi 5 yil muddatga uzaytiriladi.

Dehli shahrida 2005-yil 5-aprelda ikki asl nusxada, har biri oʻzbek, ingliz va hind tillarida tuzilgan boʻlib, bunda matnlar bir xil kuchga egadir. Talqin qilish jarayonida kelishmovchiliklar yuzaga kelsa, ingliz tilidagi matn hal qiluvchi hisoblanadi.